Author: لئیق الرحمن

راولپنڈی: بلوچستان میں سیکیورٹی فورسز کے آپریشن میں 3 دہشت گرد ہلاک ہوگئے جبکہ فورسز کی گاڑی بم کی زد میں آنے سے میجر اور حوالدار شہید ہوگئے۔

پاک فوج کے شعبہ تعلقات عامہ ا(ٓئی ایس پی آر) کے مطابق بلوچستان کے ضلع ہرنائی میں فورسز نے دہشت گردوں کی موجودگی کی اطلاع پر آپریشن کیا اس دوران فائرنگ کے تبادلے میں 3 دہشت گرد مارے گئے۔

آئی ایس پی آر کا بتانا ہے کہ آپریشن کے دوران سیکیورٹی فورسز کی گاڑی دیسی ساختہ بم کی زد میں آگئی جس کے نتیجے میں میجر محمد حسبیب اور حوالدار نور احمد شہید ہوگئے۔

ترجمان پاک فوج کا کہنا ہے کہ میجر محمد حسیب شہید کا تعلق ضلع راولپنڈی سے ہے اور ان کی عمر 28 سال ہے، میجر محمد حسیب نے 8 سال 6 ماہ تک دفاع وطن کا مقدس فریضہ سر انجام دیا۔

آئی ایس پی آر کے مطابق میجر محمد حسیب شہید کے سوگواران میں والدین اور بہن، بھائی شامل ہیں۔

ترجمان پاک فوج کا کہنا ہے کہ 38 سالہ حوالدار نور احمد شہید کا تعلق ضلع بارکھان سے ہے، انہوں نے 14 سال تک وطن عزیز کا دفاع کیا، نور احمد شہید کے سوگواران میں اہلیہ، تین بیٹے اور بیٹی شامل ہیں۔

آئی ایس پی آر کا کہنا ہے کہ بلوچستان کے امن کو سبوتاژ کرنے کی کوششوں کو ناکام بنانے کے لیے پرعزم ہیں، بہادر سپاہیوں کی قربانیاں ہمارے عزم کو مزید مضبوط کرتی ہیں۔

راولپنڈی: بلوچستان میں سیکیورٹی فورسز کے آپریشن میں 4 دہشت گرد مارے گئے۔

پاک فوج کے شعبہ تعلقات عامہ (آئی ایس پی آر) کے مطابق بلوچستان کے ضلع کیچ کے علاقے بالگتر میں سیکیورٹی فورسز نے انٹیلیجنس بیسڈ آپریشن کیا اس دوران فائرنگ کے تبادلے میں 4 دہشت گرد مارے گئے۔

آئی ایس پی آر کا بتانا ہے کہ دہشت گرد سرغنہ ثنا عرف بارو بھی ہلاک دہشت گردوں میں شامل ہے، ہلاک دہشت گرد خودکش بمبار تیار کرنے اور حملوں میں ملوث تھا۔

ترجمان پاک فوج کا کہنا ہے کہ ہلاک دہشت گردوں سے اسلحہ اور گولہ بارود برآمد کیا گیا ہے۔

آئی ایس پی آر کا کہنا ہے کہ علاقے میں ممکنہ دہشت گردوں کی موجودگی پر کلیئرنس آپریشن جاری ہے، فورسز بلوچستان کے امن و استحکام سبوتاژ کرنے کی کوشش ناکام بنانے کے لیے پرعزم ہیں۔

وزیراعظم کا کامیاب آپریشن پر فورسز کو خراج تحسین

وزیراعظم شہباز شریف نے کامیاب آپریشن پر فورسز کو خراج تحسین پیش کیا اور پذیرائی کی ہے۔

شہباز شریف نے کہا کہ امن و امان میں خلل ڈالنے والوں کو بھاری قیمت ادا کرنی پڑے گی، دہشت گردوں کے مذموم عزائم کو اسی طرح خاک میں ملاتے رہیں گے۔

انہوں نے کہا کہ دہشت گردی کے مکمل خاتمے تک ہماری جنگ جاری رہے گی۔

راولپنڈی: خیبرپختونخوا میں سیکیورٹی فورسز کی دو مختلف کارروائیوں میں 6 خوارج ہلاک ہوگئے۔

پاک فوج کے شعبہ تعلقات عامہ (آئی ایس پی آر) کے مطابق شمالی وزیرستان کے علاقے دوسالی میں خوارج کے مقام کو موثر طریقے سے تلاش کیا گیا، خفیہ اطلاع پر آپریشن میں ایک خارجی احمد شاہ عرف انتظار ہلاک ہوا۔

آئی ایس پی آر کا بتانا ہے کہ سیکیورٹی فورسز نے دوسری کارروائی جنوبی وزیرستان کے علاقے کھمرنگ میں کی، خوارج کا گروہ افغان سرحد سے دراندازی کی کوشش کررہا تھا۔

ترجمان پاک فوج کا کہنا ہے کہ سیکیورٹی فورسز نے دراندازی ناکام بنا کر 5 خوارج کو ہلاک کردیا جبکہ 3 زخمی ہوئے۔

واضح رہے کہ دو روز قبل سیکیورٹی فورسز نے خوارج کی موجودگی کی اطلاع پر جنوبی وزیرستان کے علاقے سرواکئی میں کامیاب انٹیلی جنس بیسڈ آپریشن کیا تھا۔

آئی ایس پی آر کا بتانا تھا کہ جنوبی وزیرستان میں انٹیلی جنس معلومات کی بنیاد پر آپریشن کیا گیا تھا اور فائرنگ کے تبادلے میں سیکیورٹی فورسز نے 4 خوارج ہلاک ہوگئے تھے۔

آئی ایس پی آر کا کہنا تھا کہ علاقے میں ممکنہ خوارج کے خاتمے کے لیے کلیئرنس آپریشن جاری ہے، سیکیورٹی فورسز دہشت گردی کی لعنت کو ختم کرنےکے لیے پرعزم ہیں، بہادر سپاہیوں کے کارنامے ہمارے عزم کو مزید مستحکم کرتے ہیں۔

راولپنڈی: آرمی چیف جنرل سید عاصم منیر کا کہنا ہے کہ عالمی امن کو ابھرتے ہوئے خطرات اور چیلنجز کا سامنا ہے۔

اے آر وائی نیوز کے مطابق انٹرنیشنل ایسوسی ایشن آف پیس کیپنگ ٹریننگ سینٹر کی 28ویں سالانہ کانفرنس 4 سے 8 نومبر تک جاری رہے گی، آرمی چیف نے سینٹر فار پیس اینڈ اسٹیبلیٹی کی عمارت کا افتتاح کیا۔

آئی ایس پی آر کا بتانا ہے کہ اس موقع پر یو این انڈر سیکریٹری جنرل برائے امن آپریشنز ودیگر حکام نے شرکت کی۔

آرمی چیف نے کانفرنس سے خطاب کرتے ہوئے کہا کہ اقوام متحدہ کے تحت کئی امن مشنز کام کررہے ہیں۔

انہوں نے کہا کہ امن کی کوششوں کے باوجود کشمیریوں، فلسطینیوں کی حالت زار سامنے ہے، کشمیریوں اور فلسطینیوں کے حالات بہت کچھ کرنے کی طرف توجہ دلاتے ہیں۔

تقریب میں اعزازی مہمان جین پیئر لاکروکس نے اقوام متحدہ کے امن مشن میں پاکستان کے تعاون کا اعتراف کیا اور 28ویں آئی اے پی ٹی سی سالانہ کانفرنس کی میزبانی پر پاکستان کی تعریف کی۔

قبل ازیں آرمی چیف جنرل عاصم منیر کا تقریب میں آمد پر انسپکٹر جنرل ٹریننگ اینڈ ایویلیوایشن لیفٹیننٹ جنرل فیاض شاہ نے استقبال کیا۔