لاہور: محکمہ تعلیم نے مسجد مکتب اسکولوں کو مڈل اور ہائی اسکولوں میں اپ گریڈ کرنے کا فیصلہ کرلیا، ہائی اسکول میں اپ گریڈ کرنے کے بعد 26 افراد پر مشتمل عملہ تعینات کیا جائے گا۔
تفصیلات کے مطابق مسجد مکتب اسکولوں کو مڈل اور ہائی اسکولوں میں اپ گریڈ کرنے کا فیصلہ کیا گیا ہے، اسکولوں کی اپ گریڈیشن کا فارمولہ تیار کر لیا گیا۔
مسجد مکتب اسکول کو پرائمری اسکول میں اپ گریڈ کرنے کے لیے کم از کم 8 افراد کا عملہ رکھا جائے گا، بوائز اور گرلز اسکولوں کے لیے 6، 6 ٹیچرز اور 2، 2 نان ٹیچنگ اسٹاف رکھا جائے گا۔
ایلمنٹری اسکولوں کو اپ گریڈیشن کے بعد 18 افراد کا عملہ دیا جایے گا، ایلمنٹری اسکولوں میں 15 ٹیچرز اور 3 نان ٹیچنگ افراد پر مشتمل اسٹاف ہوگا۔
علاوہ ازیں مسجد مکتب اسکول کو ہائی اسکول میں اپ گریڈ کرنے کے لیے 26 افراد پر مشتمل عملہ تعینات کیا جائے گا جس میں مختلف گریڈز کے 21 اساتذہ اور 5 نان ٹیچنگ افراد پر اسٹاف ہوگا۔
لاہور : پنجاب میں میٹرک اور انٹرمیڈیٹ کے امتحانات میں 60 فیصد نمبرز حاصل کرنے والے طلباء کو اسکالر شپ دینے کا اعلان کردیا گیا۔
تفصیلات کے مطابق پنجاب ایجوکیشن اینڈونمنٹ فنڈ نے ہونہار طلباء کو کروڑوں روپے کے فنڈز سے اسکالرشپ دینے کا اعلان کردیا۔
پنجاب ایجوکیشن اینڈونمنٹ فنڈ کا کہنا ہے کہ 2021 میں میٹرک اور انٹرمیڈیٹ کے امتحان میں 60 فیصد نمبرز حاصل کرنے والے طلباء درخواستیں جمع کروانے کے اہل ہوں گے۔
یتیم طلباء، گریڈ ایک سے چار کے سرکاری ملازمین کے بچے درخواست جمع کرواسکیں گے جبکہ سرکاری ملازمین کے بچے جنکی تنخواہ 23 ہزار سے کم ہے وظائف کے اہل ہوں گے۔
خصوصی اوراقلیتی مذاہب سےتعلق رکھنے والے بچے بھی اپلائی کرسکیں گے ، درخواستیں31مارچ تک پنجاب اینڈونمنٹ فنڈ کے آفس میں جمع کروائی جاسکیں گی۔
یاد رہے گذشتہ سال وزیراعلیٰ پنجاب نے رحمت اللعالمینﷺ اسکالر شپ میں 50کروڑ سے بڑھاکرایک ارب کرنے کا اعلان کرتے ہوئے کہا تھا 677 مزید رحمت اللعالمینؐ اسکالر شپ دیئے جائیں گے۔
علامہ اقبال انٹرنیشنل ایئرپورٹ پر مسافر سامان سے بھرا بیگ بھول گیا، سول ایوی ایشن نے بیگ اس کے مالک کو واپس لوٹا دیا۔
اے آر وائی نیوز کے مطابق قطر ایئر ویز سے پاکستان آنے والا مسافر اپنا بیگ علامہ اقبال ایئرپورٹ پر بھول گیا تھا۔
بیگ میں غیر ملکی کرنسی کے علاوہ قیمتی سامان بھی موجود تھا۔
ایئرپورٹ منیجر سول ایوسی ایشن چوہدری نذیر نے مسافر کے بیگ ایئرپورٹ پر بھول جانے کی اطلاع ملنے پر بیگ کے مذکورہ مسافر مالک سے رابطہ کیا اور اسے ایئرپورٹ بلاکر یہ بیگ واپس کردیا۔
ایئرپورٹ منیجر کے مطابق بیگ میں 10ہزار 900 کینیڈین ڈالرز، طلائی زیورات جن میں چین، بریسلیٹ، 2 انگوٹھیاں شامل ہیں اس کے علاوہ آئی فون اور ضروری کاغذات موجود تھے۔
بیگ واپس ملنے پر مذکورہ مسافر نے سول ایوی ایشن کا شکریہ ادا کیا۔
واضح رہے کہ اس سے قبل بھی لاہور ایئرپورٹ پر سول ایوی ایشن عملے نے گزشتہ نومبر میں شارجہ سے آنے والے مسافر کا گمشدہ سامان واپس لوٹایا تھا۔
لاہور : پنجاب بھر میں کورونا کیسز کی تعداد میں اضافہ ہورہا ہے ، کورونا کے باعث مزید نو افراد جان کی بازی ہار گئے اور 2107کیسزرپورٹ رپورٹ ہوئے۔
تفصیلات کے مطابق پنجاب میں کورونا کیسز کے گزشتہ 24گھنٹے کے اعداد و شمار جاری کردیے گئے، سیکرٹری محکمہ پرائمری اینڈ سیکنڈری ہیلتھ عمران سکندر بلوچ نے بتایا کہ صوبے میں کورونا کے 9 مریض انتقال کرگئے ، جس کے بعد کورونا سے انتقال کرنیوالوں کی تعداد13 ہزار 157 ہوگئی۔
صوبہ بھر میں کورونا کے باعث لاہور اور راولپنڈی سے تین تین جبکہ بہاولپور، فیصل آباد اور گوجرانولہ سے ایک ایک ہلاکت رپورٹ ہوئی ہے۔
سیکریٹری محکمہ ہیلتھ کا کہنا تھا کہ محکمہ ہیلتھ کے مختلف سیکٹرز کے لئے اسپیشل ایس اوپیزجاری کردیئے گئے ہیں۔
عمران سکندر کے مطابق 24 گھنٹےمیں پنجاب میں کوروناکے2107کیسزرپورٹ ہوئے ، جس کے بعد کورونا کیسز کی کل تعداد 4 لاکھ 78 ہزار 573 ہوگئی۔
سیکریٹری محکمہ ہیلتھ نے بتایا پنجاب میں کوروناکے436296مریض صحت یاب ہوچکے ہیں جبکہ صوبے میں کورونا کے ایکٹو کیسز کی تعداد 29 ہزار 120 ہے۔
عمران سکندر بلوچ کا کہنا تھا کہمگزشتہ چوبیس گھنٹوں کے دوران صوبہ بھر کے تمام شہروں میں کورونا کے مثبت کیسز کی مجموعی شرح آٹھ اعشاریہ چھ فیصد ریکارڈ کی گئی۔
لاہور: صوبہ پنجاب میں کرونا وائرس کی نئی قسم اومیکرون کا پھیلاؤ جاری ہے، لاہور میں اومیکرون کے 23 اور جہلم میں 7 کیسز رپورٹ کیے گئے۔
تفصیلات کے مطابق صوبہ پنجاب کے دارالحکومت لاہور میں کرونا وائرس کے مثبت کیسز کی شرح 20.3 فیصد ہوچکی ہے۔
محکمہ صحت پنجاب کا کہنا ہے کہ گزشتہ 24 گھنٹوں کے دوران پنجاب بھر سے کرونا وائرس کی نئی قسم اومیکرون کے 30 کیسز رپورٹ ہوئے جس کے بعد صوبے میں اومیکرون کیسز کی تعداد 11 سو 85 ہوگئی۔
محکمہ صحت کے مطابق صرف لاہور میں اومیکرون کے 23 کیسز رپورٹ ہوئے، علاوہ ازیں جہلم میں بھی اومیکرون کے7 نئے کیسز سامنے آئے۔
خیال رہے کہ ملک بھر میں کرونا وائرس کی پانچویں لہر کی ہلاکت خیزی میں اضافہ ہورہا ہے، گزشتہ 24 گھنٹے کے دوران ملک میں کووڈ 19 سے مزید 30 اموات ہوئی ہیں۔
اس عرصے کے دوران ملک بھر میں مزید 8 ہزار 183 نئے کووڈ کیسز رپورٹ ہوئے ہیں، ملک میں کرونا وائرس کے مثبت کیسز کی شرح 11.92 فیصد تک جا پہنچی ہے۔
لاہور : کراچی کے بعد لاہور میں بھی اومیکرون تیزی سے پھیلنے لگا ،ایک روز میں صوبے بھر میں اومیکرون کے 100 نئے کیسزسامنے آئے۔
تفصیلات کے مطابق پنجاب کے دارلحکومت لاہور میں اومیکرون کے کیسزمیں آج حیران کن اضافہ دیکھا گیا ، محکمہ صحت پنجاب نے بتایا کہ لاہورمیں صرف ایک دن میں اومیکرون95نئےکیسزسامنے آئے اور شہر میں کیسز کی تعداد737 ہوگئی۔
محکمہ صحت کا کہنا تھا کہ گزشتہ24گھنٹوں کےدوران پنجاب میں اومیکرون کے100 نئےکیسزسامنےآئے ، جس کے بعد صوبے میں اومیکرون کےکیسزکی تعداد 790ہو گئی۔
لاہور اور دوسرےشہروں میں بھی اومیکرون کے کیسزمیں اضافہ ہونا شروع ہوگیا ہے، شیخوپورہ میں اومی کرون کے 6 نئے کیسز رپورٹ ہوئے۔
محکمہ صحت کا کہنا ہے کہ کوروناکےنئےویرینٹ کوروکناایک چیلنج بن چکاہے جبکہ لاہورمیں کوروناوائرس کےمثبت کیسزکی شرح بھی16فیصدتک پہنچ گئی ہے۔
وزیر صحت پنجاب نے کہا ہے کہ لاہورمیں اومیکرون بہت تیزی سے پھیل رہا ہے، لوگ احتیاط کریں۔
لاہور: پنجاب حکومت نے اسکول نہ بند کرنے کا اعلان کرتے ہوئے کہا ہے اسکولوں میں مثبت کیسز کی شرح کو مدنظر رکھ کر بند کرنے کا فیصلہ کیا جائے گا۔
تفصیلات کے مطابق کورونا کیسز بڑھنے پر اسکولز بند کرنے کے معاملے پر محکمہ تعلیم پنجاب کی جانب سے بیان میں کہا گیا ہے کہ فی الوقت اسکولز بند نہیں کر رہے ہیں ، اسکولوں میں پہلے کورونا ٹیسٹ کیے جائیں گے۔
محکمہ تعلیم پنجاب کا کہنا تھا کہ ٹیسٹ کے نتیجہ میں آنے والے مثبت کیسز کی شرح کو مدنظر رکھ کر اسکولز بند کرنے کا فیصلہ کیا جائے گا۔
حکام نے بتایا محکمہ صحت پنجاب کی ٹیمیں اسکولوں میں جا کر کوویڈ ٹیسٹ کررہی ہیں۔
گذشتہ روز این سی او سی نے کرونا وائرس کی زیادہ شرح والے تعلیمی اداروں کو ایک ہفتے کے لیے بند کرنے کا فیصلہ کرتے ہوئے کہا تھا کہ وبا کے اثرات جاننے کے لیے اومیکرون سے متاثرہ شہروں کے تعلیمی اداروں میں کرونا ٹیسٹ کیے جائیں گے۔
وبائی حکومتیں محکمہ صحت و تعلیم کے حکام کے ساتھ مشاورت سے تعلیمی اداروں کی بندش کا فیصلہ کریں گی، اور تمام تعلیمی اداروں میں ویکسینیشن کے لیے خصوصی مہم چلائی جائے گی۔
پنجاب کی عوام کوکورونا وائرس سے بچانے کیلئے صوبہ بھرمیں لاک ڈاؤن سخت کرنے کا فیصلہ کیا گیا ہے۔
محکمہ پرائمری اینڈ سیکنڈری ہیلتھ کیئر کی جانب سے نوٹیفیکشن جاری کردیاگیا ہے اور وزیراعلی پنجاب کی ہدایات پر ویکسی نیشن مہم اور NPIs پر عمل درآمد تیز کرنے کے احکامات جاری کیے گئے ہیں۔
کورونا وائرس پازیٹوٹی شرح کے مطابق پنجاب کے محتلف علاقوں میں پابندیوں کا اطلاق کیا جا رہا ہے۔ 10 فیصد سے زائد پازیٹویٹی شرح والے علاقوں میں پابندیاں سخت کرنے کا فیصلہ کیا گیا ہے۔ لاہور اور راولپنڈی میں کورونا وائرس کی شرح 10 فیصد سے زائد ہے۔
سیکرٹری محکمہ پرائمری اینڈسیکنڈری ہیلتھ کیئر عمران سکندر بلوچ کے مطابق نوٹیفیکشن پنجاب بھر میں 31 جنوری تک نافذ العمل رہے گا، پنجاب بھر میں شادی کی تقریبات پر نافذ پابندیاں 24 جنوری سے 15 فروری تک جاری رہیں گی کاروباری سرگرمیاں اور دفتری امور معمول کے مطابق چلیں گے ہر قسم کے انڈور ڈائننگ پر 21 جنوری سے مکمل پابندی عائد کی جا رہی ہے۔
نوٹیفکیشن کے مطابق ہر قسم کے انڈور اجتماعات، شادی کی تقریبات، پر 24 جنوری سے مکمل پابندی عائد کی جا رہی ہے۔ صوبہ بھر میں آوٹ ڈور اجتماعات ،شادی کی تقریبات کی مکمل ویکسینیٹد 300 افراد کی گنجائش کے ساتھ اجازت ہو گی جب کہ آوٹ ڈور ڈائیننگ کیلئے صرف مکمل ویکسینیٹد افراد کو اجازت ہو گی۔
صوبہ بھر کے تمام مزارات، جمز اور سینما گھروں کو 50 فیصد گنجائش کے ساتھ کام کرنے کی اجازت ہو گی ہر قسم کی کانٹیکٹ سپورٹس پر مکمل پابندی عائد ہو گی۔
پنجاب بھرمیں ہر قسم کی پبلک ٹرانسپورٹ 20 جنوری سے 70 فیصد گنجائش کے ساتھ چل سکے گی جب کہ ریل گاڑی 80 فیصد گنجائش کے ساتھ چل سکے گی۔
مکمل ویکسی نیٹد افراد کے ساتھ کنٹرول ٹورزم کی اجازت ہو گی البتہ تمام تفریحی مقامات، پولز اور پارکس 50 فیصد گنجائش کے ساتھ کھلے رہیں گے۔ تعلیمی ادارے 12 سال سے زائد عمر کے بچوں کی 100 فیصد تعداد کے ساتھ کھلے رہیں گے۔ تعلیمی ادارے 12 سال سے کم عمر کے بچوں کے50 فیصد تعداد کے ساتھ متفرق دنوں میں کھلے رہیں گے۔ 12 سال سے زائد عمر کے تمام افراد کی مکمل ویکسی نیشن کروانے کی جامع منصوبہ کی گئی ہے۔
لاہور: لاہور کے مصروف اور قدیم بازار انار کلی میں خوفناک بم دھماکا ہوا ہے، دھماکے کے نتیجے میں 9 سالہ بچے سمیت 2 افراد جاں بحق جبکہ 25 افراد زخمی ہوگئے ہیں۔
اے آر وائی نیوز کے مطابق صوبہ پنجاب کے دارالحکومت لاہور کے مشہور انار کلی بازار میں دھماکا ہوا ہے، دھماکا اس قدر خوفناک تھا کہ عمارتوں کے شیشے ٹوٹ گئے اور متعدد گاڑیوں کو نقصان پہنچا، دھماکے کے فوری بعد کئی گاڑیوں میں آگ لگ گئی۔
رپورٹ کے مطابق دھماکے کے نتیجے میں نو سالہ بچے سمیت 2 افراد جاں بحق جبکہ 25 زخمی ہوئے ہیں، زخمی بچہ کراچی سے لاہور اپنے رشتے داروں کے یہاں آیا تھا۔
دھماکے کی اطلاع ملتے ہی ریسکیو ٹیموں کی بڑی تعداد جائے حادثے پر پہنچی اور دھماکے میں زخمیوں کو طبی امداد کے لئے میو اسپتال منتقل کیا۔
دھماکے کے بعد سیکورٹی فورسز نے علاقے کو گھیرے میں لیتے ہوئے تمام غیر متعلقہ افراد کو متاثرہ جگہ سے دور ہٹادیا ہے جبکہ بم ڈسپوزل اسکواڈ نے بھی موقع پر پہنچ کرتحقیقات کا آغاز کردیا ہے۔
ایم ایس میو اسپتال نے میڈیا سے گفتگو میں بتایا کہ بڑی تعداد میں زخمیوں کے پیش نظر اسپتال میں ایمرجنسی نافذ کردی گئی ہے اور اضافی طبی عملے کو طلب کرلیا گیا ہے، دھماکے کے 8 زخمیوں کی حالت تشویشناک ہے۔
زخمیوں سے متعلق ایم ایس میواسپتال کا کہنا تھا کہ سر پر بہت کم زخم آئے، ٹانگوں ،ہاتھوں پر زیادہ چوٹیں آئیں، انہوں نے کہا کہ دھماکے میں بال بیرنگ کےحوالےسےکچھ کہناقبل ازوقت ہوگا، زخمیوں کوبہترین طبی سہولتیں دی جارہی ہیں۔
اسسٹنٹ کمشنر کا دورہ میو اسپتال
انار کلی بازار میں دھماکے کی اطلاع ملتے ہی اسسٹنٹ کمشنر سٹی فیضان احمد میو اسپتال پہنچے اور زخمیوں کی عیادت کی۔
ڈی آئی جی آپریشنز ڈاکٹر عابد کی میڈیا سے گفتگو
ڈی آئی جی آپریشنز ڈاکٹر عابد نے انار کلی بازار میں دھماکے کی تصدیق کرتے ہوئے بتایا کہ لوہاری چوک میں دھماکا ہواہے، ابتدائی طورپرلگ رہاہے کہ پلانٹڈ ڈیوائس تھی، جسے موٹر سائیکل میں نصب کیا گیا تھا۔
ڈی آئی جی آپریشنز نے بتایا کہ متاثرہ مقام پر ریسکیو آپریشن مکمل کرلیا گیا ہے، دھماکے میں زخمی و جاں بحق افراد کو اسپتالوں میں منتقل کردیا گیا ہے، زخمیوں کے ورثا کوبتانا چاہتے ہیں کہ انکےپیارے محفوظ ہیں اور انہیں بہترین طبی امداددی جارہی ہے۔
وزیراعلیٰ پنجاب کا نوٹس
انار کلی بازار میں ہونے والے دھماکے پر وزیراعلیٰ پنجاب نے نوٹس لیتے ہوئے آئی جی پنجاب سے رپورٹ طلب کرلی ہے، وزیراعلیٰ پنجاب عثمان بزدار نے حکم دیا کہ واقعےکی تحقیقات کرکے جامع رپورٹ پیش کی جائے اور دھماکے میں زخمیوں کو علاج معالجے کی بہترین سہولتیں فراہم کی جائیں۔
شہباز شریف، چوہدری شجاعت، پرویزالٰہی اور مونس الہیٰ کی مذمت
اپوزیشن لیڈر قومی اسمبلی شہباز شریف نے انارکلی میں دھماکے میں قیمتی جانی نقصان پر اظہار افسوس کیا ہے، ٹوئٹر پر جاری بیان میں شہبازشریف نے کہا کہ معصوم بچےاور غریب افراد اس میں نشانہ بنے جو قابل مذمت ہے، جاں بحق افراد کے اہلخانہ سے دلی تعزیت کرتے ہیں، اسلام آباد کے بعد لاہور میں دہشتگردی ملک کیلئے نیک فال نہیں۔
لاہور کے زندہ دل اور تاریخی علاقے انار کلی میں دھماکے سے قیمتی جانی نقصان پر بے حد دکھ اور افسوس ہے۔ معصوم بچےاورغریب افراد اس میں نشانہ بنے جو انتہائی قابل مذمت ہے۔جاں بحق ہونے والوں کے اہل خانہ سے دلی تعزیت کرتے ہیں۔اسلام آباد کے بعد لاہور میں دہشت گردی ملک کے لئے نیک فال نہیں!
اسپیکر پنجاب اسمبلی پرویزالٰہی نے بھی انار کلی بم دھماکے کی شدید الفاظ میں مذمت کرتے ہوئے کہا کہ زخمیوں کو فوری طور پر بہترین طبی امداد دی جائے، چوہدری شجاعت نے مطالبہ کیا کہ شہرکا امن خراب کرنیوالوں کو فوری گرفتار کر کےسزا دی جائے جبکہ مونس الٰہی نے دھماکے میں جاں بحق افراد کے لئے دعائے مغفرت جبکہ زخمیوں کی جلد صحت یابی کی دعا کی۔
وزیر قانون پنجاب راجہ بشارت نے آئی جی پنجاب سے واقعےکی ابتدائی رپورٹ طلب کرلی ہے، انہوں نے پولیس کے اعلیٰ حکام کو ہدایت کی کہ تحقیقات کے دوران تمام پہلوؤں کو مدنظر رکھا جائے۔
پولیس کو الرٹ رہنے کا حکم
انار کلی دھماکے کے بعد آئی جی پنجاب نے شہر کے اہم مقامات پر سیکیورٹی سخت کرنے کا حکم دے دیاہے اور پولیس حکام کو کڑی ہدایت جاری کیں ہے کہ شہر کے داخلی اور خارجی راستوں پر سخت چیکنگ کی جائے اور جامع تلاشی کے بعد گاڑیوں کو داخلے کی اجازت دی جائے۔
لاہور: پنجاب کے دارلحکومت لاہور میں کورونا وائرس کے مثبت کیسز کی شرح بھی 15.2 فیصد تک پہنچ گئی، ایک دن میں اومیکرون کے 30 نئے کیسز رپورٹ ہوئے۔
تفصیلات کے مطابق صوبہ پنجاب میں اومیکرون کے کیسز کی تعداد میں تیزی سے اضافہ ریکارڈ کیا جارہا ہے ، اس حوالے سے محکمہ صحت پنجاب نے بتایا کہ لاہور میں اومیکرون کے 30 نئے کیسز سامنے آئے ، جس کے بعد شہر میں اومیکرون کے کیسز کی تعداد 548 ہو گئی ہے۔
محکمہ صحت کا کہنا تھا کہ پنجاب میں اومیکرون کے کیسز کی تعداد 590 ہو گئی جبکہ لاہور کے ساتھ ساتھ دوسرے شہروں میں بھی اومیکرون کے کیسز میں اضافہ ہونا شروع ہوگیا ہے۔
حکام نے کہا لاہور میں کورونا وائرس کے مثبت کیسز کی شرح بھی 15.2 فیصد تک پہنچ گئی اور کورونا کے نئے ویرینٹ کو روکنا ایک چیلنج بن چکا ہے۔
خیال رہے ملک میں کورونا ٹیسٹ مثبت آنے کی شرح میں مسلسل اضافہ ہورہا ہے، این سی اوسی کے مطابق کورونا ٹیسٹ مثبت آنے کی شرح گیارہ اعشاریہ پانچ پانچ فیصد تک پہنچ گئی ہے۔
گزشتہ چوبیس گھنٹےمیں کورونا کے مزید پانچ مریض انتقال کرگئے جبکہ 7000 کے قریب نئے کیسزرپورٹ ہوئے، اس وقت کورونا کے نو سو اٹھارہ مریضوں کی حالت تشویشناک ہے۔
