Author: جہانگیر خان

اسلام آباد: وزارت صحت نے اسلام آباد کے سب سے بڑے سرکاری اسپتال پمز میں کنٹریکٹ پر بھرتی کرنے کا فیصلہ کیا ہے۔

ذرائع وزارت صحت پمز اسپتال کیلئے بھرتیاں ایک سالہ مدت کیلئے ہوں گی، وزارت صحت نے پمز اسپتال میں کنٹریکٹ پر بھرتیوں کی اجازت دیدی، پمز کی میڈیکل، نان میڈیکل 494 آسامیوں پر بھرتیاں ہونگی۔

 ذرائع کا کہنا ہے کہ پمز اسپتال کیلئے ایک سالہ کنٹریکٹ پر بھرتیاں ایف پی ایس سی کرے گا، اسپتال کیلئے گریڈ 19 کے 8 ایسوسی ایٹ پروفیسرز، 43 اسسٹنٹ پروفیسرز، 45 سنیئر رجسٹرار بھرتی ہونگے۔

پمز ذرائع کے مطابق اسپتال کیلئے ایک نیوکلیئر فزیشن، ڈی ڈی انجینئرنگ، بوائلر انجینئر بھرتی ہو گا، گریڈ 17 کے 94 میڈیکل آفیسرز بھرتی کئے جائیں گے، گریڈ سترہ کے 16 اسسٹنٹ اینستھیٹسٹ، 2 فزیو تھراپسٹ بھی بھرتی ہونگے۔

ذرائع کا مزید کہنا ہے کہ پمز اسپتال کیلئے گریڈ سولہ کی 246 چارج نرس بھرتی کی جائیں گی، عملے کی کمی سے پمز کی کوالٹی ہیلتھ کیئر سروسز متاثر ہو رہی ہیں، پمز میں میڈیکل، نان میڈیکل 1700 سے زائد آسامیاں خالی ہیں، جس میں سے 13 سو آسامیاں بھرتیوں، 4 سو سے زائد پروموشنز سے پر ہونگی۔

اسلام آباد : ڈبلیو ایچ او نے پاکستان میں ادویات کے جعلی خام مال سپلائی کی نشاندہی کردی، اس حوالے ڈریپ نے تصاویر اور انتباہی مراسلہ جاری کردیا۔

تفصیلات کے مطابق پاکستان میں ادویات کے جعلی خام مال کی سپلائی کا انکشاف ہوا ، جس کے بعد ڈریپ سے جعلی پروپیلین گلائیکول کی تصاویراورانتباہی مراسلہ جاری کردیا۔

ڈریپ نے بتایا کہ ڈبلیو ایچ او نے ادویات کے جعلی خام مال سپلائی کی نشاندہی کی ہے، مذموم عناصر جعلی پروپیلین کلائیکول کے بیجز سپلائی کررہے ہیں۔

مراسلے میں کہا گیا کہ پروپیلین گلائیکول کے ڈاؤیورپ والےلیبل کے 2بیجزجعلی ہیں، پروپیلین گلائیکول کا ڈاؤکیمیکل کمپنی والے لیبل کا ایک بیج جعلی ہے، فارما انڈسٹری پروپیلین گلائیکول کوبطورخام مال استعمال کرتی ہے اور یہ متبادل دواؤں،محلول سازی میں استعمال ہوتا ہے۔

ڈریپ کا کہنا تھا کہ جعلی پروپیلین گلائیکول دواسازی میں استعمال نہیں ہونا چاہیے، اس سے محلول سازی انسانی صحت کیلئے نقصان دہ ہے، متبادل دعا ساز کمپنیز غیر مستند پروپیلین گلائیکول استعمال نہ کریں۔

مراسلے کے مطابق کمپنیز جعلی پروپیلین گلائیکول بیجز سے تیاردوائیں واپس منگوائیں، فارما کمپنیاں مستند اداروں سے معیاری خام مال کی خریداری کریں، فیلڈ فورس پروپیلین گلائیکول کے جعلی بیجز کی اطلاع پر کارروائی کریں اور فیلڈ فورس مارکیٹ سےجعلی خام مال سے تیارشدہ مصنوعات ضبط کریں۔

اسلام آباد : انسداد ملیریا کے عالمی ڈونر دی گلوبل فنڈ نے حکومت پاکستان کو خط لکھ کر مچھر دانیوں کی چوری پر شدید تشویش کا اظہار کرتے ہوئے جامع تحقیقات کا مطالبہ کردیا۔

تفصیلات کے مطابق پاکستان کو عطیہ میں ملنے والی لاکھوں مچھر دانیوں کی چوری سے ملک کی جگ ہنسائی ہوئی۔

عالمی ڈونر گلوبل فنڈ نے حکومت سے رابطہ کرکے چوری پر شدیدتشویش اور ناراضگی کا اظہار کرتے ہوئے مال مسروقہ برآمد اور معاملے کی مکمل تحقیقات کا مطالبہ کردیا۔

وزارت قومی صحت کے ذرائع نے تصدیق کی ہے کہ انسداد ملیریا کے عالمی ڈونرز دی گلوبل فنڈ کی جانب سے حکومت پاکستان کو خط ارسال کیا گیا ہے۔

خط گلوبل فنڈ نے وفاقی سیکرٹری وزارت صحت کے نام لکھا ہے جبکہ خط کی کاپی وزیراعظم شہباز شریف اور وزیراعلی بلوچستان کو بھی بھجوائی گئی ہے۔

گلوبل فنڈ نے حکومت پاکستان سے مچھر دانیاں چوری کے معاملے کی جامع تحقیقات کر کے چوری شدہ مچھر دانیاں برآمد کرنے کا مطالبہ کیا ہے۔

خط میں گلوبل فنڈ کی جانب سے کوئٹہ میں کامن مینجمنٹ یونٹ کے زیرانتظام سرکاری ویئر ہاوس سے تین لاکھ 68700 مچھر دانیوں کی چوری کو تشویشناک قرار دیا ہے۔

گلوبل فنڈ کے مطابق چوری شدہ مچھر دانیوں کی کھیپ 8 کنٹینرز پر مشتمل ہے اور ان کی مالیت پاکستانی روپوں میں پچیس کروڑ روپے سے زائد بنتی ہے، گلوبل فنڈ گرانٹ سے خریدی جانے والی مچھردانیاں بلوچستان کے ملیریا کےحوالےسے حساس علاقوں میں تقسیم ہونا تھیں ۔

خط میں کہا گیا کہ یہ مچھردانیاں 7 لاکھ 30 ہزار سے زائدافراد میں تقسیم ہونا تھیں، مچھر دانیاں رواں سال جنوری میں کوئٹہ میں واقع ویئرہاوس منتقل کی گئی تھیں اور انکی تقسیم کا آغاز گذشتہ ماہ جولائی میں ہوا تھا۔

خط کے مطابق چوری کے واقعے کےبعد بلوچستان کے ملیریا سے متاثرہ اضلاع میں مچھردانیاں تقسیم نہیں ہو سکیں، چوری کے واقعے سے انسداد ملیریا کے مشترکہ اقدامات کو دھچکہ پہنچا ہے۔

عالمی امدادی ادارےکا کہنا ہے کہ گلوبل فنڈ کے مطابق حکومت پاکستان کو مچھردانیوں کی انشورنس کرانے کی متعدد بار تنبیہ کی گئی تھیں ، گرانٹ ریگولیشنز کے تحت امدادی سامان کی انشورنس حکومت پاکستان کی ذمہ داری تھی ، گرانٹ قواعد کے تحت سامان کو کسی بھی قسم کے نقصان کی تلافی انشورنس کی رقم سے ہونا تھی ۔لیکن کامن مینجمنٹ یونٹ کے حکام نےگلوبل فنڈ کی واضح ہدایات کو نظر انداز کیا۔

خط میں کہا گیا ہے کہ حکومت پاکستان کی جانب سے 2024 سے دو ہزار چھیبس کے دورانیہ کیلئے کل دو کروڑ 70 لاکھ مچھردانیاں فراہم کرنے کی استدعا کی گئی تھی۔

گلوبل فنڈ کا کہنا تھا کہ پاکستان انسداد ملیریا کی جنگ میں نازک موڑ سے گزر رہا ہے، 2022 کے سیلاب نے انسداد ملیریا کی کوششوں کو شدید نقصان پہنچایا اور جس کے بعدپاکستان میں ملیریا کیسز چھ گنا بڑھ گئے ہیں۔

پاکستان میں ملیریا کا سیزن عروج پر ہے، چوری کے واقعے کے بعد بلوچستان کے ملیریا سے متاثرہ اضلاع میں مچھردانیوں کی تقسیم نہیں ہو سکی ہے، جس کے باعث شہریوں کو ملیریا سے بچانے میں مشکلات پیش آئیں گی ۔

ذرائع کے مطابق کوئٹہ میں سرکاری ویئر ہاوس سے مچھردانیاں رواں ماہ چوری ہوئی تھیں، چوری کی خبر اے آروائی نیوز نے سولہ اگست کو نشر کی تھی کہ مچھردانیاں کامن مینجمنٹ یونٹ کے براہ راست زیر انتظام ویئرہاوس سے چوری ہوئی تھیں۔

ذرائع کا کہنا ہے کہ مچھردانیاں سی ایم یو کے عملے کی مبینہ ملی بھگت سے چوری ہوئی ہیں۔، ویئر ہاوس کا عملہ مچھر دانیوں کی چوری میں ملوث ہے، مچھر دانیاں چوری کی نشاندہی کنٹریکٹ لینے والی غیر سرکاری تنظیم انڈس نے کی تھی۔

ذرائع کے مطابق کامن مینجمنٹ یونٹ نے چوری کے واقعے پر پردہ ڈالنے کی کوشش کی، بلوچستان کے ملیریا سے متاثرہ مخصوص اضلاع میں مچھردانیوں کی تقسیم جاری تھی۔

انڈس نامی این جی او کو بلوچستان کے تین بڑے اضلاع میں اٹھارہ لاکھ مچھردانیوں کی تقسیم کا ٹھیکہ ملا تھا، ذرائع کا کہنا ہے کہ بلوچستان میں ماضی میں دوا لگی مچھر دانیاں ملیریا کنٹرول پروگرام کی جانب سے براہ راست کی جاتی تھیں۔

اسلام آباد : پیپلزپارٹی پنجاب کی تنظیم صوبائی حکومت کے خلاف پھٹ پڑی اور بلاول بھٹو کے سامنے شکایات کےانبارلگادیئے۔

تفصیلات کے مطابق چیئرمین پی پی بلاول بھٹوکی پیپلزپارٹی پنجاب کے رہنماؤں سے ملاقات کی اندرونی کہانی سامنے آگئی۔

ذرائع نے بتایا کہ پیپلزپارٹی کے پنجاب حکومت سے متعلق تحفظات دور نہ ہوسکے،جس پر تنظیم صوبائی حکومت کے خلاف پھٹ پڑی۔

ذرائع کا کہنا تھا کہ پنجاب کی تنظیم  نے بلاول بھٹو کے سامنے شکایات کےانبار لگا دیئے، ارکان نے کہا کہ پنجاب میں پیپلزپارٹی کے ایم پی ایز تک کواہمیت نہیں دی جارہی اور پنجاب کی بیوروکریسی پیپلزپارٹی سےتعاون نہیں کررہی۔

ارکان کا کہنا تھا کہ لگتا ہے پنجاب کی انتظامیہ کوپی پی سےمتعلق خصوصی ہدایات ہیں، پیپلزپارٹی ارکان پنجاب اسمبلی کے ترقیاتی کام نہیں کیے جارہے۔

ذرائع نے کہا کہ پنجاب حکومت تحریری معاہدے پر پیشرفت نہیں کررہی، بلاول بھٹو تحفظات وزیراعظم کےسامنے رکھیں۔

اجلاس میں بلاول بھٹو ارکان کے تحفظات نوٹ کرتے رہے اور پنجاب حکومت کے رویے پر حیرانی اورپریشانی کااظہار کرتے ہوئے تحفظات وزیراعظم تک پہنچانےکی یقین دہانی کرادی۔

بلاول بھٹو سے پی پی وفد کی گزشتہ رات ملاقات ہوئی تھی، راجہ پرویزاشرف،حسن مرتضیٰ سمیت دیگرپارٹی رہنما وفد میں شامل تھے۔