ایبٹ آباد: موسمیاتی تبدیلیوں سے آگاہی، اس کے تدارک، قدرتی ماحول کے تحفظ کی مشترکہ جدوجہد کے لیے ڈبلیو ڈبلیو ایف پاکستان کے ساتھ ایبٹ آباد یونین آف جرنلسٹس نے معاہدے کی یادداشت پر دستخط کیے ہیں۔
ہفتے کے روز گلگت بلتستان کے صحافیوں کے وفد نے ڈبلیو ڈبلیو ایف کے تعاون سے ایبٹ آباد پریس کلب کا دورہ کیا، مقررین کا کہنا تھا پاکستان کو موسمیاتی تبدیلیوں کے خطرات کا سامنا ہے، اس میں قدرتی ماحول سے مالا مال گلگت بلتستان اور خیبر پختونخوا سرفہرست ہیں۔
انھوں نے کہا 2010 کے بعد گلگت میں موسمیاتی تغیر و تبدل کے اثرات گہرے ہوتے جا رہے ہیں، جس کی وجہ سے سالانہ ترقیاتی بجٹ سے زیادہ نقصان کا تخمینہ ہے، گلگت بلتستان کے مالی بحران کی وجہ سے ترقیاتی منصوبے تاخیر کا شکار ہیں، اور سینکڑوں لوگ نقل مکانی پر مجبور ہو چکے ہیں۔
ڈبلیو ڈبلیو ایف کے نثار احمد کا کہنا تھا دنیا میں پاکستان موسمیاتی تبدیلیوں میں پہلے 8 ویں نمبر پر تھا، جو اب پانچویں نمبر پر آچکا ہے، موسمیاتی تبدیلیوں سے گلیشیئر متاثر ہو رہے ہیں، حکومت کی اب ترجیح ہے کہ اس تبدیلی پر کیسے قابو پایا جائے، بارشوں سے جہاں سیلابی کیفیت پیدا ہو رہی ہے اس کے پانی کو جمع کرنے کے لیے اقدامات اٹھانے ہوں گے۔
ملک میں سڑکوں کے جال اور زرعی زمینوں پر تعمیرات بھی موسمیاتی تبدیلیوں کی اہم وجوہ ہیں، جو پانی کے ذخائر کو کم کر رہے ہیں، اس میں اس بات پر زور دیا جا رہا ہے کہ گھروں کی چھتوں پر بارش کے پانی کو زمین کو ری چارج کرنے کے اقدامات اٹھائے جائیں، اس میں واٹر اکاؤنٹیبلیٹی کے منصوبے کے تحت 17 اضلاع میں سو سے زائد دیہات میں کام کیا جا رہا ہے، جن میں گلگت کے 10 اضلاع اور خیبر پختونخوا کے 6 اور پنجاب کا ایک ضلع شامل ہے۔
انھوں نے کہا کہ میڈیا کا کردار اہم ہے، ان کی شراکت سے موسمیاتی تبدیلیوں کے مسائل کو اجاگر کرنے اور اس کے تدارک کے لیے کام کرنے سے مثبت نتائج مرتب ہوں گے۔ مقررین کا کہنا تھا کہ گلگت بلتستان کے مسائل کو اجاگر کرنے اور صحافتی سرگرمیوں کو فروغ دینے میں ایبٹ آباد کے اخبارات کا اہم کردار رہا ہے۔
تقریب میں ڈبلیو ڈبلیو ایف پاکستان کے صوبائی منیجر سعیدالسلام ، کمیونیکشن منیجر نثار احمد، صدر ایبٹ آباد یونین آف جرنلسٹ ثاقب خان، گلگت پریس کلب کے سابق صدر امتیاز علی تاج، جی بی یونین کے فہیم اختر، صدر ایبٹ آباد پریس کلب محمد شاہد چوہدری، جنرل سیکریٹری سردار شفیق احمد، ایبٹ آباد یونین آف جرنلسٹس کے جنرل سیکریٹری عاطف قیوم نے بھی خطاب کیا۔
