Author: جہانگیر خان

اسلام آباد : ڈریپ نے انجکشن کی تیاری میں استعمال ہونے والے محلول سٹیرائل واٹر کا ایک بیچ غیر معیاری قرار دیتے ہوئے پروڈکٹ ری کال الرٹ جاری کردیا۔

تفصیلات کے مطابق ڈرگ ریگولیٹری اتھارٹی نے انجکشن کی تیاری میں استعمال ہونے والے محلول کا ایک بیچ غیر معیاری قرار دے دیا اور ساتھ ہی انجکشن سٹیرائل واٹر کا پروڈکٹ ری کال الرٹ جاری کردیا۔

ڈریپ الرٹ میں کہا گیا ہے کہ انجکشن سٹیرائل واٹر ری کال الرٹ کا اجرا شہری،ڈاکٹرز، کیمسٹ کیلئے کیا ہے، سینٹرل ڈرگ لیب کراچی نے انجکشن سٹیرائل واٹر کا بیچ غیر معیاری قرار دیا۔

الرٹ میں کہنا ہے کہ انجکشن سٹیرائل واٹر کا بیچ بی 6-77 غیر معیاری قرار دیا گیا ہے، سٹیرائل واٹر اینٹی بائیوٹک اور انجکشن کی تیاری میں استعمال ہوتا ہے، سٹیرائل واٹر کو ملا کر ادویات کا محلول تیار کیا جاتا ہے۔

غیر معیاری سٹیرائل واٹر کا استعمال مریض کیلئے نقصان دہ ہو سکتا ہے اور محلول سے تیارکردہ انجکشن ری ایکشن کر سکتا ہے، بخار، سوزش، شاک ہوسکتا ہے۔

ڈریپ نے کمپنی کو سٹیرائل واٹر کا متاثرہ بیچ مارکیٹ میں سپلائی سے روک دیا ہے ، غیر معیاری سٹیرائل انجکشن واٹر آئی ایس آئی ایس فارما کراچی کاتیارکردہ ہے۔

ڈریپ نے کمپنی کو سٹیرائل واٹر کا متاثرہ بیچ مارکیٹ سے اٹھانے کی ہدایت کردی اور کہا ہے کہ کیمسٹ سٹیرائل انجکشن واٹر کے متاثرہ بیچ کی سیل روکنے کیلئے اسٹاک چیک کریں۔

الرٹ کے مطابق کیمسٹ سٹیرائل انجکشن واٹر کا متاثرہ بیچ کمپنی کو واپس کریں، ڈریپ کی صوبائی ٹیمیں میڈیسن مارکیٹ میں سرویلنس بڑھائیں اور ڈاکٹرز مریضوں کو سٹیرائل انجکشن واٹر کا متاثرہ بیچ استعمال نہ کرائیں۔

اسلام آباد : ادویات کی رجسٹریشن اور لائسنسنگ کے نظام کو آن لائن کر دیا گیا، ادویہ سازکمپنیاں رجسٹریشن اور لائسنس کیلئے آن لائن درخواستیں جمع کروا سکیں گی۔

تفصیلات کے مطابق وزیر صحت ڈاکٹر ندیم جان کی جانب سے انقلابی قدم اٹھاتے ہوئے نئی ادویات کی رجسٹریشن اور لائسنسنگ کو بھی ڈیجیٹل سسٹم سے جوڑ دیا گیا۔

وزارت صحت کے ترجمان کا کہنا ہے کہ ڈریپ نے ادویات کی رجسٹریشن اور لائسنسنگ کا نظام کو آن لائن کردیا ہے ، وزیر صحت نے ذمہ داریاں سنبھالتے ہی ادویات کی لائسنسنگ اور کہ رجسٹریشن کو ڈیجیٹل کرنے کی ہدایت کی تھی۔

ترجمان نے کہا کہ وزیر صحت ڈاکٹر ندیم جان نے باقاعدہ طور پر اپنے آفس میں افتتاح کر دیا ہے۔

اس حوالے سے ڈاکٹر ندیم جان کا کہنا تھا کہ ادویہ ساز کمپنیاں رجسٹریشن اور لائسنس کے حصول کیلیے ان لاین درخواستیں جمع کروا سکیں گی، اس سے قبل ادویات کی رجسٹرہشن یا لائسنسنگ کے لئےڈریپ آفس جاکر اپلائی کرنا پڑتا تھا۔

وزیر صحت نے کہا کہ اب نئی ادویات کی لائسنسنگ اور رجسٹریشن کے لئے ڈریپ آفس جانے کی پابندی بھی ختم ہو گئی ہے، نئی ملٹی نیشنل کمپنیوں کی رجسٹریشن اور لائسنسنگ بھی ڈیجیٹل. سسٹم کے تحت ہوگی۔

ان کا مزید کہنا تھا کہ آٹومیٹڈ سسٹم پاکستان کی ادویات پر عالمی اداروں کے اعتماد اور برآمدات میں اضافہ کا باعث ہوگا۔

ڈاکٹر ندیم جان نے کہا کہ میں نے ڈریپ کے اندر میرٹ اور شفافیت کی بنیاد رکھ دی ہے، میرٹ اور شفافیت کی وجہ سے اداروں کی کارکردگی میں نمایاں اضافہ ہوتا ہے، اس اقدام سے ریگولیٹر پر عوام کے اعتماد میں اضافہ ہوتا ہے۔

وزیر صحت نے بتایا کہ وزارت صحت میں اصلاحاتی ایجنڈے پر عمل درآمد کو یقینی بنارہا ہوں ، اس اقدام سے بد عنوانی کی بجائے شفافیت کو فروغ ملے گا ، عوام کا ریگولیٹر سے ڈایریکٹ رابطے کو یقینی بنانے کیلے شکایتی ایپ بھی لانچ کی تھی۔

ان کا کہنا تھا کہ ڈریپ کو جدید خطوط پر استوار کرنے کیلے عملی اقدامات کو یقینی بنارہا ہوں اور ڈریپ کو انٹر نیشنل معیار کے مطابق بنانے کیلے مربوط اقدامات کیے جارہے ہیں۔

اسلام آباد : وزیر صحت ڈاکٹر ندیم جان نے دواؤں کی فراہمی بہتر بنانے کیلئے ہنگامی بنیاد پر رجسٹریشن کے احکامات جاری کر دیئے۔

تفصیلات کے مطابق جان بچانے والی دواؤں کی دستیابی یقینی بنانے کیلئے پیش رفت سامنے آئی ، وزیر صحت ڈاکٹر ندیم جان نے دواؤں کی فراہمی بہتر بنانے کیلئے ہنگامی بنیاد پر رجسٹریشن کے احکامات جاری کر دیئے۔

ڈاکٹر ندیم جان نے کہا کہ درآمد ،مقامی مینوفیکچرنگ کیلئے اینٹی کینسر دواؤں کی بھی منظوری دی گئی ، ڈریپ نے بیہوشی کےانجکشن ،اینٹی کینسر دواؤں کی رجسٹریشن کی منظوری دیدی۔

وزیرصحت نے مزید بتایا کہ انفلوئنزاویکسینز،ہیپارن ،اینوکسیپارن انجکشنزکی رجسٹریشن سمیت نئی اینٹی ذیابیطس دوا ،سیماگلوٹائڈ انجکشن کی رجسٹریشن کی منظوری دی گئی۔

ترجمان وزارت صحت کا کہنا تھا کہ ڈریپ نے ترجیحی بنیادپررجسٹریشن کےکیسزکو منظور کیا ہے رجسٹریشن سے شوگر ،مرگی ،اینٹی کینسر دواؤں، اینٹی کینسرشوگر،جان بچانیوالی دواؤں کی فراہمی میں مددملے گی۔

اسلام آباد: سابق وزیر خزانہ مفتاح اسماعیل کا پیپلزپارٹی میں شمولیت کا امکان ہے۔

تفصیلات کے مطابق پیپلزپارٹی (پی پی) کے ذرائع نے دعوی کیا ہے کہ انکی جماعت کے سابق ن لیگی رہنما اور وفاقی وزیر خزانہ رہنے والے مفتاح اسماعیل سے معاملات طے پانے والے ہیں، مفتاح اسماعیل جلد پیپلزپارٹی میں شمولیت کا باضابطہ اعلان کریں گے۔

ذرائع کا کہنا ہے کہ مفتاح اسماعیل کی ممکنہ شمولیت کے معاملے پر پیپلزپارٹی قیادت کو اعتماد میں لیا گیا، پارٹی قیادت کی منظوری کے بعد مفتاح اسماعیل سے رابطوں کا آغاز کیا گیا۔

ذرائع کے مطابق پیپلزپارٹی کے سینئر رہنماؤں کا وفد گذشتہ ڈیڑھ ماہ سے مفتاح اسماعیل سے رابطے میں ہے۔

مفتاح اسماعیل ن لیگ کی گذشتہ حکومت کے دوران شاہد خاقان عباسی کی کابینہ میں بطور وزیر خزانہ کام کر چکے ہیں، مفتاح اسماعیل کو 2022 میں دوبارہ وزیر خزانہ مقرر کیا گیا تھا تاہم سینیٹر اسحاق ڈار کی لندن سے آمد سے قبل مفتاح اسماعیل وزیر خزانہ کے عہدے سے مستعفی ہو گئے تھے۔

مفتاح اسماعیل جون 2023 میں مسلم لیگ ن کے پارٹی عہدوں سے مستعفی ہوتے ہوئے سیاست کو خیرباد کہنے کا اعلان کیا تھا۔

اسلام آباد: پیپلزپارٹی نے الیکشن میں ن لیگ سے سیٹ ایڈجسٹمنٹ نہ کرنے کا فیصلہ کرلیا اور کہا کہ ن لیگ سے سیٹ ایڈجسٹمنٹ میں فائدہ کم نقصان زیادہ ہے۔

تفصیلات کے مطابق پیپلزپارٹی نے الیکشن میں ن لیگ سے سیٹ ایڈجسٹمنٹ نہ کرنے کا فیصلہ کرلیا ، ذرائع نے بتایا کہ ملک بھر میں کسی حلقہ پر ن لیگ سے سیٹ ایڈجسٹمنٹ نہیں ہو گی۔

ذرائع کا کہنا تھا کہ بعض رہنماؤں نے ن لیگ سے ایڈجسٹمنٹ کی تجویز دی تھی، جس کے بعد پی پی قیادت نے ن لیگ سے سیٹ ایڈجسٹمنٹ پر پارٹی کی رائے لی تاہم صوبائی پارٹی رہنماؤں نے ن لیگ سے سیٹ ایڈجسٹمنٹ تجویزمسترد کردی۔

پی پی ذرائع نے کہا کہ ن لیگ سے سیٹ ایڈجسٹمنٹ میں فائدہ کم نقصان زیادہ ہے، الیکشن میں ن لیگ سے سیٹ ایڈجسٹمنٹ گھاٹے کا سودا ہے کیونکہ پی ڈی ایم حکومت کانزلہ آئندہ الیکشن میں ن لیگ پرگرے گا۔

ذرائع نے بتایا کہ ن لیگ وسطی پنجاب میں پی پی سے سیٹ ایڈجسٹمنٹ پر رضامند نہیں، ن لیگ پنجاب سے زیادہ سے زیادہ قومی، صوبائی نشستیں چاہتی ہے اور پنجاب میں ایڈجسٹمنٹ ہونے پرن لیگ سندھ میں سیٹیں مانگےگی۔

ذرائع کا کہنا تھا کہ ن لیگ ایڈجسٹمنٹ پر سندھ میں 10سے زائد سیٹیں مانگ سکتی ہے لیکن پیپلزپارٹی سندھ سے ایک سیٹ چھوڑنے کی پوزیشن میں نہیں ہے، پیپلزپارٹی سندھ حکومت کی کارکردگی کی بنیاد پر ماضی سے زیادہ سیٹیں لے گی۔

پی پی ذرائع کے مطابق کراچی سے قومی اسمبلی کی 6سیٹیں جیتناپیپلزپارٹی کا ہدف ہے۔

پشاور: ڈرگ ریگولیٹری اتھارٹی آف پاکستان (ڈریپ) نے  پشاور میں ممنوعہ، روایتی سرنج ساز فیکٹری پر چھاپہ مار کارروائی کی ہے۔

تفصیلات کے مطابق ڈرگ ریگولیٹری اتھارٹی نے پشاور کے میسرز تاج کمپنی میں بڑی کارروائی کرتے ہوئے گودام سے ممنوعہ، روایتی سرنجز کی بڑی تعداد برآمد کرلی۔

ڈرگ ریگولیٹری اتھارٹی پاکستان کے چیف ایگزیکٹیو آفیسر ڈاکٹر عاصم رؤف نے بتایا کہ میسرز تاج کمپنی کو منظور شدہ سرنجز سازی کی ہدایت کر چکی تھی جس کے بعد کمپنی کے گودام پر چھاپہ مارا گیا جہاں سے ممنوعہ، روایتی سرنجز کی بھاری مقدار برآمد کرلی گئی ہے۔

 ڈاکٹر عاصم رؤف کے مطابق میسرز تاج اینڈ کمپنی ممنوعہ و روایتی سرنجز تیار کر رہی تھی، چھاپہ مارکیٹ میں ممنوعہ روایتی سرنجز دستیابی کی اطلاع پر مارا ہے۔

ڈاکٹر عاصم رؤف کا کہنا ہے کہ فیڈرل ڈریپ ٹیم نے بھاری مقدار میں ممنوعہ سرنجز قبضے میں لیں اور ملزمان کیخلاف قانون کے مطابق کاروائی کا آغاز کر دیا ہے،

ڈاکٹر عاصم رؤف نے مزید کہا کہ حکومت ملک سے جعلی ادویات کے خاتمے کیلیے پر عزم ہے، عوام کی جانوں سے کھیلنے کی ہرگز اجازت نہیں دی جائے گی، عوام کو معیاری اور طبی سہولیات کی فراہمی ہمارا مشن ہے۔