Author: لئیق الرحمن

راولپنڈی (30 جولائی 2025): فیلڈ مارشل آرمی چیف جنرل عاصم منیر کا کہنا ہے کہ دہشتگردی کیخلاف قومی سطح پر یکجہتی ناگزیر ہے۔

فوج کے شعبہ تعلقات عامہ (آئی ایس پی آر) کے مطابق فیلڈ مارشل آرمی چیف جنرل عاصم منیر سے نیشنل ورکشاپ بلوچستان کے شرکا نے ملاقات کی، اس موقع پر انہوں نے قومی یکجہتی اور بلوچستان کی ترقی پر زور دیا۔

فیلڈ مارشل عاصم منیر نے کہا کہ دہشتگردی کے مکمل خاتمے کیلیے پاک فوج پرعزم ہے۔ انہوں نے بھارت کی دہشتگرد تنظیموں کی پشت پناہی کی شدید مذمت کی۔

یہ بھی پڑھیں: بھارتی اسپانسرڈ فتنہ الخوارج کے خاتمے کیلیے کوشاں ہیں، فیلڈ مارشل عاصم منیر

سپہ سالار نے کہا کہ فتنہ الخوارج اور فتنہ الہندستان بھارت کی ناکام پراکسیز ہیں، معرکہ حق میں شکست کے بعد بھارت کی پراکسی وار میں شدت آئی ہے، دہشتگرد کسی مذہب، قوم یا فرقے کے نمائندہ نہیں۔

انہوں نے بلوچستان میں ترقیاتی منصوبوں کو قومی ترقی کا ضامن قرار دیا اور ادارہ جاتی ہم آہنگی اور قومی سطح پر مربوط حکمت عملی پر زور دیا۔

ان کا کہنا تھا کہ پاکستان علاقائی امن کیلیے پُرعزم ہے مگر ہر خطرے کا بھرپور جواب دینے کو تیار ہے۔

آئی ایس پی آر کے مطابق نشست کے اختتام پر فیلڈ مارشل آرمی چیف جنرل عاصم منیر اور شرکا کے درمیان سوال و جواب کا سیشن ہوا۔ سپہ سالار نے شرکا کے سوالات کے تفصیلی جوابات دیے۔

راولپنڈی: مستونگ میں سیکیورٹی فورسز کی کارروائی میں بھارتی حمایت یافتہ 3 دہشت گرد ہلاک ہوگئے، میجر اور سپاہی نے جام شہادت نوش کیا۔

پاک فوج کے شعبہ تعلقات عامہ (آئی ایس پی آر) کے مطابق فورسزز نے مستونگ میں بھارتی حمایت یافتہ دہشت گردوں کے خلاف انٹیلیجنس بیسڈ آپریشن کیا۔

سیکیورٹی فورسز کی موثر کارروائی میں بھارتی حمایت یافتہ 3 دہشت گرد مارے گئے، فائرنگ کے تبادلے میں میجر زیاد اور سپاہی ناظم حسین بہادری سے لڑتے ہوئے شہید ہوگئے۔

ترجمان پاک فوج کے مطابق ہلاک دہشت گردوں سے اسلحہ، گولیاں اور دھماکا خیز مواد برآمد کیا گیا۔

آئی ایس پی آر کا کہنا ہے کہ علاقے میں ممکنہ دہشت گردوں کے خاتمے کے لیے کلیئرنس آپریشن جاری ہے، سیکیورٹی فورسز بھارتی حمایت یافتہ دہشت گردی کے خاتمے کے لیے پرعزم ہیں۔

کور کمانڈرز کانفرنس میں فورم کا کہنا ہے کہ بھارتی حمایت یافتہ پراکسیز کے خلاف کارروائیاں جاری رکھنا ناگزیر ہے۔

فیلڈ مارشل عاصم منیر کی زیر صدارت 271 ویں کور کمانڈرز کانفرنس ہوئی جس میں بھارتی اسپانسرڈ پراکسیز کے ہاتھوں حالیہ دہشت گرد حملوں میں شہید ہونے والوں کے لیے فاتحہ خوانی کی گئی، فورم نے دہشت گرد پراکسیوں کے خلاف فورسز کی حالیہ کامیابیوں کا جائزہ لیا۔

شرکا نے عزم کا اظہار کیا کہ ہمارے شہدا کا خون رائیگاں نہیں جائے گا، پاکستان کے عوام کا تحفظ اور سلامتی مسلح افواج کی اولین ترجیح ہے۔

فورم کا کہنا ہے کہ بھارتی حمایت یافتہ پراکسیز کیخلاف فیصلہ کن اور جامع کارروائیاں جاری رکھنا ناگزیر ہے، بھارت فتنہ الخوارج، فتنہ الہندوستان کی پراکسیز سے مذموم ایجنڈے کو آگے بڑھانے کی کوشش کررہا ہے۔

آرمی چیف نے کہا کہ فوجی کشیدگی میں تیسرے فریق کی شمولیت اور بلاک پولیٹکس بھارت کی بے بنیاد کوشش ہے، بھارت خطے میں نیٹ سیکیورٹی پرووائیڈر کا خود ساختہ کردار گمراہ کن طور پر پیش کرتا ہے۔

پاک فوج کے سپہ سالار نے کہا کہ دنیا واضح طور پر بھارتی توسیع پسندانہ عزائم، ہندوتوا انتہا پسندی سے بدظن ہوتی جارہی ہے۔

فورم نے جنگ کی بدلتی نوعیت، خطرات کے پیش نظر پاک فوج کی حکمت عملی، جدتوں پر بریف کیا، آرمی چیف نے ٹرائی سروسز ہم آہنگی مزید مضبوط کرنے میں پاک بحریہ اور فضائیہ کی قیادت کو سراہا، آرمی چیف نے ملک کو درپیش خطرات کے خلاف پاک فوج کی آپریشنل تیاریوں پر مکمل اعتماد کا اظہار کیا۔

آئی ایس پی آر کے مطابق آرمی چیف کے وزیراعظم کے ہمراہ ایران، ترکیہ، آذربائیجان کے کامیاب دورے پر بریفنگ دی گئی، فورم کو بریفنگ دی گئی کہ آرمی چیف نے وزیراعظم کے ساتھ سعودی عرب، یو اے ای کا بھی کامیاب دورہ کیا جس میں پاکستان کے فعال سفارتی کردار کی تفصیلات سے فورم کو آگاہ کیا گیا۔

فورم کو آرمی چیف کے تاریخی اور منفرد دورہ امریکا کے بارے میں بھی بریفنگ دی گئی، دورہ امریکا کے دوران اعلیٰ امریکی قیادت کو پاکستان کا بامقصد موقف براہ راست پیش کیا گیا، دورہ امریکا کے دوران دو طرفہ معاملات، علاقائی، ین الاقوامی امور سے بھی آگاہ کیا گیا۔

کور کمانڈرز فورم نے مشرق وسطیٰ اور ایران کی حالیہ پیشرفت کے تناظر میں داخلی، خارجی سلامتی کا تفصیلی جائزہ لیا، طاقت کے استعمال کے بڑھتے رجحان کو ترجیحی پالیسی ٹول کے طور پر استعمال کرنے پر تشویش کا اظہار کیا۔

فیلڈ مارشل عاصم منیر نے کہا ہے کہ کسی بھی مہم جوئی، پاکستان کی خودمختاری اور سالمیت کونقصان پہنچانے کی کوشش کا فوری جواب دیا جائے گا۔

اے آر وائی نیوز کے مطابق فیلڈ مارشل سید عاصم منیر نشان امتیاز (ملٹری) نے نیشنل ڈیفنس یونیورسٹی اسلام آباد کا دورہ کیا اور اس موقع پر نیشنل سیکیورٹی اینڈ وار کورس کرنے والے مسلح افراج کے فارغ التحصیل افسران سے خطاب کرتے ہوئے جنگی جنون کا شکار بھارت کو واضح اور دوٹوک انداز میں جواب دیا ہے۔

فیلڈ مارشل سید عاصم منیر نے کہا کہ کسی بھی مہم جوئی، پاکستان کی سالمیت کونقصان پہنچانے کی کوشش کا فوری جواب دیا جائے گا اور خود مختاری کی خلاف ورزی کا بغیر کسی ہچکچاہٹ منہ توڑ جواب دیا جائے گا۔

انہوں نے متنبہ کیا کہ ہماری آبادی کے مراکز، فوجی اڈوں کو نشانہ بنانے پر سخت جواب دیا جائے گا جب کہ اقتصادی مراکز، بندرگاہوں کو نشانہ بنانے پر بھی تکلیف دہ اور سوچ سے بڑھ کر جواب دیا جائے گا اور اس ساری کشیدگی کی اصل ذمہ داری بصیرت سے محروم اور مغرور جارح بھارت پر عائد ہوگی۔

فیلڈ مارشل نے کہا کہ بھارت کے منفی میڈیا پروپیگنڈے پر کہا کہ آپریشن بنیان مرصوص میں پاکستان کی کامیابی میں بیرونی حمایت جیسے بھارتی الزامات غیر ذمہ دارانہ ہیں۔ اپنی ناکامی کی غیر منطقی توجیہات پیش کرنا دراصل اسٹریٹجک دور اندیشی کی کمی ثابت کرتا ہے۔ حقیقت یہ ہے کہ بھارت آپریشن سندور کے دوران مقرر کردہ فوجی اہداف حاصل کرنے میں ناکام رہا۔

آرمی چیف کا کہنا تھا کہ جنگیں میڈیا کی بیان بازی، فینسی جنگی ساز وسامان یا سیاسی نعرے بازی سے نہیں بلکہ جنگیں یقین، محکم اور پیشہ ورانہ قابلیت، آپریشنل شفافیت، مضبوط اداروں، قومی عزم سے جیتی جاتی ہیں۔ بھارت کا ناکامی کی غیر منطقی توجیہات پیش کرنا دراصل اسٹریٹجک دور اندیشی کی کمی ثابت کرتا ہے۔ وہ خودمختار ایٹمی ریاست کیخلاف اشتعال انگیزی سے پیدا ممکنہ تباہ کن نتائج کے ادراک میں ناکام رہا۔

ان کا کہنا تھا کہ پاکستان نے اقوام عالم میں اصولی سفارت کاری پر مبنی دیرپا، باہمی احترام اور امن سےتعلقات قائم کیے اور خود کو خطے میں نیٹ ریجنل اسٹیبلائزر ثابت کیا ہے۔ اس کے برعکس خطے کے ممالک بھارت کے جارحانہ اور ہندو توا نظریے سے تنگ ہیں۔

فیلڈ مارشل عاصم منیر نے کہا کہ اس قسم کے بھارتی بیانات پاکستان کی کامیابی تسلیم کرنے میں روایتی ہچکچاہٹ کی عکاسی ہیں اور بھارت پاکستان کی حکمت عملی، مقامی صلاحیت، مضبوط اداروں کی بنیاد پر کامیابی تسلیم کرنے سے گریزاں ہے۔ دو طرفہ فوجی تصادم میں دیگر ملکوں کو شامل کرنا بھارت کی خالصتاً ناقص سیاسی کوشش ہے اور اس کے بے بنیاد بیانات کا مقصد فرضی ’’نیٹ سیکیورٹی پر وائڈر‘‘ کے خودساختہ رول کی ناکام کوشش ہے۔

عاصم منیر نے اس موقع پر پاکستان کی مسلح افراد کی پیشہ ورانہ مہارت، جذبے اور جنگی تیاری پر مکمل اعتماد کا اظہار کیا اور فارغ التحصیل افسران پر زور دیا کہ وہ دیانتداری، بے لوث خدمت، قوم کے لیے غیر متزلزل عزم پر ثابت قدم رہیں۔