Author: جہانگیر خان

پاکستان مسلم لیگ ن اور پیپلز پارٹی کے مذاکرات میں اہم پیش رفت ہوئی ہے اور گورنر پنجاب کی گاڑی تبدیل کرنے کی یقین دہانی کرا دی گئی ہے۔

اے آر وائی نیوز کو ذرائع سے ملنے والی اطلاعات کے مطابق پاکستان مسلم لیگ ن اور پاکستان پیپلز پارٹی کے درمیان جاری مذاکرات میں اہم پیش رفت سامنے آئی ہے۔

ذرائع نے بتایا ہے کہ گورنر پنجاب سلیم حیدر کی پرانی گاڑی کا مسئلہ حل ہو گیا ہے اور ن لیگ نے ان کی پرانی گاڑی تبدیل کرنے کی یقین دہانی کرا دی ہے۔

ذرائع کا کہنا ہے کہ پیپلز پارٹی نے گورنر پنجاب کی گاڑی پرانی ہونے کا شکوہ کیا تھا، جس پر ن لیگ نے اپنی حلیف جماعت کو گاڑی تبدیل کرنے کی یقین دہانی کرائی۔

ذرائع کے مطابق ن لیگ نے پیپلز پارٹی کو گورنر پنجاب کی دیگر شکایات بھی جلد دور کرنے کی یقین دہانی کرا دی ہے۔

ذرائع نے بتایا کہ مذاکرات کے اس دور میں ن لیگ نے گورنر پنجاب کے آبائی حلقے میں سیاسی اور انتظامی مداخلت نہ کرنے اور انتخابی ضلع سے متعلقہ تمام شکایات دور کرنے کی بھی یقین دہانی کرائی ہے۔

ذرائع کا کہنا ہے کہ گورنر پنجاب کے بیشتر تحفظات جلد دور ہونا شروع ہو جائیں گے اور پنجاب حکومت اٹک میں ترقیاتی کاموں کیلیے خصوصی فنڈز جاری کرے گی۔

اسلام آباد : وفاقی دارالحکومت کے اسپتالوں کو مرحلہ وار شمسی توانائی پر منتقل کرنے کا فیصلہ کرلیا گیا۔

تفصیلات کے مطابق وفاقی دارالحکومت کے اسپتالوں کو شمسی توانائی پر منتقل کرنے کا فیصلہ کرلیا گیا۔

ذرائع نے بتایا کہ اسلام آباد کے اسپتالوں کو مرحلہ وار شمسی توانائی پر منتقل کیا جائےگا، پہلےمرحلے میں پمز اسپتال، پولی کلینک اور دوسرے مرحلے این آئی آر ایم ، ایف جی اسپتال سولر پر منتقل ہوں گے۔

ذرائع کا کہنا تھا کہ وزارت صحت نے پمز،پولی کلینک سے سولر ائزنگ پلان مانگ لیا، پمز،پولی کلینک سولرائزیشن منصوبہ آئندہ پی ایس ڈی پی میں شامل ہو گا۔

پی ایس ڈی پی میں پمز، پولی کلینک سولرئزایشن منصوبے کیلئے فنڈز مختص ہوں گے ، پمز اسپتال، پولی کلینک انتظامیہ سولر توانائی منتقلی پلان تیارکر رہی ہیں، سولر پر منتقلی سے بلوں کی مد میں کثیر بچت ہو گی۔

ذرائع وزارت صحت کا بتانا تھا کہ پمز اسپتال کا ماہانہ بجلی بل 3 کروڑ روپے سے زائد اور پولی کلینک اسپتال کا ماہانہ بجلی بل 70لاکھ روپے سے زائد آتا ہے، ماضی میں عدم ادائیگی پرمتعددبار پمز، پولی کلینک کی بجلی منقطع ہو چکی ہے۔

اسلام آباد : نجی میڈیکل وڈینٹل کالجز میں داخلے کے خواہشمند طلبا کی بڑی مشکل آسان ہوگئی ، فیسوں کے حوالے سے جلد ریلیف کا امکان ہے۔

تفصیلات کے مطابق نجی میڈیکل وڈینٹل کالجز کی فیسوں میں کمی کیلئے سفارشات کو حتمی شکل دے دی گئی، ذرائع نے کہا کہ پی ایم ڈی سی کونسل نے فیسوں سےمتعلق سفارشات کی منظوری دی۔

نجی میڈیکل کالجز کی فیسوں سےمتعلق سفارشات خصوصی کمیٹی کو ارسال کردی گئی ہے، فیسوں کا اعلان نائب وزیراعظم جلدکریں گے، اسحاق ڈارمیڈیکل ایجوکیشن سےمتعلق خصوصی کمیٹی کےسربراہ ہیں۔

ذرائع نے بتایا کہ میڈیکل کالج کی کم ازکم فیس حد 18 لاکھ مقرر کرنے اور زیادہ سے زیادہ سالانہ فیس 25 لاکھ رکھنے کی سفارش کی گئی ہے۔

ذرائع کا کہنا تھا کہ نجی میڈیکل، ڈینٹل کالج کی فیس میں سالانہ 5 فیصد اضافہ ہوگا، میڈیکل، ڈینٹل کالجز کے نمائندے فیس سفارشات سے متفق ہیں۔

نجی میڈیکل کالجز کےٹیچنگ اسپتال کے 35 فیصد بیڈز سوشل ویلفیئر کیلئے مختص ہوں گے جبکہ کالجز سالانہ 5 اسکالر شپس دینے کے پابند ہوں گے۔

ذرائع کے مطابق نجی میڈیکل کالج میں 10 فیصد نشستیں غیر ملکی طلبا کیلئے ہوں گی اور غیر ملکی طلبا کی فیس 15 ہزار ڈالر رکھنے اور اوورسیز پاکستانیوں کا کوٹہ 15 فیصد رکھنے کی تجویز ہے۔

میڈیکل کالجز کی نادار طلبا سے قسط وار فیس وصولی کی تجویز شامل ہیں ، سالانہ 12 تا 15 لاکھ فیس کی تجویز آئی، جسے نجی میڈیکل کالجز نمائندوں نے مسترد کر دیا تھا، نجی میڈیکل کالجز 25 تا 35 لاکھ روپے سالانہ فیس لے رہے ہیں۔

اسلام آباد : حکومت نے فارمیسی کے نئے ادارے کھولنے پر پابندی لگانے کا فیصلہ کرلیا، پابندی کا فیصلہ زائد فارمیسی ادارے، فیکلٹی کمی، غیر معیاری تعلیم پر ہوا۔

تفصیلات کے مطابق حکومت نے فارمیسی کے نئے ادارے کھولنے پر پابندی لگانے کا فیصلہ کرتے ہوئے ملک بھر میں نئے فارمیسی اسکول اور کالجز کھولنے پر پابندی عائد کردی۔

ذرائع نے کہا کہ فارمیسی اسکول، کالجز کھولنے پر ایک سال کیلئے پابندی عائد ہوئی ہے ، فارمیسی ادارے کھولنے پر پابندی میں مزید توسیع کا امکان ہے۔

پابندی کا فیصلہ زائد فارمیسی ادارے، فیکلٹی کمی، غیر معیاری تعلیم پر ہوا، اس حوالے سے فارمیسی کونسل پاکستان نے صوبائی دفاتر کو مراسلہ ارسال کر دیا ہے۔

پی سی پی کے یکم مارچ کے 62 ویں اجلاس میں پابندی کا فیصلہ ہوا، فارمیسی اسکول، کالجز کھولنے پر پابندی کا نفاذ 31 مئی سے ہوگا۔

ذرائع نے کہا کہ پی سی پی 30 مئی کے بعد این او سی درخواستوں پر غور نہیں کرے گی، 30 مئی سے قبل کی فارمیسی سکول، کالجز کی درخواستوں پر غور ہوگا۔

مراسلے میں کہا گیا کہ ملک میں فارمیسی انسٹیٹیوٹ کی تعداد غیر موزوں ہے، متعدد ادارے فارمیسی ایجوکیشن کے معیار پر سمجھوتہ کر رہے ہیں۔

ملک میں متعدد فارمیسی سکول، کالجز کو فیکلٹی کی کمی کا سامنا ہے، فارمیسی سکول، کالجز کو الاٹ کردہ سیٹوں کی تعداد غیر متناسب ہے، گریجویٹ فارماسسٹ ملکی ضرورت پوری کرنے کیلئے ناکافی ہے۔

فارمیسی شعبہ میں بیروزگاری خطرناک سطح کو چھو رہی ہے، کورسز جدید عصری تقاضوں سے ہم آہنگ نہیں ہیں، فارمیسی کورسز طلبا کی فنی مہارت یقینی بنانے کیلئے ناکافی ہیں، ٹیکنیشن کورسز کرانے والے اداروں کی تعداد 7 سو سے زائد اور فارما ڈی کورسز کرانے والے اداروں کی تعداد 2 سو سے زائد ہے۔