Author: نعیم اشرف بٹ

لاہور : سابق وزیراعلیٰ پنجاب پرویز الہی کی اہلیہ قیصرہ الہٰی کا کہنا ہے کہ پرویزالہٰی نے واضح کہا ہے وہ پی ٹی آئی کونہیں چھوڑیں گے۔

تفصیلات کے مطابق سابق وزیراعلیٰ پنجاب پرویز الہی کی اہلیہ قیصرہ الہٰی نے اے آر وائی نیوز کو انٹرویو میں کہا کہ چوہدری شجاعت کا بیٹا جب عورت کارڈ کی بات کرتا ہے تو تکلیف ہوتی ہے اور جب یہ لوگ میرے والد کیساتھ تصویریں لگاتے ہیں توحیرانی ہوتی ہے۔

اہلیہ پرویز الہٰی کا کہنا تھا کہ آج جو کچھ ہورہا ہے1977میں ایسا نہیں تھا، بہت کوشش کی گئی میرےکاغذات بھی مسترد ہوجائیں۔

قیصرہ الٰہی نے چوہدری شجاعت کے بیٹوں کا ذکر کرتے ہوئے بتایا کہ شافع کو تالے توڑنے کا شوق ہے،میرےبیٹے مونس کے کمرہ کاتالا توڑ دیا، پتہ نہیں انہوں نے کیا پڑھا اور سیکھا ہے اور ان کی کیا تربیت ہے لیکن کسی نے کہا ہے کہ ہربزدل انسان ظالم ہوتاہے اوریہ اپنی بزدلی دکھارہے ہیں۔

انھوں نے خاندانی اختلافات پر کہا کہ میں نےسوچ رکھا تھا ان کے بارے میں بات نہ کروں لیکن یہ جھوٹ بولتےہیں، شجاعت صاحب سے بات کروں توکہتےہیں اچھا بات کرتا ہوں لیکن کچھ نہیں ہوتا، پرویزبہت اپ سیٹ ہوتےہیں کہتےہیں شجاعت گھر والے کیس جیسی حرکت نہیں کرسکتا ، بچوں نے خود ہی دستخط کرکےمیرے اوپر کیس کیاہوگا۔

اہلیہ قیصرہ الہٰی کا کہنا تھا کہ پرویزالہٰی نےواضح کہاہےوہ پی ٹی آئی کونہیں چھوڑیں گے جبکہ میرا بھائی کہتا ہے پرویز بانی پی ٹی آئی کو چھوڑدیں اور کل باہر آجائیں ،مونس بھی آجائے۔

الیکشن کے حوالے سے انھوں نے کہا کہ کیا اس طرح الیکشن ہوتےہیں،میرا تودل کیااپنا سامان اٹھاکرواپس چلی جاؤں۔

پرویز الہی کی اہلیہ کا چوہدری شجاعت کے بیٹوں سے متعلق کہنا تھا کہ چاہتی ہی نہیں تھی ان دونوں لڑکوں کے بارےمیں بات کرتی لیکن اب حد ہوگئی ، کس حیثیت سےان دونوں کےساتھ پولیس ،ایلیٹ فورس ہر وقت ہوتی ہے۔

انھوں نے مزید بتایا کہ دونوں فیملیز نےتحریری طے کیا گھر کےاندرکوئی سیاسی سرگرمی نہیں ہوگی، میرےبھائی شجاعت اوران کے دونوں بیٹوں نےاتفاق کیا لیکن پھرخلاف ورزی کی ، چھوٹابھائی شفاعت صلح پسندہےاس نےپوری کوشش کی ان سے بات کرنے کی، شجاعت کہتے ہیں میں نے ریٹائرمنٹ لے لی،پرویزبھی لے،بچوں کو سیاست کرنے دیں۔

اسلام آباد : جمعیت علمائے اسلام کے رہنما حافظ حمداللہ نے دعویٰ کیا کہ خیبرپختونخوا میں دھمکی آمیز پمفلٹ تقسیم ہورہے ہیں، ہمیں کارنر میٹنگ تک نہیں کرنے دی جارہی۔

تفصیلات کے مطابق جمعیت علمائے اسلام کے رہنما حافظ حمداللہ نے اے آر وائی نیوز کو خصوصی انٹرویو دیتے ہوئے بتایا کہ کے پی میں پمفلٹس تقسیم ہورہے ہیں کارنرمیٹنگ ہوئی تومعاف نہیں کیاجائے گا۔

حافظ حمداللہ کا کہنا تھا کہ سیکیورٹی کا یہ عالم ہےہمارا امیدوارکسی کےگھر نہیں جاسکتا ، ہمیں کارنر میٹنگ تک نہیں کرنےدی جارہی، کےپی میں شام کوکوئی باہرنہیں نکل سکتا، وہاں حکومت کسی اورکی ہوتی ہے۔

نواز شریف کے حوالے سے سوال پر جمعیت علمائے اسلام کے رہنما نے کہا کہ نوازشریف نےجوغلطیاں ماضی میں کیں وہ اب نہ دہرائیں، بیساکھیوں سے حکومت بنائیں گے تو لولی لنگڑی سےبھی بدترہوگی، ماضی میں جس نےبھی طاقتور سیاست کی اس کو مار بھی وہیں سے پڑی۔

ان کا مزید کہنا تھا کہ نوازشریف اگر فٹ ہونا چاہتےہیں توکتنی دیر تک ہوجائیں گے، نوازشریف کب تک برداشت کرینگے نام اور دستخط ان کے اور حکم کسی اور کا ہو۔

حافظ حمداللہ نے کہا کہ اسی طرح بانی پی ٹی آئی کو حکومت ملی تو اب کیاہورہاہے، اس قسم کی حکومت کامستقبل خوفناک دیکھ رہا ہوں۔

رہنما جے یو آئی ف کا کہنا تھا کہ لوٹوں کے ذریعے اقتدارمیں آناچاہتےہیں توپھریہ سیاست اورمیچورٹی نہیں، یہ اصولی نہیں وصولی کی سیاست ہے۔

انھوں نے مزید کہا کہ عوام نوازشریف یا پیپلزپارٹی پر اعتماد کرتے ہیں توان کووزارت عظمیٰ مبارک، عوام کے بجائے پاور پالیٹکس کرنی ہےتویہ عوام اورجمہوریت کیلئےٹھیک نہیں ، طاقت کی سیاست سے جو بھی وزیراعظم بنا وہ جونیجو، شوکت عزیزیا کاکڑ جیسا ہوگا۔

حافظ حمداللہ کا کہنا تھا کہ آئی پی پی، پرویزخٹک اورراجہ ریاض کون ہیں، سب پی ٹی آئی کا حصہ تھے۔

انھوں نے زور دیا کہ تمام جماعتوں کو فیصلہ کرنا ہوگا، ڈیموکریسی میں لوٹاکریسی کی گنجائش نہیں، جہاں لوٹا کھڑا ہو، تمام جماعتیں اسے گرانے کی کوشش کریں تاکہ پارلیمنٹ نہ آسکے۔

اسلام آباد : سربراہ پی ٹی آئی سیاسی کمیٹی اسد قیصر کا کہنا ہے کہ ہم کسی ٹکراؤ کے حق میں نہ ہیں اور نہ چاہتے ہیں، یہ ملک ہمارا ہے اور ادارے بھی ہمارے ہیں۔

تفصیلات کے مطابق سربراہ پی ٹی آئی سیاسی کمیٹی اسد قیصر نے اے آر وائی نیوز کو انٹرویو دیتے ہوئے کہا کہ یہ ملک ہماراہے،ادارےبھی ہمارے ہیں،ہم مضبوط پاکستان چاہتےہیں۔

اسد قیصر نے دعویٰ کیا کہ ن لیگ چاہتی ہےہمارا اداروں سےٹکراؤہو اورانہیں سیاسی فائدہ پہنچے لیکن ہم نےفیصلہ کیا ہے کسی قسم کے ٹکراؤ کے حق میں نہ تھے اورنہ ہیں، یہ ن لیگ کی غلط فہمی ہے کہ پی ٹی آئی اور فوج میں فاصلے بڑھائیں گے، ان شااللہ ن لیگ پروپیگنڈے اورمہم میں ناکام ہوگی۔

انھوں نے کہا کہ فیصلہ سازوں سے کہتا ہوں خداراشفاف انتخابات کرائیں، لیول پلیئنگ فیلڈ دیں، ایسے الیکشن سے ملک میں استحکام نہیں بدترین عدم استحکام آئے گا۔

سربراہ پی ٹی آئی سیاسی کمیٹی کا کہنا تھا کہ جو لوگ ہماری اداروں سے مس انڈراسٹینڈنگ چاہتےہیں ان کو ہم لفٹ نہیں کراتے۔

انھوں نے الزام لگاتے ہوئے کہا کہ پنجاب میں نوازشریف اور بیٹی نشاندہی کرتے ہیں اس کو نہیں چھوڑنا اس کو تنگ کرنا ہے، اسی طرح کے پی ، سندھ میں کوئی اور ایسا کر رہا ہے کیونکہ پی ٹی آئی مقبول ہے۔

اسد قیصر کا کہنا تھا کہ پی ٹی آئی کے خوف سے دباؤ ڈالا جا رہا ہے کہ سینئر قیادت کو الیکشن سے باہر رکھا جائے کیونکہ وہ پی ٹی آئی کامقابلہ نہیں کرسکتےاس لیے اوچھے ہتھکنڈوں پراترآئے ہیں۔

سربراہ پی ٹی آئی سیاسی کمیٹی نے الیکشن کمیشن پر الزام عائد کرتے ہوئے کہا کہ کہ الیکشن کمیشن بدترین کردارادا کررہا ہے، پری پول دھاندلی کا آغازہوچکا ، الیکشن کمیشن تونیوٹرل ادارہ ہے اس کا کیا کام ہےایک پارٹی سےپرسنل ہوجائے۔

سابق اسپیکر نے امید ظاہر کی کہ دھاندلی کےتمام حربوں کےباوجودہم ان شا اللہ یہ الیکشن جیتیں گے، عدالتوں سےتوقع ہےاوراگرعدالتیں کردار ادا نہ کریں تو ملک کہاں جائےگا۔

اسد قیصر نے اپنے اوپر مقدمات کے حوالے سے بتایا کہ پہلی بارجیل گیا، کبھی گملےچوری اورکبھی الٹراساؤنڈمشین کےپرزےکاکیس بنادیا۔