نیو یارک: سکھوں کی عالمی تنظیم سکھ فار جسٹس نے مقبوضہ جموں و کشمیر کے ضلع پہلگام میں سیاحوں پر حملے کے حوالے سے بیان جاری کر دیا۔
رہنما سکھ فار جسٹس گرپتونت سنگھ پنوں نے اپنے بیان میں کہا کہ ضلع پہلگام میں ہندوؤں کا قتل بھارتی ایجنسی ’را‘ کا آپریشن تھا، مودی حکومت اور بھارتی ایجنسی کی دہشتگردی کی مذمت کرتے ہیں۔
گرپتونت سنگھ پنوں نے کہا کہ مقبوضہ جموں و کشمیر میں دہشتگردی بھارتی ایجنسیوں کا ممکنہ جھوٹا آپریشن ہے، پہلگام دہشتگردانہ حملے سے کس کو فائدہ ہوا؟ کیا ہندوؤں کا قتل مقبوضہ جموں و کشمیر کی آزادی کا باعث بنتا ہے؟
یہ بھی پڑھیں: مقبوضہ کشمیر میں سیاحوں پر حملہ، پاکستان کا ردعمل آگیا
انہوں نے مزید کہا کہ اس جھوٹے آپریشن کا فائدہ صرف نریندر مودی کو ہوا، سکھ ہونے کی حیثیت سے ہم اس درد کو جانتے ہیں، سابق امریکی صدر کلنٹن کے دورے کے دوران بھی بھارتی ایجنسیوں نے ایسا ہی ڈرامہ رچایا تھا۔
گزشتہ روز مقبوضہ جموں و کشمیر میں فائرنگ کے نتیجے میں 26 سیاح ہلاک جبکہ 8 زخمی ہوگئے، فائرنگ کا واقعہ بائی سرن وادی میں پیش آیا تھا۔
سیاحوں پر حملہ اُس وقت کیا گیا جب امریکی نائب صدر بھی بھارت کا دورہ کر رہے ہیں۔ اس سے پہلے بھی مودی حکومت سیاسی فائدہ حاصل کرنے کیلیے آپریشن کا ڈرامہ رچاتی رہی ہے، مودی حکومت اپنی ناکامیوں پر پردہ ڈالنے کیلیے متعدد بار فالس فلیگ آپریشن کاڈرامہ رچا چکی ہے۔
حملے کے فوراً بعد بھارتی میڈیا اور خفیہ ایجنسی را سے جڑے سوشل میڈیا اکاؤنٹس نے پاکستان کے خلاف زہر اُگلنا شروع کر دیا، حملے میں مذہب کا استعمال کرتے ہوئے غیر مسلموں کو نشانہ بنانے کا ڈرامہ بھی کیا گیا۔
مقبوضہ وادی میں سیاحوں پر حملے کے بعد حسبِ روایت بھارتی میڈیا کی جانب سے من گھڑت پروپیگنڈا جاری ہے۔
