Author: حسن حفیظ

لاہور: صوبہ پنجاب کے محکمہ پرائمری اینڈ سیکنڈری ہیلتھ کیئر نے شاپنگ مالز اور مارکیٹس کھولنے سے متعلق وائرل ہونے والے نوٹی فکیشن پر وضاحت جاری کردی۔

پرائمری اینڈ سیکنڈری ہیلتھ کیئر پنجاب کے ترجمان کی جانب سے جاری وضاحتی بیان میں کہا گیا ہے کہ شاپنگ مالز، مارکیٹیں کھولنے کا نوٹی فکیشن جاری نہیں کیا گیا۔

بیان میں بتایا گیا ہے کہ صوبے بھر کے شاپنگ مالز کی بندش برقرار رہے گی اور ابھی انہیں کھولنے کی اجازت نہیں دی جائے گی، سوشل میڈیا پر وائرل ہونے والا نوٹی فکیشن جعلی ہے۔

ہیلتھ کیئر پنجاب کے ترجمان نے دکانداروں، کاروباری افراد کو متنبہ کیا کہ جعلی نوٹی فکیشن کی بنیاد پر اپنے کاروبار نہ کھولیں اور کسی بھی خبر یا نوٹی فکیشن کی تصدیق کے لیے ہیلپ لائن نمبر 1033 پر رابطہ کریں، اس کے علاوہ فیس بک آفیشل پیج، ٹویٹر اکاؤنٹ کو بھی فالو کریں۔

مزید پڑھیں: پنجاب میں رات 12 بجے لاک ڈاون کا خاتمہ، نوٹیفکیشن جاری

یاد رہے کہ پنجاب حکومت نے صوبے بھر میں نافذ ہونے والے اسمارٹ لاک ڈاؤن کو پانچ اگست کے بجائے 3 اگست کو ختم کرنے اعلان کیا تھا جس کا باضابطہ نوٹی فکیشن بھی جاری کیا گیا۔

مذکورہ نوٹی فکیشن پرائمری اینڈ سیکنڈری ہیلتھ کیئر کے سیکریٹری نے جاری کیا تھا۔

حکومت نے اسمارٹ لاک ڈاؤن کے خاتمے کا فیصلہ مویشی منڈیوں میں کرونا کیسز رپورٹ نہ ہونے اور وہاں سے لیے گئے سیمپلز کے حوصلہ افزا نتائج آنے پر کیا تھا۔

لاہور: صوبہ پنجاب میں 15سے19اگست تک انسداد پولیومہم چلائی جائے گی، ویکسی نیشن ٹیموں کی حفاظت کے لیے سیکورٹی انتظامات سے متعلق خط لکھ دیا گیا۔

تفصیلات کے مطابق انسداد پولیو اور ویکسی نیشن ٹیموں کی حفاظت کے لیے سیکورٹی انتظامات سے متعلق سیکریٹری پرائمری اینڈ سکینڈری ہیلتھ کیئر نے سیکیورٹی کوآرڈی نیشن کمیٹی کو خط دیا جس میں مطالبہ کیا گیا ہے ہے کہ 15 سے 19 اگست کے درمیان مہم میں شریک ٹیموں کی سیکیورٹی یقینی بنائی جائے۔

سیکریٹری ہیلتھ کیئر کا کہنا ہے کہ 15سے19اگست تک انسدادپولیومہم چلائی جائے گی، پنجاب میں انسدادپولیو ٹیموں کی سیکیورٹی اولین ترجیح ہے، ٹیموں کی سیکیورٹی کے لیے انتظامات کا جائزہ لیا جائے۔

انسداد پولیو مہم کا پنجاب کے3 اضلاع میں آغاز

خیال رہے کہ اس سے قبل 20 جولائی کو پنجاب کے تین اضلاع میں چار روزہ پولیو مہم کا آغاز کیا گیا تھا، اس دوران 9 سو سے زائد پولیو ٹیموں نے حصہ لیا، مذکورہ مہم کے دوران لاہور کی 6 یونین کونسلز میں 3 سو سے زائد پولیو ورکرز 56 ہزار 22 بچوں کو پولیو کے قطرے پلائے گئے تھے۔

لاہور: ملک کے دیگر صوبوں کی طرح پنجاب میں بھی کرونا کیسز میں بتدریج کمی ریکارڈ کی جارہی ہے، گزشتہ 24 گھنٹوں کے دوران وبا کے 139 کیسز رپورٹ ہوئے اور 5 اموات ہوئیں۔

تفصیلات کے مطابق ترجمان پرائمری اینڈ سیکنڈری ہیلتھ کیئر کی کرونا سے متعلق تازہ رپورٹ میں بتایا گیا ہے کہ پنجاب میں نئے کیسز رپورٹ ہونے کے بعد کرونا کے مریضوں کی مجموعی تعداد 93336 ہوگئی ہے۔

’پنجاب میں کرونا سے مزید 5 مریض انتقال کرگئے جس کے بعد اموات کی مجموعی تعداد2153 ہوگئی، اب تک743533ٹیسٹ کیے جا چکے ہیں جبکہ کرونا کو شکست دینے والوں کی تعداد82,575 ہوگئی‘۔

ملک بھر میں کرونا کے نئے 432 کیسز رپورٹ، 15 اموات

کرونا کے نئے کیسز کچھ یوں رپورٹ ہوئے، لاہور میں 58، ننکانہ 2، شیخوپورہ 1، راولپنڈی6، اٹک 2، جہلم3 اور گوجرانوالہ میں 17کیسز رپورٹ سامنے آئے۔ اسی طرح سیالکوٹ3، نارووال 1، گجرات2، منڈی بہاؤالدین2، ملتان3، وہاڑی 3، فیصل آباد8، چنیوٹ 3 اور ٹوبہ میں 1 کیس سامنے آیا۔

مہلک وائرس نے سرگودھا2، میانوالی 3، بہاولنگر1، بہاولپور9، لودھراں 3، ڈی جی خان4، مظفر گڑھ1 اور پاکپتن میں 1 شہری کو اپنا شکار بنایا، تمام متاثرین کو ہرممکن طبی امداد فراہم کی جارہی ہے۔

لاہور: پنجاب حکومت نے کورونا میں خدمات سر انجام دینے والے 12 ہیلتھ پروفیشنلز کو پاکستان سول ایوارڈ دینے کا فیصلہ کرلیا۔

محکمہ اسپیشلائزڈ ہیلتھ کیئر نے نیشنل کمانڈ اینڈ کنٹرول سینٹر کو مراسلہ بھجوا دیا ہے۔کمیٹی کی جانب سے12 ہیلتھ پروفیشنلز کے نام تجویز کیے گئے ہیں۔

سی ای او میو اسپتال پروفیسر اسد اسلم کو ستار امتیاز سے نوازا جائے گا۔ وی سی نشتر میڈیکل یونیورسٹی شہید پروفیسر مصطفی کمال پاشا کو نشان امتیاز سے نوازا جائے گا۔

چئیرمین کورونا ایکسپرٹ ایڈوائزری گروپ ریٹائرڈ پروفیسر محمود شوکت، وی سی راولپنڈی میڈیکل یونیورسٹی پروفیسر محمد عمر ، چئیرمین بورڈ آف گورنر پی کے ایل آئی پروفیسر جاوید رضا گردیزی کو ستارہ امتیاز سے نوازا جائے گا۔

گورنمنٹ جنرل اسپتال غلام محمد، فیصل آباد کے کنسلٹنٹ انستھزیا ڈاکٹر خالد ناز کو تمغہ امتیاز سےنوازا جائے گا۔ میو اسپتال کی چارج نرس شازیہ لطیف اور ای سی جی ٹیکنیشن طارق سعید کو تمغہ امتیاز سےنوازا جائے گا۔

جنرل اسپتال لاہور کی ہیڈ نرس کے کتھرین صدیق اور سروسز ہسپتال کی ہیڈ نرس شاہدہ جبیں کو بھی تمغہ امتیاز عطہ کیا جائے گا جب کہ علامہ اقبال میموریل اسپتال سیالکوٹ کے ٹیکنیشن سموئیل اورنشتر میڈیکل یونیورسٹی ملتان کی ٹیکنیشن کومل کو بھی تمغہ امتیاز سے نوازا جائے گا۔