Author: Jahangeer Aslam

سپریم کورٹ نے پنجاب اور کے پی میں انتخابات کی تاریخ سے متعلق ازخود نوٹس کی سماعت میں سیاسی جماعتوں کو اپنی قیادت سے ہدایت لینے کا وقت دیتے ہوئے سماعت شام 4 بجے تک کا وقفہ دے دیا ہے۔

اے آر وائی نیوز کے مطابق سپریم کورٹ نے پنجاب اور کے پی میں انتخابات کی تاریخ سے متعلق ازخود نوٹس کی چیف جسٹس عمر عطا بندیال کی سربراہی میں 5 رکنی بینچ کی سماعت جاری ہے۔ فریقین کے وکلا کے دلائل مکمل ہونے کے بعد عدالت نے سیاسی جماعتوں کو اپنی قیادت سے ہدایت لینے کا وقت دیتے ہوئے سماعت میں شام 4 بجے تک کا وقفہ دے دیا ہے۔

سپریم کورٹ کے 5 رکنی بینچ کے رکن جسٹس منصور علی شاہ نے کہا ہے کہ سیاسی قائدین مشورہ کرکے الیکشن کی متوقع تاریخ سے آگاہ کریں۔

جسٹس منصور علی شاہ نے کہا کہ میرے پنچایتی دماغ میں یہ خیال آیا ہے اور جمہوریت کا تقاضا یہی ہے کہ مل بیٹھ کر الیکشن کی تاریخ طے کریں، جمہوریت کی یہی منشا ہے کہ ایک فریق لچک دکھائے۔ جسٹس مندوخیل نے کہا کہ اصل طریقہ بھی یہی ہے کہ مل کر فیصلہ کیا جائے۔

جسٹس منصور نے مزید کہا کہ قانونی باتوں کو ایک طرف رکھ کر ملک کا سوچیں، ملک کو آگے رکھ کر سوچیں گے تو حل نکل ہی آئےگا۔

اس موقع پر حکمران اتحادی جماعتوں کے وکیل فاروق ایچ نائیک نے کیس کی سماعت کل تک ملتوی کرنے کی استدعا کرتے ہوئے کہا کہ وزیراعظم، آصف زرداری اور مولانا فضل الرحمٰن سے مشاورت کرنی ہے اس لیے سماعت کل تک ملتوی کی جائے۔

تاہم چیف جسٹس عمر عطا بندیال نے ان کی یہ استدعا مسترد کرتے ہوئے کہا کہ یہ مقدمہ آج ہی نمٹانا چاہتے ہیں۔ عدالت کا سارا کام ایک اسی مقدمے کی وجہ سے رکا ہوا ہے۔

چیف جسٹس نے کہا کہ سب لوگ اپنے اپنے لیڈروں سے فون پر رابطہ کرسکتے ہیں، زیادہ وقت نہیں لگنا چاہیے۔ جس پر فاروق ایچ نائیک نے کہا کہ کیا یہ اتنا آسان معاملہ ہے کہ فون پر مشورہ کریں جس پر چیف جسٹس نے کہا کہ ٹھیک ہے پھر 4 بجے تک وقفہ کرتے ہیں جس کے بعد فیصلہ کریں گے اور سماعت میں 4 بجے تک کا وقفہ دے دیا۔

اس سے قبل ازخود نوٹس کی سماعت کرتے ہوئے چیف جسٹس عمر عطا بندیال نے رولنگ دیتے ہوئے کہا ہے کہ الیکشن کی تاریخ مقرر کرنا لازمی ہے اس میں جو رکاوٹیں ہیں وہ تاریخ دینے کے بعد دور کی جاسکتی ہیں۔ کوئی بڑا مسئلہ ہو تو آپ عدالت سے رجوع کر سکتے ہیں۔

چیف جسٹس نے کہا کہ نظام کو آئین کے تحت مفلوج کرنے کی اجازت نہیں۔ انتخابات کرانا لازم ہے اور اولین ترجیح آئین کے تحت چلنا ہے۔ ہر اسمبلی کا الیکشن 5 سال کے لیے ہوتا ہے۔ یہ قانون حکومت کا آئینی اختیار ہے۔ ملک معاشی مشکل حالات میں ہیں۔

چیف جسٹس کا کہنا تھا کہ کوئی بھی آئینی انتخابات کی مدت نہیں بڑھا سکتا کیونکہ عدالت کے علاوہ کسی کو انتخابی مدت بڑھانے کا اختیار نہیں۔ ٹھوس وجوہات کا جائزہ لیکر ہی عدالت حکم دے سکتی ہے۔ معاشی مشکلات کا ذکر 1988 کے صدارتی ریفرنس میں بھی تھا۔

عمر عطا بندیال نے کہا کہ آرٹیکل 254 وقت میں  تاخیر پر پردہ ڈالتا ہے۔ آرٹیکل 254 لائسنس نہیں دیتا کہ الیکشن میں 90 دن سے تاخیر ہو۔ قدرتی آفات یا جنگ ہو تو آرٹیکل 254 کا سہارا لیا جاسکتا ہے۔

چیف جسٹس نے کہا کہ الیکشن بروقت نہ ہوئے تو استحکام  نہیں آئے گا۔ حکومت کی نیک نیتی پر کوئی سوال نہیں اٹھا رہے لیکن ملک میں پہلی بار ایسی صورتحال ہے کہ کنٹینرز کھڑے ہیں لیکن زرمبادلہ نہیں ہے۔

آج صرف تاریخ طے کرنے کا معاملہ دیکھنا ہے۔ اگر 90 روز سے تاخیر والی تاریخ آئی تو کوئی چیلنج کر دے گا۔ معاملہ عدالت میں آئے تو دیکھیں گے۔

ازخود نوٹس کی سماعت کے دوران اٹارنی جنرل شہزاد الہٰی، الیکشن کمیشن کی قانونی ٹیم، حکمران اتحادی جماعتوں کے مشترکہ وکیل فاروق ایچ نائیک، صدر مملکت کے وکیل سلمان اکرم راجا اور اسلام آباد ہائیکورٹ بار کے صدر عابد زبیری نے دلائل دیے۔

اسلام آباد : سپریم کورٹ پنجاب اور کے پی میں انتخابات پر ازخود نوٹس کیس کی سماعت آج پھر ہوگی ، 9 رکنی بنچ 3 سوالات کے جواب تلاش کرے گا۔

تفصیلات کے مطابق سپریم کورٹ میں چیف جسٹس کی سربراہی میں9 رکنی بینچ آج پھر پنجاب اور کےپی میں الیکشن شیڈول سے متعلق ازخود نوٹس کیس کی سماعت کرے گا۔

سپریم کورٹ کا 9 رکنی بنچ 3 سوالات کے جواب تلاش کرے گا، اسمبلی تحلیل کی صورت میں انتخاب کی تاریخ کااعلان کس کی ذمہ داری ہے ، 90 روز میں انتخابات کی ذمہ داری کس نے اور کیسے نبھانی ہے اور انتخابات کے حوالے سے وفاق اور صوبوں کی کیا ذمہ داریاں ہیں؟

سپریم کورٹ نے صدر، اٹارنی جنرل، متعلقہ گورنرز سمیت پاکستان بار کونسل اور تمام سیاسی جماعتوں کونوٹسز جاری کررکھے ہیں۔

گزشتہ روز کی سماعت میں سپریم کورٹ کے دو ججوں نے ازخود نوٹس پر اعتراض اٹھایا تھا۔

چیف جسٹس عمر عطا بندیال کا ریمارکس میں کہنا تھا کہ آئین کی خلاف ورزی برداشت نہیں،چاہتےہیں انتخابات آئین کےمطابق ہوں، دیکھنا ہے اسمبلیوں کی تحلیل کے بعد الیکشن کی تاریخ دینے کا اختیار کس کا ہے۔

جسٹس عمر عطا بندیال نے کہا تھا کہ انتخابات کا مسئلہ وضاحت طلب ہے، ہم سب کو سننے کا ارادہ رکھتے ہیں، لیکن وقت کم ہے، سماعت طویل نہیں ہوگی، تفصیلی سماعت پیر سے ہوگی۔

اسلام آباد: پنجاب اور خیبر پختونخوا میں عام انتخابات سے متعلق کیس کی سماعت کے دوران سپریم کورٹ کے نو رکنی لارجر بینچ میں شامل جسٹس جمال خان مندوخیل نےازخود نوٹس پر اعتراض اٹھا دیا۔

سپریم کورٹ میں چیف جسٹس عمر عطا بندیال کی سربراہی میں 9 رکنی لارجر بینچ نے ازخود نوٹس کی سماعت کی۔ اس دوران چیف جسٹس نے ریماکس دیے کہ عدالت نے تین معاملات کو سننا ہے سیکشن 57  کے تحت صدر مملکت نے 9 اپریل کو پنجاب اور خیبر پختونخوا اسمبلیوں کیلیے انتخابات کا اعلان کیا، اب دیکھنا ہے کہ اسمبلیوں کی تحلیل کے بعد الیکشن تاریخ دینے کا اختیار کس کا ہے؟ ہائی کورٹ میں لمبی کارروائی چل رہی ہے اور وقت گزرتا جا رہا ہے۔

اس دوران جسٹس جمال خان مندوخیل نے تحفظات کا اظہار کرتے ہوئے ریمارکس دیے کہ ازخود نوٹس پر تحفظات ہیں، ہمارے سامنے دو اسمبلیوں کے اسپیکرز کی درخواستیں ہیں، ازخود نوٹس جسٹس اعجاز الاحسن اور جسٹس مظاہر علی اکبر نقوی کے نوٹ پر لیا گیا، اس کیس میں چیف الیکشن کمشنر کو بھی بلایا گیا ہے جو کہ فریق نہیں ہیں۔

جسٹس جمال جان مندوخیل نے کہا کہ کچھ آڈیوز سامنے آئی ہیں جس میں کچھ ججز کے حوالے سے بات کی جا رہی ہے، ان حالات میں رائے ہے یہ کیس 184(3) کا نہیں بنتا۔

اس پر چیف جسٹس نے ریمارکس دیے کہ ازخود نوٹس بعد میں لیا پہلے اسپیکرز کی درخواستیں دائر ہوئیں، انتخابات کا مسئلہ وضاحت طلب ہے، وقت کی کمی کے باعث لمبی سماعت نہیں کر سکتے، تجویز ہے کہ کل بھی اس کیس کی سماعت کریں۔