Author: جہانزیب علی

نیویارک : امریکی نائب وزیر خارجہ برائےجنوبی اوروسطی ایشیا ڈونلڈ لو کا کہنا ہے کہ پاکستان معاشی بحالی کے راستے پر گامزن ہے، امریکا چاہتا ہے کہ پاکستان کامیاب ہو۔

تفصیلات کے مطابق امریکی نائب وزیر خارجہ برائے جنوبی اور وسطی ایشیا ڈونلڈ لو نے اےآروائی نیوز سے خصوصی گفتگو میں کہا کہ پاکستان معاشی بحالی کےراستے پرگامزن ہے، پاکستان جس معاشی بحالی سے گزر رہا ہے اس سے ہمیں بہت حوصلہ ملا ہے۔

انھوں نے بتایا کہ وزیر خزانہ اورنگزیب سے تفصیلی ملاقات ہوئی، ملاقات میں معاشی منصوبے اوراصلاحات سے متعلق جاننے کا موقع ملا، یہ منصوبے آسان نہیں لیکن یہ پاکستان کا مستقبل ہے،ان منصوبوں سے پاکستان اپنی معیشت کو مستحکم کرے گا۔

امریکی نائب وزیر خارجہ برائے جنوبی اور وسطی ایشیا کا کہنا تھا کہ معیشت کی بحالی نہ صرف نوجوانوں بلکہ تمام پاکستانیوں کے فائدہ مند ہے، انسداد دہشتگردی کی کوششیں میں فوج اور حکومت پاکستان کا ساتھ دےرہےہیں، امریکا چاہتا ہے کہ پاکستان کامیاب ہو۔

انھوں نے کہا کہ شہباز شریف کی حکومت سے ہمارے گہرے تعلقات ہیں، ہمارا پاکستانی عوام سے بہت گہرا رشتہ ہے۔

نیو یارک : اردو ترجمان امریکی محکمہ خارجہ مارگریٹ میکلوڈ کا کہنا ہے کہ خوشحال، مستحکم اور پرامن پاکستان امریکا کے اپنے مفاد میں ہے۔

تفصیلات کے مطابق اقوام متحدہ کے اجلاس کے دوران اردو ترجمان امریکی محکمہ خارجہ مارگریٹ میکلوڈ نے اے آر وائی نیوز کے بیورو چیف جہاں زیب علی سے خصوصی گفتگو میں کہا پاکستانی عوام کئی دہائیوں سے دہشت گردی کی بھاری قیمت ادا کررہے ہیں، ہم بہترپاک بھارت تعلقات دیکھنا چاہتےہیں۔

اردو ترجمان امریکی محکمہ خارجہ کا کہنا تھا کہ پاکستان سرمایہ کاری کافروغ چاہتاہے ، جس کیلئےمستحکم اقتصادی صورتحال کا ہوناضروری ہے تاہم آئی ایم ایف کی اصلاحات پاکستان کےلوگوں کیلئےفائدہ مندہیں

انھوں نے کہا کہ خوشحال، مستحکم اور پرامن پاکستان امریکا کے اپنے مفاد میں ہے، اسی لیے پاکستان میں عوام کی منتخب کردہ حکومت سے ہماری بات چیت جاری رہتی ہے۔

امریکی ترجمان نے بتایا کہ صدر بائیڈن دنیا بھر کے اختلافات ختم کرکے اس دنیا کو امن کا گہوارہ بنانا چاہتے ہیں اور امریکا پاکستان کو معاشی و سماجی طور پر مضبوط دیکھنا چاہتا ہے۔

نیویارک : وفاقی وزیر اطلاعات عطا محمد تارڑ کا کہنا ہے کہ دہشت گردی پر زیرو ٹالرنس ہےدہشت گردوں سے کسی قسم کے مذاکرات نہیں ہوں گے۔

تفصیلات کے مطابق وفاقی وزیر اطلاعات عطا تارڑ نے نیویارک میں اے آر وائی نیوز کے بیوروچیف جہانزیب علی سے خصوصی گفتگو کرتے ہوئے کہا وزیراعظم خطاب میں فلسطین اور کشمیرکےمسئلے سمیت دہشت گردی اور ماحولیاتی تبدیلی پربات کریں گے۔

وفاقی وزیر اطلاعات نے بتایا کہ پاکستان میں مہنگائی سنگل ڈیجٹ پرچلی گئی ہ. ہماری آئی ٹی ایکسپورٹس3.1بلین ڈالرتک پہنچ چکی ہیں، وزیراعظم نے ہر فورم پرفلسطین کا مسئلہ اٹھایاہے، ان کے دورے کے پاکستان پربہت اچھے نتائج مرتب ہوں گے۔

ان کا کہنا تھا کہ پاکستان کی معیشت بہتری کی طرف جارہی ہے، سیاسی استحکا م معاشی استحکام سے ممکن ہے، آئی ایم ایف سے مذاکرات حتمی مراحل میں داخل ہوچکے ہیں، ملاقاتیں ہوں گی، آئی ایم ایف پروگرام فائنل ہوگا۔

وفاقی وزیر نے مزید کہا کہ نوازشریف کےدورمیں ہم نےدہشت گردی کومکمل ختم کیا ، نوازشریف دور میں کراچی کاامن واپس لایا گیا، پھر ایک حکومت آئی اورکہا ہمیں طالبان سےبات کرنی ہے ، طالبان کو واپس لایا گیا،جس کا خمیازہ پوری قوم بھگت رہی ہے

وزیر اطلاعات کا کہنا تھا کہ ہم دہشت گردی کوجڑ سےاکھاڑ دیں گے، دہشت گردی پر زیرو ٹالرنس ہے، دہشت گردوں سے کسی قسم کے مذاکرات نہیں ہوں گے، ہمارا عزم پاکستان کو مستحکم کرنا ہے، دہشتگردی کوجب تک جڑسےاکھاڑ نہیں دیتے ہم چین سے نہیں بیٹھیں گے۔

انھوں نے پی ٹی آئی پر تنقید کرتے ہوئے کہا کہ یہ لوگ نعرےلگاتےہیں خان نہیں توپاکستان نہیں، پاکستان ہے تو ہم سب ہیں،پاکستان نہیں توہم سب بھی نہیں، 9مئی کےحملےکرنےوالوں سےکیابات کریں اورکون کرے،ان کے2جلسےناکام ہوئے،یہ لوگ جلسے چھوڑیں عوام کی خدمت کریں، ہم لیپ ٹاپ بانٹ رہےتھے،یہ لنگربانٹ رہےتھے۔

ان کا کہنا تھا کہ سوات میں جو ہوا وہ نا قابل قبول ہے،پولیس کےجوان شہیدہوئے، کاش وزیراعلیٰ کے پی کسی دہشتگرد کےخلاف کارروائی کرتے، ان سے درخواست کروں گا، خیبرپختونخوا اور پاکستان ہم سب کا ہے، وزیراعلیٰ خیبرپختونخوابیان بازی چھوڑیں عوام میں جائیں۔

نیویارک : اقوام متحدہ میں پاکستان کے مستقل مندوب منیر اکرم کا کہنا ہے کہ مقبوضہ کشمیر میں انسانی حقوق کی بدترین صورتحال ہے، کشمیر کے بغیر بھارت کیساتھ مذاکرات نہیں ہوسکتے۔

تفصیلات کے مطابق اقوام متحدہ میں پاکستان کے مستقل مندوب منیر اکرم نے اے آر وائی نیوز سے خصوصی گفتگو میں کہا کہ اقوام متحدہ کی سلامتی کی غزہ کے حوالے سے سفارشات انصاف پر مبنی ہیں، غزہ کی صورتحال نے مغربی دنیا کی منافقانہ پالیسی بے نقاب کردی ہے اور انسانی حقوق کا شور مچانے والے ممالک کی پول کھول دی ہے۔

پاکستانی مستقل مندوب کا کہنا تھا کہ افغان طالبان کیساتھ مذاکرات اور سیکورٹی معاملات پر کارروائیاں جاری رہیں گی۔۔ ہم چاہتے ہیں ٹی ٹی پی کے خلاف کارروائی کی جائے اور طالبان حکومت کو باور کرانا ہے کہ یہ نہ صرف خطے بلکہ خود ان کیلئے خطرناک ہے۔

انھوں نے کہا کہ مقبوضہ کشمیر میں جس طرح کی انسانی حقوق کی خلاف ورزیاں ہو رہی ہیں۔۔ عوام کو کچلا جارہا ہے، ایسے میں مذاکرات کا ہونا مشکل ہوجاتا ہے۔،کشمیر کے بغیر بھارت کیساتھ مذاکرات نہیں ہوسکتے۔

پاکستانی سفیر کا مزید کہنا تھا کہ بھارت کو اس حوالے سے اقدامات کرنا ہوں گے لیکن بھارت کی جانب سے تو دھمکیاں آتی ہیں، ہمارے ارادے ہیں کہ صورتحال کو معمول پر لایا جائے۔

وزیراعظم کے خطاب کے حوالے سے انھوں نے بتایا کہ وزیراعظم سلامتی کونسل میں سماجی ومعاشی ترقی سےمتعلق دنیا کو آگاہ کریں گے اور کشمیر، فلسطین،افغانستان ودیگر عالمی مسائل پر توجہ دلائیں گے۔