Author: حسن حفیظ

وزیراعلیٰ پنجاب حمزہ شہباز کی ن لیگی رہنما دانیال عزیز کی عیادت کیلیے سروسز اسپتال آنے پر ایمرجنسی کو نوگو ایریا بنادیا گیا۔

اے آر وائی نیوز کے مطابق وزیراعلیٰ پنجاب حمزہ شہباز کی ن لیگی رہنما دانیال عزیز کی عیادت کیلیے سروسز اسپتال آنے پر ایمرجنسی کو نوگو ایریا بنادیا گیا اور ایمرجنسی کے باہر مریضوں اور لواحقین کو روک دیا گیا۔

اطلاعات کے مطابق سروسز اسپتال کی ایمرجنسی میں تشویشناک حالت میں مبتلا مریض بھی داخل ہیں تاہم وزیراعلیٰ کے دورے کے دوران ان کی سیکیورٹی نے کسی کو بھی ایمرجنسی میں داخل نہیں ہونے دیا حتیٰ کہ خواتین کو بھی اندر داخل ہونے سے روک دیا اور آنے والے مریضوں اور ان کے لواحقین کو سیکیورٹی عملے نے دھکے بھی دیے۔

اس موقع پر ایک مریض نے بتایا کہ اسے یورین بیگ لگنا ہے لیکن سیکیورٹی عملہ اندر نہیں جانے دے رہا ہے جب کہ اسپتال کی ایمرجنسی کے باہر پریشان حال کھڑے کئی افراد نے بتایا کہ ان کے مریض ایمرجنسی میں موجود ہیں لیکن ہمیں اندر نہیں جانے دیا جارہا ہے۔

یہ بھی پڑھیں: دانیال عزیز ٹریفک حادثے میں شدید زخمی، اسپتال منتقل

واضح رہے کہ ن لیگ کے رہنما دانیال عزیز گزشتہ روز ٹریفک حادثے میں شدید زخمی ہوگئے تھے جن کی عیادت کے لیے وزیراعلیٰ پنجاب حمزہ شہباز سروسز اسپتال آئے تھے۔

محکمہ صحت پنجاب نے لاہور کے چلڈرن اسپتال میں آگ کی تحقیقات کا آغاز کردیا ہے اور اس حوالے سے 6 رکنی انکوائری کمیٹی تشکیل دیدی ہے۔

اے آر وائی نیوز کے مطابق محکمہ صحت پنجاب نے صوبائی دارالحکومت لاہور کے چلڈرن اسپتال میں آگ کی تحقیقات کا آغاز کردیا ہے اور اس حوالے سے 6 رکنی انکوائری کمیٹی تشکیل دیدی ہے اور ہیلتھ ڈیپارٹمنٹ کےاسپیشل سیکرٹری کو 6 رکنی انکوائری کمیٹی کا سربراہ مقرر کیا گیا ہے۔

اس حوالے سے جاری کردہ مراسلے میں کہا گیا ہے کہ تحقیقاتی کمیٹی اسپتال میں آگ کیسے لگی، اسپتال انتظامیہ کیا اقدامات کرسکتی تھی اس کا تعین کیا جائے گا اور اسپتال میں لگے فائر الارم اور فائر فائٹنگ سسٹم کی تحقیقات کی جائے گی۔

تحقیقاتی کمیٹی آگ سے متاثرہ افراد اور اسٹاف سے بھی پوچھ گچھ کرے گی جب کہ آگ سے ہونے والے نقصان کا تخمینہ لگانے کے ساتھ ذمے داروں کا تعین کرکے کارروائی کا آغاز کیا جائے گا۔

محکمہ صحت نے انکوائری کمیٹی کو 3 روز میں تحقیقات مکمل کرکے رپورٹ جمع کرانے کی ہدایت کی ہے۔

واضح رہے کہ ہفتے کی صبح لاہور کے معروف چلڈرن اسپتال میں آتشزدگی کا واقعہ رونما ہوا ہے جس کے نتیجے میں فارمیسی مکمل طور پر جل کر راکھ کا ڈھیر بن گئی۔

 مزید پڑھیں: لاہور کے بڑے اسپتال میں خوفناک آتشزدگی، فارمیسی جل کر خاکستر

وزیر اعلی پنجاب حمزہ شہباز نے چلڈرن اسپتال میں آتشزدگی کے واقعے کا نوٹس لیتے ہوئے انکوائری کا حکم دیا تھا اور سیکریٹری صحت سے رپورٹ بھی طلب کی تھی۔

پنجاب حکومت نے منکی پوکس سے بچاؤ کے لئیے ویکسین خریدنے کا فیصلہ کیا ہے۔

پنجاب حکومت ویکسین کی دس لاکھ خوراکیں ڈنمارک سے منگوائے گی۔ ویکسین کو ہیلتھ کئیر ورکز اور کم قوت مدافعت والے افراد کے لیے منگوایا جائے گا۔

ڈنمارک کے سفارت خانے کو ویکسین منگوانے کے لیے خط لکھنے کا فیصلہ کیا گیا ہے۔ پیر سے پنجاب کے تمام ڈاکٹرز کی منکی پوکس پر ٹریننگ دینے کا بھی فیصلہ کیا گیا ہے۔

یونیورسٹی آف ہیلتھ سائنسز ڈاکٹرز کو منکی پوکس کے علاج پر تربیت دے گا۔

پنجاب میں منکی پکس کے پھیلاؤ کے خدشے کے پیش نظر پنجاب حکومت نےبیماری کے علاج کیلئے ٹیکنیکل ورکنگ گروپ تشکیل دے دیا۔

ڈائریکٹر جنرل ہیلتھ سروسزڈاکٹر ہارون جہانگیر کو ورکنگ گروپ کا چیئرمین نامزد کیا گیا ہے ، ورکنگ گروپ میں جلد، انفیکشن، میڈیسن اور وائرس کے ماہرین شامل ہیں۔

ورکنگ گروپ پنجاب میں منکی پوکس کی صورتحال سے نمٹنے اور مریضوں کی تعداد، ادویات سمیت اسپتالوں کی تیاری کا جائزہ لے گا۔

ورکنگ گروپ اسپتالوں میں علاج سے متعلق آڈٹ اور انسپکشن بھی کرے گا۔

یاد رہے گذشتہ ہفتے قومی ادارہ صحت نے منکی پاکس کے حوالے سے ہائی الرٹ جاری کیا تھا، جس میں کہا تھا کہ مختلف ممالک میں منکی پاکس کے 92 مصدقہ کیسز سامنے آچکے ہیں ، منکی پاکس زونوٹک وائرس سےلاحق ہونے والامرض ہے ، افریقی چوہے اور بندر منکی پاکس کےانسانوں میں منتقلی کاسبب بن رہے ہیں۔

الرٹ میں کہا گیا تھا کہ منکی پاکس کی علامات 1سے 3 روز میں ظاہرہوتی ہیں اور اس سے مریض کے چہرے، جلد پر سرخ نشانات ظاہر ہوتے ہیں، بخار، سر، پٹھوں کا درد منکی پاکس کی اہم علامات ہیں۔