لندن: برطانوی حکومت نے پرتگال کا نام امبر (زرد) لسٹ میں شامل کردیا، جس کے بعد وہاں سے آنے والے مسافروں کو اب گھروں میں قرنطینہ کرنا ہوگا۔
نمائندہ اے آر وائی نیوز کے مطابق برطانیہ نے کرونا صورت حال کے پیش نظر مختلف ممالک کو ٹریفک سگنل فہرست میں شامل کیا ہے۔
اس فہرست کو سرخ، امبر اور سبز رنگ میں تقسیم کیا گیا ہے، جس کے مطابق سرخ یا ریڈ لسٹ میں شامل ممالک سے آنے والے مسافروں کو دس روز ہوٹل میں قرنطینہ کرنا ہوگا۔
اسی طرح امبر یا زرد فہرست میں شامل ممالک سے آنے والے مسافروں کو دس روز گھروں میں قرنطینہ کرنا ہوگا جبکہ سبز یعنی گرین رنگ میں شامل ممالک سے آنے والوں کو قرنطینہ سے مستشنیٰ ہوگا۔
برطانوی حکام نے کرونا کی صورت حال کا جائزہ لینے کے بعد پرتگال کو گرین سے امبر میں شامل کیا۔
اس سے قبل پرتگال سے برطانیہ آنے والے ملکی و غیر ملکی مسافروں کو قرنطینہ کی اجازت نہیں تھی مگر اب انہیں دس روز گھروں پر قرنطینہ کرنا ہوگا۔
یاد رہے کہ برطانیہ میں اب تک 18 کروڑ 48 لاکھ 27 ہزار 214 شہریوں کے کرونا ٹیسٹ کیے جاچکے ہیں، جن میں سے 44 لاکھ 94 ہزار 699 کی رپورٹ مثبت آئی۔
برطانیہ میں کرونا سے مرنے والوں کی تعداد 1 لاکھ 27 ہزار 794 تک پہنچ گئی جبکہ اس وقت ایکٹیو کیسز کی تعداد 72 ہزار 928 ہے، اسی طرح سے صحت یاب ہونے والوں کی تعداد 42 لاکھ 93 ہزار 977 تک پہنچ گئی ہے۔
