اقوام متحدہ کی سلامتی کونسل نے روس مخالف تمام ترامیم مسترد کرتے ہوئے یوکرین سے متعلق امریکی قرارداد منظور کرلی۔
چین، امریکا، پاناما، پاکستان، الجیریا، کوریا اور روس نے قرارداد کے حق میں ووٹ دیئے، مجموعی طور پر قرارداد کے حق میں 10 ووٹ پڑے، فرانس ، برطانیہ، ڈنمارک،یونان سمیت 5ارکان غیرحاضر رہے۔
رپورٹ کے مطابق روس نے یوکرین سے متعلق امریکی قرارداد میں ترمیم کی یورپی کوشش کو ویٹو کردیا۔
اقوام متحدہ کی سیکیورٹی کونسل نے روس یوکرین جنگ کے تین سال مکمل ہونے کے موقع پر امریکہ کی تیار کردہ ایک قرارداد منظور کی ہے۔
غیر ملکی خبر رساں ادارے کی رپورٹ کے مطابق اقوام متحدہ میں پیر کو یوکرین، یورپی یونین کی مشترکہ قرار داد اور امریکا کی الگ قرار داد پر ووٹنگ ہوئی۔
روس نے سلامتی کونسل میں یوکرین سے متعلق امریکی قرارداد میں ترمیم کرنے کی کوشش کی تھی مگر اس میں ناکام رہا تھا۔
بعد میں روس نے سلامتی کونسل میں یوکرین سے متعلق امریکی قرارداد میں ترمیم کی یورپی کوشش کو ویٹو کردیا۔
امریکی قرارداد میں کہا گیا ہےکہ تنازع کا فوری خاتمہ اور یوکرین روس کے درمیان دیرپا امن قائم کیا جائے، اقوام متحدہ کا مرکزی کردار عالمی امن اور تنازعات کے خاتمے کو ممکن بنانا ہے۔
قرارداد میں روس کو نہ تو جارح کہا گیا بلکہ یوکرین روس تنازع قرار دیا گیا، قرارداد میں روسی فیڈریشن اور یوکرین کے درمیان تنازع کے دوران اموات پر اظہار افسوس کیا گیا۔
رپورٹ کے مطابق امریکی صدر ڈونلڈ ٹرمپ امن کے قیام کے لیے ثالثی کی کوششیں کر رہے ہیں۔ اب تک 15 رکنی کونسل اس تنازعے پر کوئی کارروائی نہیں کر سکی تھی کیونکہ روس ایک ویٹو پاور ہے۔
واضح رہے کہ امریکا نے اقوام متحدہ میں روس کے خلاف قرارداد کی مخالفت کی تھی، قرارداد میں روس کو یوکرین کی جنگ میں جارحانہ قرار دیا گیا تھا۔
بین الاقوامی میڈیا رپورٹس کے مطابق یوکرین میں جامع، منصفانہ، دیرپا امن آگے بڑھانا” کے عنوان سے قرارداد پیش ہوئی۔
مذکورہ قرارداد اقوام متحدہ کی جنرل اسمبلی میں پیش کی گئی جس کے حق میں 93 اور مخالفت میں 18 ووٹ پڑے جب کہ 65 ووٹر غیرحاضر رہے۔
