راولپنڈی : پاک فوج نے لائن آف کنٹرول ( ایل او سی) پر بھارتی کواڈ کاپٹر کی فضائی حدود کی خلاف ورزی کو ناکام بناتے ہوئے مار گرایا، بھمبر کے مناور سیکٹر میں دشمن نےکواڈکاپٹر سے جاسوسی کی کوشش کی۔
تفصیلات کے مطابق پاک فوج نے لائن آف کنٹرول ( ایل او سی) پر بھارتی کواڈ کاپٹر کو مار گرایا، سیکیورٹی ذرائع نے بتایا کہ فضائی حدود کی خلاف ورزی کرکے بھارتی کواڈ کاپٹر سے جاسوسی کی کوشش کی گئی۔
سیکیورٹی ذرائع نے اس واقعہ کی تصدیق کی ہے کہ بھمبر کے مناور سیکٹر میں دشمن نے کواڈ کاپٹر سے جاسوسی کی کوشش کی، پاک فوج کی بروقت کارروائی نے دشمن کی سرحد پار جاسوسی کی مذموم کوشش کو ناکام بنا دیا۔
ذرائع نے کہا کہ یہ واقعہ پاک فوج کی مستعدی،پیشہ ورانہ مہارت،دفاعی تیاری ثبوت ہے۔ پاک فوج دشمن کی کسی بھی جارحیت کافوری جواب دینے کیلئےہر دم تیار ہے اور ، پوری قوم افواجِ پاکستان کے ساتھ ملکر دشمن کو ہر محاذ پر منہ توڑ جواب دیں گی۔
یاد رہے پہلگام واقعے کے بعد پاک بھارت تعلقات کشیدہ ہیں، بھارتی نیوز چینلز مسلسل کشمیری مسلمانوں اور پاکستانی فوج کو اس واقعے کا ذمہ دار قرار دے رہے ہیں، جبکہ ہندو قوم پرست جماعتیں اشتعال انگیز بیانات دے کر عوام میں نفرت پھیلانے میں مصروف ہیں اور پاکستان کے خلاف بدلہ لینے کی کھلی دھمکیاں دی جا رہی ہیں۔
دوسری جانب پاکستان نے حملے میں ملوث ہونے کے الزامات کو سختی سے مسترد کر دیا ہے۔
