Author: نعیم اشرف بٹ

سینیئر سیاستدان اور سابق وزیراعلیٰ پنجاب منظور وٹو نے کہا ہے کہ ان کے پیپلز پارٹی میں جانے کے امکانات ہے تاہم ابھی حتمی فیصلہ کرنا باقی ہے۔

سینیئر سیاستدان اور سابق وزیراعلیٰ پنجاب میاں منظور وٹو نے اے آر وائی نیوز کو خصوصی انٹرویو دیتے ہوئے اپنے مستقبل کے سیاسی ارادے ظاہر کر دیے ہیں اور کہا ہے کہ ان کے پیپلز پارٹی میں جانے کے امکانات ہیں تاہم اس حوالے سے ابھی حتمی فیصلہ کرنا ہے۔

منظور وٹو نے کہا کہ ان کی پیپلز پارٹی کے دوستوں اور جہانگیر ترین سے ملاقاتیں ہوئی ہیں، چیئرمین پی پی بلاول بھٹو نے مجھے کہا آپ کو ساتھ ملانے کے لیے بات کرنی ہے۔

ان کا کہنا تھا کہ بلاول بھٹو زرداری کے وزیراعظم بننے کے بہت امکانات ہیں۔ جب پیپلز پارٹی ن لیگ کے وزیراعظم کو مان سکتی ہے تو پی پی کے وزیراعظم کو ن لیگ بھی سپورٹ کرے گی۔

سینیئر سیاستدان نے ملک کے مستقبل کے سیاسی منظر نامے کے حوالے سے پیشگوئی کرتے ہوئے کہا کہ اکتوبر میں الیکشن ہوں گے اور وفاق میں اتحادی حکومت بنے گی، پنجاب میں ن لیگ کی سربراہی میں اتحادی حکومت جب کہ کے پی میں تحریک انصاف ہوگی۔ سندھ میں پی پی اور بلوچستان میں بھی پیپلز پارٹی دوسروں کو ساتھ ملا کر حکومت بنائے گی۔

منظور وٹو نے کہا کہ میرے بچوں نے تحریک انصاف کو چھوڑ دیا ہے، پی ٹی آئی چھوڑنے والے کچھ آزاد حیثیت میں رہیں گے اور کچھ پیپلز پارٹی میں جائیں گے۔

جہانگیر ترین کے حوالے سے منظور وٹو نے کہا کہ وہ نئی پارٹی بنانا چاہتے ہیں اور یہ چاہتے ہیں کہ قد آور شخصیات ان کے ساتھ آئیں، ہم نے ماضی میں بھی دیکھا کئی پیپلز پارٹیاں بنیں، کئی مسلم لیگ بنیں جو ختم ہوگئیں۔ وقتی طور پر نئی پارٹیاں بنتی ضرور ہیں لیکن پھر ختم ہوجاتی ہیں۔

ان کا کہنا تھا کہ یہ نہیں کہتا کہ جہانگیر ترین کی جماعت ختم ہو لیکن اس کا انحصار اسے چلانے پر ہے، جہانگیر ترین نے کہا کہ جس کو وزیراعظم بنایا اس نے میری بیٹی کے خلاف مقدمات بنائے۔

پاکستان پیپلز پارٹی کے رہنما دوست محمد کھوسہ نے کہا ہے کہ جہانگیر ترین گروپ کے ارکان کے علاوہ ن لیگ سے ناراض ارکان اسمبلی بھی پی پی سے رابطے میں ہیں۔

پاکستان پیپلز پارٹی کے رہنما دوست محمد کھوسہ نے اے آر وائی نیوز کو انٹرویو دیتے ہوئے کہا کہ صرف جہانگیر ترین گروپ کے ارکان ہی نہیں بلکہ ن لیگ سے ناراض ارکان اسمبلی بھی پی پی سے رابطے میں ہیں اور ن لیگ کے 8 سے 10 ایم این ایز نے ہمارے ساتھ رابطے کیے ہیں۔

دوست محمد کا کہنا تھا کہ ن لیگ سے رابطہ کرنے والوں میں کچھ موجودہ ایم این ایز اور کچھ سابق ہیں، بے اعتبار لوگوں کے سوا شاید ہی کوئی ایسا ہو جو رابطے میں نہ ہو، آئندہ چند دنوں میں آپ کے سامنے یہ تمام بڑے نام آ جائیں گے۔

پی پی رہنما کا جہانگیر ترین کی نئی سیاسی جماعت کے قیام کی کوششوں کے حوالے سے کہنا تھا کہ ترین گروپ والے مار کھا چکے اور اب وہ مزید کسی مِس ایڈونچر کے متحمل نہیں ہو سکتے، ق لیگ دیکھ لیں کس طرح ٹوٹ پھوٹ ہوئی اور اب کیا حالت ہے، ق لیگ کی طرح انکا بھی یہی حال ہوگا کیونکہ ان کا مستقبل نہیں۔

دوست محمد نے انکشاف کیا کہ ن لیگ کے ایک گروپ نے وزیراعظم شہباز شریف سے شیر کے نشان پر الیکشن نہ لڑنے کی درخواست کی۔ اس گروپ کا کہنا ہے کہ عوام میں ہماری پذیرائی نہیں اس لیے ہمیں آزاد لڑنے کی اجازت دیں، ان کی اس بات پر ن لیگ کی اعلی قیادت نے کافی برہمی کا اظہار کیا ہے۔

انہوں نے مزید کہا کہ رابطہ کرنے والوں میں جنوبی پنجاب کے علاوہ دیگر علاقوں کے لوگ بھی ہیں، کچھ نےشمولیت کی ہے لیکن ابھی تو پارٹی شروع ہوئی ہے۔

پاکستان پیپلز پارٹی کے رہنما قمر زمان کائرہ نے کہا ہے کہ پی ٹی آئی خود ٹوٹ رہی ہے یا توڑی جا رہی ہے اس کا فی الحال جواب نہیں دوں گا۔

پاکستان پیپلز پارٹی کے رہنما اور وزیراعظم کے مشیر قمر زمان کائرہ نے اے آر وائی نیوز کو خصوصی انٹرویو دیتے ہوئے کہا ہے کہ جماعتوں کا ٹوٹنا جمہوری عمل کے لیے استحکام کا باعث نہیں، ذاتی طور پر جماعتوں کے ٹوٹنے پر خوش نہیں۔ جماعتیں خود بھی ٹوٹتی ہیں اور توڑی بھی جاتی ہیں، تحریک انصاف خود ٹوٹ رہی ہے یا توڑی جا رہی ہے اس کا فی الحال جواب نہیں دوں گا۔

قمر زمان کائرہ نے مزید کہا کہ عمران خان نے جو نفرت پروموٹ کی بدقسمتی سے 9 مئی اس کا اظہار تھا، پی ٹی آئی پر پابندی کے حوالے سے پیپلز پارٹی اپنے موقف پر قائم ہے اور پارٹی کی رائے میں اس طرح جماعتوں پر پابندی لگانا مسئلے کا حل نہیں ہے مسلم لیگ ن میں اگر کوئی ایسی ڈسکشن ہے تو یہ ان کی رائے ہے۔

پی پی رہنما نے کہا کہ پابندیوں سےج ماعتیں ختم نہیں ہوتیں، جیسے پیپلز پارٹی، ایم کیو ایم اور اے این پی نہیں ہوسکیں، ہمارے اتحادی پی ٹی آئی سے مذاکرات کے حق میں نہ تھے لیکن ہم نے قدم بڑھایا، یہ طے ہو گیا تھا کہ بجٹ کے بعد جولائی میں اسمبلیاں تحلیل ہو جائیں گی، صرف یہ فائنل کرنا تھا جولائی کے پہلے ہفتے یا آخر میں توڑی جائیں۔

وزیراعظم کے مشیر نے کہا کہ ہم تو تحریری معاہدے میں جولائی میں اسمبلیاں توڑنے کے لیے تیار تھے، نظر آ رہا تھا 15 جولائی سے آگے یا پیچھے کی تاریخ کا اعلان ہوگا، الیکشن کو اکتوبر سے آگے لے کر جانے کی کوئی بات نہیں لیکن عمران خان نے کہا 14 مئی سے پہلے اسمبلی نہ توڑی تو مذاکرات ختم۔ عمران کا اختلاف ہے کہ ادارے میرے حق میں مداخلت کیوں نہیں کر رہے۔

قمر زمان کائرہ نے کہا ہ میرا سیاسی تجزیہ ہے اور خواہش بھی ہے کہ انشا اللہ بلاول اگلے وزیراعظم ہوں گے، سادہ اکثریت نہ بھی ملی تو اتحادیوں کے ساتھ مل کر بلاول کو وزیراعظم بنائیں گے۔

لاہور: وزیراعظم شہباز شریف اور مسلم لیگ ق کے سربراہ چوہدری شجاعت نے انتخابات کی حکمت عملی پر اتفاق کرلیا۔

اے آر وائی نیوز کے مطابق وزیراعظم شہباز شریف اور چوہدری شجاعت حسین کی ملاقات کا احوال سامنے آگیا، ذرائع کا بتانا ہے کہ ن لیگ اور مسلم لیگ ق آئندہ انتخابات میں مل کر حصہ لیں گی۔

ذرائع کا بتانا ہے کہ سالک، شافع حسین ن لیگ کے گجرات سے رہنما عابد رضا سے معاملات طے کریں گے اور حلقوں کے مطابق مشترکہ امیدواروں کا فیصلہ ہوگا۔

چوہدری شجاعت نے 9 مئی کے واقعات پر کہا کہ مجرموں کو سزا دی جائے اور معصوم لوگوں کو چھوڑ دیا جائے۔

واضح رہے کہ اس سے قبل وزیراعظم شہباز شریف نے مسلم لیگ (ق) کے سربراہ و سابق وزیراعظم چوہدری شجاعت حسین سے ان کی رہائشگاہ پر ملاقات کی تھی۔

نگران وزیراعلیٰ پنجاب محسن نقوی بھی وزیراعظم شہباز شریف کے ہمراہ تھے جبکہ ملاقات میں وفاقی وزیر چوہدری سالک حسین اور چوہدری شافع حسین بھی شریک تھے۔

وزیراعظم نے چوہدری شجاعت سے ملکی سیاسی صورتحال پر تبادلہ خیال کیا تھا۔