Author: لئیق الرحمن

کوئٹہ: بلوچستان کے علاقے ہوشاب میں بارودی سرنگ کے دھماکے میں ایف سی جوان نے جامِ شہادت نوش کرلیا۔

پاک فوج کے شعبۂ تعلقاتِ عامہ (آئی ایس پی آر) کی جانب سے جاری ہونے والے اعلامیے کے مطابق دہشت گردوں نے ہوشاب کے  قریب واقع علاقے شپک میں آئی ڈی کے ذریعے ایف سی گاڑی پر حملہ کیا۔

آئی ایس پی آر کے مطابق ایف سی کا واٹر باؤزر دہشت گردی کی جانب سے نصب کی گئی بارودی سرنگ سے ٹکرایا، جس میں ایف سی کے جوان کفایت اللہ  نے جامِ شہادت نوش کیا۔

آئی ایس پی آر کے مطابق دھماکے کے بعد علاقے میں دہشت گردوں کی تلاش کیلئے آپریشن شروع کردیا گیا۔

پاک فوج کے شعبہ تعلقاتِ عامہ کی جانب سے جاری بیان میں کہا گیا ہے کہ ’ملک دشمن عناصرکے ایسے بزدلانہ حملوں سے فورسز کے عزم کو متزلزل نہیں کرسکتے، بلوچستان میں ملک دشمن ایجنسیوں کوامن وامان خراب کرنے نہیں دیں گے‘۔

پاک فوج کے ترجمان نے کہا کہ ’سیکیورٹی فورسز ہر قیمت پر دشمن کےعزائم کو ناکام بنا دیں گی‘۔

اسلام آباد: فنانشل ایکشن ٹاسک فورس (ایف اے ٹی ایف) نے پاکستان کو گرے لسٹ میں برقرار رکھنے کا فیصلہ کیا ہے۔

اے آر وائی نیوز کے مطابق ایف اے ٹی ایف کا کہنا ہے کہ پاکستان نے 27 میں سے 26 نکات پر مکمل عملدرآمد کیا ہے، ایک پہلو پر پاکستان نے کافی پیشرفت مکمل کی ہے۔

ذرائع کے مطابق ایف اے ٹی ایف نے پاکستان کی کارکردگی کو باضابطہ طور پر سراہا اور پاکستان کو 6 مزید نکات پر عملدرآمد کہا کہہ دیا۔

ایف اے ٹی ایف کا کہنا ہے کہ پاکستان نے فیٹف کے ایکشن پلان کے تحت 17 قوانین پاس کیے، کالعدم تنظیموں کے ایک ہزار سے زائد اثاثہ جات تحویل میں لیے گئے۔

فیٹف کا کہنا ہے کہ ایک نکتہ زیر سماعت عدالتی مقدمات کے مکمل ہونے سے متعلق ہے، اس ایک نکتے کی بنیاد پر پاکستان کو گرے لسٹ میں برقرار رکھا گیا ہے، اس نکتے پر بھی پاکستان نے نمایاں پیش رفت کی ہے۔

ایف اے ٹی ایف کا کہنا ہے کہ پاکستان اس نکتے اور میوچل ایولیوشن کے 6 نکات پر جلد عملدرآمد کرے۔

خیال رہے گزشتہ میٹنگ تک پاکستان نے 24 نکات پر عملدرآمدکیا تھا ، جون 2018 میں ایف اے ٹی ایف نے پاکستان کو اپنی گرے لسٹ میں شامل کیا ، اس سلسلے میں ضروری اقدامات اٹھانے کے لیے پاکستان کو اکتوبر 2019 تک وقت دیا گیا، جس میں بعد میں مزید توسیع کر دی گئی تھی۔

راولپنڈی:  چیف آف آرمی اسٹاف جنرل قمر جاوید باجوہ نے لائن آف کنٹرول، ورکنگ باؤنڈری اور پاک افغان سرحد پر آپریشنل تیاریاں جاری رکھنے کی ہدایت کردی۔

پاک فوج کے شعبۂ تعلقاتِ عامہ (آئی ایس پی آر) کی جانب سے جاری ہونے والے اعلامیے کے مطابق آرمی چیف جنرل قمر جاوید باجوہ کی زیرصدارت فارمیشن کمانڈرز کانفرنس  منعقد ہوئی، جس میں کورکمانڈرز ، پرنسپلز اسٹاف ، آفیسرز اور فارمیشنز کمانڈرز نے شرکت کی۔

کانفرنس کے شرکا کو  جیو اسٹریٹجک صورت حال اور قومی سیکیورٹی کو پیش چیلنجزپر بریفنگ دی گئی اور اس پر تبادلۂ خیال بھی کیا گیا۔ آئی ایس پی آر کے مطابق چیلنجز اور خطرات سے نمٹنےکیلئےجوابی حکمت عملی پربھی تفصیلی غور کیا گیا جبکہ کانفرنس میں مختلف امور پر تفصیلی بات چیت بھی کی گئی۔

چیف آف آرمی اسٹاف نے ملک میں جاری استحکام آپریشن پر اطمینان کا اظہار اور آپریشن ردالفساد کی کامیابیوں کو بھی سراہا۔ شرکا نے قبائلی اضلاع میں دہشت گردی کے خلاف مقامی افراد کی قربانیوں کو خراجِ عقیدت پیش کیا۔

خیبرپختون خوا میں ضم ہونے والی قبائلی اضلاع، بلوچستان میں سماجی اور اقتصادی ترقی کے عمل پر غور کیا گیا جبکہ کانفرنس میں مشرقی سرحدوں اور مقبوضہ جموں کشمیرکی تازہ صورتحال کا جائزہ بھی لیا گیا۔

کانفرنس کےشرکا نے کشمیریوں کی جدوجہد،حق خود ارادیت پر مکمل یکجہتی کا اظہار  کیا اور کشمیریوں کو اقوام متحدہ کی قراردادوں کے تحت حق خودارادیت دینے پر زور بھی دیا۔

آئی ایس پی آر کے مطابق کانفرنس میں افغان مفاہمتی عمل میں پاکستان کے بامقصد عمل کو بھی سراہاگیا۔ شعبہ تعلقاتِ عامہ کی جانب سے جاری اعلامیے میں بتایا گیا کہ  آرمی چیف نے ایل اوسی، ورکنگ باؤنڈری پر آپریشنل تیاریاں برقرار رکھنےکی ضرورت پر زور دیتے ہوئے پاک افغان سرحد پر بھی آپریشنل تیاریاں جاری رکھنے کی ہدایت کی۔

آرمی چیف نے مختلف تربیتی مشقوں میں فارمیشن کے تربیتی معیار کی تعریف کی، انہوں نے جوانوں اور افسران کے بلند عزم کو سراہا اور کرونا، ٹڈی دل، پولیو کے خاتمے کی قومی کوششوں میں‌ کردار ادا کرنے پر بھی تعریف کی۔ چیف آف آرمی اسٹاف کا کہنا تھا کہ پاک فوج قوم کی خدمت اور وطن کے دفاع کیلئے ہر سطح تک جائےگی۔

اس موقع پر آرمی چیف نے ملتان اور منگلا کور کو بہترین کارکردگی دکھانے پر ٹرافیز سے بھی نوازا اور کامیابی کے سلسلے کو جاری رکھنے پر زور دیا۔