Author: جہانزیب علی

واشنگٹن : امریکا نے جمہوریت سربراہی کانفرنس میں پاکستان کی عدم شرکت پر ردعمل دیتے ہوئے کہا کہ بہت افسوس ہے کہ پاکستان کانفرنس میں شرکت نہیں کر رہا لیکن پاکستان خود مختار ملک ہے، اپنے فیصلے خود کرسکتا ہے۔

تفصیلات کے مطابق امریکی محکمہ خارجہ کے نائب ترجمان ویدانت پٹیل نے پریس کانفرنس میں اے آر وائی نیوز کے نمائندے کی جانب سے جمہوریت سربراہی کانفرنس میں پاکستان کی عدم شرکت سے متعلق سوال پر جواب دیتے ہوئے کہا کہ  بہت افسوس ہے کہ پاکستان اس کانفرنس میں شرکت نہیں کر رہا۔

نائب ترجمان نے کہا کہ پاکستان خود مختار ملک ہے، اپنے فیصلے خود کرسکتا ہے اور یہ کوئی ایس بات نہیں کہ ہم پاکستان کے ساتھ کام نہ کریں۔

ویدانت پٹیل کا کہنا تھا کہ پاکستان کی عدم شرکت کا فیصلہ امریکاکی  تعلقات جاری رکھنے کی خواہشات متاثرنہیں کرےگا۔

ترجمان نے کہا کہ پاکستان اور امریکا بے شمار معاملات پر رابطہ کاری کرتے ہیں، پاکستان کے ساتھ جمہوریت، انسانی حقوق، مذہبی آزادی پر رابطے جاری رہیں گے،پاکستان کےساتھ سیکورٹی معاملات پر بھی اہم شراکت داری ہے۔

خیال رہے امریکا میں دوسری جمہوریت سربراہی کانفرنس جاری ہے، کانفرنس میں دنیا بھر سے ایک سو پچیس ممالک کے سربراہان اور نمائندے شریک ہیں۔۔ کانفرنس کا عنوان ‘میڈیا کی آزادی، جمہوریت کے اقدار کا فروغ ہے’۔

پاکستان نے دعوت نامہ ملنے کے باوجود کانفر نس میں شرکت نہیں کی، پاکستان کی عدم شرکت کے سوال پر امر یکی محکمہ خارجہ نے تبصرے سے گریز کرتے ہوئے کہا کہ امریکا، پاکستان وسیع تر مسائل پر مل کر کام کرتے ہیں، ہم جمہوریت، انسانی حقوق اور مذہبی آزادی پر بات جاری رکھیں گے۔

واشنگٹن : امریکا نے وفاقی وزیر داخلہ رانا ثنا اللہ کی چیئرمین پی ٹی آئی عمران خان کو قتل کی دھمکیوں پر ردعمل دیتے ہوئے کہا کہ تشدد، ہراسانی یا دھمکی کا سیاست میں عمل دخل نہیں ہونا چاہیے۔

تفصیلات کے مطابق تفصیلات کے مطابق امریکی محکمہ خارجہ کے نائب ترجمان ویدانت پٹیل کی پریس بریفنگ کے دوران اے آر وائی نیوز کے نمائندے نے سوال کیا کہ راناثنااللہ کی عمران خان کوقتل کی دھمکیوں پر کیا کہیں گے؟ جس پر ترجمان ویدانت پٹیل نے کہا کہ راناثنااللہ کی عمران خان کو دھمکی پر ان سے پوچھیں میں کوئی تبصرہ نہیں کرسکتا۔

امریکی محکمہ خارجہ کے نائب ترجمان نے کہا کہ تشدد، ہراسانی یا دھمکی کا سیاست میں عمل دخل نہیں ہوناچاہیے، سیاسی فریقین کو قانون کی عزت کرنے کی حوصلہ افزائی کرتے ہیں۔

ان کا کہنا تھا کہ چاہتے ہیں پاکستان میں قانون کی بالادستی ہو، عوام کو جمہوری و آئینی طریقے سے اپنے رہنما کا انتخاب کی آزادی ہونی چاہیے۔

دوسری جانب مودی حکومت کی جانب سے راہول گاندھی کو نااہل کرنے سے متعلق سوال پر جواب دیتے ہوئے امریکی ترجمان نے کہا کہ قانون کی حکمرانی،عدالتوں کااحترام جمہوریت کیلئے اہم ہے، راہول گاندھی کے معاملے کو قریب سے دیکھ رہے ہیں۔

یاد رہے وزیرداخلہ رانا ثنااللہ نے ایک انٹرویو میں کہا تھا کہ عمران خان معاملات کو جس سطح پر لے گئے ہیں، اب وہ سیاست سےمائنس ہوجائیں گے یا ہم۔

رانا ثنااللہ کا کہنا تھا کہ جب ہم سمجھیں گے ہمارے وجود کی نفی ہو رہی ہے تو ہرحد تک جائیں گے، پھر یہ نہیں سوچا جاتا کہ یہ جمہوری ہے یہ غیرجمہوری اور یہ اصولی یہ بے اصولی۔

انھوں نے مزید کہا تھا کہ ملک اور ملک کی سیاست کو وہاں پر لاکھڑا کردیا ہے کہ اب دونوں میں سے ایک کا وجود ہی باقی رہے گا، انارکی پھیلی ہوئی ہے، عمران خان کے ساتھ جتنے لوگ ہیں وہ ہمیں اپنا دشمن سمجھتے ہیں۔

واشنگٹن : امریکا نے زلمے خلیل زاد کے بیانات کو ذاتی خیالات قرار دے دیا اور کہا کہ زلمے خلیل کے بیانات کا امریکی فارن پالیسی سے تعلق نہیں۔

تفصیلات کے مطابق امریکی محکمہ خارجہ کےنائب ترجمان ویدانت پٹیل نے پریس بریفنگ میں اے آر وائی نیوز کے نمائندے  جہانزیب علی  کے خلیل زاد کے بیانات سے متعلق سوال پر کہا کہ زلمے خلیل زاد عام شہری ہیں،ان کے بیانات ذاتی حیثیت میں ہیں، ان کے بیانات کا امریکی فارن پالیسی سے تعلق نہیں۔

پریس بریفنگ کے دوران اے آر وائی نیوز کے نمائندے  نے سوال کیا کہ زلمےخلیل زادپاکستانی حکومت کوالیکشن پر مشورے دے رہے ہیں، ان کے بیانات سے تاثر مل رہا ہے امریکی حکومت کی نمائندگی کررہےہیں۔

جس کے جواب میں ترجمان امریکی محکمہ خارجہ نے کہا کہ آپ نے بالکل صحیح اوراہم سوال کیاہے، زلمے خلیل زاد کا بیان انتظامیہ کی نمائندگی نہیں کرتا۔

خیال رہے امریکی نمائندہ خصوصی برائے افغانستان و پاکستان زلمے خلیل زاد نے سماجی رابطے کی ویب سائٹ ٹوئٹر پر اپنے بیان میں کہا تھا کہ لگتا ہے الیکشن سے روکنے اور پی ٹی آئی پر پابندی کی کوشش کی جائے گی، بظاہر حکومت نےعمران خان کو ریاست کا دشمن قرار دینے کا فیصلہ کرلیا ہے، ایسے اقدامات سے پاکستان مزید بحرانوں کا شکار ہو جائے گا۔

زلمے خلیل زاد کا کہنا تھا کہ پاکستان کوسیاسی،معاشی اورسکیورٹی بحرانوں کاسامنا ہے،بعض ممالک نےپاکستان میں طےشدہ سرمایہ کاری بھی معطل کردی ہے،آئی ایم ایف سےقرض ملےگایانہیں معاملہ اب تک یقینی نہیں،

امریکی نمائندے خصوصی نے کہا تھا کہ موجودہ حکومت کے اقدامات جاری رہے تو پاکستان کو مزید نقصان ہوگا، دشمنی اور تشدد بڑھے گا، امید ہے پاکستان کے سیاسی رہنما تنگ نظری سے خود کو بلند کریں گے۔

واشنگٹن : امریکا نے چیئرمین پی‌ ٹی آئی عمران خان کی رہائشگاہ زمان پارک کے باہر جھڑپوں پر سب کو تحمل کا مظاہرہ کرنے کا مشورہ دے دیا۔

تفصیلات کے مطابق امریکی محکمہ خارجہ کے ترجمان نے اےآروائی نیوزسے خصوصی گفتگو  کرتے ہوئے کہا کہ عمران خان کی رہائشگاہ زمان پارک کے باہر جھڑپوں سے متعلق رپورٹس سےآگاہ ہیں۔

امریکی محکمہ خارجہ  کا کہنا تھا کہ ہم سب کو تحمل کامظاہرہ کرنےکامشورہ دیتے ہیں۔

ترجمان نے کہا کہ امریکا پاکستان کیساتھ دیرینہ تعاون کوقدرکی نگاہ سےدیکھتاہے، ہمیشہ خوشحال اورجمہوری پاکستان کوامریکی مفادات کیلئے اہم سمجھا ہے۔

ان کا مزید کہنا تھا کہ امریکا کسی سیاسی امیدوار یا پارٹی کے مقابلے میں دوسرےکی حمایت نہیں کرتا، پاکستان میں جمہوری اور آئینی اصولوں کی پرامن برقراری کی حمایت کرتے ہیں۔

واشنگٹن : امریکا نے ایک بار پھرپاکستان میں جمہوری وآئینی نظام کی حمایت کردی اور کہا کسی ایک سیاسی امیدوار کی حمایت نہیں کرتے۔

تفصیلات کے مطابق ترجمان امریکی محکمہ خارجہ نیڈپرائس نے واشنگٹن میں آخری پریس بریفنگ دیتے ہوئے کہا کہ دنیابھرکی طرح پاکستان میں بھی جمہوری،آئینی نظام کےحامی ہیں‌۔

نیڈپرائس کا کہنا تھا کہ امریکا سیاسی جماعتوں کےدرمیان معاملات پر کوئی پوزیشن نہیں لیتا اور کسی ایک سیاسی امیدوار کی حمایت نہیں کرتے اور نہ ہی کسی ایک سیاسی جماعت کو دوسری پرترجیح بھی نہیں دیتے۔

گذشتہ ہفتے امریکی محکمہ خارجہ کے ترجمان نیڈ پرائس نے پریس بریفنگ میں پاکستان کے حوالے سے کہا تھا کہ سیاسی معاملات کا فیصلہ پاکستانی عوام کو خود کرنا ہے ، اس حوالے سے امریکہ کوئی پوزیشن نہیں لیتا۔

نیڈ پرائس کا کہنا تھا کہ ہم صرف پاکستان میں جمہوریت اور اس کے آئینی نظام کی حمایت کرتے ہیں، ایک پرامن، مستحکم اور خوشحال پاکستان ہمارے مفاد میں ہے۔

ترجمان امریکی محکمہ خارجہ نے کہا تھا کہ ایک اصلاحاتی ایجنڈا ہے، جو پاکستانی حکومت کے درمیان ہے۔