Author: فرخ اعجاز

بانی پی ٹی آئی سے ملاقات کے لیے آنے والے تحریک انصاف کے رہنماؤں کو پولیس کے اڈیالہ جیل کے باہر سے حراست میں لے لیا جنہیں کچھ دیر بعد رہا کر دیا گیا۔

اے آر وائی نیوز کے مطابق پاکستان تحریک انصاف کے مرکزی رہنما جو بانی پی ٹی آئی عمران خان سے ملاقات کے لیے اڈیالہ جیل پہنچے تھے۔ انہیں جیل کے باہر سے پولیس نے حراست میں لے کر اڈیالہ چوکی منتقل کر دیا۔

حراست میں لیے جانے والے رہنماؤں میں اپوزیشن لیڈر عمر ایوب، سنی اتحاد کونسل کے سربراہ حامد رضا خان، سابق اسپیکر قومی اسمبلی اسد قیصر، ملک احمد خان بھچر، عالیہ حمزہ، شبلی فراز شامل تھے۔

تاہم کچھ دیر حراست میں رکھنے کے بعد تمام رہنماؤں کو رہا کر دیا گیا جس کے بعد وہ بانی پی ٹی آئی سے ملاقات کیے بغیر جیل سے واپس لوٹ گئے۔

پولیس کی جانب سے پی ٹی آئی رہنماؤں کی گرفتاری اور پھر رہائی سے متعلق کوئی تفصیلات نہیں بتائی گئی ہیں۔

منگل اور جمعرات کو اڈیالہ جیل میں بانی پی ٹی آئی سے ملاقاتوں کا دن ہوتا ہے اور اسی لیے آج پی ٹی آئی رہنما ملاقات کے لیے آئے تھے۔ گزشتہ ہفتے بھی سیاسی رہنماؤں کو عمران خان سے ملاقات نہیں کرنے دی گئی تھی جس کے بعد وہ آج پھر ملاقات کے لیے تھے۔

رپورٹر کے مطابق آج صبح جیل کے باہر سیکیورٹی معمول کے مطابق تھی تاہم جیسے ہی پی ٹی آئی رہنما اپنے قائد سے ملنے جیل آئے تو پولیس کی بھاری نفری بھی وہاں پہنچ گئی اور انہیں حراست میں لے کر اڈیالہ چوکی منتقل کر دیا جب کہ جیل کے مرکزی دروازے پر بھی پولیس کی بھاری نفری تعینات کر دی گئی ہے۔

واضح رہے کہ آج اڈیالہ جیل میں توشہ خانہ ٹو کیس میں بریت کی درخوستوں پر فیصلہ ہونا تھا، تاہم جج کی عدم موجودگی کے باعث یہ سماعت ملتوی کر دی گئی۔

توشہ خانہ کیس ٹو میں بانی پی ٹی آئی اور ان کی اہلیہ بشریٰ بی بی پر فرد جرم عائد نہ ہو سکی سماعت 2 نومبر تک ملتوی کر دی گئی۔

اے آر وائی نیوز کے مطابق اڈیالہ جیل میں اسپیشل جج سینٹرل شاہ رخ ارجمند نے توشہ خانہ کیس 2 کی سماعت کی۔ اس موقع پر بانی تحریک انصاف عمران خان کو کمرہ عدالت میں پیش کیا گیا جب کہ ان کی اہلیہ بشریٰ بی بی کی حاضری سے استثنیٰ کی درخواست دائر کی گئی۔

ایف آئی اے پراسیکیوٹر مجید عمیر نے بشریٰ بی بی کی حاضری سے استثنیٰ کی درخواست کی مخالفت کرتے ہوئے کہا کہ ضمانت ملنے کا مطلب یہ نہیں کہ ملزم ٹرائل کیلیے پیش نہ ہو۔

ایف آئی اے پراسیکیوٹر نے یہ بھی بتایا کہ حاضری سے استثنیٰ کی درخواست پر بشریٰ بھی بی کے دستخط بھی موجود نہیں۔ عدالت نے آج کی تاریخ فرد جرم عائد کرنے کے لیے مقرر کی تھی۔ عدالت سے استدعا ہے کہ توشہ خانہ کیس ٹو کا ٹرائل روز چلایا جائے۔

عدالت نے بشریٰ بی بی کی حاضری سے استثنی کی درخواست منظور کرتے ہوئے آئندہ سماعت پر حاضری کا نوٹس بھی جاری کر دیا جب کہ بانی پی ٹی آئی نے توشہ خانہ کیس ٹو میں وکیل مقرر کرنے کے لیے عدالت سے وقت مانگ لیا۔

عمران خان کی جانب سے درخواست میں موقف اختیار کیا گیا کہ گزشتہ تین ہفتے سے وکلا سے ملاقات اور مشاورت کا وقت نہیں دیا گیا۔

انہوں نے مشاورت کے لیے چار وکلا کے نام عدالت کو پیش کیے جن میں بیرسٹر علی ظفر، بیرسٹر گوہر، سلمان اکرم راجا اور بیرسٹر سلمان صفدر شامل ہیں۔

عدالت نے بانی پی ٹی آئی کو وکلا سے مشاورت کے لیے 31 اکتوبر کا وقت دیتے ہوئے کہا کہ وکلا مقرر کرنے کے لیے آخری موقع دیا جا رہا ہے۔ آئندہ سماعت پر وکیل مقرر نہ کیے تو عدالت سرکاری وکیل مقرر کر دے گی۔ اس کے بعد عدالت نے کیس کی سماعت 2 نومبر تک ملتوی کر دی۔