Author: جہانگیر اسلم

اسلام آباد : سیشن عدالت نے بغاوت پر اکسانے کے کیس میں پی ٹی آئی رہنما شہباز گل کے ناقابل ضمانت وارنٹ جاری کردیے۔

تفصیلات کے مطابق اسلام آباد کی سیشن عدالت میں پی ٹی آئی کے رہنما شہباز گل کے خلاف بغاوت پر اکسانے کے کیس کی سماعت ہوئی۔

ایڈیشنل ڈسٹرکٹ اینڈ سیشن جج طاہر عباس سپرا نے کیس کی سماعت کی ، پراسیکیوٹر راجہ رضوان عباسی اور شہباز گل کے وکیل مرتضیٰ طوری عدالت میں پیش ہوئے۔

سماعت کے دوران جج طاہر عباس نے گل کی عدالت میں حاضری سے استثنیٰ کی درخواست مسترد کردی اور مسلسل غیر حاضری پر ان کے ناقابل ضمانت وارنٹ گرفتاری جاری کردیئے۔

عدالت نے کہا شہباز گل کو پیش ہونا ہوگا یا پھر ناقابل ضمانت وارنٹ پر عملدرآمد ہوگا، بعد ازاں سیشن عدالت نے بغاوت پر اکسانے کے کیس کی سماعت چھبیس جون تک ملتوی کردی۔

یاد رہےمارچ میں لاہور ہائی کورٹ نے پاکستان تحریک انصاف کے رہنما شہباز گل کو 29 مارچ کو چار ہفتوں کے لیے امریکہ جانے کی اجازت دی تھی۔

اس سے قبل فیڈرل انویسٹی گیشن اتھارٹی (ایف آئی اے) نے شہباز گل کو لاہور ایئرپورٹ سے سعودی عرب جانے سے روک دیا تھا، ایف آئی اے امیگریشن ونگ نے شہباز گل کو ان کا نام ایگزٹ کنٹرول لسٹ (ای سی ایل) میں موجود ہونے پر روکا تھا۔

اسلام آباد : اسلام آباد ہائیکورٹ نے سابق مشیر داخلہ و احتساب شہزاد اکبر کے بھائی مراد اکبر کی بازیابی کیس میں آئی جی اسلام آباد اور ڈی جی رینجرز پیر کو ذاتی حیثیت میں طلب کرلیا۔

تفصیلات کے مطابق اسلام آباد ہائی کورٹ میں سابق مشیر داخلہ و احتساب شہزاد اکبر کے بھائی مراداکبر کی بازیابی کی درخواست پر سماعت ہوئی۔

عدالت نے آئی جی اسلام آباد اور ڈی جی رینجرز کو پیر کو ذاتی حیثیت میں اسلام آبادہائیکورٹ طلب کرلیا، جسٹس محسن اخترکیانی نے ریمارکس دیئے آئندہ سماعت پر ڈی جی رینجرز کے خلاف شوکازنوٹس جاری کروں گا۔

عدالت نے وزارت دفاع کے نمائندے کو ہدایت کی کہ ڈی جی رینجرزکوکہیں آئندہ سماعت پرخود آئیں، اگر بندہ نہ آیا تو اگلی تاریخ پر وزیر داخلہ کوبلاؤں گا اور اگر پھر بھی بندہ نہ آیا تو وزیر اعظم کو بلاؤں گا۔،

جسٹس محسن اختر کیانی نے کہا کہ 36کلومیٹر کے ایریا میں اگر امن کایہ عالم رہا تو آپ پھر اپنے گھر چلے جائیں۔

بعد ازاں عدالت نے مراد اکبر کی بازیابی کیس کی سماعت پیر تک ملتوی کردی۔

اسلام آباد : اسلام آباد ہائی کورٹ نے پولیس کو سابق مشیر داخلہ و احتساب شہزاد اکبر کے بھائی مراد اکبر کی بازیابی کے لئے 2 روز کی مہلت دے دی۔

تفصیلات کے مطابق اسلام آباد ہائی کورٹ میں سابق مشیر برائے احتساب شہزاد اکبر کے بھائی کی بازیابی کیلئے درخواست پر سماعت ہوئی۔

عدالتی حکم پر ڈی آئی جی آپریشنزشہزاد بخاری عدالت میں پیش ہوئے جبکہ وکیل درخواست گزارقاسم ودود عدالت میں پیش ہوئے۔

عدالت نے شہزاد اکبر کے بھائی کی بازیابی کیلئے ڈی آئی جی آپریشنز کو 2 روز کا وقت دے دیا اور کہا 2 دن کا وقت ہے مراد اکبر کو پیش کریں، بعد ازاں سماعت 2 جون تک ملتوی کردی۔

یاد رہے چند روز قبل سلام آباد ہائی کورٹ میں شہزاد اکبر کے بھائی مرزا مراد اکبر جنہیں گھر پر چھاپے بعد پولیس مبینہ طور پر اپنے ہمراہ لے گئی تھی کی بازیابی کیلئے درخواست دائر کی گئی تھی۔

شہزاد اکبر کے وکیل قاسم ودود کی جانب سے دائر درخواست میں مؤقف اختیار کیا گیا تھا کہ ہفتہ اور اتوار کی درمیانی شب مرزا شہزاد اکبر کے بھائی مرزا مراد اکبر کو حراست میں لیا گیا تھا۔

درخواست میں کہا گیا تھا کہ چھاپے کے وقت ہم سے گھر میں پہلے شہزاد اکبر پھر مرزا مراد اکبر سے متعلق پوچھا گیا، اب پولیس افسران، ایف آئی اے اور نیب اہلکار کہہ رہے ہیں کہ ہمیں کچھ معلوم نہیں۔

اسلام آباد : سینئر قانون دان لطیف کھوسہ کا کہنا ہے کہ سلام ہے مریم کو جو پہلے روز کہا تھا وہ کر دکھایا، انھوں نے کہا تھا انہیں ویسے ہی کرش کریں جیسےن لیگ کوکیا۔

تفصیلات کے مطابق سینئر قانون دان لطیف کھوسہ نے اسلام آباد ہائی کورٹ میں میڈیا سے گفتگو کرتے ہوئے کہا لیول پلیئنگ فیلڈہی تو سارا ایجنڈا ہے، مریم نواز نے جو کہا تھا وہ کر دکھایا ، مریم نواز نے کہا تھا کہ انہیں ویسے ہی کرش کریں جیسے پہلے مسلم لیگ ن کو کیا گیا۔

لطیف کھوسہ کا کہنا تھا کہ مریم نواز اب اپنے والد کو لے کر آئیں گی جو پارک لین میں بیٹھا ہوا ہے، نواز شریف اسلام آباد ہائیکورٹ کا مفرور ہے ،ریڈ وارنٹ نکلے ہوئے ہیں۔

سینئر قانون دان نے کہا کہ چیئرمین بلاول بھٹو نے پانامہ لیکس آنے کے بعد میری سربراہی میں کمیٹی تشکیل دی، میرے علاؤہ فاروق ایچ نائیک،اعتزاز احسن اور نیئر بخاری کمیٹی میں شامل تھے۔

انھوں نے بتایا کہ بلاول بھٹو کی بنائی گئی کمیٹی نے پانامہ لیکس کے بعد نواز شریف کیخلاف کیسز کئے تھے، پانامہ کیس فول پروف اور کرپشن کے اوپن اینڈ شٹ کیسز تھے۔

نواز شریف پر تنقید کرتے ہوئے کہا کہ وہ بیٹھے بھی پارک لین میں اور مانتے بھی نہیں۔

اسلام آباد : تحریک انصاف کے رہنما اسد عمر نے عمران خان سے ملنے کے سوال پر جواب دیا کہ پہلے اپنے کیس تو بھگت لوں، فی الحال انسداد دہشت گردی کی عدالت جا رہا ہوں۔

تفصیلات کے مطابق تحریک انصاف کے رہنما اسد عمر پیشی کے لئے انسداد دہشت گردی کی عدالت پہنچے ، اس موقع پر صحافیوں نے سوالات کی بوچھاڑ کردی۔

صحافیوں نے سوال کیا کہ کیا پی ٹی آئی کے عہدے چھوڑنے کا کوئی افسوس ہے، کیا خان صاحب سے ملنے جارہے ہیں، جس پر اسد عمر نے کہا کہ فی الحال انسداد دہشت گردی کی عدالت جا رہا ہوں، پہلے اپنے کیس تو بھگت لوں۔

صحافی نے پوچھا مشکل وقت میں خان کے ساتھ کیوں نہیں کھڑے تو اسد عمر کا کہنا تھا کہ آپ ہی فیصلہ کرلیں مجھ سے کیوں پوچھ رہے ہیں۔

صحافی نے سوال کیا پی ٹی آئی کا مستقبل کیا دیکھ رہے ہیں؟ لیکن اسدعمر یہ سوال بھی گول کرگئے اور کہا آپ بتائیں آپ صحافی ہیں۔

یاد رہے گذشتہ ہفتے پی ٹی آئی رہنما اسد عمر نے پی ٹی آئی کے عہدوں سے مستعفی ہونے کا اعلان کرتے ہوئے کہا کہ میں ان حالات میں پی ٹی آئی کے سیکریٹری جنرل اور قیادت کی ذمہ داری نہیں نبھا سکتا۔

اسد عمر کا کہنا تھا مجھ پر کوئی دباؤ نہیں تھا سیکریٹری جنرل کا عہدہ اور کور کمیٹی کی رکنیت چھوڑنے کا اعلان کیا ہے پارٹی چھوڑنے کی بات نہیں کی۔

اسلام آباد : اسپیشل جج سینٹرل نے متنازع ٹوئٹ کیس میں پی ٹی آئی رہنما اعظم سواتی کے ناقابل ضمانت وارنٹ سے متعلق فیصلہ محفوظ کر لیا۔

تفصیلات کے مطابق اسپیشل جج سینٹرل میں پی ٹی آئی رہنما اعظم سواتی کیخلاف متنازع ٹوئٹ کیس کی سماعت ہوئی۔

تفتیشی افسر نے بتایا کہ وارنٹ کی تعمیل کی کارروائی کی ہے، وارنٹ کی تعمیل کے وقت اعظم سواتی اپنے گھر میں موجود نہیں تھے۔

وکیل سہیل خان کا کہنا تھا کہ میرا اعظم سواتی سے رابطہ نہیں ہو سکا ،تفتشی افسر وارنٹ کی تعمیل کیلئے کہاں گئے ،کیسے تعمیل کرائی،تفتیشی افسر کی جانب سے تعمیلی رپورٹ پر وکیل کا نمبر دیا گیا، جب تعمیل نہیں کرائی گئی تو پراسس کو دوبارہ دہرایا جاتا ہے۔3

وکیل نے کہا کہ اعظم سواتی کی مستقل رہائش اسلام آباد میں ہے ،آبائی علاقہ مانسہرہ ہے، جس پر عدالت نے وارنٹ کی تعمیل کرانے والے اہلکار کو طلب کر لیا

اعظم سواتی کے متنازع ٹوئٹ کیس میں وارنٹ کی تعمیل کرانے والا ایف آئی اے اہلکار عدالت میں پیش ہوا ، اہلکار نے بتایا کہ اعظم سواتی کے گھر کے دروازے بند تھے کسی نے وارنٹ موصول نہیں کیا، ان گاؤں کا ایڈریس ہمارے پاس نہیں۔

جج اعظم خان کا کہنا تھا کہ انفارمیشن کیسے پہنچے گی جب دروازے بندکئے ہوئے ہیں، جس پرپراسیکیوٹر رضوان عباسی نے بتایا کہ اعظم سواتی کے ناقابل ضمانت وارنٹ جاری کیے جائیں، وکیل صاحب کے کلائنٹ کو ڈھونڈنے کیلئے الٰہ دین کا چراغ نہیں، اعظم سواتی نے عدالت کو شورٹی بانڈ دے رکھے ہیں وہ عدالت میں پیش ہوں گے۔

عدالت نے اعظم سواتی کی عدم حاضری پر فرد جرم کی کارروائی مؤخر کردی، ایف آئی اے پراسیکیوٹر کی جانب سے ناقابل ضمانت وارنٹ گرفتاری جاری کرنے کی استدعا کی گئی۔

جس پر عدالت نے اعظم سواتی کے ناقابل ضمانت وارنٹ سےمتعلق عدالت نےفیصلہ محفوظ کر لیا۔