Author: حسن حفیظ

لاہور: حکومتِ پنجاب نے اسپتالوں میں احتجاج کرنے والے ینگ ڈاکٹرز سے مذاکرات نہ کرنے کا فیصلہ کر لیا۔

صوبائی وزرا خواجہ عمران نذیر اور خواجہ سلمان رفیق کی زیرِ صدارت اجلاس میں مذکورہ فیصلہ کیا گیا۔ اجلاس میں کل سے ڈیوٹی پر نہ آنے والے عملے کی غیر حاضری لگانے کی ہدایت کی گئی۔

اجلاس میں صوبائی وزیر اسپیشلائزڈ ہیلتھ کیئر سلمان رفیق نے کہا کہ گزشتہ روز صوبے کے فعال اسپتالوں کی او پی ڈیز میں 60 ہزار مریضوں کا علاج ہوا، وائس چانسلرز، ایم ایس اور پرنسپلز خود او پی ڈی میں کام کر رہے ہیں۔

سلمان رفیق نے کہا کہ وائس چانسلرز، ایم ایس اور پرنسپلز سے بدکلامی برداشت نہیں کریں گے، اسپتالوں کا نظام خراب کرنے میں ایک سیاسی پارٹی کے ایجنڈے پر عمل ہو رہا ہے۔

وزیر صحت پنجاب عمران نذیر نے کہا کہ حکومت بات کرنے کو تیار ہے مگر احتجاج ختم کیا جائے، احتجاج کے دوران کسی سے بات نہیں کریں گے، صحت کی سہولت مریضوں کا حق ہے اس پر سمجھوتہ نہیں ہوگا۔

عمران نذیر نے کہا کہ ریاست کی رٹ چیلنج کرنے والوں کو برداشت نہیں کریں گے، اسپتالوں سے ہڑتال کا کلچر ہمیشہ کے لیے ختم کریں گے۔

لاہور: سابق صوبائی وزیر و رہنما پاکستان تحریک انصاف (پی ٹی آئی) یاسمین راشد کی کوٹ لکھپت جیل میں طبیعت اچانک بگڑ گئی۔

ذرائع نے اے آر وائی نیوز کو بتایا کہ یاسمین راشد کی طبیعت ناساز ہونے پر انہیں علاج کیلیے سروسز اسپتال منتقل کر دیا گیا، وہ جیل میں بے ہوش ہوگئی تھیں۔

ذرائع نے بتایا کہ سخت گرمی کی وجہ سے یاسمین راشد کا جیل میں بلڈ پریشر ہائی ہوگیا تھا جس کی وجہ سے وہ جیل میں بے ہوش ہوئیں

سروسز اسپتال میں پی ٹی آئی رہنما کا علاج جاری ہے۔ سخت گرمی کی وجہ سے آئی جی جیل خانہ جات نے کوٹ لکھپت جیل میں ائر کولر لگانے کا حکم دیا تھا۔

یاسمین راشد 9 مئی کے پُرتشدد واقعات میں ملوث ہونے کے باعث قید ہیں۔ فروری میں گاڑیاں اور تھانہ شادمان جلانے کے مقدمات میں ان سمیت محمود الرشید اور اعجاز چوہدری پر فردِ جرم عائد کی گئی تھی۔

اس سے قبل اپریل میں یاسمین راشد کو طبیعت ناسازی کے باعث جیل سے اسپتال منتقل کیا گیا تھا۔ ان کو سانس کی تکلیف اور کھانسی کی شکایت تھی، اسپتال میں ان کا میڈیکل ایمرجنسی میں معائنہ کیا گیا تھا۔

ذرائع بتایا تھا کہ پی ٹی آئی رہنما کا پلمونولوجی اور میڈسن کے ڈاکٹرز نے چیک اپ کیا تھا۔