Author: گل حماد فاروقی

پشاور: چترال سے تعلق رکھنے والا کمسن لڑکا ڈاکٹروں کی مبینہ غفلت کی بھینٹ چڑھ گیا‘ اپنڈکس کے مرض میں مبتلا فرحان کئی اسپتال بدلنے کے بعد زندگی کی بازی ہار گیا۔

تفصیلات کے مطابق تیرہ سالہ محمد فرحان کو پیٹ میں تکلیف کی شکایت پر پشاور کے بڑے سرکاری اسپتال منتقل کیا گیا جہاں ڈاکٹروں نے معائنے کے بعد بغیر کوئی ٹیسٹ کیے یہ کہہ کر واپس گھر بھیج دیا کہ اس کے معدے میں معمولی زخم ہے جو کہ دوا سے ٹھیک ہوجائے گا،

رات گئے فرحان کو ایک بار پھر شدید تکلیف اٹھی تو اسے دوبارہ اسپتال لایا گیا تاہم اس کا اپنڈکس ڈائیگناز کرکے بر وقت آپریٹ کرنے کے بجائے ڈاکٹروں نے معمولی طبی امداد کے بعد گھر روانہ کردیا۔

وہ گھر آیا تو حالت بد سے بد تر ہوتی رہی جب حالت نہایت بگڑ گئی تو پانچویں روز اسے پشاور کے ہی ایک اور سرکاری اسپتال لے جایا گیا جہاں ایک ڈاکٹرنے اس کا معائنہ کرکے بتایا کہ مریض کو اپنڈکس کی شکایت ہے۔

بچے کے پیٹ میں ناک کے ذریعے پائپ لگایا گیا تاہم ڈاکٹروں کا کہنا تھا کہ آپریشن تھیٹر میں کسی سیرئیس مریض کا آپریشن ہورہا ہے لہذا محمد فرحان کو شام پانچ بجے آپریشن تھیٹر لے جا یا گیا جہاں اس کا بڑا آپریشن کیا گیا۔

اسی رات فرحان کی حالت انتہائی خراب ہوئی مگر اس وقت انتہائی نگہداشت کے وارڈ میں کوئی بیڈ حالی نہیں تھالہذا اسے فی الفور ایک ٹیچنگ اسپتال منتقل کیا گیا تاہم وہاں وہ جانبرد نہ ہوسکا اورانتقال کرگیا۔

بچے کے والدین نے صوبائی حکومت سے اپیل کی ہے کہ واقعے کا نوٹس لے کرمتعلقہ اسپتالوں میں تعینات افراد کے خلاف فی الفور محکمہ جاتی ایکشن لیا جائے تاکہ آئندہ کوئی معصوم کسی معمولی مرض میں محض غفلت کے سبب موت کے منہ میں نا جائے۔

واضح رہے کہ خیبر پختونخواہ کی حکومت کی جانب سے مختلف اوقات میں محکمہ صحت میں انقلابی تبدیلیوں کے دعوے کیے جاتے رہے ہیں تاہم صوبائی حکومت کی جانب سے اٹھائے گئے اقدامات کے ثمرات عام آدمی کی پہنچ سے فی الحال کوسوں دور ہیں۔

چترال: آغا خان ایجوکیشن آفس چترال کے پارکنگ لاٹ میں آتشزدگی سے گاڑیوں اور دیگر سازو سامان کو نقصان پہنچا ہے۔

تفصیلات کے مطابق آگ لگنے سے دو گاڑیاں اور اسکریپ کا سامان جل کر خاکستر ہوگیا، آگ کی شدید پورے بالاچ کے علاقے میں محسوس کی گئی۔

فائربریگیڈ کی بروقت کارروائی سے آگ پرقابو پایا گیا اور مزید تباہی سے علاقے اور مذکورہ دفتر کو بچالیا گیا، آگ لگنے کی وجوہات کا تاحال پتہ نہیں چل سکا۔

آغا خان ایجوکیشن سروس کے اسٹاف سے پوچھنے پر بتایا گیا کہ آگ ان کی چھٹی کے بعد لگی ہے اس لئے انہیں اس
بارے میں کوئی معلومات نہیں ہیں۔

آگ لگنے کے موقع پرچترال پولیس کے جوان اورآرمی کے جوان بھی پہنچ کر امدادی کاموں میں بڑھ چڑھ کرحصہ لے رہے ہیں اورآگ پرقابو پانے میں اپناکردارادا کیا۔

چترال: پاکستان پیپلز پارٹی کے چئیرمین بلاول بھٹو زرداری کی جانب سے ارسون کے سیلاب متاثرین میں امدادی سامان تقسیم کی گئیِ، اس سلسلے میں ارسون کے مقام پرایک تقریب بھی منعقد ہوئی۔

تقریب میں رکن صوبائی اسمبلی اورسابق صوبائی وزیر سلیم خان اس موقع پرمہمان خصوصی تھے، انہوں نے کہا کہ دو جولائی کو جو تباہ کن سیلاب آیا تھا اس نے اس وادی کی اینٹ سے اینٹ بجادی ہے، نظام زندگی مفلوج ہو کررہ گیا ہے۔

سلیم خان نے اس موقع پر عوام کے مطالبہ پر جنویش میں ایک پرائمری سکول، ارسون کی لنک روڈ کی مرمت کیلئے دس لاکھ روپے، مسجد پیتا سون کی بحالی اور تعمیر نو کیلئے پانچ لاکھ روپے، پیتا سون کی مدرسہ کی بحالی اوردوبارہ تعمیر کیلئے پانچ لاکھ روپے اور بجلی بحال کرنے کے لئے ٹرانسفارمرفراہم کرنے کا اعلان کیا۔

انہوں نے یقین دہانی کی کہ وہ اسمبلی کے فلور پر بھی اس علاقے کے مسائل کو اٹھائیں گے انہوں نے کہا کہ پچھلے سال بھی سیلاب اور زلزلہ نے چترال کو تباہ کیا تھا مگر صوبائی حکومت نے ان کو کچھ بھی نہیں دیا نہایت رقم ریلیز ہوئی جو اونٹ کے منہ میں زیرہ کے برابر ہے۔

تقریب کے اختتام پرانہوں نے پیپلز پارٹی کے چیئرمین بلاول زرداری کی جانب سے متاثرین میں پچاس خیمے، سوکمبل اور150 رضائیاں تقسیم کیں جن پرمتاثرین نے ان کا شکریہ ادا کیا کہ مصیبت کے اس گھڑی نے بلاول بھٹو زرداری نے بھی ان کو یاد کیا۔

تاہم چند متاثرین نے شکایت کی کہ اب تک جو بھی امداد کی گئی ہے وہ ناکافی ہے اور حکومت کو چاہیے کہ اس وادی میں زندگی کو معمول پرلانے کے لئے تباہ شدہ انفراسٹرکچر کو فوری بحال کرے۔

چترال: رمضان اورعید کے بعد بھی سبزیوں کی قیمت غریب افراد کی قوتِ خرید سے باہرہے، یہی وجہ ہے کہ نادار لوگ کچرے کے ڈھیر پرسے سبزی چننے پر مجبور ہوگئے ہیں۔

چترال کے بازار میں ایک نہایت ضعیف العمر خاتون دیکھی گھی جن کا شوہر خاکروب ہے، وہ اتالیق پُل کے قریب پڑے ہوئے گندگی کی ڈھیر سے کچھ بچا کچا سبزی اکھٹا کرکے بوری میں ڈال رہی تھی

ان سے جب پوچھا گیا کہ گندگی کے اس ڈھیر میں پڑی ہوئی سبزی کیوں اکٹھا کررہی ہے تو ان کا سیدھا سادھا جواب تھا کہ ’’وہ کیا کرے بازار میں ٹماٹر کی قیمت چالیس سے ڈیڑھ سوروپے فی کلو ہوئی۔ آلو تیس سے سو روپے فی کلو بک رہا ہے ان کی اتنی حیثٰیت نہیں ہے کہ وہ اتنی مہنگی سبزی خریدے۔

تاہم وہ اپنی عزت نفس بچانے کی غرض سے کہنے لگی کہ وہ یہ سبزی اپنی گائے کے لیے لے جارہی ہے حالانکہ دیکھا یہ گیا تھا کہ وہ اس ڈھیر میں سے محض قدرے صاف اور قابل استعمال سبزی چن رہی تھین اور گلی سڑی سبزی کو نظرانداز کررہی تھی۔

ایک اسلامی ریاست میں حکمرانوں کی ذمہ داری بنتی ہے کہ وہ اپنے رعایا کی مشکلات کو جانے ا ن کی مسائل کو حل کرے ان کی تکلیف کو دور کرے تاکہ لوگ خودکشی کرنے اور گندگی کی ڈھیر سے بچے کچے پھل یا سبزی کھانے پر مجبورنہ ہوں۔

چترال: کالاش قبیلے سے تعلق رکھنے والی نو مسلم لڑکی نے غیر ملکی خبررساں ادارے کی تردید کرتے ہوئے کہا کہ اسلام ایک مکمل ضابطہ حیات ہے اور میں اپنی مرضی سے مسلمان ہوئی ہوں۔

واضح رہے کہ گزشتہ روز کالاش کی بمبوریت نامی وادی میں ایک تصادم ہوا تھا اور فرانسیسی خبر رساں ادارے نے خبر نشر کی تھی کہ کالاش قبیلے سے تعلق رکھنے والی کم عمر دوشیزہ کو جبری اسلام قبول کرایا گیا ہے۔

رینا15 سال کی ہیں اور نویں جماعت کی طالبہ ہیں، انہوں نے آج چترال پریس کانفرنس میں پریس کانفرنس کی جس میں ان کے والد غلام محمد اورچچا ان کے ہمراہ موجود تھے۔

رینا نے صحافیوں سے گفتگو کرتے ہوئے کہا انہیں کسی نے اسلام قبول کرنے پر مجبور نہیں کیا بلکہ وہ اپنی مرضی سے مسلمان ہوئی ہیں۔

 رینا کا کہنا ہے اسے کسی نے اسلام قبول کرنے پر مجبور نہیں کیا بلکہ وہ اپنی اسکول کی ساتھی طالبات سے متاثر ہوکر مسلمان ہوئی ہے۔

رینا نے اس سے قبل جوڈیشل مجسٹریٹ فضل ودود جان کے سامنے  تحریری بیان دیا ہے کہ اسلام ایک مکمل ضابطہ حیات ہے اور وہ اپنی مرضی سے اسلام کو بحیثیت مذہب قبول کررہی ہے۔

واضح رہے کہ چترال سے ملحقہ کالاش وادی بمبوریت میں کچھ عرصہ قبل ایک مدرسہ قائم ہوا تھا اور رواں ماہ تین کالاش لڑکیاں وہاں اسلام قبول کرچکی ہیں۔

رینا کے والد نے میڈیا سے گفتگو کرتے ہوئے اپیل کی کہ رینا کیونکہ اب اسلام قبول کرچکی ہے لہذایہ مسلمانوں کی ذمہ داری ہے کہ اس کا خیال رکھا جائے اور اس کے ساتھ کوئی نا خوشگوارواقعہ پیش نہ آئے۔