پی ایف یو جے ورکرز کے صدر پرویز شوکت کی رحلت فرمانے کے بعد آر آئی یو جے ورکرز کی جانب سے تعزیتی ریفرنس کا انعقاد پی آئی ڈی میں کیا گیا۔
اے آر وائی نیوز کے مطابق تعزیتی ریفرنس میں وفاقی وزیر اطلاعات مرتضی سولنگی، سیکرٹری اطلاعات و نشریات شاہیرہ شاہد، پی پی پی کے رہنما فرحت اللہ بابر اور دیگر صحافیوں نے شرکت کی۔
شرکاء کا کہنا تھا کہ ویج بورڈ ایوارڈ اور صحافیوں کے تحفظ کے قوانین کا بننا، منظوری اور نفاذ پرویز شوکت کی بے مثل جدو جہد کا ثمر ہے۔ پرویز شوکت کی زندگی صحافی رہنماؤں، صحافیوں اور میڈیا ورکرز کیلئے مشعل راہ اور قابل تقلید ہے۔
پرویز شوکت نے اپنے شعبے کے لوگوں کیلئے بے مثل اور بے لوث خدمت کی، آج ہم ان کا ماتم کر رہے ہیں مگر انکی داستان زیست اس قدر بھرپور تھی کہ اس حوالے سے آئندہ سے ہر سال جشن شوکت منایا جانا چاہئے۔
ان خیالات کا اظہار وفاقی وزیر اطلاعات و نشریات غلام مرتضی سولنگی، سیکرٹری اطلاعات و نشریات شاہیرہ شاہد، پاکستان پیپلز پارٹی کے رہنما سینیٹر فرحت اللہ بابر، سابق وفاقی وزیر جے سالک، پی ایف یو جے ورکرز کے قائم مقام صدر طاہر راٹھور، نائب صدر ڈاکٹر سعدیہ کمال، سیکرٹری اطلاعات عبدالرزاق چشتی، پرویز شوکت مرحوم کے بھائی اظہر سہیل نے پی ایف یو جے ورکرز کے مرحوم صدر پرویز شوکت کے تعزیتی ریفرنس سے خطاب کرتے ہوئے کیا۔
اس کے علاوہ آر آئی یو جے ورکرز کے صدر جہانگیر اسلم، سیکرٹری بلال عزت، سینئر صحافی فاروق اقدس، ایوب ناصر، فاروق فیصل خان، ظفر محمود شیخ، خاور نواز راجہ، اینکر پرسن مدیحہ ملک، مظہر اقبال، جاوید ملک، شکیل قرار، راشد حبیب، نمود مسلم، انوار زیدی، فرخ نواز بھٹی، اکمل شہزاد، فرحت فاطمہ، رانا عدنان و دیگر رہنماؤں نے بھی پی ایف یو جے ورکرز کے مرحوم صدر پرویز شوکت کے تعزیتی ریفرنس سے خطاب کیا۔
وفاقی وزیر مرتضی سولنگی نے کہا کہ پرویز شوکت نے ایک قابل تقلید زندگی چھوڑی ہے۔ انہوں نے ہمیشہ کارکن کی بات کی اور مرتے دم تک اس مشن پر گامزن رہے، سیکرٹری اطلاعات شاہیرہ شاہد نے کہا کہ مرحوم جب بھی میرے آفس آئے ایک ہی ایجنڈا لیکر آئے اور وہ کارکن کے حق کی بات تھی۔
انہوں نے کہا کہ ایک کامیاب شخص کی یاد ماتم نہیں جشن کے قابل ہوتی ہے، مقررین نے کہا کہ مرحوم نے ایک با مقصد زندگی گزاری، ایمانداری کو شعار بنائے رکھا اور ایجنڈا صحافت اختیار کر کے اپنے ذاتی مقاصد اور عہدے حاصل نہیں کئے، پرویز شوکت حقیقی رہنما کے طور پر ایک ہمدرد، غمگسار اور سخی انسان کے طور پر جئے۔
ہمیں فخر ہے کہ ہمارا بھائی، ہمارا دوست اور ہمارا رہنماء ایک اچھا نام اور کردار چھوڑ کر گیا ہے۔ مرحوم کے بھائی سہیل اظہر، بھانجے عدیل رضا اور بھتیجے منہال نے کہا کہ ہم اہل خانہ آر آئی یو جے ورکرز کے شکر گزار ہیں جنہوں نے ان کی یاد میں یہ محفل منعقد کی اور ہماری ڈھارس بندھائی۔
انہوں نے کہا کہ ہمیں حکومت یا کسی ادارے سے کوئی مالی مدد یا نوکری نہیں چاہئے تاہم ہم چاہتے ہیں کہ انکی خدمات کے اعتراف میں دارالحکومت کی کوئی سڑک منسوب کی جائے۔
پی ایف یو جے ورکرز کے قائم قام صدر طاہر راٹھور نے اختتامی خطاب میں کہا کہ پرویز شوکت مرحوم نے دیانت، صداقت اور جدو جہد کا جو سفر طے کیا اسے ہر صورت جاری رکھا جائے گا، تقریب کے آخر میں حافظ محمد رفیق نے مرحوم کے درجات کی بلندی کیلئے دعا کروائی۔
