Author: جہانزیب علی

واشنگٹن: بنگلہ دیش کی صورتحال پر ترجمان امریکی محکمہ خارجہ میتھیو ملر کا ردعمل آگیا۔

اے آر وائی نیوز کے مطابق ترجمان امریکی محکمہ خارجہ میتھیو ملر کا کہنا ہے کہ بنگلہ دیش کی صورتحال کا جائزہ لے رہے ہیں، عبوری حکومت کے قیام کا اعلان کا خیر مقدم کرتے ہیں۔

انہوں نے کہا کہ امریکا، بنگلہ دیش کے عوام کے ساتھ کھڑا ہے، بنگلہ دیش میں فریقین پر زور دیتے ہیں کہ تشدد سے گریز کریں اور تحمل سے کام لیں۔

میتھیو ملر نے کہا کہ بنگلہ دیش میں پچھلے کئی ہفتوں میں بہت سی جانیں ضائع ہوچکی ہیں، انسانی حقوق کی خلاف ورزیوں کے نتیجے میں اموات کی رپورٹس پر افسردہ ہیں۔

ترجمان امریکی محکمہ خارجہ نے کہا کہ بنگلہ دیش میں اپنے پیاروں کو کھو دینے والوں سے دلی تعزیت کرتے ہیں۔

واضح رہے کہ شیخ حسینہ فرار ہوکر بھارت پہنچ چکی ہیں جہاں انھوں نے دہلی کے قریب بھارتی قومی سلامتی کے مشیراجیت دوول سے ملاقات کی۔

بھارتی میڈیا کا کہنا ہے کہ شیخ حسینہ کی آئندہ منزل برطانیہ ہے، جہاں وہ سیاسی پناہ حاصل کرنے کی کوشش کریں گی جبکہ بھارت نے بنگلہ دیش کے ساتھ 4,096 کلومیٹر سرحد پر ہائی الرٹ کردیا ہے۔

بنگلہ دیش جانے والی تمام ٹرینوں کو انڈین ریلوے حکام نے روک دیا ہے، بھارت سے ڈھاکہ جانے والی پروازوں کو بھی منسوخ کردیا گیا ہے۔

علاوہ ازیں بنگلہ دیشی فوج کا کہنا ہے کہ کل صبح سے کرفیو ختم کردیا گیا ہے، اسکول اور کاروبار کھول دیے جائیں گے۔

واشنگٹن: امریکی محکمہ خارجہ کے ترجمان میتھیو ملر کا کہنا ہے کہ پاکستان میں سیاسی جماعتوں کے ساتھ یکساں طور پر برتاؤ دیکھنا چاہتے ہیں۔

ترجمان محکمہ خارجہ میتھیو ملر نے پریس کانفرنس میں کہا کہ کانگریس سے پاکستان کو 10 کروڑ ڈالر فنڈز کی سفارش کی ہے، فنڈز انسداد دہشتگردی اور جمہوریت کی مضبوطی کیلیے استعمال ہوگا، رقم جمہوریت اور سول سوسائٹی کو مستحکم کرنے کے پروگراموں میں استعمال ہوگی۔

میتھیو ملر نے کہا کہ امداد سے دہشتگردی اور انتہا پسندی کا مقابلہ کیا جا سکے گا، امداد سے معاشی اصلاحات اور قرضوں کے انتظام میں مدد مل سکے گی۔

پریس کانفرنس میں سوال کیا گیا کہ کیا امریکی سفیر جیل میں بانی پی ٹی آئی سے ملاقات کریں گے؟ اس پر میتھیو ملر نے کہا کہ پاکستان کے اندرونی سیاسی معاملات پر امریکا کوئی پوزیشن نہیں لیتا، ہم جمہوریت کے احترام پر زور دیتے ہیں۔

انہوں نے کہا کہ پاکستان میں انسانی حقوق کا احترام ہوتے دیکھنا چاہتے ہیں، پاکستان میں سیاسی جماعتوں کے ساتھ یکساں طور پر برتاؤ دیکھنا چاہتے ہیں۔

سوال کیا گیا کہ بی جے پی نے کئی ریاستوں میں مسلم ریسٹورنٹ مالکان کو اپنے مسلم نام آویزاں کرنے کا کہا، بھارتی مسلمانوں کو خدشہ ہے ان کیلیے مزید مشکلات پیدا ہوں گی آپ کا کیا مؤقف ہے۔

ترجمان نے کہا کہ ہم نے بھارتی مسلمانوں سے متعلق رپورٹیں دیکھی ہیں، بھارتی سپریم کورٹ نے 22 جولائی کو قوانین کے نفاذ پر عبوری حکم امتناعی جاری کیا، ہم مذہبی آزادی کے احترام کو فروغ دینے اور اس کے حامی ہونے کیلیے پرعزم ہیں، مذہب اور عقیدے کی آزادی کے حق کے احترام کیلیے ہندوستانی ہم منصبوں سے بات کی۔

سوال کیا گیا کہ امریکی کمیشن مذہبی آزادی نے بھارت کو تشویشناک ممالک میں شامل کرنے کا مطالبہ کیا، بھارت امریکی کمشنرز کو بھارت کا دورہ کرنے کیلیے ویزے بھی جاری نہیں کر رہا۔

میتھیو ملر نے کہا کہ میں کسی مخصوص ویزا کیس پر بات نہیں کروں گا، مذہبی آزادی ایک ایسا معاملہ ہے جسے ہم سنجیدگی سے لیتے ہیں، ہم ہر سال اپنی سالانہ رپورٹ مذہبی آزادی سے متعلق جاری کرتے ہیں۔