Author: جہانزیب علی

واشنگٹن : امریکی محکمہ خارجہ کے ترجمان ویدانت پٹیل نے پاکستان میں پیمرا ترمیمی بل پر ردعمل کا اظہار کرتے ہوئے کہا ہے کہ ہم نے پاکستان اور دنیا بھر میں آزادی صحافت پر تحفظات کا اظہار کیا ہے۔

ویدانت پٹیل نے منگل کو ایک پریس بریفنگ میں کہا کہ آزاد میڈیا اور باخبر شہری کسی بھی قوم اور اس کے جمہوری مستقبل کے لیے انتہائی اہمیت کے حامل ہیں۔

ان کا کہنا تھا کہ ایک آزاد پریس اور باخبر شہری کسی بھی قوم اوراس کے جمہوری مستقبل کیلئے اہم ہیں، ہمارا آزادی صحافت پر مؤقف بہت واضح ہے۔

ترجمان نے کہا کہ ہم پاکستان میں حکام اور تمام اسٹیک ہولڈرز سے صحافتی آزادی سے متعلق اظہار کرتے رہتے ہیں، آزاد پریس اور باخبر شہری کسی بھی قوم کے لیے کلیدی حیثیت رکھتے ہیں، اس کے جمہوری مستقبل کے بارے میں ہم بالکل واضح رہے ہیں۔

سینٹ کام چیف اور آرمی چیف کی ملاقات

ترجمان امریکی محکمہ خارجہ نے سینٹ کام چیف اور پاکستانی آرمی چیف جنرل عاصم منیر کی ملاقات پر تبصرے سے گریز کرتے ہوئے اے آر وائی نیوز کے نمائندے کو جواب دیا کہ وہ
اس ملاقات کے حوالے سے سینٹ کام سے تفصیلات حاصل کریں۔

ٹونی بلنکن اور بلاول بھٹو کی ٹیلیفونک گفتگو

ویدانت پٹیل نے امریکی وزیرخارجہ ٹونی بلنکن اور بلاول بھٹو کی ٹیلیفونک گفتگو پر رد عمل میں کہا کہ امریکی وزیرخارجہ نے پاکستانی ہم منصب سے دونوں ملکوں کی پیداواری شراکت پر بات کی۔

انہوں نے کہا کہ امریکا تجارتی اور سرمایہ کاری تعلقات کے ذریعے پاکستان سے بات چیت جاری رکھے گا، امریکی وزیرخارجہ نے پاکستان کی معاونت کیلئےآئی ایم ایف کی منظوری کا خیرمقدم بھی کیا۔

ٹونی بلنکن نے پاکستان میں معاشی بحالی، خوشحالی کے فروغ کیلئے اصلاحات کی حوصلہ افزائی کی، امریکی وزیرخارجہ نے یوکرین، مستحکم افغانستان پر امریکا اور پاکستان کے مشترکہ مفاد پر بھی گفتگو کی۔

 دورہ افغانستان کے حوالے سے امریکی مؤقف

ترجمان امریکی محکمہ خارجہ نے بتایا کہ کسی امریکی عہدیدار کا دورہ افغانستان کا کوئی پلان نہیں ہے، افغانستان میں انسانی حقوق کی سنگین خلاف ورزیوں اور خواتین سے جاری سلوک کی مذمت کرتے ہیں۔