اسلام آباد: گزشتہ روز پاکستان تحریک انصاف (پی ٹی آئی) کے احتجاج میں شہید ہونے والے رینجرز اہلکاروں کی نماز جنازہ چکلالہ گیریژن میں ادا کر دی گئی۔
نائیک محمد رمضان شہید، سپاہی گلفام خان شہید اور سپاہی شاہنواز شہید کو فوجی اعزاز کے ساتھ آبائی علاقوں میں سپرد خاک کیا جائے گا۔
فوج کے شعبہ تعلقات عامہ (آئی ایس پی آر) کے مطابق نماز جنازہ میں وزیر اعظم شہباز شریف اور آرمی چیف جنرل عاصم منیر نے شرکت کی جبکہ نائب وزیر اعظم اسحاق ڈار، وزیر داخلہ محسن نقوی، وزیر اطلاعات عطا اللہ تارڑ و دیگر حکام بھی موجود تھے۔
اس موقع پر وزیر اعظم شہباز شریف کا کہنا تھا کہ پاکستان خون ریزی اور افراتفری کا متحمل نہیں ہو سکتا، پُرتشدد کارروائیاں ناقابلِ قبول اور انتہائی ناقابلِ مذمت ہیں۔
شہباز شریف نے کہا کہ پُرتشدد کارروائیوں پر قانون نافذ کرنے والے اداروں نے تحمل کا مظاہرہ کیا، پوری قوم رینجرز اور پولیس کے شہدا کو خراج عقیدت پیش کرتی ہے، ان پُرتشدد فسادات میں سکیورٹی اہلکار بھی زخمی ہوئے۔
پیر اور منگل کی درمیانی شب سری نگر ہائی وے پر شرپسندوں نے گاڑی رینجرز اہلکاروں پر چڑھا دی تھی جس کے نتیجے میں 4 رینجرز اہلکار شہید جبکہ رینجرز اور پولیس کے 5 جوان شدید زخمی ہو گئے تھے جنہیں طبی امداد کیلیے اسپتال منتقل کیا گیا تھا۔
واقعے کے بعد حکومت نے آرٹیکل 245 کے تحت پاک فوج کو طلب کر لیا اور اس کے ساتھ ہی شرپسندوں سے نمٹنے اور موقع پر گولی مارنے کے بھی واضح احکامات جاری کر دیے۔
