Author: جہانگیر اسلم

اسلام آباد : ارشد شریف قتل کے ازخودنوٹس کیس کی سماعت کا تحریری حکم نامہ جاری کردیا گیا ، جس میں کہا گیا کہ سوموٹو میں عدالت ارشد شریف کے قتل کی تحقیقات میں محض سہولت فراہم کر رہی ہے۔

تفصیلات کے مطابق سپریم کورٹ نے ارشد شریف قتل کے ازخودنوٹس سماعت کا تحریری حکم نامہ جاری کردیا، جس میں کہا گیا کہ اٹارنی جنرل پاکستان نےدورپورٹس کا حوالہ دیا. خصوصی مشترکہ تحقیقاتی ٹیم کی طرف سے عبوری تحقیقاتی رپورٹ سپریم کورٹ میں جمع کرائی گئی، دوسری رپورٹ وزارت خارجہ کی طرف سے اب تک اقدامات کے بارے میں بتایا گیا۔

عدالت نے حکم نامے میں کہا ہے کہ اٹارنی جنرل نے بتایا کینیا اوریواےای حکومتیں وفاقی حکومت کیساتھ قانونی معاونت پربات چیت کےعمل میں ہیں، اس طرح کے معاہدوں پر عمل درآمد میں کچھ وقت لگےگا۔

حکم نامے کے مطابق ارشد شریف کی والدہ کے وکیل نے دو متفرق دائر درخواستوں کا حوالہ دیا،والدہ کےوکیل نے استدعا کی ایس جےآئی ٹی کو ان افراد کی جانچ کی ہدایت دی جائے۔

عدالت کا کہنا تھا کہ متفرق درخواستوں پر غور کرنے کے بعد عدالت کا خیال ہے والدہ کے وکیل کی استدعا قابل قبول نہیں، سوموٹو میں عدالت ارشد شریف کے قتل کی تحقیقات میں محض سہولت فراہم کر رہی ہے اور کیس پر مزید سماعت جولائی 2023 میں دوبارہ کی جائے گی۔

اسلام آباد : ارشد شریف قتل کیس میں تاحال ملزمان وقار اور خرم کے ریڈ نوٹس جاری نہ ہو سکے اور نہ کینیا کے ساتھ باہمی قانونی معاونت ( ایم ایل اے) کا معاہدہ ہو سکا۔

تفصیلات کے مطابق ارشد شریف قتل کیس میں کوئی پیش رفت نہ ہو سکی اور تاحال ملزمان وقار اور خرم کے ریڈ نوٹس جاری نہ ہو سکے۔

ذرائع نے بتایا ہے کہ کینیا اور پاکستان کے درمیان باہمی قانونی معاونت ( ایم ایل اے) کا معاہدہ نہیں ہو سکا، اسپیشل جے آئی ٹی نے دفتر خارجہ کے ذریعے کینیا کی ایمبیسی سے رابطہ کیا، جس میں کینیا اور یو اے ای سے تحقیقات کے لیے جلد از جلد اجازت کی درخواست کی ہے۔

ذرائع کا کہنا تھا کہ کینیا اور یو اے ای اپنے ملکی قوانین کے تحت معاملات کو دیکھ رہی ہیں اور اسپیشل جے آئی ٹی نے ملک کے اندر تحقیقات کے لیے تمام اقدامات کیے ہیں۔

ذرائع کے مطابق اسپیشل جے آئی ٹی آج پیش رفت رپورٹ سپریم کورٹ میں جمع کروائے گی اور چیف جسٹس کی سربراہی میں پانچ رکنی لارجر بینچ آج کیس کی سماعت کرے گا۔

اسلام آباد : سپریم کورٹ میں پنجاب میں انتخابات سے متعلق کیس کی سماعت آج ہوگی، عدالت نے وفاق کی جانب سے لارجر بینچ بنانے کی درخواست مسترد کردی تھی۔

تفصیلات کے مطابق سپریم کورٹ میں پنجاب میں الیکشن کیس کی سماعت آج ہوگی، الیکشن کمیشن کی نظرثانی درخواست 3 رکنی بینچ سنے گا، بینچ میں جسٹس اعجاز الاحسن اور جسٹس منیب اختر شامل ہیں۔

گزشتہ سماعت میں عدالت عظمی نے نے پنجاب میں انتخابات کے حوالےسے مقدمہ میں سات رکنی بنچ بنانے کیلئے وفاق کی درخواست مسترد کردی تھی۔

چیف جسٹس نے تین رکنی بنچ برقرار رکھنے کا فیصلہ سنایا تھا ، تحریری فیصلہ میں کہا گیا تھا کہ انتخابات سے متعلق فیصلہ تین چارکاکہنا غلط ہے۔ سات رکنی بنچ بناہی نہیں تو تین چار کاتناسب کیسےہوسکتاہے، قابل غورہے یکم مارچ کے فیصلے پر پانچوں ججز کے دستخط ہیں۔

عدالت کا کہنا تھا کہ جسٹس منصورعلی شاہ نےدستخط کیساتھ لکھاکہ الگ سےآرڈرلکھاہے، جسٹس جمال مندوخیل لکھتےہیں مرکزی فیصلےکیساتھ الگ نوٹ تحریرکیا، دونوں ججزنےمشترکہ آرڈرجاری کیاجس پر2ججز کےدستخط تھے۔

تحریری فیصلے میں کہا گیا تھا کہ چیف جسٹس نےالیکشن ازخودنوٹس کیس پرپہلے9رکنی لارجربینچ تشکیل دیا،9رکنی لارجربینچ نے 23 فروری کوپہلی سماعت کی، چیف جسٹس نےانتخابات ازخودنوٹس کیس پرصرف 2بینچ تشکیل دیے،فیصلہ

فیصلے کے مطابق چیف جسٹس نے پہلے 9 رکنی اور پھر5 رکنی بینچ تشکیل دیا، اس کیس میں کسی دوسرے بینچ کا کوئی وجودنہیں ہے۔

اسلام آباد : سپریم کورٹ نے مارگلہ ہلز میں مائننگ پر تشویش کا اظہار کرتے ہوئے پہاڑوں پر مائننگ سے متعلق تفصیلات طلب کرلیں اور کہا صوبائی حکومتیں بتائیں اب تک کتنے درخت لگائے جا چکے ہیں؟۔

تفصیلات کے مطابق سپریم کورٹ میں جنگلات کی زمینوں پر قبضے کیخلاف کیس کی سماعت ہوئی، عدالت نے مارگلہ ہلز میں مائننگ پر تشویش کا اظہار کردیا۔

چیف جسٹس پاکستان نے ریمارکس دیئے اسلام آباد کی طرف والے مارگلہ کے پہاڑوں پر درخت نظر آتے ہیں،مارگلہ ہلز کی دوسری طرف مائننگ ہو رہی ہے، جس پر حکومتی وکیل راجہ شفقت نے بتایا کہ وہ علاقہ خیبرپختونخوامیں آتا ہے۔

چیف جسٹس نے کہا کہ جنگلات کی زمینوں پر تجاوزات قائم کی جا رہی ہیں، حکومتیں درخت لگانے کیلئے کیا اقدامات کر رہی ہیں، صوبائی حکومتیں بتائیں کتنے درخت بیچے گئے، اب تک کتنے درخت لگائے جا چکے ہیں۔

جسٹس عمر عطابندیال نے استفسار کیا کہ کیا پبلک پرائیویٹ پارٹنر شپ کے تحت محکمہ جنگلات کی زمین لیز پر دی جا رہی ہے ؟َ تو صوبائی حکومتوں کے وکلا نے جواب دیا کہ عدالتی فیصلے کی روشنی میں تمام لیز منسوخ کر دی گئی ہیں۔

عدالت نے چاروں صوبوں سے جنگلات کی زمینوں کو واگزار کرنے اور مارگلہ کے پہاڑوں پر مائننگ کے بارے تفصیلات طلب کر لیں اور کیس کی سماعت ایک ماہ کیلئے ملتوی کردی۔

اسلام آباد : اسلام آباد ہائی کورٹ نے جعلی اور غیرقانونی چھاپوں سے کاروباری افراد کے لٹنے کے کیس میں غلط بیانی اور غلط رپورٹ جمع کرانے پر ڈائریکٹرجنرل ایڈمن اسلام آباد سعید رمضان کو توہین عدالت کا شوکازنوٹس جاری کردیا۔

تفصیلات کے مطابق اسلام آباد میں جعلی اور غیرقانونی چھاپوں سے کاروباری افراد لٹنے لگے، تھانہ لوہی بھیر کی حدود سے غیرقانونی چھاپے میں سرکاری اہلکار رقم و دیگر قیمتی سامان لے اڑے۔

اسلام آباد ہائی کورٹ نے غلط بیانی پر ڈائریکٹرجنرل ایڈمن اسلام آباد سعید رمضان کیخلاف توہین عدالت کارروائی کا فیصلہ کرتے ہوئے غلط رپورٹ جمع کرانے پر سعیدرمضان کو توہین عدالت کا شوکاز نوٹس جاری کردیا۔

عدالت نے کہا کہ ڈائریکٹرجنرل ایڈمن اسلام آباد جواب جمع کرائیں کیوں نہ انہیں توہین عدالت پرسزادی جائے اور ایک ہفتےمیں شوکاز نوٹس کی کاپی سعید رمضان کو فراہم کرنے کی ہدایت کردی۔

چیف کمشنر اسلام آباد اور ڈی آئی جی آپریشنز نے انکوائری رپورٹ اسلام آباد ہائی کورٹ میں جمع کرائی ، جس میں چیف کمشنراسلام آباد نے سپا سینٹر پر چھاپہ غیرقانونی قرار دے دیا۔

عدالت نے کہا کہ چیف کمشنر نے ڈی آئی جی آپریشنز، ڈی جی ایڈمن اسلام آباد کی انکوائری رپورٹ کاجائزہ لیا، چیف کمشنر رپورٹ کے مطابق چھاپے میں سنگین نوعیت کی بے ضابطگیاں پائی گئیں۔

تحریری حکمنامے میں کہا گیا کہ رپورٹ کے مطابق نہ تو سرچ وارنٹ لیے گئے نہ ہی حاصل کرنےکی کوشش کی گئی، چیف کمشنر کے مطابق چھاپہ غیر قانونی تھا، سپا سینٹر سے رقم سابق مجسٹریٹ امجدحسین کے ڈرائیور اور پرائیویٹ میڈیا پرسن نے چھینی۔

عدالتی حکم میں کہنا تھا کہ چیف کمشنر کے مطابق رقم چھیننے میں 2 پولیس کانسٹیبل بھی ملوث تھے، رپورٹ کے مطابق چھاپے کے وقت مجسٹریٹ بھی موقع پر موجود نہیں تھے، چیف کمشنر کے مطابق امجد حسین سے ایگزیکٹو مجسٹریٹ اختیارات واپس لے لیے گئے ہیں۔

عدالت نے کہا کہ رپورٹ کے مطابق امجد حسین جعفری کو معطل کرکے ان کے خلاف انکوائری افسر بھی تعینات کردیا ہے، چیف کمشنر کے مطابق اختر زمان کو ایس ایچ او کے عہدے سے ہٹا دیا گیا اور پولیس اہلکاروں کےخلاف ڈسپلنری کارروائی شروع کردی گئی ہے۔

بعد ازاں عدالت نے 20 جون کو کیس سماعت کے لیے مقرر کرنے کا حکم دے دیا۔