راولپنڈی: آرمی چیف عاصم منیر کا کہنا ہے کہ ہم کبھی بھی فتنہ الخوارج کو اپنی فرسودہ سوچ ملک پر مسلط نہیں کرنے دیں گے۔
پاک فوج کے شعبہ تعلقات عامہ (آئی ایس پی آر) کے مطابق آرمی چیف نے پاکستان بھر کے یونیورسٹی اور کالجز کے طلباء سے خطاب کیا اور ان کی حوصلہ افزائی کی۔
انہوں نے کہا کہ پاکستان عوام بالخصوص نوجوانوں کا پاک فوج سے ایک انتہائی مضبوط رشتہ ہے، ملک دشمن عناصر کی فوج اور عوام کے درمیان خلیج ڈالنے کی کوشش ہمیشہ ناکام رہی ہے اور یہ کوشش انشا اللہ آئندہ بھی ناکام رہے گی۔
آرمی چیف نے کہا کہ پاکستان کے آئین کا آغاز بھی ان الحکم الاللہ (حاکمیت صرف اللہ کی ہے) سے ہوتا ہےْ
پاک فوج کے سپہ سالار نے کہا کہ یہ فتنہ الخوارج کس شریعت اور دین کی بات کرتے ہیں؟ ہم کبھی بھی فتنہ الخوارج کو فرسودہ سوچ ملک پر مسلط نہیں کرنے دیں گے، خیبرپختونخوا، بلوچستان کے غیور لوگ دہشت گردوں کے خلاف آہنی دیوار کی طرح کھڑے ہیں۔
انہوں نے کہا کہ طلبا اپنی تعلیم پر خصوصی توجہ دیں آپ پاکستان کے مستقبل کے رہنما ہیں، طلبا خود کو پاکستان کی ترقی کے قابل بنائیں۔
آرمی چیف نے کہا کہ طلبا تعلیمی سرگرمیوں میں بہترین کارکردگی کے لیے کوشش کریں، طلبا ایسی مہارتیں پیدا کریں جو ملک کی ترقی میں مثبت کردار کے لیے ہوں۔
آئی ایس پی آر کے مطابق آرمی چیف نے طلبا کی تخلیقی اور اختراعی صلاحیتوں کی تعریف کی، اور ملکی خود مختاری اور علاقائی سالمیت کے تحفظ میں پاک فوج کے کردار کو اجاگر کیا۔
آرمی چیف نے دہشت گردی کے خلاف جدوجہد میں عوام کی قربانیوں کو خراج تحسین پیش کیا۔
