راولپنڈی: سیکیورٹی فورسز نے سوات میں خفیہ اطلاع پر کارروائی کی جس کے نتیجے میں تحریک طالبان کا مطلوب دہشت گرد مارا گیا۔
پاک فوج کے شعبۂ تعلقات عامہ (آئی ایس پی آر) کی جانب سے جاری ہونے والے بیان میں بتایا گیا ہے کہ سیکیورٹی فورسز نے سوات کے علاقے کانجو میں خفیہ اطلاع پر آپریشن کیا۔
ترجمان پاک فوج کے مطابق دہشت گرد نے فورسز پر فائرنگ کی جس پر اہلکاروں نے جوابی فائرنگ بھی کی۔
آئی ایس پی آر کے مطابق فائرنگ کے تبادلے میں ایک دہشت گرد مارا گیا جس کی شناخت مکرم کے نام سے ہوئی، سیکیورٹی فورسز نے آپریشن کے دوران ایک دہشت گرد کو گرفتار بھی کیا۔
ترجمان پاک فوج کے مطابق دہشت گردوں کی فائرنگ کی زد میں آکر دو شہری شہید ہوئے۔
آئی ایس پی آر کے مطابق دہشت گردوں کا تعلق تحریک طالبان پاکستان سے ہے، جو سیکیورٹی فورسز پر حملوں اور اسکول تباہ کرنے میں ملوث تھے۔
واضح رہے کہ سیکیورٹی فورسز نے 7 مارچ کو شمالی اور جنوبی وزیرستان میں خفیہ اطلاعات پر آپریشن کیا، جس کے دوران 4 دہشت گرد مارے گئے تھے۔ ترجمان پاک فوج کی جانب سے جاری بیان میں بتایا گیا تھا کہ آپریشن کے دوران فائرنگ کے تبادلے میں 4 سرکردہ دہشت گرد مارے گئے، جن کی شناخت عبدالآدم، محبوب، میر سلام کے ناموں سے ہوئی۔
ترجمان پاک فوج کے مطابق عبدالآدم نامی دہشت گرد سیکیورٹی فورسز پر حملوں سمیت دہشت گردی میں مطلوب تھا۔
مذکورہ بالا کارروائی سے ایک روز قبل سیکیورٹی فورسز نے شمالی وزیرستان کے مختلف علاقوں میں خفیہ اطلاعات پر دو آپریشنز کیے ، جس کے دوران 3 دہشت گرد لیڈرز سمیت 8 افراد مارے گئے تھے۔
آئی ایس پی آر کا کہنا تھا کہ مارے جانے والوں میں عبدالانیر عرف عادل، جنید عرف جامد، خالق عرف ریحان شامل ہیں، مارے گئے دہشت گرد سیکیورٹی فورسز اور مقامی لوگوں پر حملوں میں ملوث تھے۔
