Author: جہانزیب علی

امریکی وزیر خارجہ مارکو روبیو نے مزید ویزے منسوخ کرنے کا عندیہ دے دیا۔

اے آر وائی نیوز کے مطابق امریکی وزیر خارجہ مارکو روبیو نے کہا کہ میں نے کسی طالب علم کو ڈی پورٹ نہیں کیا، طالب علموں کے ویزے منسوخ کیے ہیں۔

انہوں نے کہا کہ آپ یہاں پڑھنے آتے ہیں، پھر تعلیمی اداروں، ملکی قوانین کی خلاف ورزی کرتے ہیں، ہم مزید ویزے منسوخ کرنے جارہے ہیں۔

ایک سوال کے جواب میں انہوں نے کہا کہ سعودی عرب نے موجودہ صورتحال میں اسرائیل کے ساتھ مذاکرات ختم کردیے ہیں، اسرائیل اور سعودی عرب کو قریب لانا چاہتے ہیں۔

علاوہ ازیں امریکی سینیٹرز نے پاک بھارت کشیدگی ختم کروانے پر مارکو روبیو کو خراج تحسین پیش کیا ہے۔

امریکی وزیر خارجہ مارکو روبیو سے اسرائیل غزہ کی صورت حال پر سوالات کیے گئے، متعدد امریکی سینیٹرز نے مارکو روبیو سے نیتن یاہو کے حالیہ بیانات پر سوالات کیے۔

امریکی سینیٹر نے کہا کہ نیتن یاہو نے کہا ہے وہ غزہ سمیت دیگر علاقوں پر بھی قبضہ کریں گے، اسرائیلی فوج غزہ میں امدادی سامان جانے نہیں دے رہی جواب میں امریکی وزیر خارجہ نے کہا کہ غزہ میں امداد کی ترسیل شروع ہوگئی ہے۔

مارکو روبیو کا کہنا تھا کہ اسرائیل حماس کی باقیات ک ختم کرنا چاہتا ہے، حماس کے ہوتے ہوئے غزہ کے لوگ خوشحال نہیں ہوسکتے۔

امریکی وزیر خارجہ نے کہا کہ اس وقت توجہ مغویوں کی واپسی اور امداد کی فراہمی پر ہے۔

لندن: برطانیہ نے غزہ کی مسلسل ناکہ بندی اور امداد کی ترسیل کو روکنے پر اسرائیل کے ساتھ نئے فری ٹریڈ مذاکرات معطل کر دیے۔

برطانوی وزیر خارجہ ڈیوڈلیمی نے اعلان کیا ہے کہ اسرائیلی سفیر کو فری ٹریڈ ڈیل معطلی سے آگاہ کرنے کیلئے طلب کر لیا ہے۔

انہوں نے کہا کہ غزہ میں لاکھوں شہریوں پر بھوک کا خطرہ منڈلا رہا ہے جو مکروہ عمل ہے غزہ میں 11 ہفتوں سے انسانی امداد کی ناکہ بندی ظالمانہ ہے، اسرائیلی وزیراعظم نیتن یاہو اب یہ سب ختم کریں۔

وزیر خارجہ نے دوٹوک پیغام دیا کہ اسرائیل نے غزہ کی ناکہ بندی کو ختم نہ کیا تو ہم مزید کارروائی بھی کریں گے، برطانیہ نیتن یاہو سے امدادی ناکہ بندی کے فوری خاتمےکا مطالبہ کرتا ہے۔

برطانیہ، فرانس اور کینیڈا کے رہنماؤں نے اسرائیل کو خبردار کیا ہے کہ اگر اس نے غزہ پر اپنی فوجی کارروائی نہ روکی اور انسانی امداد پر عائد پابندیاں نہ ہٹائیں، تو اُس کے خلاف عملی اقدامات اُٹھائے جائیں گے۔

رپورٹس کے مطابق تینوں ممالک کے مشترکہ بیان میں کہا گیا ہے کہ ”اسرائیلی حکومت کی جانب سے شہری آبادی کے لیے بنیادی انسانی امداد کو روکنا کسی صورت قبول نہیں اور بین الاقوامی انسانی قانون کی صریح خلاف ورزی ہے۔

ان کے اس بیان میں مغربی کنارے میں بستیوں کی توسیع کی بھی مخالفت کی گئی اور واضح کیا گیا کہ اگر صورتحال میں تبدیلی نہ آئی تو مخصوص نوعیت کی پابندیاں بھی عائد کی جا سکتی ہیں۔

امریکی اخبار واشنگٹن پوسٹ کا کہنا ہے ٹرمپ کے معاونین نے اسرائیلی حکام کو واضح پیغام دیا ہے اگر جنگ نہ رکی تو ہم آپ کی حمایت سے دستبردار ہوجائیں گے۔

دوسری جانب اسرائیلی وزیرخارجہ گیدون سار کا کہنا ہے امریکی صدر کی جانب سے پابندیوں کی دھمکیوں کے بعد اسرائیل نے محدود امداد کھولنے کا فیصلہ کیا۔

اسرائیلی میڈیا کا کہنا ہے کہ نیتن یاہو حکومت کو امریکا کی جانب سے شدید دباؤ ہے۔

اطلاعات ہیں کہ اسرائیل ایک حتمی معاہدے کی طرف بڑھ رہا ہے، جب کہ واشنگٹن کی جانب سے دباؤ واضح طور پر اور شدت اختیار کر چکا ہے۔

ترجمان امریکی محکمہ خارجہ ٹیمی بروس نے بتایا ہے کہ امریکا نے بھارت اور پاکستان سے مسلح تصادم بند کرنے کا کہہ دیا ہے۔

ترجمان ٹیمی بروس نے پریس کانفرنس کرتے ہوئے کہا کہ امریکی وزیرخارجہ کی وزیر اعظم شہبازشریف سے بات ہوئی ہے جب کہ مارکو روبیو کی بھارتی وزیرخارجہ سے بھی گفتگو ہوئی ہے۔

ترجمان نے کہا کہ امریکا پاکستان اور بھارت  میں براہ راست رابطہ بحال کرانا چاہتا ہے، پاکستان اور بھارت میں براہ راست رابطوں کی حوصلہ افزائی کرتے ہیں اور مارکوروبیو نے پاکستان اور بھارت سےکشیدگی کم کرنے پر بات کی ہے۔

ترجمان کے مطابق فریقین سے کہتے ہیں مسائل کےحل کیلئے ذمہ دارانہ اقدامات کریں پاکستان پہلگام واقعے کی تحقیقات چاہتا ہے اور امریکا سمجھتا ہےکشمیر میں جو کچھ بھی ہو رہا ہے افسوسناک ہے۔

قبل ازیں امریکی وزیر خارجہ مارکو روبیو نے وزیراعظم شہباز شریف کو ٹیلیفون کیا اس موقع پر پاک بھارت کشیدگی اور موجودہ صورتحال پر گفتگو کی گئی۔

وزیراعظم نے بھارتی میزال اور ڈرون حملوں کی شدید مذمت کرتے ہوئے کہا کہ بھارتی حملوں میں شہری بنیادی ڈھانچے کو نقصان پہنچا جب کہ ان حملوں میں 31 شہری شہید اور 57 زخمی ہوئے ہیں۔

شہباز شریف کا مزید کہنا تھا کہ بھارت نے جارحیت کر کے خطے کے امن اور استحکام کو خطرے میں ڈال دیا ہے۔ پاکستانی عوام بھارت کی بلا اشتعال شر انگیزی سے شدید غصہ میں ہیں۔

وزیراعظم شہباز شریف نے ملکی خود مختاری اور علاقائی سالمیت کا ہر قیمت پر دفاع کرنے کے عزم کا اعادہ کرتے ہوئے کہا کہ پاکستان اقوام متحدہ کے چارٹر کے تحت اپنے دفاع میں کارروائی کا حق محفوظ رکھتا ہے۔

اس موقع پر امریکی وزیر خارجہ مارکو روبیو نے کہا کہ ہم جنوبی ایشیا کی صورتحال پر گہری نظر رکھے ہوئے ہیں اور خطے میں امن واستحکام کے فروغ کے لیے پر عزم ہیں۔

امریکی وزیر خارجہ نے پاکستان اور بھارت پر کشیدگی کم کرنے کے لیے مل کر کام کرنے پر زور دیا۔