Author: جہانگیر خان

ڈرگ ریگولیٹری اتھارٹی (ڈریپ) نے لاہور کے نجی اسپتال میں بڑی کارروائی کرتے ہوئے بیرون ملک ‏سے کورونا کی ادویات اسمگل کرنے والے گروہ کو پکڑ لیا۔

سی ای او ڈریپ کے مطابق پنجاب ڈرگ کنٹرول یونٹ اور ڈرپ نے مشترکہ کارروائی کر کے گروہ ‏سے کورونا کی اسمگل شدہ مختلف ادویات برآمد کر لیں۔

سی ای او ڈریپ ڈاکٹر عاصم کا کہنا ہے کہ ملزم سے ایکٹمرا، پریوینر ویکسین، ایمفوٹیریسین ‏انجکشنز اور بھارتی ساختہ ادویات برآمد ہوئی ہیں، گرفتار ملزم کے مطابق گروہ کے پاس ادویات ‏کاوافرسٹاک ہے گروہ رکن اسپتال میں مریض کو ادویات دینے آیا تھا۔

بتایا گیا ہے کہ اسمگلر گروہ کے خلاف کارروائی خفیہ اطلاع پر کی گئی ہے گروہ کے ایجنٹس ‏اسپتالوں میں سمگل کورونا ادویات پہنچاتے تھے گروہ کورونا کی اسمگل ادویات کئی گنا مہنگے ‏داموں فروخت کرتا تھا، ملزمان ایکٹمرا انجکشن ایک تا ڈیڑھ لاکھ میں فروخت کرتے تھے جب کہ ‏ایکٹمرا انجکشن کی سرکاری قیمت 60000 مقرر ہے۔

سی ای او ڈریپ کا کہنا ہے کہ غیر قانونی ادویات بیچنے والوں کے خلاف کارروائیاں جاری رہیں گی ‏ان میں بھارتی ساختہ ادویات بھی شامل ہیں جو ڈیلٹا ویئرئنٹ میں ہونے والے بلیک فنگس میں ‏استعمال ہوتی ہیں ۔

اسلام آباد ہائیکورٹ نے کچی آبادیوں کے خلاف آپریشن روکنے کا حکم دے دیا۔

تفصیلات کے مطابق اسلام آباد کی کچی آبادی میں کسی قسم کے آپریشن پر اسلام آباد ہائی کورٹ ‏نے حکم امتناع جاری کر دیا۔

کچی آبادی پر چیئرمین سی ڈی اے ڈی جی فیڈرل گورنمنٹ ایمپلائز ہاؤسنگ اتھارٹی سے تفصیلی ‏جواب طلب کیا گیا ہے۔

اسلام آباد ہائی کورٹ نے حکم دیا ہے کہ کیس کی اگلی سماعت تک ضلعی انتظامیہ کچی آبادی ‏میں کسی قسم کا آپریشن نہ کرے۔

چیف جسٹس اطہر من اللہ نے کہا کہ ورکنگ کلاس اسلام آباد کی زمین باقی شہریوں کی طرح ‏کیوں نہیں ایکوائر کرسکتی؟ متوسط طبقہ کچی آبادیوں میں چار دہائیوں سے آباد ہے انہیں ‏سہولیات کیوں نہیں مل سکتی۔

ہائی کورٹ نے اٹارنی جنرل پاکستان، وائس چیئرمین پاکستان بار کونسل کو اگلے سماعت پر طلب ‏کرلیا ہے۔

واضح رہے کہ چیف جسٹس اطہر من اللہ نے شہری نذر خان کی درخواست پر عبوری حکمنامہ ‏جاری کیا ہے۔

اسلام آباد ہائیکورٹ کے چیف جسٹس اطہر من اللہ کا بڑا فیصلہ، چیف جسٹس اسلام آباد ہائی ‏کورٹ نے معلومات تک رسائی قانون کے تحت چیف جسٹس اور دیگر ججز کو ملنے والی مراعات ‏سے متعلق تفصیلات جاری کردیں۔

رجسٹرار آفس کی طرف سے سیکرٹری وزارت قانون کو لکھے گئے خط میں کہاگیاہےکہ اسلام آباد ‏ہائی کورٹ کےچیف جسٹس اور ججز میں نہ گورنمنٹ اسکیم نہ کسی اور اسکیم میں پلاٹ کے لیے ‏اپلائی کیا نہ پلاٹ الاٹ ہوا،پاکستان انفارمیشن کمیشن کے فیصلے کے مطابق شہری کو چیف ‏جسٹس ،ججز کی مراعات کی معلومات شئیر کریں۔

شہری نے چیف جسٹس اور سپریم کورٹ اور اسلام آباد ہائی کورٹ کے ججز کی مراعات سے متعلق ‏معلومات کی درخواست دی تھی،پاکستان انفارمیشن کمیشن نے2جون کو فیصلہ دیا شہری کو ‏معلومات تک رسائی قانون کے تحت معلومات دی جائیں، پاکستان انفارمیشن کمیشن کا مراعات کی ‏معلومات شئیر کرنے کا پیراگراف خط کا حصہ ہیں، پاکستان انفارمیشن کمیشن کے فیصلے پر عمل ‏کرتے ہوئے متعلقہ معلومات شہری کو دیں جائیں۔

چیف جسٹس اور ہائی کورٹ کے ججز کے ( ‏Perks and Privileges‏) صدراتی آرڈر کے ذریعے ہوتے ‏ہیں،ججز مراعات کے صدارتی آرڈرز کو اسلام آباد ہائی کورٹ کی ویب سائٹ پر پبلک کردیا گیا ہے، ‏صدارتی آرڈر میں چیف جسٹس اور ججز کی ریٹائرمنٹ کے بعد کی مراعات کی تفصیلات بھی ‏شامل ہیں، ججز مراعات کے صدراتی آرڈیننس کے مطابق چیف جسٹس ہائی کورٹ کی تنخواہ8 لاکھ ‏‏63 ہزار 69 روپے ہے جبکہ ہائی کورٹ کے ہر جج کی تنخواہ 8 لاکھ 29 ہزار8 سو75 روپے ہے۔

اسلام آباد: نیشنل کمانڈ اینڈ آپریشن سینٹر(این سی او سی) نے ملک میں کورونا وائرس کے حوالے سے نئی پابندیوں کا نوٹی فکیشن جاری کردیا ہے۔

تفصیلات کے مطابق ملک کے مخصوص شہروں کے لیے این سی او سی کی پابندیوں کا اطلاق آج سے ہوگا۔ کورونا کی نئی پابندیوں کا اطلاق لاہور، راولپنڈی فیصل آباد، ملتان، پشاور، ایبٹ آباد، مظفر آباد، میرپور اور اسلام آباد پر ہوگا۔ سندھ حکومت کی جانب سے کراچی اور حیدر آباد میں سخت پابندیاں ہیں۔

نوٹی فکیشن میں کہا گیا ہے کہ مخصوص شہروں میں کاروباری سرگرمیاں رات 8 بجے تک ہوں گی، مخصوص شہروں میں کاروبار ہفتہ وار 2روز بند رہیں گے، ہفتہ وار بندش کے لیے 2دنوں کا انتخاب صوبوں کی صوابدید ہے۔

نیشنل کمانڈ اینڈ آپریشن سینٹر کے نوٹی فکشن کے مطابق پیڑول پمپس، فارمیسی اور ویکسینیشن سنٹرز، کھلے رہیں گے، اشیائے خوردونوش کی دکانیں بھی کھلی رہیں گی، 13 مخصوص شہروں میں انڈور ڈائننگ پر مکمل پابندی ہوگی، آؤٹ ڈور ڈائننگ کی رات 10 بجے تک اجازت ہوگی۔

سندھ لاک ڈاؤن، این سی او سی کا فضائی آپریشن، ٹرین سروس اور وفاقی ادارے کھلے رکھنے کا اعلان

این سی او سی کا کہنا ہے کہ ریسٹورینٹس میں ٹیک اوے پر پابندی نہیں ہوگی، 8 اگست سے ان ڈور شادی تقریبات پرپابندی عائد کی ہے، 400افراد کے ساتھ آؤٹ ڈور تقریب کی رات10 بجے تک اجازت ہے۔

نوٹی فکیشن کے تحت مخصوص شہروں میں مزارات اور سینما گھر مکمل بند رہیں گے۔ مخصوص شہروں میں انڈور سماجی، مذہبی اور تفریحی اجتماعات پر پابندی ہوگی۔ 400افراد کے آؤٹ ڈور مذہبی، سماجی اور تفریحی اجتمات کی اجازت ہوگی۔ 13شہروں میں سرکاری اور نجی دفاتر میں 50 فیصد عملہ کام کرے گا۔