Author: جہانگیر خان

اسلام آباد : رواں سال کی آخری قومی انسداد پولیو مہم کا آغاز ہو گیا، مہم کے دوران چارکروڑ43 لاکھ55 ہزار341 بچوں کو پولیو سے بچاؤ کے قطرے پلائے جائیں گے۔

تفصیلات کے مطابق رواں سال کی آخری قومی انسداد پولیو مہم کا آغازہوگیا، جو تین دسمبر تک جاری رہے گا۔

قومی انسداد پولیو مہم کا آخری فیز 27 نومبر سے 3 دسمبر تک چلے گا، قومی انسداد پولیو مہم کا تیسرا فیز سات روز میں مکمل ہو گا۔ت

قومی انسداد پولیو مہم کا آخری فیز میں تین لاکھ سے زائد پولیو ورکرز خدمات انجام دے رہے ہیں، تیسرا فیز سات روز میں مکمل ہوگا۔

تیسرے فیزمیں پانچ روزہ مہم جبکہ دو کیچ اپ ڈیز ہوں گے جبکہ کیچ اپ ڈیز میں رہ جانے والے بچوں کی پولیو ویکسینیشن کی جائے گی۔

ذرائع نے بتایا کہ 4کروڑ 43 لاکھ پچپن ہزار تین سو اکتالیس بچےمہم کا ہدف ہیں، مہم میں بلوچستان، پنجاب اور خیبرپختونخوا کےچھتیس چھتیس اضلاع میں بالترتیب پچیس لاکھ ستانوے ہزار، دو کروڑ پچیس لاکھ پینسٹھ ہزار اور چوہتر لاکھ چہتر ہزار بچوں کو انسدادپولیو کے قطرے پلائے جائیں گے۔

سندھ کے تیس اضلاع ایک کروڑ انتیس لاکھ پانچ ہزار اور اسلام آباد میں چارلاکھ اکیس ہزاربچوں کوپولیوسےبچاؤکےقطرے پلائےجائیں گے۔

آزادکشمیر اور گلگت بلتستان کے دس دس اضلاع میں قومی پولیو مہم چلائی جائے گی اور آزاد کشمیرمیں سات لاکھ بیس ہزار سے زائد بچوں کی پولیو ویکسی نیشن ہوگی۔

اسلام آباد : ایک دہائی گزرنے کے بعد کیپیٹل اسپتال کی کیتھ لیب فعال ہوگئی اور کیتھ لیب کا باقاعدہ آغاز ہو گیا ہے۔

تفصیلات کے مطابق وفاقی ترقیاتی ادارے نے شعبہ صحت کا اہم سنگ میل عبور کرلیا، ایک دہائی گزرنے کے بعد کیپیٹل اسپتال کی کیتھ لیب فعال ہوگئی۔

ایگزیکٹو ڈائریکٹر کیپیٹل اسپتال ڈاکٹر فضل مولا نے کیتھ لیب کا افتتاح کیا، اس موقع پر ڈاکٹر فضل مولا نے کہا کہ کیپیٹل اسپتال میں کیتھ لیب کا باقاعدہ آغاز ہو گیا ہے، افتتاحی روز3اینجیوپلاسٹی کی ہیں۔

سربراہ کیپیٹل اسپتال کا کہنا تھا کہ کیپیٹل اسپتال میں کیتھ لیب کا قیام دیرینہ خواب تھا، کیپیٹل اسپتال کا شعبہ کوکلیئر امپلانٹس مکمل فعال ہے، کیتھ لیب فنکشنل کرنے کا سہرا اسپتال ٹیم کو جاتا ہے۔

ذرائع نے بتایا کہ کیپیٹل اسپتال انتظامیہ نے کیتھ لیب فنکشنل کرنے کا فیصلہ کیا۔

اسلام آباد : پیپلزپارٹی نے آئندہ عام انتخابات میں وفاق اور صوبوں میں کسی جماعت سے اتحاد نہ کرنے کا فیصلہ کرلیا۔

تفصیلات کے مطابق پیپلزپارٹی نےآئندہ عام انتخابات میں سولو فلائٹ لینے کا فیصلہ کرلیا، ذرائع نے کہا ہے کہ پیپلزپارٹی کسی سیاسی جماعت سے انتخابی اتحاد نہیں کرے گی۔

ذرائع کا کہنا ہے کہ پیپلزپارٹی کا وفاق ،صوبوں میں کسی جماعت سے اتحاد نہیں ہو گا، پیپلزپارٹی الیکشن کے بعد حکومت سازی میں اتحاد پر غور کر سکتی ہے۔

ذرائع نے کہا ہے کہ پیپلزپارٹی وفاق، صوبوں میں سیٹ ایڈجسٹمنٹ کر غور کر سکتی ہے، اے این پی کے ساتھ کے پی اور کراچی میں سیٹ ایڈجسٹمنٹ ہو سکتی یے جبکہ کے پی میں آزاد امیدوار اور پی ٹی آئی سے سیٹ ایڈجسٹمنٹ ہو سکتی ہے۔

پارٹی ذرائع کا کہنا تھا کہ پیپلزپارٹی کا ماضی میں انتخابی اتحاد کا تجربہ خوشگوار نہیں رہا اور ماضی میں انتخابی اتحاد کا خمیازہ الیکشن میں بھگتا ہے اور اتحاد کی صورت پی پی کو الیکشن میں شدید نقصان اٹھانا پڑتا ہے۔

ذرائع کے مطابق انتخابی اتحاد کرنے پر پی پی کا ووٹرز متنفر اور ٹوٹ جاتا ہے، پی پی ووٹر انتخابی اتحاد ہونے پر مشترکہ امیدوار کو ووٹ نہیں دیتا، پنجاب میں ن لیگی ووٹر پی پی کے مشترکہ امیدوار کو ووٹ نہیں دیتا۔

پنجاب میں پی ٹی آئی ووٹر ن لیگ، پی پی کو ووٹ نہیں دے گا، کے پی میں پی ٹی آئی ووٹر جے یو آئی، پی پی کو ووٹ نہیں دے گا۔

اسلام آباد : ڈرگ ریگولیٹری اتھارٹی (ڈریپ) نے’وینا سیرپ‘کا پراڈکٹ ریکال الرٹ جاری کردیا ، جس میں خبردار کیا ہے کہ غیرمعیاری ویناسیرپ کے استعمال سےطبیعت خراب ہو سکتی ہے۔

تفصیلات کے مطابق ڈرگ ریگولیٹری اتھارٹی (ڈریپ) نے اینیمیا کےعلاج کی دوا کا ایک بیچ غیر معیاری قرار دے دیا اوت وینا سیرپ کا پراڈکٹ ریکال الرٹ جاری کردیا۔

جس میں کہا ہے کہ سینٹرل ڈرگ لیب کراچی نے وینا سیرپ کابیچ غیرمعیاری قرار دیا ہے، وینا سیرپ کا بیچ کے ایل 090 کو غیر معیاری قرار دیا گیا ہے، وینا سیرپ 2 اجزا سے تیار کردہ خون کی کمی پوری کرنےکی دوا ہے اور سوات فارما سیوٹیکل سیدو شریف کا تیار کردہ ہے۔

غیرمعیاری وینا سیرپ کے استعمال سے طبیعت خراب ہو سکتی ہے اور اس کے غیر معیاری ہونےکی وجہ سے وینا سیرپ ری ایکشن کرسکتا ہے، جس سے درد معدہ، قبض، قے ، اسہال، قے اور غنودگی ہو سکتی ہے۔

ڈریپ نے کمپنی کو وینا سیرپ کا متاثرہ بیچ مارکیٹ سپلائی سے روک دیا اور کمپنی کو وینا سیرپ کا متاثرہ بیچ مارکیٹ سے اٹھانے کی ہدایت کردی ہے۔

ڈریپ الرٹ میں کہا گیا ہے کہ کیمسٹ ویناسیرپ کے متاثرہ بیچ کی سیل روکنے کیلئے اسٹاک چیک کریں، کیمسٹ وینا سیرپ کا متاثرہ بیچ فارما کمپنی کو واپس کریں اور ڈاکٹرز مریضوں کو وینا سریپ کا متاثرہ بیچ استعمال نہ کریں ، ساتھ ہی ڈریپ کی صوبائی ٹیمیں میڈیسن مارکیٹ میں سرویلنس بڑھائیں۔

کراچی: پیپلز پارٹی نے عام انتخابات میں کراچی میں کسی جماعت سے اتحاد نہ کرنے کا فیصلہ کیا ہے۔

تفصیلات کے مطابق پیپلزپارٹی کراچی میں کسی جماعت سے انتخابی اتحاد نہیں کرے گی، انتخابی اتحاد کرنے پر پیپلزپارٹی کو ووٹ تقسیم ہونے کا خدشہ ہے اس بنا پر پارٹی نے کسی بھی جماعت سے اتحاد نہ کرنے کا فیصلہ کیا ہے۔

پیپلز پارٹی ذرائع کا بتانا ہے کہ کراچی میں مختلف حلقوں پر سیٹ ایڈجسٹمنٹ ممکن ہے، پیپلزپارٹی کراچی میں اے این پی کے ساتھ سیٹ ایڈجسٹمنٹ کر سکتی ہے۔

پارٹی ذرائع کا کہنا ہے کہ اے این پی کی خواہش پر کراچی میں سیٹ ایڈجسٹمنٹ پر غور ہو سکتا ہے لیکن پیپلزپارٹی کراچی میں اے این پی کو سیٹ ایڈجسٹمنٹ کی آفر نہیں کرے گی۔

پی پی ذرائع کا یہ بھی کہنا تھا کہ کراچی میں ن لیگ، ایم کیو ایم کے اتحاد سے پیپلز پارٹی کو خطرہ نہیں، سندھ میں ایم کیو ایم کا ن لیگ سے انتخابی اتحاد پانی کا بلبلہ ہے، کراچی میں ن لیگ کا قابل زکر ووٹ بینک نہیں ہے۔

’’ اس لیے ن لیگ کراچی یا سندھ کی کسی سیٹ پر پیپلزپارٹی کیلئے نقصان دہ نہیں، ن لیگ کسی نشست پر ایم کیو ایم کو جتوانے کی پوزیشن میں نہیں ہے، کراچی میں پی پی، ایم کیو ایم کے بعد اے این پی کا ووٹ اہمیت رکھتا ہے‘‘۔

پی پی ذرائع کا مزید کہنا ہے کہ پیپلزپارٹی کے پاس کراچی کے تمام حلقوں پر امیدوار موجود ہیں، پی پی کی اے این پی سے سیٹ ایڈجسٹمنٹ ایم کیو ایم کیلئے نقصان دہ ہو گی۔