Author: فاروق سمیع

کراچی: لیاری گینگ وار کے سرغنہ عزیر بلوچ اور رئیس ماما سمیت ہائی پروفائل مقدمات میں پولیس افسران گواہان کو پیش کرنے میں ناکام ہو گئے۔

گواہان پیش نہ کرنے پر انسداد دہشتگردی عدالت (اےٹی سی) نے 10پولیس افسران کی گرفتاری کے احکامات جاری کردیئے جب کہ متعلقہ عدالتوں نے مذکورہ پولیس افسران کی تنخواہیں بھی روکنے کا حکم دیدیا۔

گواہان کو پیش نہ کئے جانے پر پولیس افسران کے وارنٹ گرفتاری جاری کئےگئے ہیں۔ پولیس افسران مقدمات میں گواہی کے لئے بھی پیش نہیں ہو رہے۔

گواہان میں 6 انسپکٹرز ، 4 سب انسپکٹرز بھی شامل ہیں۔ گواہوں کی مسلسل عدم حاضری سے 8 سے زائد مقدمات التوا کا شکار ہیں۔

گینگسٹر عزیر بلوچ، رئیس ماما، منہاج قاضی سمیت دیگر ہائی پروفائل ملزمان کے مقدمات شامل ہیں۔ یہ مقدمات کلاکوٹ ، بغدادی ، چاکیواڑہ، کلری ، زمان ٹاؤن سمیت دیگر تھانوں میں درج ہیں۔

کراچی کی انسداد دہشت گردی عدالت نے 9 مئی ہنگامہ آرائی اور پولیس حملہ کیس میں پی ٹی آئی رہنما حلیم عادل شیخ سمیت 4 کارکنان کی رہائی کے احکامات جاری کر دیے۔

نمائندہ اے آر وائی نیوز کے مطابق ٹیپو سلطان تھانے میں درج مقدمے میں حلیم عادل سمیت 4 ملزمان کے ریلیز آرڈر جاری کیے گئے ہیں۔ دیگر ملزمان میں شبیرحسین ، بشارت حسین اور عبدالصمد شامل ہیں۔

عدالتی حکم میں کہا گیا ہے کہ ملزمان کسی دوسرے مقدمے میں گرفتار نہیں تو انہیں رہا کیا جائے۔ عدالت نے چاروں ملزمان کی فی کس ایک لاکھ روپے میں ضمانت منظور کی تھی۔

پولیس کا کہنا ہے کہ حلیم عادل شیخ فیروزآباد تھانے میں درج مقدمہ میں بھی گرفتار ہیں، ملزمان پر 9مئی کو شارع فیصل پر جلاؤگھیراؤ اور ہنگامہ آرائی کا الزام ہے ملزمان نے پولیس پر حملہ کیا اور گاڑیوں کو بھی آگ لگائی تھی۔

سپریم کورٹ میں کے ای ایس سی نجکاری کے خلاف جماعت اسلامی نے اپنی دائر درخواست واپس لے لی عدالت نے درخواست واپس لینے پر نمٹا دی۔

اے آر وائی نیوز کے مطابق سپریم کورٹ کراچی رجسٹری میں کے ای ایس سی نجکاری اور اوور بلنگ کے خلاف جماعت اسلامی کی درخواست پر سماعت ہوئی چیف جسٹس کی سربراہی میں تین رکنی بینچ نے سماعت کی۔

چیف جسٹس عمر عطا بندیال نے جماعت اسلامی کے وکیل رشید اے رضوی سے استفسار کیا کہ کیا آپ درخواست چلانا چاہتے ہیں جس پر رشید اے رضوی ایڈووکیٹ نے کہا کہ جی ہاں، یہ درخواست آج بھی مؤثر ہے کیونکہ 2 کروڑ سے زیادہ آبادی والا شہر متاثر ہو رہا ہے، آپ کراچی والوں سے پوچھیں ان پر کیا گزر رہی ہے۔ جس پر چیف جسٹس نے کہا کہ یہ ہمارا کنسرن نہیں ہے ہم نے قانون دیکھنا ہے۔

جسٹس اطہر من اللہ نے کہا کہ آرٹیکل 184 (3) کے کیسز میں ماضی میں بہت ساری چیزیں ہوئی جو نہیں ہونی چاہیے تھیں، ریکوڈک اور اسٹیل مل جیسے کیسز ہوئے، جماعت اسلامی بہت معتبر جماعت ہے لیکن آرٹیکل 184(3) کے تحت دی گئی یہ درخواست حکومت کی معاشی پالیسی کے خلاف ہے، آپ کو یہ معاملات پارلیمنٹ میں لے کر جانے چاہیئں۔

جسٹس عائشہ ملک نے استفسار کیا کہ ہم نجکاری کو کیسے منسوخ کر دیں؟ ٹیرف کا تعین کرنا نیپرا کا کام ہے آپ کو یہ معاملات نیپرا کے سامنے اٹھانے چاہیئں۔

جماعت اسلامی کے وکیل نے کہا جب پارلیمنٹ فیل ہو جائے تو پھر عدالت ہی بچتی ہے۔

چیف جسٹس نے کہا کہ پارلیمنٹ ناکام ہوگئی ایسا نہ کہیں۔ پارلیمنٹ ایک معزز ادارہ ہے ہمیں اس کو مضبوط کرنا چاہیے، اس کو مضبوط کیجیے۔ آپ کو نجکاری کے خلاف کارروائی کرنے سے نہیں روک رہے لیکن اس کے لیے آپ کو متعلقہ فورم سے رجوع کرنا چاہیے۔

انہوں نے مزید کہا نیشنل پالیسی کے تحت اداروں کی نجکاری کا فیصلہ ہوا، نجکاری کا مقصد معیشت کو مضبوط کرنا تھا، اکانومنک میٹر کو ہم ہاتھ نہیں لگانا چاہتے۔

اس موقع پر جماعت اسلامی کے وکیل نے کہا کہ پھر ہمیں نیپرا جانے کی اجازت دی جائے جس پر چیف جسٹس نے کہا کہ نیپرا اور دیگر فورمز پر جانا بالکل آپ کا حق ہے۔

رشید اے رضوی ایڈووکیٹ نے کہا کہ ہم نیپرا اور کونسل آف کمپلینٹ سے رجوع کرنا چاہیں گے اور کے ای ایس سی کی نجکاری کے خلاف اپنی درخواست واپس لے لی۔

اس موقع پر چیف جسٹس نے کا رشید اے رضوی ایڈووکیٹ سے مکالمہ ہوا جس میں انہوں نے جماعت اسلامی کے وکیل کا شکریہ ادا کیا اور جماعت اسلامی کی تعریف کرتے ہوئے کہا کہ اس نے ملک میں سیاسی اتفاق رائے پیدا کرنے کی مثبت کوشش کی لیکن یہاں عدالت کے سامنے آپ کا معاملہ تھوڑا مختلف ہے۔ عدالت کے لیے ممکن نہیں کہ کے ای ایس سی نجکاری کی گہرائی میں جائے۔

سپریم کورٹ نے جماعت اسلامی کی جانب سے معاملہ متعلقہ فورم پر اٹھانے کی استدعا منظور کرلی اور جماعت اسلامی کے درخواست واپس لینے پر اس کو نمٹا دیا۔