عید الضحی سے قبل ملک میں کانگو وائرس کے پھیلاؤ کے خدشے پر قومی ادارہ صحت نے کانگو وائرس بارے ہنگامی ایڈوائزری جاری کر دی۔
ایڈوائزری وفاقی، صوبائی وزارت صحت، نجی، سرکاری اسپتالوں کو ارسال کی گئی ہے۔ کانگو وائرس بارے ایڈوائزری قومی ادارہ صحت کے ماہرین نے تیار کی ہے۔
ہدایت نامہ کا مقصد شہریوں، طبی ماہرین کو کانگو بارے معلومات فراہم کرنا ہے۔ ایڈوائزری کے مطابق عید الاضحیٰ سے قبل مویشیوں کی ملک گیر نقل و حمل ہوتی ہے عید الاضحی سے قبل انسانوں کا جانوروں سے میل جول بڑھتا ہے ان دنوں میں کانگو وائرس کے پھیلائو کا خدشہ ہوتا ہے ہدایت نامہ کا مقصد شہریوں،متعلقہ اداروں کو کانگو وائرس بارے محتاط کرنا ہے۔
ایڈوائزری کے مطابق کانگو وائرس کا پھیلائو روکنے کیلئے بروقت اقدامات ناگزیر ہیں بروقت حفاظتی اقدامات سے کانگو وائرس کا پھیلاؤ روکنا ممکن ہے متعلقہ ادارے کانگو وائرس کا پھیلاؤ روکنے کیلئے پیشگی اقدامات کریں، کانگو بخار خطرناک نیرو نامی وائرس سے لاحق ہوتا ہے کانگو کیسز میں اموات کی شرح 40 فیصد تک ہے جب کہ دنیا بھر میں سالانہ 15 ہزار کانگو کیسز، 500 اموات رپورٹ ہوتی ہیں۔
وائرس کیسے پھیلتا ہے
ایڈوائزری میں کہا گیا ہے کہ پاکستان میں کانگو وائرس کا پہلا کیس 1976 میں رپورٹ ہوا تھا بلوچستان کانگو وائرس کے حوالے سے حساس علاقہ ہے ملک میں بیشتر کانگو کیس بلوچستان سے رپورٹ ہوتے ہیں گزشتہ سال ملک میں 101 کانگو وائرس کیسز سامنے آئے تھے کانگو وائرس مویشی کی کھال سے چپکی چیچڑ میں پایا جاتا ہے گائے، بکری، بھیڑوں، پالتو جانوروں کی جلد کانگو کی پناہ گاہ ہے کانگو وائرس چیچڑ کے ذریعے ایک سے دوسری جگہ منتقل ہوتا ہے اور متاثرہ چیچڑ کے کاٹنے سے کانگو وائرس انسان کو منتقل ہوتا ہے، نیرو وائرس انسانوں کو کانگو بخار لاحق ہونے کا سبب بنتا ہے کانگو وائرس سے انسان ہیموریجک بخار میں مبتلا ہوتا ہے۔
علامات
کانگو بخار سے ہلاکتوں کی شرح 10 تا 40 فیصد ہو سکتی ہیں جانوروں میں کانگو بخار کی علامات ظاہر نہیں ہوتیں یہ وائرس انسانی خون، تھوک اور فضلے میں پایا جاتا ہے، گلہ بان ،قصاب کانگو وائرس سے جلد متاثر ہو سکتے ہیں، تیز بخار، کمر، پٹھوں، گردن میں درد ،قے کانگو کی علامات ہیں، متلی ،گلے کی سوزش، جسم پر سرخ دھبے کانگو کی اہم علامات ہیں، منہ ،ناک، اندرونی اعضاء سے خون بہنا کانگو کی اہم علامات ہیں، ہدایت نامہ
احتیاطی تدابیر
عید پر خریدار پوری آستین والے کپڑے پہن کر مویشی منڈی جائیں شہری مویشی منڈی سے واپسی پر فورا نہا کر نئے کپڑے پہنیں، خریدار بچوں کو مویشی منڈی لے جانے سے گریز کریں محکمہ لائیو سٹاک مویشی منڈی میں جانوروں پر چیچڑ مار سپرے کرے، شہری و قصاب قربانی کے وقت دستانوں کا استعمال کریں، شہری قربانی کے وقت خود کو زخم و جانوروں کے خون سے بچائیں شہری قربانی کا گوشت دھوتے وقت دستانوں کا استعمال کریں احتیاطاً قربانی کے گوشت کو اچھی طرح پکا کر کھائیں۔
کانگو وائرس کی باقاعدہ ویکسین تاحال ایجاد نہیں ہوئی لہذا شہری احتیاطی تدابیر اپنا کر کانگو وائرس سے محفوظ رہ سکتے ہیں، طبی عملہ کانگو کے مریض کا علاج کرتے وقت خصوصی احتیاط کریں طبی ماہرین کانگو کے مصدقہ مریض کو آئیسولیشن روم میں رکھیں این آئی ایچ میں کانگو وائرس کی تشخیصی سہولیات دستیاب ہیں، ڈاکٹرز کانگو کے مشتبہ مریض کے نمونے فورا این آئی ایچ بھجوائیں، مناسب احتیاطی تدابیر اپنا کر کانگو وائرس سے بچائو ممکن ہے۔
