کراچی: چاکیواڑہ تھانے کی جانب سے عدالت میں رپورٹ پیش کی گئی ہے کہ عذیر بلوچ کے خلاف گواہ پیش ہونے سے کترانے لگے ہیں۔
تفصیلات کے مطابق ایڈیشنل ڈسٹرکٹ اینڈ سیشن جج جنوبی کی عدالت میں لیاری گینگ وار کے سرغنہ عذیر بلوچ کے خلاف تین مقدمات کی سماعت ہوئی۔
تھانہ چاکیواڑہ کی جانب سے عدالت میں رپورٹ پیش گئی، جس میں کہا گیا ہے کہ تینوں کیسز کا ایک بھی گواہ عدالت میں پیش نہ ہو سکا۔
رپورٹ کے مطابق 2 گواہ پولیس کانسٹیبل جمشید اور طلعت مردم شماری کی ڈیوٹی پر ہیں، گواہ سرفراز کا کہنا ہے کہ اس کی جائیداد کا تنازع چل رہا ہے جس کے لیے وہ گاؤں میں ہے۔
رپورٹ میں کہا گیا ہے کہ ایک گواہ خضر حیات کی رہائش گاہ تبدیل ہو چکی ہے، جب کہ ایک گواہ سائیں محمد ریٹائر ہو کر گاؤں واپس جا چکا ہے، گواہ نواز کا پنجاب پولیس میں ٹرانسفر ہو گیا ہے اس لیے وہ بھی پیش نہیں ہو سکتا۔
تھانے کی رپورٹ کے بعد عدالت نے تمام گواہوں کے قابل ضمانت وارنٹ گرفتاری جاری کر دیے، اور عدالت نے آئندہ سماعت پر تمام گواہوں کو پیش کرنے کی ہدایت کر دی ہے۔
واضح رہے کہ عذیر بلوچ کے خلاف چاکیواڑہ تھانے میں 3 مقدمات درج ہیں، ان پر قتل اور پولیس مقابلے سمیت متعدد الزامات ہیں۔
