Author: نعیم اشرف بٹ

اہم معاملات پر بی اے پی کو نظر انداز کرنے پر اتحادی سینیٹر دنیش کمار حکومت پر برس پڑے اور کہا کہ جب اقتدار آتا ہے تو ان کی فرعونیت مزید بڑھ جاتی ہے۔

جوں جوں موجودہ حکومت کے خاتمے کا وقت قریب آ رہا ہے اتحادیوں کے اختلافات اور شکوے شکایات بڑھتے جا رہے ہیں۔ اب بی اے پی کو اہم معاملات پر نظر انداز کرنے پر سینیٹر دنیش کمار بھی حکومت پر برس پڑے ہیں اور کہتے ہیں کہ حیران ہوں کہ جب اقتدار آتا ہے تو ان کی فرعونیت مزید بڑھ جاتی ہے۔

بلوچستان عوامی پارٹی کے رہنما سینیٹر دنیش کمار نے اے آر وائی نیوز سے خصوصی گفتگو کرتے ہوئے کہا ہے کہ یہ فرعونیت کا ہی مظاہرہ ہے کہ بلوچستان کے ارکان کو نظر انداز کر رہے ہیں۔ اسلام آباد کی نفسیات ہے جس کے تحت یہ چھوٹی پارٹیوں کو گھاس نہیں ڈالتے۔

ان کا کہنا تھا کہ نگراں وزیراعظم پر ہم سے مشورہ ہوا نہ ہی اعتماد میں لیا گیا ہے۔ نگراں سیٹ اپ کیلیے ہمارے پارلیمانی لیڈر خالد مگسی سے رابطہ نہیں کیا گیا۔ رابطہ نہ کیا تو ہم سمجھ سکتے ہیں کہ یہ ضرورت کے وقت ہمیں استعمال کرتے ہیں۔

بی اے پی کے سینیٹر نے کہا کہ 2 بڑی جماعتیں اپنے مفادات کے تحت ہی فیصلہ کریں گی اور اس میں تیسری بھی شامل ہے، جب ان کو ضرورت ہوتی ہے تو ہمیں آکر گلے لگاتے ہیں اور جب ضرورت نہیں ہوتی تو ردی کے کاغذ کی طرح پھینک دیتے ہیں۔ بلوچستان عوامی پارٹی کے ساتھ ہمیشہ دھوکے بازی کی گئی۔

دنیش کمار نے کہا کہ منتخب وزیراعظم بلوچستان سے آنے کا تو امکان نہیں اس لیے میری شدید خواہش ہے نگراں وزیراعظم بلوچستان سے ہو کیونکہ یہ بلوچ عوام کی خواہش ہے۔

ان کا کہنا تھا کہ آصف زرداری اب رک گئے لیکن کسی اور جماعت نے دانت تیز کر لیے ہیں، جلد ہی ایک اور وفاقی پارٹی ہمارے ارکان پر حملہ آور ہونیوالی ہے۔ آپ جلد سن لیں گے کہ وہ کس طرح سے بلوچستان میں آکر اپنا پاور شو کریں گے۔

بی اے پی رہنما کا کہنا تھا کہ ہمارے بندے ٹوٹتے نہیں لیکن جب مین اسٹریم میں قبول نہ کیا جائے تو پھر مایوس ہوتے ہیں اور سوچتے ہیں کہ وفاقی پارٹی میں شامل ہوں تاکہ ہمارے مسائل حل ہوں۔

انہوں نے مزید کہا کہ الیکشن وقت پر ہونے چاہئیں کن مردم شماری کا نوٹیفکیشن ہوگیا تو 4 ماہ تاخیر ہو سکتی ہے۔ بلوچستان کے لوگوں کا بھی یہی مطالبہ ہے کہ نئی مردم شماری پر انتخابات ہوں۔ پرانی مردم شماری میں بلوچستان کی آبادی کم دکھائی گئی، اب ہماری سیٹیں زیادہ ہوں گی۔

ترجمان پی ڈی ایم اور جے یو آئی (ف) کے رہنما حافظ حمد اللہ نے کہا ہے کہ نواز شریف اپنے چھوٹے بھائی شہباز شریف سے بہتر وزیراعظم ہیں۔

ترجمان پی ڈی ایم اور جے یو آئی کے مرکزی رہنما حافظ حمد اللہ نے اے آر وائی نیوز کو انٹرویو دیتے ہوئے نواز شریف کو اپنے چھوٹے بھائی شہباز شریف سے بہتر وزیراعظم قرار دے دیا اس کے ساتھ ہی انوہں نے استحکام پاکستان پارٹی اور پرویز خٹک کی جماعتوں کو آڑے ہاتھوں لیتے ہوئے دونوں کو مفاد پرستوں کا ٹولہ قرار دیا۔

حافظ حمد اللہ نے کہا کہ لوگ کہتے ہیں شہباز شریف بہتر منتظم ہیں لیکن نواز شریف اپنے چھوٹے بھائی شہباز شریف سے بہتر وزیر اعظم ہیں۔ وہ بہتر ہیں اسی لیے تو تین بار ملک کے وزیراعظم بنے۔

ترجمان پی ڈی ایم نے کہا کہ ہم جمہوری لوگ ہیں اور الیکشن کے التوا میں نہیں، چاہتے ہیں کہ انتخابات مقررہ وقت پر ہوں اگر ایسا نہ ہوا تو اس کا جواب بھی اسی وقت دیں گے۔

انہوں نے کہا کہ نگران سیٹ اپ پر ن لیگ سے غیر رسمی بات شروع ہو گئی ہے۔ سعد رفیق اور اسحاق ڈار کے ساتھ کچھ لوگ فضل الرحمان کے پاس آئے تھے۔ جب رسمی طور پر میٹنگ ہو گی تو اس کی کچھ اور شکل ہو جائے گی۔ تاہم جے یو اائی کا کسی سے انتخابی اتحاد نہیں ہوگا البتہ سیٹ ایڈجسٹمنٹ ہوسکتی ہے۔

حافظ حمد اللہ نے کہا کہ استحکام پاکستان پارٹی یا پرویز خٹک کی پارٹی کا سیاست سے کوئی تعلق نہیں۔ آئی پی پی اور پرویز خٹک کی سیاست ان کے مفادات ہیں، یہ پہلے مفادات کے لیے پی ٹی آئی میں گئے اور اب نئے گھونسلے ڈھونڈ رہے ہیں لیکن ہمیں ان کی کوئی ضرورت نہیں ہے۔

ترجمان پی ڈی ایم نے کہا کہ حاجی غلام علی کو گورنر کے پی بنانا تنہا جمعیت علماٰ ئے اسلام کا نہیں بلکہ سب اتحادیوں کا فیصلہ تھا۔ ایمل ولی خان نے خود چار سدہ کے جلسے میں غلام علی کے نام کا اعلان کیا تھا لیکن اب ن لیگ، پیپلز پارٹی اور اے این پی گورنر پر اعتراضات اٹھا رہی ہیں۔

ان کا کہنا تھا کہ اگر کچھ تحفظات ہیں تو اس کا فورم اتحادیوں کا اجلاس ہے لیکن میڈیا پر اچھالنے سے انتشار پیدا ہو گا، جس فورم نے ان کو گورنر بنایا اسی فورم پر الزامات کے شواہد لے آئیں تو پھر فیصلہ کر لیں۔

پیپلز پارٹی اور ن لیگ میں آئندہ الیکشن میں کامیابی کے حصول کے لیے الیکٹیبلز شامل کرنے کا مقابلہ بلوچستان تک پہنچ گیا ہے۔

اے آر وائی نیوز کے مطابق موجودہ حکومتی حلیف جماعتوں پاکستان پیپلز پارٹی اور مسلم لیگ ن میں آئندہ الکشن میں کامیابی کے حصول کی کوششوں کے حوالے سے مقابلہ بازی شروع ہو گئی ہے اور دنوں جماعتوں کی جانب سے الیکٹیبلز کو اپنی جماعتوں میں شامل کرنے کا مقابلہ بلوچستان تک پہنچ گیا ہے۔

ذرائع کے مطابق پیپلز پارٹی کے بعد ن لیگ کی نظریں بھی بلوچستان کے الیکٹیبلز پر مرکوز ہو گئی ہیں اور اس نے بلوچستان کے اہم ارکان اسمبلی سے ن لیگ میں رابطے کیے ہیں۔

ذرائع نے بتایا کہ یہ رابطے اپنے اپنے حلقوں کے الیکٹیبلز آزاد اور بعض بلوچ قوم پرست رہنماؤں سے کیے گئے ہیں تاہم ن لیگ کو ابھی اس جانب سے کوئی حتمی جواب نہیں دیا گیا ہے بلکہ اس پر غور کرنے کے لیے وقت مانگا گیا ہے۔

ذرائع کے مطابق جن سیاسی وقوم پرست رہنماؤں سے رابطے کیے گئے ہیں وہ موجودہ حکومت کے اختتام پر نگراں حکومت اور الیکشن کے اعلان کا انتظار کر رہے ہیں جس کے بعد ہی وہ اس حوالے سے کوئی حتمی فیصلہ کریں گے۔

ذرائع نے بتایا کہ دبئی میں پاکستان پیپلز پارٹی اور ن لیگ کی قیادت میں اس بات پر اتفاق ہوگیا ہے کہ آئندہ الیکشن کے نتیجے میں جس جماعت کو بھی چاہے ایک رکن ہی برتری ہوگی اس کو حکومت بنانے کا موقع دیا جائے گا اور دوسری جماعت اس کو سپورٹ کرے گی۔

تاہم سابق صدر زرداری نے کچھ عرصہ قبل بلوچستان میں ایک جماعت کے کچھ الیکٹبلز اور ارکان اسمبلی کو پی پی میں شامل کرایا تھا جس سے یہ تاثر ملا کہ پیپلز پارٹی اگلے الیکشن میں اکثریت لے سکتی ہے جس کا توڑ کرتے ہوئے اب ن لیگ بے بھی بلوچستان کا رخ کیا ہے۔

ذرائع کا کہنا ہے کہ آئندہ الیکشن کے بعد حکومت سازی میں بلوچستان سے الیکٹیبلز اپنا وزن کسی بھی سیاسی جماعت میں رکھ کر اہم کردار ادا کر سکتے ہیں۔

لاہور: مجرموں کا سراغ لگانے والی پنجاب فرانزک ایجنسی نے اپنے ادارے میں کریک ڈاؤن کرتے ہوئے 3 ملازمین کو پکڑ لیا۔

اے آر وائی نیوز کے مطابق دستاویز میں بتایا گیا کہ فرانزک ایجنسی کے 3 ملازمین کو رپورٹس اور بھرتیوں پر رشوت لیتے ہوئے پکڑ لیا گیا، ملازمین کا انٹرنل انٹیلی جنس رپورٹ پر پولی گرافک ٹیسٹ کیا گیا۔

دستاویز کے مطابق پولی گرافک ٹیسٹ میں تینوں ملازمین پکڑے گئے جنہیں اینٹی کرپشن کے حوالے کر دیا گیا، پہلے فیز میں نائب قاصد اور ڈرائیورز کو پکڑا گیا جبکہ کچھ مزید ملازمین بھی ملوث ہو سکتے ہیں۔

دستاویز کے مطابق صرف ایک کیس میں نائب قاصد کے 10 لاکھ روپے لینے کا انکشاف ہوا ہے۔