Author: نعیم اشرف بٹ

لاہور: پاکستان مسلم لیگ (ن) کے رہنما حنیف عباسی نے کہا ہے کہ پیپلزپارٹی کے ساتھ اب اتحادی حکومت نظر نہیں آرہی، پیپلزپارٹی کیساتھ حکومت بنانے سے بہتر ہے ن لیگ حکومت نہ بنائے۔

پاکستان مسلم لیگ (ن) کے رہنما حنیف عباسی نے اے آروائی نیوز کو انٹرویو میں کہا کہ اگر پہلے جیسی اتحادی حکومت ہوئی تو نوازشریف اپنا وژن مکمل نہیں کرسکیں گے، شہبازشریف سے متعلق بلاول کی باتیں اخلاق سے گری ہوئی ہیں، آصف زرداری اور بلاول دونوں شہبازشریف کو  بڑا بھائی کہتے رہے ہیں۔

مسلم لیگ ن کے رہنما نے کہا کہ پیپلزپارٹی کا حساب، انگور کھٹے والا ہے، آپ نے شو باز کہا ہے تو پھر آپ بھی سندھ کو ٹھیک کر کے شو بازی کر لیں، پورے سندھ میں پینے کا صاف پانی نہیں، انہوں نے  سندھ والوں کو صحت اور تعلیم بھی نہیں دی۔

حنیف عباسی کا کہنا تھا کہ سندھ کے اسکول،کالجز میں جانور بندھے ہیں، وڈیروں نے زمینوں پر قبضہ کرلیا، ہم لاڈلے نہیں، بس انصاف دیر سے ملا، پی پی سے کہتا ہوں محنت کر حسد نہ کر۔

انہوں نے کہا کہ قومی اسمبلی میں بلاول نے وزیراعظم کو کہا ہمیں لاڑکانہ اور کراچی  ٹھیک کرکے دیں، بلاول نےاسمبلی میں کہا ہمیں سندھ میں شہبازشریف چاہیے۔

سابق معاون خصوصی حنیف عباسی نے کہا کہ پنجاب میں ہم جیتیں گے، بلوچستان میں بھی ن لیگ حکومت بنارہی ہے، کے پی میں مولانا کے ساتھ اتحادی حکومت بنائینگے، سندھ میں پی پی سے ٹکر کا مقابلہ ہوگا۔

ان کا کہنا تھا کہ ہم نے پیپلزپارٹی کی وزارتوں میں مداخلت نہیں کی اور آپ ان کی کارکردگی دیکھ لیں، بلاول بھٹو کی وزارت خارجہ میں کیا کارکردگی رہی، ممی ڈیڈی وزیر خارجہ لگا دیں گے تو کامیابی حاصل نہیں ہوگی۔

مسلم لیگ کن کے رہنما کا کہنا تھا کہ ہماری جماعت  کے لوگ ق لیگ سے اتحاد کے حق میں نہیں، گجرات کی ایک 2 نشستوں  پر اختلاف تھا اب سیٹ ایڈجسٹمنٹ لیڈر شپ کا فیصلہ ہوگا۔

حنیف عباسی کا کہنا تھا کہ پی ٹی آئی کو دیوار سے لگا کر ملک نہیں چل سکتا لیکن  9 مئی والے عناصر کو نکال دیں، اگر 9 مئی والوں کو بھی لیول پلئینگ فیلڈ دینی ہے تو کالعدم تنظیموں کو بھی ہونی چاہیے، شیخ رشید کی بات کا یقین نہیں،کسی کام کا چلہ نہیں کاٹا، جھوٹ بولتا ہے۔

حنیف عباسی نے دعویٰ کیا کہ پرویزالہٰی اتنے مضبوط نہیں، انکو تو کسی نے پریس کانفرنس کا کہا ہی نہیں۔

لاہور : مسلم لیگ ن کی قیادت نے ق لیگ سے مکمل انتخابی اتحاد کی مخالفت کرتے ہوئے چند نشستوں پر ایڈجسٹمنٹ کا مشورہ دے دیا۔

تفصیلات کے مطابق ن لیگ کی قیادت نے مسلم لیگ ق سے مکمل انتخابی اتحاد کی مخالفت کردی ، ذرائع نے بتایا کہ لیگی قیادت نے چند نشستوں پر ایڈجسٹمنٹ کا مشورہ دیا ہے۔

ذرائع نے کہا ہے کہ رپورٹ ن لیگ کی ٹکٹ کےامیدواروں کے ابتدائی انٹرویوز کےبعد تیار کی گئی، جس میں ن لیگ کی ٹکٹ کمیٹی نےایک دونشستوں پرسیٹ ایڈجسٹمنٹ کی تجویزدی ہے۔

ذرائع کا کہنا تھا کہ گجرات میں چوہدری وجاہت اورحسین الہٰی سے سیٹ ایڈجسٹمنٹ کی مخالفت کی گئی ہے، گجرات شہر کی قومی اسمبلی کی سیٹ پرسالک حسین سےسیٹ ایڈجسٹمنٹ ہوسکتی ہے۔

چوہدری وجاہت کے حلقے سے نوابزادہ غضنفر گل کو ٹکٹ دینے کی سفارش کی گئی ہے جبکہ ایم پی اےکی سیٹ سےبھی شافع حسین کی جگہ ن لیگ کےحاجی ناصر کی حمایت کی۔

ذرائع کےمطابق بہاولپور سے طارق بشیر چیمہ بھی ن لیگ سے سیٹ ایڈجسٹمنٹ کےخواہشمند ہیں،سالک حسین کے مقابلے میں پی ٹی آئی کے پرویزالہٰی یا ان کے خاندان کا فرد انتخاب لڑے گا۔

ذرائع نے مزید بتایا ہے کہ ق لیگ سے اتحاد یا سیٹ ایڈجسٹمنٹ کا حتمی فیصلہ نوازشریف کریں گے۔

لاہور : مسلم لیگ نون کو پنجاب کے بیس سے زائد قومی اسمبلی کےحلقوں میں پارٹی ٹکٹوں کی تقسیم میں مشکلات کا سامنا ہے۔

تفصیلات کے مطابق مسلم لیگ نون کے لیے پنجاب کے بیس سے زائد قومی اسمبلی کےحلقوں میں ٹکٹوں کا اجراٰ معمہ بن گیا ہے۔

پارٹی کے سینئر رہنما نے بتایا کہ ان حلقوں میں ایک سیٹ کے لیے تین سے چار طاقتور الیکٹیبلز کے درمیان سخت مقابلہ اور کھینچا تانی جاری ہے۔

ذرائع کا کہنا ہے کہ ان میں سب سے بڑا مسئلہ فیصل اباد کے حلقہ این اے 102 کو ہے، جہاں پر نون لیگ کے رہنما طلال چوہدری اور تحریک انصاف کو چھوڑنے والے نواب شیر وسیر کےدرمیان مقابلہ چل رہا ہے۔

اس سلسلے میں دونوں اطراف اپنی اپنی لابی کےذریعے پارٹی قائدین تک سفارشیں کروا رہےہیں۔

دو روز قبل لاہور میں سابق اپوزیشن لیڈر راجہ ریاض نے نواب شیر وسیر کے ہمراہ نون لیگ کے صدر شہبازشریف سے ملاقات کی۔

جس میں شہبازشریف کو کہا گیا کہ وعدے کےمطابق ائندہ انتخابات میں حلقہ این اے ایک سو دو سے نون لیگ کی ٹکٹ نواب شیر وسیر کو ملنی چاہیے، جس پر شہبازشریف نے کہا کہ وہ ان کو سپورٹ کریں گے۔

دوسری جانب طلال چوہدری بھی مریم نواز کےذریعے اسی حلقے سے ٹکٹ حاصل کرنے کےلیے دباو ڈال رہےہیں، ذرائع کے مطابق طلال چوہدری کو تجویز دی گئی ہے کہ وہ سینیٹر بن جائیں، اس تجویز پر طلال چوہدری نے ابھی تک حامی نہیں بھری ہے تاہم پارٹی ٹکٹ کا حتمی فیصلہ نوازشریف ہی کریں گے۔

اسلام آباد: سابق اپوزیشن لیڈر اور ن لیگ کے رہنما راجہ ریاض نے کہا ہے کہ صرف ایک چیز کی لابنگ ہورہی ہے کہ نواز شریف ان شااللہ وزیر اعظم بنیں گے۔

تفصیلات کے مطابق سابق اپوزیشن لیڈر اور ن لیگ کے رہنما راجہ ریاض نے اے آر وائی نیوز کو خصوصی انٹرویو میں کہا کہ پی ٹی آئی اس وقت بہت مشکلات میں ہے اگر نئے امیدواروں آتے ہیں تو ان کے پاس وقت کم ہے۔

سابق اپوزیشن لیڈر نے کہا کہ اس وقت صرف ایک چیزکی لابنگ ہورہی ہے کہ نواز شریف ان شااللہ وزیر اعظم بنیں گے، ن لیگ اسوقت پنجاب میں سوئپ کر رہی ہے اسکے مقابلے میں کوئی جماعت اتنی مضبوط نہیں ہے۔

 عدم اعتماد سے متعلق راجہ ریاض کا کہنا تھا کہ عدم اعتماد سے 2 ماہ پہلے ن لیگ سے ہمارے مذاکرات میں سب کچھ طے ہوا، ہماری بات شہباز شریف سے ہوتی تھی پھر فون پر نواز شریف کو بتایا جاتا تھا جس کا ضامن کوئی نہیں، عدم اعتماد سے پہلے جو طے ہوا اس پر ہم اور وہ قائم ہیں۔

راجہ ریاض نے کہا کہ ہم نے طے کیا ہوا تھا ہم نے پی ٹی آئی چیئرمین کو وزیراعظم نہیں رہنے دینا ہے، پی ٹی آئی چیئرمین ہماری عزت نہیں کرتا تھا اور اسکا سیکرٹری ہمارا فون نہیں سنتا تھا، اعظم خان اب وعدہ معاف گواہ بن گیا ہے وہ  پہلے فرعون بنا ہوا تھا۔

انہوں نے کہا کہ پی ٹی آئی چیئرمین کی اتنی ہمت نہیں تھی کہ گھنٹی بجا کر اعظم خان کو میٹنگ میں بلا لے، وہ تو پی ٹی آئی کے سینئر رہنما اسد عمر اور شاہ محمود قریشی کو لفٹ نہیں کرواتا تھا، پتا نہیں پی ٹی آئی چیئرمین کی کیا مجبوری تھی۔

سابق اپوزیشن لیڈر نے کہا کہ عدم اعتماد سے پہلے چیئرمین پی ٹی آئی کوسپورٹ نہیں تھی ان کے اوپر سے ہاتھ کھینچ لیا گیا تھا، ہمیں پتا چلا تھا کہ ایک جرنیل کے ذریعے ہمیں لاجز سے اٹھانے کی کوشش ہونی تھی، اس لئے سندھ ہاؤس چلے گئے۔

’’ پی ٹی آئی چیئرمین نے یہ کہا تھا لیکن ہمیں نہیں اٹھایا گیا تو اسکا مطلب ہے ہاتھ کھینچ لیا گیا تھا، جب ہمیں نہیں اٹھانے دیا گیا تو اسکا مطلب تھا عدم اعتماد کامیاب ہوجائےگی‘‘۔

راجہ ریاض کا کہنا تھا کہ ہم نے تو کشتیاں جلا دی تھیں اور عدم اعتماد میں ووٹ ڈال کر نا اہل ہونے کو تیار تھے اس دن  ایوان میں بھی موجود تھا لیکن شہباز شریف نے ہمیں ووٹ دینے سے منع کر دیا۔

ن لیگ رہنما راجا ریاض نے مزید کہا کہ شہبازشریف نے جس سے جو وعدہ کیا پورا کیا، میں ان کامشکور ہوں، لیکن ہمارے گروپ کے 8 لوگ ن لیگ کے علاوہ کہیں اور جانا چاہتے ہیں۔

پیپلز پارٹی کے چیئرمین بلاول بھٹو زرداری اور ان کے والد سابق صدر آصف علی زرداری کے درمیان اختلافات کی خبروں پر  راجہ ریاض نے کہا کہ آصف زرداری اور بلاول بھٹو کے بیانات ہلکے پھلکے ہیں ان کو سنجیدہ نہ لیں۔

راجہ ریاض نے کہا کہ ایک کی ڈیوٹی آگ لگانا اور دوسرے کی آگ بجھانا ہے، زرداری صاحب منجھے ہوئے سیاستدان ہیں اور بلاول ابھی سیکھ رہے ہیں۔

 راجہ ریاض نے انٹرویو میں مزید کہا کہ استحکام پاکستان پارٹی کا ووٹر تو نظر نہیں آرہا اس لیے انکے لیے دعا ہی کر سکتا ہوں، قومی حکومت بنانی ہی پڑے گی، پاکستان کا فائدہ ہی قومی حکومت میں ہے جس میں سب ایک پیج پر بیٹھیں اور حکومت میں شامل ہوں، دہشت گردوں کے علاوہ پی ٹی آئی والے بھی نیشنل حکومت کا حصہ ہوسکتے ہیں۔

’ضامن کوئی نہیں، عدم اعتماد سے پہلے جو طے ہوا اس پر ہم اور وہ قائم ہیں‘! شہباز شریف نے جس سے جو وعدہ کیا پورا کیا، میں ان کا شکرگزار ہوں —- ہمارے گروپ کے 8 لوگ ن لیگ کے علاوہ کہیں اور جانا نہیں چاہتے، سابق اپوزیشن لیڈر اور ن لیگ کے رہنما راجا ریاض کا اے آر وائی نیوز کو خصوصی… pic.twitter.com/LPSa332WYZ

— ARY NEWS (@ARYNEWSOFFICIAL) November 25, 2023