حال ہی میں نیٹ فلیکس نے ویب سیریز ”ایڈولیسنس“ نشر کی ہے، جو فی الحال چار اقساط پر مشتمل ہے اور اسے دنیا بھر میں دیکھا جارہا ہے۔ اس ویب سیریز میں دو باتیں بہت کمال ہیں، جن میں سے ایک کا تعلق انسان کے اندر موجود جوہر اور اس کی صلاحیتوں‌ سے ہے اور دوسری تیکنیکی ہے۔

پہلی بات اس کا ”ون ٹیک فارمیٹ“ پر بنایا جانا ہے۔ یعنی ہر قسط بغیر کوئی سین کاٹے یا ایڈٹ کیے، ایک ہی بار میں شوٹ کی گئی ہے۔ اس کا مطلب یہ ہے کہ ہر ایک گھنٹے کی قسط کو ایک ہی مرتبہ پکچرائز کیا گیا ہے، جو ویب سازی کی دنیا میں ایک انقلابی نوعیت کا کام ہے۔

اس ویب سیریز کی دوسری کمال بات مرکزی کردار نبھانے والے وہ بچہ ہے، جس نے اپنی زندگی میں پہلی بار اداکاری کی اور اس کی پرفارمنس دیکھ کر سب دنگ رہ گئے۔ بلکہ یہ کہنا چاہیے کہ بڑے بڑے اداکاروں نے دانتوں تلے انگلیاں دبا لی ہیں۔

دوستو! ویب سیریز ”ایڈولیسنس“ کا تفصیلی تجزیہ پیشِ خدمت ہے۔

کہانی/ اسکرپٹ

یہ کہانی ایک نفسیاتی جرم کے ارتکاب پر مبنی ہے، جس میں ملزم، جو بعد میں مجرم ثابت ہو جاتا ہے، ایک 13 سالہ بچہ ہے۔ اس ویب سیریز کی آفیشل ٹیم نے اس کہانی اور ویب سیریز کے لیے لفظ ”ڈراما“ استعمال کیا ہے، جو کسی بھی طورپر درست نہیں ہے، کیونکہ یہ کہانی ایک حقیقی واقعہ پر مبنی ہے، جس کا تذکرہ آگے آئے گا، لیکن اس کے ایک خالق جیک تھرون اس بات کا انکار کرتے ہیں۔

اس ویب سیریز کا مرکزی خیال جیک تھرون اور اسٹفین گراہم نے تشکیل دیا اور اس کو لکھا بھی ہے۔ اس تیرہ سالہ بچے کو جس کا نام جیم ملر ہے۔ پوری کہانی اسی کے گرد گھومتی ہے۔کہانی کے کرداروں کی ترتیب، کہانی آگے بڑھانے کا طریقہ اور اس میں مسلسل تجسس برقرار رکھنے کا ہنر کام یابی سے برتا گیا ہے۔

یہ ایک ایسے کمسن بچے کی کہانی ہے، جو ایک برطانوی قصبے میں رہائش پذیر ہے۔ وہ اسکول میں پڑھتا ہے اور سوشل میڈیا پر متحرک ہے۔ مغرب میں اکثر اسکولوں میں جس طرح بچوں میں آپس میں تعصب پر مبنی خیالات پائے جاتے ہیں، وہی اس کہانی میں بھی شامل ہیں۔یہ بچہ (جو تیزی سے بلوغت کی طرف بڑھ رہا ہے) کیسے اپنی ایک ہم جماعت کے قتل میں ملوث ہو جاتا ہے، اس کے پیچھے کیا محرکات ہوتے ہیں اور پھر برطانوی نظامِ قانون کیسے اسے اپنے دائرے میں لیتا ہے، ان سب پہلوؤں کو بہت خوبی سے کہانی میں پیش کیا گیا ہے۔

ویب سازی

اس ویب سیریز کی سب سے کمال بات اس کا ون ٹیک فارمیٹ پر بنایا جانا ہے۔ اس کی کل چار اقساط ہیں اور ہر قسط ایک گھنٹے کی ہے جسے مسلسل ایک ہی ٹیک میں مکمل کیا گیا ہے۔ اس ویب سیریز کو دیکھتے ہوئے بظاہر کوئی تکنیکی غلطی بھی نظر نہیں آتی بلکہ کئی جگہوں پر بغیر کیمرہ بند کیے جس طرح کردار سے کردار کو بدلا گیا ہے، وہ لاجواب ہے۔ اس ویب سیریز میں کاسٹنگ کا انتخاب بھی قابل داد ہے۔ اس میں جس طرح ایک نئے بچے کو موقع دیا گیا، اور اس نے اس موقع سے اپنی زندگی بدل دی، یہ قابلِ تعریف ہے۔ یہ کہنے میں کوئی جھجھک محسوس نہیں‌ ہوتی کہ یہ بچہ آنے والے وقت کا ایک بڑا اداکار ہے۔

ایک ہی وقت میں پوری قسط کو شوٹ کرنے کی غرض سے ایک رن تھرو بنایا گیا اور ہر قسط دس بار شوٹ کی گئی اور اس میں سے جو سب سے بہتر شوٹ ہوا، اس کو حتمی شکل دے دی گئی۔ ایک قسط شوٹ کرنے میں تین ہفتے لگے اور چار مہینوں میں اس کا مکمل کام ختم کر لیا گیا۔ یہ ویب سیریز 93 ممالک میں ٹاپ 10 کے چارٹ پر نمبر ون رہی ہے اور یہ بھی اس کا ایک کمال ہی ہے۔ ایڈولیسنس“ کے پروڈیوسروں میں کئی بڑے نام شامل ہیں، جن میں سے ایک امریکی اداکار بریڈ پٹ ہیں۔

ہدایت کاری اور فن کاروں کا انتخاب

برطانیہ کے معروف ہدایت کار فلپ بارنٹینی جنہوں نے اپنے کیریئر کا آغاز اداکاری سے کیا تھا، اب بطور ہدایت کار اپنی صلاحیتوں کا اظہار کر کے فلم بینوں‌ کو حیران کر دیا ہے۔ اس ویب سیریز میں سنیماٹوگرافی کے پہلو کو نظر انداز نہیں کیا جاسکتا اور اس پر تمام کیمرہ مین اور ٹیم بھی قابل داد ہے، جنہوں نے اپنی پیشہ ورانہ مہارت کو بروئے کار لا کر اس ویب سیریز کو یادگار بنا دیا۔

ویب سیریز کی خاص بات اس بچے کی دریافت ہے، جس نے اس میں مرکزی کردار نبھایا ہے۔ اس کا نام اون کوپر ہے۔ یہ ایک کاسٹنگ ڈائریکٹر شاہین بیگ کی دریافت ہے۔ وہ ایسے اداکاروں اور کمیونٹی کے لیے کام کرتی ہیں، جنہیں کم توجہ ملتی ہے یا جن کے پاس شوبز کی چکا چوند میں نووارد ہونے کی وجہ سے آگے بڑھنے کے راستے کم ہوں۔ شاہین بیگ کی خدمات کا دائرہ وسیع ہے۔ وہ پاکستانی نژاد ہیں اور چوں کہ اون کوپر شاہین بیگ کی دریافت ہے تو یہ بات پاکستانی کمیونٹی کے لیے بھی باعثِ فخر ہے۔ انہوں نے ویب سیریز ایڈولیسنس“ کے اس مرکزی کردار کے لیے پانچ سو بچوں کے آڈیشن لیے تھے۔

اداکاری

”ایڈولیسنس“ کے شریک خالق اور معروف اداکار اسٹیفین گراہم نے اس ویب سیریز کی تشکیل سے فلم بینوں‌ کو تو حیران کیا ہی مگر بطور اداکار بھی انہوں نے ویب سیریز دیکھنے والوں کے دل موہ لیے۔ اس بات میں کوئی شک نہیں کہ ان کی اداکاری نے ہر لمحہ ناظرین کو کہانی سے جوڑے رکھا اور اس ویب سیریز کے جتنے کلائمکس ہیں ان کا بوجھ بھی اسٹیفین گراہم‌ نے ہی اٹھایا ہے۔ ان کے ساتھ نو وارد اور کمسن اون کاپر نے بھی اپنی فطری اداکاری سے ویب سیریز کو چار چاند لگا دیے ہیں۔ اس ویب سیریز میں دوسرے کم عمر بچے بھی دکھائی دیے ہیں، جنہوں نے اپنا کام بہت اچھے انداز میں کیا ہے، البتہ متذکرہ بالا دو مرکزی کرداروں کے علاوہ اگر کسی نے اپنی اداکاری سے دیکھنے والوں کو ششدر کیا ہے تو وہ ماہر نفسیات کا کردار نبھانے والی اداکارہ ایرن ڈوہرٹی ہیں۔ انہوں نے لاجواب اداکاری کی ہے۔ اس ویب سیریز میں ہمیں کئی پاکستانی اور انڈین نژاد اداکار بھی دکھائی دیتے ہیں۔ 

کہانی کا تنازع

برطانیہ میں اس کہانی کی طرز پر ایک واقعہ کچھ برس پہلے رونما ہوا تھا۔ کہا جا رہا ہے کہ یہ ویب سیریز اسی کہانی کے اردگرد گھومتی ہے، جب کہ ویب سیریز کے آفیشلز نے اس سے انکار کیا ہے۔ صرف یہی نہیں بلکہ اصل واقعے میں ملوث کمسن بچہ سیاہ فام تھا جب کہ اس ویب سیریز میں سفید فام بچہ دکھایا گیا ہے، جس پر امریکی صدر ڈونلڈ ٹرمپ کے مشیر ایلون مسک نے نسلی تعصب کا الزام بھی عائد کیا ہے۔

کہانی کے پس منظر میں ایسا محسوس بھی ہوتا ہے کہ کہیں نہ کہیں اس معاشرے میں نسلی امتیاز موجود تو ہے اور اسے ویب سیریز ”ایڈولیسنس“ کی کہانی میں بھی ڈھکے چھپے انداز میں دکھایا گیا ہے۔ خاص طور پر جب ایک سیاہ فام تفتیشی افسر اتفاقاً اپنے بیٹے کے اسکول جاتا ہے، جہاں وہ خوف ناک واقعہ پیش آیا ہے، تو دکھایا گیا ہے کہ اس کا بیٹا کس طرح سے نسلی تعصب کا سامنا کرتا ہے۔ دوسری طرف ایک بڑی بات یہ بھی ہے کہ برطانوی وزیراعظم کو بھی اس ویب سیریز نے بہت متاثر کیا ہے۔ انہوں نے اس کے بنانے والوں کی حوصلہ افزائی کے لیے ان سے ملاقات کی اور ویب سیریز کی تشہیر میں بھی اپنا حصّہ ڈالا ہے۔

اختتامیہ

مذکورہ ویب سیریز موجودہ دور میں بچوں کے زیادہ سوشل میڈیا استعمال کرنے کے نقصانات کا احاطہ کر رہی ہے اور اسے بچوں کو ضرور دکھانا چاہیے۔ ایسے موضوعات کو ان کے حقیقی پہلوؤں کے ساتھ پیش کیا جانا بھی ضروری ہے، یعنی اگر کوئی کہانی کسی سچے واقعہ پر مبنی ہے تو اس میں حقائق کا خیال رکھا جانا چاہیے۔

قارئین! اگر آپ ایک اچھی کہانی کو اسکرین پر دیکھنے کے خواہش مند ہیں تو یہ ویب سیریز آپ کے لیے ہی ہے۔ اردو اور ہندی زبان سمجھنے والوں کے لیے اچھی خبر ہے کہ یہ ویب سیریز ہندی ڈبنگ میں بھی دیکھنے کے لیے موجود ہے۔

دنیا بھر میں تین ایسے فنون ہیں، جن کو پرفارمنگ آرٹس کی بنیاد سمجھا جاتا ہے، وہ تھیٹر، موسیقی اور رقص ہیں۔ پاکستان میں موسیقی کو سب سے زیادہ عروج ملا۔رقص تو کسی طور اپنا نام ٹھیک طور سے درج ہی نہ کروا سکا۔ باقی رہ گیا تھیٹر، تو اس فن کے نام پر کچھ کام ہوا، مگر اس تناظر میں ہونے والی تمام کوششیں انفرادی تھیں۔ کسی ادارے کے تحت جو کام ہوا، اس میں صرف دو ادارے "نیشنل اکیڈمی آف پرفارمنگ آرٹس” اور "کراچی آرٹس کونسل” دکھائی دیتے ہیں، جن میں سے اوّل الذکر تو مغربی ڈراما نگاری کے اثر سے تاحال باہر نہیں آسکا، البتہ کراچی آرٹس کونسل نے دیر سے سہی، مگر مقامی تھیٹر پر اپنی توجہ مرکوز کی، جو قابلِ تحسین ہے۔ اس سلسلے میں "عوامی تھیٹر فیسٹیول” تازہ ترین پیشکش ہے، جس میں ہر طرز اور مزاج کے تھیٹر کو جگہ ملی۔ اس ناٹک میلے میں سے ہم نے جس کھیل کا انتخاب کیا، اس کاعنوان”مذاقِ خاص” ہے۔

مرکزی خیال/ مکالمے/ لفظیات

یہ انسانی فطرت ہے، ہم جذباتی طور پر جن مقامات سے جڑے ہوتے ہیں، اس کا موازنہ ضرور کرتے ہیں کہ وہ مقام ماضی میں کیسا تھا اور حال میں کیسا ہے۔ ایسے ہی جذبات کے مد و جزر پر مبنی کھیل "مذاقِ خاص” تھا، جس میں عہدِ حاضر کے کراچی کا ایک معروف مقام "آرام باغ” دکھایا گیا ہے، جو ماضی کی شان دار تہذیب کا نوحہ پیش کررہا ہے۔ وہ عہد جب کراچی تہذیب و تمدن کا مرکز ہوا کرتا تھا، اس وقت اس باغ کا نام "رام باغ” تھا، جو آرام باغ ہو گیا۔ تہذیبِ گم گشتہ کی ایک ان کہی داستان کو مرکزی خیال کے ذریعے تمثیلی تخلیق کر کے پیش کیا گیا۔ یہ ترکیب تو انتہائی عام ہے، مگر اس کو جس خاص انداز سے پیش کیا گیا، وہ متاثر کن ہے۔ اسے ڈراما نویس نے "شہرِ خراب کا رام باغ” پکارا ہے اور یہ بنیادی تصور دیا کہ "تہذیب روایات نہیں رویہ ہے۔”

اس تصور کو مزید بیان کرتے ہوئے جمال مجیب قریشی کہتے ہیں کہ "رام باغ عوام کے لیے کبھی ایک تفریح گاہ تھی، اب ایک اجاڑ ویران باغ ہے۔ شہر کے معیاری نفسیاتی اسپتال سے مریض بھاگ کر اکثر اس سرکاری باغ میں آکر چھپ جاتے ہیں۔ یہ سرکاری تحویل میں ایک ایسا مقام ہے جو ایک ایک گم گشتہ طبقاتی معاشرے کا کھنڈر بھی ہے۔ یہ ایک شکستہ مقام ہے۔ اس کے ہر ذرے پر ایک سوالیہ نشان کندہ ہے۔ اس باغ میں پھیلے سوکھے پتوں کی نیچے ایک آتش فشاں دہک رہا ہے۔ یہ ایک اجاڑ زنداں ہے۔ یہاں رات کے وقت بے چین ارواح کا گزر ہوتا ہے۔”

اس کھیل میں اداکاروں نے جو مکالمے ادا کیے، اور جو خود کلامی (مونو لاگ) تھے، وہ ذو معنی اور شعریت سے لبریز تھے، ادبیت سے بھرپور تھے اور صرف یہی نہیں بلکہ بین السطور بھی ایسے موضوعات تھے، جو آج کے حالاتِ حاضرہ کی منظر کشی کرتے ہیں، یعنی وہ باتیں بیان ہوئیں، جنہیں اب سماج میں کہنے کی کھلے بندوں اجازت نہیں ہے۔ اس باریک کام کو ڈراما نویس جمال مجیب قریشی نے بھرپور طور سے کر دکھایا۔ پھر اس کھیل کی ایک اور شان دار بات اس کی لفظیات ہیں، جس کو سماعت کر کے اور اسٹیج پر مکالموں کی صورت میں دیکھ کر لطف آگیا۔ اس کھیل میں وہ مذاق جو آپ کے ذوق کا عکاس ہوتا تھا، اس کو بھی بیان کیا گیا اور اس مذاق کو بھی، جس کو صرف ہم اڑانا مقصود سمجھتے ہیں۔ اس ناٹک کی کہانی کے بیان میں تہذیب کے زوال کے ساتھ ساتھ جس طرح فکشن کے دو کرداروں کو ملا کر کہانی بیان کی گئی ہے، وہ ترکیب بھی دل کو بھائی ہے۔ایک طرف امتیاز علی تاج کے ڈرامے کی "انار کلی” اور دوسری طرف مرزا ہادی رسوا کے ناول کی امراؤ جان ادا کا امتزاج دکھایا گیا ہے۔

کہانی و کردار

اس ڈرامے کا آغاز ایک صحافی کے کردار "شاہد میر” کے نمودار ہونے سے ہوتا ہے، ( جمال مجیب قریشی) جو صحافی ہے، آرام باغ نامی ایک پارک میں بینچ پر ماضی کی یادوں میں غرق ہے۔ پس منظر میں ایسی موسیقی ہے، جس سے ناسٹیلجیا بڑھ جاتا ہے، ماضی کی تصویریں ایک ایک کر کے ذہن کے پردے پر ابھرنے لگتی ہیں اور اسٹیج پر کرداروں کی صورت میں بھی عہدِ گم گشتہ کے یاد آنے کی شدت میں اضافہ ہونے لگتا ہے۔ اسی ترتیب میں اگلا دلکش کردار "امراؤ جان ادا” کا ہے (فاطمہ علی بھائی)، جو اپنی اسی سج دھج سے طلوع ہوتا ہے، جو اس کردار کی شان ہے۔ ان دونوں کرداروں کے مکالمات، تاریخی پس منظر، شان دار اور منظوم و غیر منظوم مکالمات کے ساتھ کہانی آگے بڑھتی ہے۔ یہ عہدِ حاضر ہے، جس کو ماضی اور حال کے کرداروں کے ساتھ ملا کر دکھایا گیا ہے۔

اسکرپٹ کے منظر نامے کی ایک جھلک

ڈرامے کا آغاز استاد بڑے غلام علی خان کی ٹھمری "آجابالم پردیسی”سے شروع ہوتا ہے۔ ایک صدا کار(جمال مجیب قریشی) کی صدا اسٹیج پر اور ہال میں گونجتی ہے کہ "یہ شہر خرابی کا رام باغ ہے، جو اب آرام باغ ہے۔ اور میں ایک جرنلسٹ ہوں۔ آدھا سچ اخبار میں چھپتا ہے اور پورا سچ میں اپنی ڈائری میں لکھتا ہوں۔ میں کہانیاں لکھتا ہوں، مظلوموں کی محرومیاں، زمانے کی ستم ظریفیاں، میرا قلم زخم قلم بند کرتا ہے۔ یہ رام باغ بھی زخموں سے چور ہے۔ کبھی یہاں گل ہی گل تھے اور اب خار ہی خار ہیں۔ کبھی یہاں پیڑوں کی چھاؤں تلے رومیو جولیٹ۔ شیریں فرہاد، لیلی مجنوں، ہیر رانجھا نظر آتے تھے۔ اب یہاں کچرے کا ڈھیر نظرآتا ہے۔ نشے کے عادی افراد اور گداگر نظر آتے ہیں۔ یہ باغ اب ایک باغ کم اور ایک کھنڈر زیادہ ہے۔

کبھی رام باغ کی ایک جھلک دیکھنے بہت سے لوگ آتے تھے، اب یہاں کوئی نہیں آتا۔ اس سیاہ رات میں یہ باغ سسکیاں لے رہا ہے۔ کھنڈر سے بے چین روحوں کی آوازیں میرے تعاقب میں ہیں۔ یہ رات ایک درد بھری رات ہے۔ میں سونا چاہتا ہوں پر مجھے نیند نہیں آتی۔ یادیں مجھے سونے نہیں دیتیں۔ رام باغ کی ایک سہانی یاد آج تک میرے خیالوں میں تازہ ہے۔ وہ رات میں کبھی بھول نہیں پایا۔ کاش وہ رات کبھی پھر سے بسر ہو۔ کاش میری محبت پھر سے میری نظروں کے سامنے آجائے۔ کاش میں پھر سے اظہار محبت کرسکوں۔ "صدا کاری کے ایسے کئی شاہکار تھے، جنہوں نے حاضرین کی سماعتوں کو معطر کیا۔

دیگر کردار اور کہانی کا کلائمکس

ان دو مرکزی کرداروں کے بعد تین مزید کردار اسٹیج پر وارد ہوتے ہیں، جو ہیں حافظ (منان حمید)، ایک پولیس افسر (صابر قریشی) اور ایک دانشور ڈاکٹر عرفان اللہ (شاہد نظامی)۔ ڈاکٹر عرفان اپنی اردو شاعری کی بابت، گفتگو کے دوران معاشرے میں موجود طبقاتی فرق کے بارے میں بات کرتے ہیں۔ وہ پاگلوں کے ڈاکٹر کے طور پر اس کردار میں جلوہ گر ہوئے ہیں۔ اگلے منظر میں ایک اور تاریخی کردار، انار کلی (کومل ناز) سلیم (جمال مجیب) کے ساتھ محو گفتگو دکھایا گیا ہے۔ اس کہانی کا کلائمکس اس بات پر ہوتا ہے کہ کون سمجھ دار اور کون پاگل اور عہدِ حاضر کی حالت زار بگڑتے ہوئے کہاں تک آپہنچی ہے اور تہذیب کے نام پر کیا کچھ ہے، جو ہم کھو چکے ہیں۔ کہانی کا دورانیہ مختصر تھا، کردار میں جامعیت تھی اور مکالمے چست تھے، جن میں چومکھی پہلو تھے۔ ایک عرصے بعد اتنی اچھی کہانی کسی منچ پر دیکھنے کو ملی۔

اداکاروں کی اداکاری

اس کھیل میں تمام اداکاروں نے اپنی بساط میں اچھی اداکاری کی، مگر "امراؤ جان ادا” کے کردار میں فاطمہ علی بھائی نے اپنے فن سے حاضرین کو مبہوت کر دیا اور حیرت کی بات یہ ہے کہ یہ ان کا پہلا اسٹیج ڈراما تھا، جس میں انہوں نے اپنی اداکاری کے جوہر دکھائے۔ اس کا کریڈٹ، کھیل کے ہدایت کار نعمان خان کو جاتا ہے، جنہوں نے ان سے اس قدر عمدگی سے کام لیا۔ جمال مجیب قریشی اور کومل ناز نے بھی اپنی اداکاری سے متاثر کیا جب کہ دیگر فن کاروں نے بھی اس رنگین مگر اداس ناٹک میں اپنے اپنے حصے کے رنگ بخوبی بھرے، مگر مزید نکھار پیدا کیا جا سکتا تھا۔

ہدایت کار کی ہدایت کاری

نعمان خان کراچی آرٹس کونسل سے وابستہ اور تھیٹر کے عاشق ہیں۔ انہوں نے اس فن کی باقاعدہ تعلیم حاصل کی ہے۔ ان کی تازہ ترین پیشکش نے عوامی تھیٹر فیسٹیول میں ایسے حاضرین کو چونکا دیا ہے، جنہیں تہذیب و تمدن اور شعر و ادب جیسے موضوعات میں دلچسپی ہے۔ چالیس منٹس کے مختصر دورانیے میں، منچ پر دو ادوار کو پیش کرنا، دو تہذیبوں کا موازنہ اور تجزیہ کرنا ایک باریک اور مشکل کام ہے، جس کو بہت عمدگی سے نعمان خان نے جمال مجیب قریشی کے شان دار اسکرپٹ و صدا کاری کی بدولت نبھایا۔ امید ہے وہ مستقبل میں بھی ایسے کھیل باذوق افراد اور مداحوں کے لیے پیش کرتے رہیں گے۔

آخری بات

یہ ناٹک، کہانی اور لفظیات کے اعتبار سے سب شعبہ جات میں نمایاں رہا۔ اداکاری اور اسٹیج مینجمنٹ میں بھی مزید کام ہو سکتا تھا۔ پورے کھیل میں موسیقی کی صورت میں فلمی رنگ غالب رہا، جو نہیں ہونا چاہیے تھا۔ مجموعی طور پر ہدایت کاری عمدہ اور کہانی نویسی شان دار تھی۔ جمال مجیب قریشی، نعمان خان اور ان کی پوری ٹیم مبارکباد کی مستحق ہے۔ تھیٹر سے وابستہ اداروں کو چاہیے، اس طرز کے کھیلوں کی حوصلہ افزائی کرتے ہوئے ان جیسے فن کاروں کو مزید مواقع دیں تاکہ ہم مقامی اور حقیقی تھیٹر کو فروغ دے سکیں۔

آج عہدِ حاضر میں، اگر اردو ادب کے دس بڑے اور اہم ناولوں کی فہرست مرتب کی جائے تو اس میں جمیلہ ہاشمی کا ناول ”دشتِ سوس“ سرِ فہرست ہوگا۔ تصوف پر مبنی، حسین بن منصور حلاج کی شخصیت کی عکاسی کرتا ہوا یہ ناول تاریخی طور پر جو اہمیت رکھتا ہے، اس کی اپنی حیثیت ہے، لیکن اردو زبان، شان دار نثر اور کہانی کی بُنت میں یہ ناول اپنے وقت کے کئی بڑے ناولوں سے آگے ہے۔ اس ناول میں اردو زبان، نثر کے پیرائے میں شاعرانہ بلندی کو چھوتی ہوئی محسوس ہوتی ہے۔ یہ ناول اس وقت لکھا گیا، جب اردو ادب کے منظر نامے پر قرۃ العین حیدر، عبداللہ حسین، بانو قدسیہ، ممتاز مفتی اور انتظار حسین جیسے منجھے ہوئے ادیب ناول نگاری کررہے تھے۔ ایسے بہت سارے مہان ادیبوں کے درمیان جمیلہ ہاشمی نے ”دشتِ سوس“ اور ”تلاشِ بہاراں“ جیسے ناول لکھ کر نمایاں مقام حاصل کیا۔ اس ناول کو سنگِ میل پبلی کیشنز، لاہور نے شائع کیا ہے۔ تھیٹر کے لیے یہ ناٹک اسی ناول ”دشتِ سوس“ سے ماخوذ ہے، جس پر تبصرہ پیشِ خدمت ہے۔

مرکزی خیال/ کہانی

مرکزی خیال اسلامی تاریخ کی مشہور صوفی شخصیت ”حسین بن منصور حلّاج“ کی سوانح کو بیان کرتا ہے۔ تصوف سے وابستہ منصور حلّاج نے اناالحق کا نعرہ لگایا اور معتوب ٹھہرےاور اس کی پاداش میں انہیں سوئے دار جانا پڑا۔ اسلامی تاریخ میں بالخصوص تصوف کے تناظر میں ان کی روداد کو تفصیل سے بیان کیا گیا ہے۔ جمیلہ ہاشمی کے لکھے ہوئے ناول کی خوبی یہ ہے کہ انہوں نے دل کو چُھو جانے والی نثر میں اس ناول کو لکھا اور ان کی نثر کا انداز بھی شاعرانہ ہے، جیسے صوفیوں کی شاعری کو نثر میں پرو دیا گیا ہو۔ یہی وجہ ہے تصوف پر مبنی ادب کی پوری تاریخ میں اس ناول کا مقام جداگانہ رہا، کیونکہ اس ناول کا پلاٹ، کردار، زبان و بیان اور اسلوب سب سے مختلف تھا۔ آج بھی قارئین کو یہ ناول مستغرق رکھے ہوئے ہے۔

مذکورہ تھیٹر کا کھیل، جس کا عنوان ناول کے نام پر ہی ہے، اس کی ڈرامائی تشکیل شاہنواز بھٹی کی کاوش ہے۔ ایک ضخیم ناول سے تھیٹر کے منچ کے لیے ان کی ماخوذ کہانی تقریباً ڈیڑھ گھنٹے کے دورانیے پر محیط ہے۔ سب سے پہلے تو وہ داد کے مستحق ہیں کہ انہوں نے اس چیلنج کو قبول کیا اور دشتِ سُوس جیسے ناول کو ناٹک کی کہانی میں بدلا۔ ان کی کوشش بہت متاثر کن ہے، مگر جو ناول پڑھ چکے ہیں، وہ ظاہر ہے اس ڈرامائی تشکیل سے متاثر نہیں ہو پائیں گے، کیونکہ اس ناول کی سب سے نادر بات اس میں برتی گئی زبان تھی، جس کو ہدایت کار اور اخذ کنندہ نے ہلکی پھلکی زبان میں منتقل کر دیا، جس کی وجہ سے ناول کا مجموعی تاثر زائل ہو گیا۔

ہدایت کاری

اس کھیل کی ہدایت کاری کے فرائض بھی شاہنواز بھٹی نے انجام دیے، جو طویل عرصے سے تھیٹر اور فلم کے شعبے سے وابستہ ہیں۔ اس کھیل میں انہوں نے ایک خاص سیاہ پس منظر میں پوری کہانی پیش کی۔ کھیل کی طوالت زیادہ ہونے کی وجہ سے ان کو محسوس ہوا کہ حاضرین اکتاہٹ کا شکار ہوسکتے ہیں، تو انہوں نے ایک گھنٹے کے دورانیے کے بعد دس منٹ کا وقفہ دے دیا، میرے خیال میں یہ ڈرامائی موڑ اس ناٹک کی موت تھی۔ اگر یہ تھیٹر کے عام طور پر معین اصولوں کے مطابق بغیر کسی وقفے کے کہانی کو جاری رہنے دیتے تو دھیرے دھیرے کہانی کا جو تاثر دیکھنے والوں پر طاری ہوا تھا، وہ دم نہ توڑتا۔ اب عالم یہ تھا کہ وقفے کے بعد حسین بن منصور حلّاج کا کردار جب اپنا مونولوگ بول رہا تھا تو حاضرین میں ایک ہلچل تھی، جیسے کہ ابھی تک وقفہ ختم نہ ہوا ہو۔ جمے جمائے تاثر کو وقفہ دے کر ضائع کر دینا ایک تکنیکی غلطی تھی، جو اس کھیل میں کی گئی۔

کھیل پر ڈیزائن کیے گئے کرداروں کی اداکاری کو ایک ہی فریم میں ڈیڑھ گھنٹے تک رکھ کر دکھایا گیا، جس سے اکتاہٹ ہونا فطری عمل تھا۔ اس کھیل کو ایک گھنٹے سے زیادہ کا نہیں ہونا چاہیے تھا اور چند فریم ضرور بدلنے چاہیے تھے۔لائٹنگ کا استعمال بھی کم رکھا گیا۔ لائیو موسیقی کا اہتمام عمدہ تھا، مگر اس کا استعمال بھی انتہائی محدود کیا، جب کہ اس کی بدولت ناٹک میں مزید جان پڑ سکتی تھی۔ ملبوسات کو ارم بشیر نے ڈیزائن کیا، جو کہانی کی کیفیت سے مطابقت رکھتے تھے۔ مجموعی طور پر ایک اچھی کوشش تھی، جس کو سراہا جانا چاہیے۔

اداکاری

اس کھیل میں مرکزی کردار حسین بن منصور حلاج کا تھا، جس کو تھیٹر سے وابستہ نوجوان اداکار ارشد شیخ نے عمدگی سے نبھایا۔ افسانوی شہرت کے حامل اس صوفی کردار کو اس کے والد یعنی منصور حلاج کی نسبت سے یاد کیا جاتا ہے۔ یہ کردار پارس مسرور نے نبھایا اور ہمیشہ کی طرح اپنی اداکاری سے متاثر کیا۔ دیگر اداکاروں میں بھی سب نے اپنے اپنے حصّے کے کرداروں کو خوب نبھایا، بالخصوص جنید بغدادی کے کردار میں سرفراز علی، ابو عمر قاضی کے کردار میں زبیر بلوچ، آقائے رازی کے کردار میں مجتبیٰ زیدی، اغول کے کردار میں طوبیٰ نعیم، محمی کے کردار میں عامر نقوی اور ہندی سوداگر کے کردار میں نادر حسین قابل تعریف ہیں۔ باقی سب اداکاروں نے بھی اچھا کام کیا، لیکن مذکورہ ناموں نے اپنے کرداروں سے کہانی میں ایک کیفیت پیدا کر دی جس کا سہرا ہدایت کار کو بھی جاتا ہے۔

آخری بات

یہ کھیل چونکہ آشکارہ آرٹ پروڈکشن کا تھا، جب کہ اس کو نیشنل اکادمی آف پرفارمنگ آرٹس کے ضیا محی الدین تھیٹر ہال میں پیش کیاگیا۔ اب ناپا کو یہ بات سمجھنی چاہیے کہ مغربی اثر سے نکل کر مقامی رنگ کو اپنی کہانیوں میں جگہ دیں۔ اردو ادب اور دیگر پاکستانی زبانوں کے اندر کہانیوں کے خزانے موجود ہیں، انہیں کوشش کرنا ہو گی، ایسی کوشش جو شاہنواز بھٹی صاحب نے کی۔ اب جنہوں نے جمیلہ ہاشمی کا ناول نہیں پڑھا ہوا، وہ اس کھیل سے لطف اندوز ہو سکتے ہیں، لیکن جو اس ناول کے قاری ہیں، ان کے سامنے ناٹک کے کرداروں سے ناول کا بیانیہ اور کردار بار بار ٹکرائیں گے، جو کہ فطری بات ہے۔ ایسے ناول بہت کم لکھے جاتے ہیں، اس پر ایک سے زائد تھیٹر کے ڈرامے بننے چاہییں۔ پہلی کوشش پر شاہنواز بھٹی اور ان کی پوری ٹیم مبارک باد کی مستحق ہے۔

اس ناول کی ابتدا جس منظر سے ہوتی ہے اور قاری اسے پڑھنا شروع کرتا ہے تو ناول کے پہلے باب صدائے ساز میں، دوسرے صفحہ پر ایک کردار کچھ یوں گویا ہے کہ ہم سنتے ہوئے مبہوت ہو جائیں۔ تھیٹر کے لیے ناٹک کی شروعات بھی اسی سے ہوئیں۔ وہ کلام ملاحظہ کیجیے، انہیں پڑھ کر اور سن کر ایسا محسوس ہوتا ہے کہ یہ الفاظ نہیں ہیں بلکہ پھول ہیں، جن کو ایک صوفی پر نچھاور کیا جا رہا ہے اور کبھی محسوس ہوتا ہے کہ یہ کل زندگی کا فلسفہ ہے اور اس ناول اور کہانی کا خلاصہ بھی، جس کو یہاں نظم کیا گیا ہے۔ جمیلہ ہاشمی کی اس شان دار نثر کے ساتھ ساتھ یہ نظم، جس میں کردار کچھ یوں گویا ہے

عشق ایک مزرعِ گلاب ہے
اس کی پگڈنڈیاں ان کے لیے ہیں
جو عاشقوں کے قبیلے سے تعلق رکھتے ہیں
عشق کی نشانیاں توفیق اور مہربانیاں
ان کی منزل ہیں
اور مہجوریاں غم خاموش اور برداشت
کبھی نہ ختم ہونے والا سوز ہمیشگی اور اذیت ناکی
اس کی شان ہے
اس کے سوا باقی سب گم کردہ منزل
جہالت اور وحشت تنہائی
اور بے جادہ گردش ہے
عشق مزرعِ زندگی ہے
(دشتِ سُوس)

جاپان ایک ایسا ایشیائی ملک ہے، جہاں ایک صدی سے زیادہ عرصہ سے اردو کی تدریس جاری و ساری ہے۔ جاپان کے دو بڑے شہر اردو زبان کے فروغ کا مرکز رہے ہیں، جن کے نام ٹوکیو اور اوساکا ہیں اور یہاں کی جامعات سے اب تک سیکڑوں طلبا اردو کے مضمون میں سند یافتہ ہو چکے ہیں۔ انہوں نے آگے چل کر تدریس، سفارت کاری سمیت مختلف شعبہ ہائے زندگی میں نام کمایا۔ آج جاپان اور پاکستان کے درمیان مضبوط تعلق کی ایک وجہ زبان بھی ہے۔

جاپان میں اردو کے ابتدائی نقوش

اردو کا اوّلین مرکز ٹوکیو ہے، جہاں باقاعدہ طور پر 1908 میں تدریس کی غرض سے ٹوکیو اسکول آف فارن لینگویجز کی بنیاد رکھی گئی، جس میں دنیا بھر کی زبانوں سمیت اردو کی تعلیم کے لیے ’شعبۂ ہندوستانی‘ قائم ہوا، جس میں داخلہ لینے والے جاپانی طلبا کی تعداد پانچ تھی۔ 1911 میں شعبۂ ہندوستانی کو ترقی دی گئی اور اس کے پہلے مہمان استاد مولانا برکت اللہ تھے جو معروف علمی شخصیت محمود الحسن کے کہنے پر جاپان تدریس کی غرض سے گئے تھے۔

جاپان میں ٹوکیو اسکول آف فارن لینگویجز کے شعبۂ ہندوستانی کے اوّلین استاد پروفیسر انوئی تھے جو تین برس تک اس شعبے سے وابستہ رہے، پھر ان کے بعد نمایاں استاد پروفیسر ریچی گامو ہیں، جن کا 1925 میں باقاعدہ طور پر جاپانی پروفیسر کی حیثیت سے شعبۂ اردو کے لیے تقرر ہوا۔ وہ اردو کی کلاسیکی داستان ’باغ و بہار‘ کے مترجم بھی تھے۔ جاپان میں پروفیسر گامو کو قبل از تقسیم ‘بابائے اردو’ کہا جاتا تھا۔ ان کے بعد پروفیسر تاکیشی سوزوکی بھی اردو تدریس کا ایک بڑا نام ہیں، جنہوں نے پہلی اردو جاپانی لغت پر کام کیا، اور تقسیمِ ہند کے بعد جاپان میں "بابائے اردو” کہلائے۔ ان دونوں بڑی شخصیات کے بعد غالب، اقبال، فیض کے کلیات کے جاپانی مترجم اور منٹو سمیت کئی بڑے ادیبوں کی کہانیوں کو جاپانی زبان میں ڈھالنے والے اردو اسکالر پروفیسر ہیروجی کتاؤکا ہیں، جن کی اردو سے وابستگی کا عرصہ پانچ دہائیوں سے زیادہ عرصے پر محیط ہے۔

1947 میں برِصغیر کی تقسیم کے بعد شعبۂ ہندوستانی کا نام تبدیل ہو کر شعبۂ اردو ہو گیا۔ 1949 میں ٹوکیو اسکول آف فارن لینگویجز کو یونیورسٹی کا درجہ مل گیا، جس میں شعبۂ ہندوستانی، دو مختلف شعبوں شعبۂ ہندی اور شعبۂ اردو میں تقسیم کر دیا گیا۔ اب یہ تعلیمی ادارہ ٹوکیو یونیورسٹی آف فارن اسٹڈیز کہلاتا ہے، جس کے موجودہ سربراہ شعبۂ اردو جناب کین ساکو مامیا ہیں۔

ٹوکیو اور اوساکا میں جو دیگر اردو کے جاپانی استاد نمایاں رہے، ان میں پروفیسر ساوا، پروفیسر جین، پروفیسر ہیروشی کان گایا، پروفیسر تسونیو ہماگچی، پروفیسر ہیروشی ہاگیتا، پروفیسر اسادا، پروفیسر میتسومورا، پروفیسر سویامانے اور دیگر شامل ہیں۔

کراچی میں کین ساکو مامیا سے ملاقات 

سترہویں عالمی اردو کانفرنس میں شرکت کے لیے کین ساکو مامیا کراچی تشریف لائے، تو راقم نے بطور میزبان کانفرنس میں ان کے ساتھ ایک سیشن میں گفتگو کی جو بعنوان "جاپان، اردو کی زرخیز سرزمین” منعقد کیا گیا تھا۔ اس سیشن میں جاپان میں اردو اور پاکستان میں جاپانیوں کی حسین یادوں کا احاطہ کیا گیا۔ بعد میں کین ساکو مامیا نے اے آر وائی کی ویب سائٹ کے لیے اردو زبان میں خصوصی انٹرویو ریکارڈ کروایا۔ اس خصوصی انٹرویو کو آپ یہاں سن سکتے ہیں۔

کین ساکو مامیا 1984ء میں اسکول کے طالبِ علم تھے جب انہوں نے پاکستان کی شاہراہ ریشم پر بنی ہوئی ایک دستاویزی فلم جاپانی زبان میں دیکھی اور اس ملک نے ان کی توجہ حاصل کی۔ بعد میں کین ساکو مامیا نے جامعہ کی سطح پر تعلیم حاصل کرنے کے دوران جنوبی ایشیا کو نقشے پر غور سے دیکھا اور پاکستان کے بارے میں مزید جاننے کا فیصلہ کیا۔یہ 1988 کی بات ہے، جب وہ ٹوکیو یونیورسٹی آف فارن اسٹڈیز میں ایم اے کے طالبِ علم تھے۔

ایک موقع پر کین ساکو مامیا پاکستان آئے اور یہاں کے سب سے بڑے شہر کراچی، پھر لاہور، اسلام آباد، کوئٹہ اور پشاور بھی گئے۔ آخر میں ان کا انتخاب حیدر آباد ٹھہرا، اور انہوں نے سندھ یونیورسٹی، جام شورو سے ایم فل کیا۔ اس سلسلہ میں پاکستان میں اپنے دو سالہ قیام کے دوران وہ کراچی اور سندھ کے دیگر شہروں میں بھی آتے جاتے رہے اور پاکستانی ثقافت سے بھی واقف ہوئے۔ پاکستان کا شہر اسلام آباد ان کو اب سب سے زیادہ اچھا لگتا ہے، کیونکہ انہوں نے اپنی زندگی کے چار سال وہاں گزارے ہیں۔ وہ اسلام آباد میں قائم جاپانی سفارت خانے میں کام کرتے تھے۔

اردو زبان کے عاشق اور جاپان میں اردو کے استاد کی حیثیت سے خدمات انجام دینے والے کین ساکو مامیا کا خیال ہے کہ جاپانیوں کو اردو زبان بولنے میں کوئی دقت نہیں ہے، البتہ اردو کا رسمُ الخط اور حروفِ تہجّی محنت سے سیکھا جاتا ہے۔ بالکل یہی صورتحال ان پاکستانیوں کو درپیش ہوگی، جو جاپانی زبان سیکھنا چاہتے ہیں۔ لسانیات کے اصولوں کے اعتبار سے دونوں زبانیں ایک دوسرے سے صوتی اعتبار سے کافی قریب ہیں۔ کین ساکو مامیا یہ بھی کہتے ہیں کہ ہم نے اپنے شعبۂ اردو میں تدریسی اور روایتی تعلیم کے طور طریقوں کے ساتھ تخلیقی اور فنی پہلوؤں سے بھی طالبِ علموں کو اردو سے روشناس کروایا ہے، یہی وجہ ہے کہ ہم اردو زبان میں اسٹیج ڈرامے بھی پیش کرتے ہیں، جن میں اردو زبان سیکھنے والے جاپانی طلبا حصہ لیتے ہیں۔ اس کے ساتھ ساتھ پاکستانی فلموں کی نمائش کا بھی اہتمام کیا جاتا ہے۔ ہم جاپان میں اپنے طلبا کو شعیب منصور کی فلم "خدا کے لیے” سمیت کئی پاکستانی اور ہندوستانی فلمیں بھی دکھا چکے ہیں۔ ہندوستانی فلموں میں نندیتا داس کی فلم "منٹو” بھی شامل ہے۔

کین ساکو مامیا پاکستان میں گزشتہ انتخابات کے موقع پر بطور آبزور تشریف لائے۔وہ پاکستان آتے جاتے رہتے ہیں اور یہاں‌ کے تمام بڑے شہروں‌ سے بخوبی واقف ہیں۔ سندھ کی ثقافت میں ان کی دل چسپی اس قدر بڑھی کہ سندھی زبان بھی سیکھی۔ اردو زبان کے قواعد اور لسانی اصولوں میں گہری دل چسپی رکھتے ہیں۔ اردو ادب اور خاص طور پر شاعری کا مطالعہ کرتے ہیں اور اپنے طلبا کو بھی پڑھاتے ہیں۔

اگر کبھی آپ ٹوکیو جائیں اور کین ساکو مامیا سے ملاقات کرنے کے لیے یونیورسٹی پہنچیں تو وہاں ان کا کمرہ آپ کو ایک چھوٹا سا پاکستان محسوس ہوگا۔ اس کمرے میں آپ کو اردو، سندھی اور پاکستان کی دیگر زبانوں کے نقش ملیں گے، کتابیں اور دیگر ثقافتی علامتیں سجی ہوئی دکھائی دیں گی۔ اپنے حالیہ دورۂ کراچی میں مرز اسد اللہ خاں غالب کا یہ شعر کین ساکو مامیا نے اکثر مواقع پر پڑھا اور میں اس ملاقات کا یہ احوال اسی شعر پر ختم کرنا چاہوں گا:

مدت ہوئی ہے یار کو مہماں کیے ہوئے

جوشِ قدح سے بزم چراغاں کیے ہوئے

ہالی وڈ کی کچھ فلمیں جداگانہ تاریخ رکھتی ہیں۔ یہ ایسی فلمیں ہیں‌ جن کو کلاسیک کا درجہ حاصل ہے۔ انہی میں‌ سے ایک گلیڈی ایٹر ہے، جو انیسویں صدی کے اختتام پر ریلیز کی گئی تھی، یعنی سنہ 2000 میں۔ اور اب 24 سال بعد اس فلم کا سیکوئل گلیڈی ایٹر 2 کے نام سے بنایا گیا ہے۔ ان دونوں فلموں میں کیا فرق ہے، اور کیا نئی فلم بھی تاریخ رقم کرسکے گی؟ یہ جاننے کے لیے‌ اس فلم پر یہ تفصیلی تجزیہ اور تبصرہ پیشِ خدمت ہے۔

کہانی/ اسکرین پلے

اس کہانی کے تناظر میں، پہلی فلم میں مرکزی کردار میکسی مس میریڈیئس کا ہے، جو ایک رومی جنرل ہے۔ وہ روم کے شہنشاہ مارکس اوریلیس کی فوج کا نڈر اور جری سپہ سالار ہے۔ ستم ظریفی یہ ہوتی ہے کہ اس بہترین شہنشاہ کا نالائق بیٹا اپنے والد کو قتل کر کے تخت پر قابض ہوجاتا ہے اور ہر اس فرد کی جان کے درپے ہوتا ہے، جو شہنشاہ کا خاص آدمی اور وفادار رہا ہو۔ ان حالات میں یہ سپہ سالار بھی وطن بدر ہوتا ہے اور پھر اس کی واپسی ہوتی ہے ایک گلیڈی ایٹر کی شکل میں۔ وہ تخت پر قابض ہوجانے شہنشاہ کے نالائق بیٹے سے قوم کو نجات دلانے اور شہنشاہ کے قتل کا بدلہ لینے کے ارادے سے لوٹتا ہے۔ اس کشمکش اور جنگ میں آخر کار وہ تمام رکاوٹوں سے گزر کر، ہر ظلم و ستم کو جھیلنے کے بعد فتح یاب ہوتا ہے اور عوام اس کا ساتھ دیتے ہیں۔

اس فلم کا سیکوئل مذکورہ بالا کہانی کے پس منظر میں ہی ترتیب دیا گیا ہے۔ فرق اتنا ہے کہ اب اس سپہ سالار کی جگہ اس کے بیٹے کو دکھایا گیا ہے، لیکن اسے فلم میں ایک عام دیہاتی کے طور پر پیش کیا گیا ہے، جس کا طرز زندگی سادہ ہے، کیوں کہ بچپن میں اس کی ماں اسے اپنے وطن سے دور کر دیتی ہے تاکہ وہ زندہ رہ سکے۔ یوں اس کی ساری زندگی پردیس میں کٹتی ہے۔ اب وہ ایک جنگ میں شریک ہو کر، اپنی بیوی کو کھونے کے بعد، قیدی اور غلام کی حیثیت سے واپس روم لایا جاتا ہے، جہاں وہ گلیڈی ایٹر کے طور پر کسی طرح حالات کو اپنے حق میں استعمال کر کے اپنی حقیقی ماں تک رسائی حاصل کر لیتا ہے۔ روم کے دربار میں محلاتی سازشوں، جان لیوا خونی معرکے سَر کرنے کے بعد وہ آخرکار اپنے دور کے ظالم اور سفاک شہنشاہ برادران اور اس کے سہولت کاروں کو مار ڈالتا ہے۔

اس کہانی کا تجزیہ کریں تو بلاشبہ پہلی فلم کی کہانی انتہائی شاندار ہے۔ اس کہانی کا مرکزی خیال ڈیوڈ فرانزونی کا تھا، جب کہ تین مختلف اسکرپٹ نویسوں نے اس کو مل کر لکھا تھا، یہی وجہ ہے کہانی میں کئی جہتیں تھیں اور ایک ہی کہانی میں کئی مرکزی کردار باہم اسکرین پر دکھائی دیتے رہے اور فلم بین ان کے سحر سے نکل نہ پائے۔ جب کہ اس دوسری فلم میں مرکزی کہانی کو پچھلی کہانی سے ہی اخذ کیا گیا۔ یعنی پلاٹ پرانا تھا، بس کچھ نئے کرداروں کے ساتھ اس کو پیش کیا گیا، لیکن کہانی طوالت کی وجہ سے ناقص ثابت ہوئی۔ اس میں مرکزی کردار کو انتہائی کمزور انداز میں لکھا گیا اور یہ اس کا ایک اور نقص ہے۔ گلیڈی ایٹر 2 کے اس کردار کو دیکھ کر کہیں محسوس نہیں ہوتا کہ وہ کسی سپہ سالار کا بیٹا ہے اور سب سے بڑھ کر وہ کوئی ایسا جنگجو ہے، جو کسی شہنشاہ کا تختہ الٹ سکے اور ریاست کا نقشہ بدل دے۔ فلم میں اسے بہت بے ڈھنگے انداز میں، ایک زبردستی کا انقلابی دکھایا گیا ہے، جس کے پیچھے عوام اور فوج بغیر کسی کشش کے آنے لگتے ہیں۔ پہلی فلم کی کہانی جس قدر دل کو موہ لینے والی تھی، دوسری فلم کی کہانی اتنی ہی معمولی اور بے لطف ہے۔

ہدایت کاری

لیونگ لیجنڈ برطانوی فلم ساز ریڈلی اسکاٹ جنہوں نے سینما کی دنیا میں بہت سی یادگار اور ناقابل فراموش فلمیں تخلیق کی ہیں، انہی کی فلموں میں سے ایک گلیڈی ایٹر بھی ہے۔ نجانے کیوں چند دوسرے بڑے فلم سازوں کی طرح انہیں بھی اس خبط نے گھیر لیا کہ وہ اپنی شہرۂ آفاق فلم کا سیکوئل بنائیں۔ سب سے پہلے تو انہیں اسکرپٹ کی تیاری میں بہت دقت ہوئی، کئی کہانیاں لکھ کر ضائع کر دی گئیں، جو کہانی فائنل ہوئی اس کا حال اوپر میں بیان کر چکا ہوں۔ بطور ڈائریکٹر یہ ان کی ناکامی ہے، کیونکہ اس برے اسکرپٹ پر وہ ایک اچھی فلم تخلیق نہیں کر سکتے تھے اور ایسا ہی ہوا۔ البتہ اگر کسی نے ان کی پہلی فلم گلیڈی ایٹر نہیں دیکھی تو انہیں کسی حد تک یہ دوسری فلم اچھی لگے گی۔ اس بات کو صرف اسکرپٹ نویسی تک محدود نہ رکھیں بلکہ فلم کے دیگر شعبوں میں بھی یہ تنزلی محسوس ہوئی، جن میں سینماٹو گرافی، موسیقی، کاسٹیوم اور فلم کے دیگر پہلو شامل ہیں۔

ریڈلی اسکاٹ واقعی ایک حیران کر دینے والے فلم ساز ہیں اور کسی حد تک اس فلم میں بھی انہوں نے ایسا کیا، اور اسی لیے فلم کو بہرحال مقبولیت مل رہی ہے، مگر ایک بڑی تعداد ان پر تنقید کررہی ہے اور مجھ سمیت یہ سارے وہ لوگ ہیں، جنہوں نے 24 سال پہلے ریلیز ہونے والی ان کی پہلی شاندار فلم گلیڈی ایٹر دیکھی ہوئی ہے۔ یہاں‌ میں کہوں گا کہ گلیڈی ایٹر 2 ایک اچھی فلم کا برا سیکوئل ہے، بالخصوص کمزور کہانی اور غلط کاسٹ اس کے ناقص ہونے کی بڑی وجوہات ہیں۔ اور اس کے ذمے دار بھی ریڈلی اسکاٹ ہیں۔ شاید اب وہ بوڑھے ہورہے ہیں۔ اسٹیون اسپیل برگ، جو امریکی فلم ساز اور سینما کی دنیا کے ایک سمجھ دار فلم میکر مشہور ہیں، اکثر ریڈلی کو مشورہ دیتے رہتے ہیں جن پر ضرور عمل کرنا چاہیے۔ ورنہ ریڈلی اسکاٹ کا تخلیقی بڑھاپا ان کی زندگی بھر کی کمائی ضائع کر سکتا ہے۔

اداکاری

گلیڈی ایٹر 2 کی سب سے بڑی خرابی اس کی مس کاسٹنگ ہے۔ خاص طور پر مرکزی کردار نبھانے والے اداکار پاؤل میسکل ہیں، جن کا اس میں کوئی قصور نہیں، سوائے اس کے کہ انہیں یہ کردار قبول نہیں کرنا چاہیے تھا۔ وہ یہ اندازہ نہ کرسکے کہ اس فلم کے تناظر میں نیوزی لینڈ سے تعلق رکھنے والا اداکار رسل کرو جو اس کردار سے اپنی زندگی بنا گیا، ایسے شہرۂ آفاق کردار کو یونہی قبول کرلینا سراسر بیوقوفی تھی، جو اس آئرش اداکار پاؤل میسکل نے کی۔ گلیڈی ایٹر کے رکھوالے کے طور پر امریکی اداکار ڈینزل واشنگٹن نے اپنے کیرئیر کی بدترین اداکاری اس فلم میں کی ہے۔ جب کہ پہلی فلم میں یہی کردار جس طرح نبھایا گیا ہے، وہ قابل تقلید ہے۔

ان کے علاوہ قابل ذکر اداکاروں میں چلی نژاد امریکی اداکار پیدرو پاسکل اور دونوں فلموں میں کام کرنے والی ڈنمارک کی اداکارہ کونی نیلسن قابل ذکر ہیں۔ دونوں نے اپنے کردار بخوبی نبھائے۔ یوگنڈا کے مہاجر خاندان میں پیدا ہونے والے سویڈن کے اداکار علی کریم نے بھی ایک انڈین کا کردار بخوبی نبھایا۔ ویسے تو یورپی فلم ساز اس بات پر زور دیتے ہیں کہ جس خطے کا کردار ہے، اداکار وہیں سے لیناچاہیے لیکن انڈین کردار کے لیے کسی افریقی کو کس پیمانے پر کاسٹ کیا گیا یہ سمجھ نہیں آیا۔ اس فلم میں ایک اسرائیلی اداکار لیوراز اور اداکارہ یوول گونن کو بھی کاسٹ کیا گیا ہے، دونوں نے بس ٹھیک اداکاری کی۔ ان کے کردار بھی مختصر تھے۔ اسی فلم میں ایک مصری نژاد فلسطینی اداکارہ می القلماوی نے بھی ایک انتہائی مختصر کردار نبھایا ہے، لیکن ان دونوں ممالک کا پس منظر رکھنے والے اداکاروں کی ایک ہی فلم میں موجودگی کو بھی معنی خیز انداز میں دیکھا جا رہا ہے۔

حرفِ آخر

وہ فلم بین جنہوں نے اس سلسلہ کی پہلی فلم نہیں دیکھی، وقت گزاری کے لیے اسے ایک بہتر فلم خیال کریں گے، لیکن فلم ساز ان فلم بینوں سے زیادہ توقعات نہیں رکھ سکتے جو پہلی فلم دیکھ چکے ہیں۔ شاید اب برطانوی فلم ساز ریڈلی اسکاٹ تھکاوٹ کا شکار ہو رہے ہیں، جس کی وجہ سے اپنے ہی شاہکار کے قد تک خود کو بخوبی نہیں لاسکے۔ اس کے باوجود وہ میرے نزدیک ایک عظیم فلم ساز ہیں، جنہوں نے ہمیں بہت شاندار فلمیں دی ہیں اور اسی لیے ہمیں یہ فلم دیکھنا چاہیے۔ میں گلیڈی ایٹر 2 دیکھ چکا ہوں اور چاہتا ہوں گا کہ قارئین بھی عظیم فلم ساز ریڈلی اسکاٹ کی حوصلہ افزائی کی غرض سے یہ فلم ضرور دیکھیں، مگر ریڈلی کو چاہیے کہ وہ دوبارہ ایسا کوئی تجربہ نہ کریں۔