Author: نعیم اشرف بٹ

لاہور: سینئر لیگی رہنما پیرصابرشاہ نے پارٹی پالیسیوں پر تنقید کرتے ہوئے ملک بچانے والے حکومتی بیانیے کو بے وزن قرار دے دیا۔

تفصیلات کے مطابق کیپٹن (ر)صفدر کے بعد ن لیگ کےایک اور سینئررہنما پارٹی پالیسیوں سے نالاں نظر آئے۔

سابق وزیراعلیٰ کے پی صابرشاہ نے ملک بچانے والے حکومتی بیانیے کو بے وزن قراردے دیا۔

ن لیگی سینیٹرپیرصابرشاہ نے اے آر وائی نیوز سے خصوصی گفتگو میں کہا کہ سیاست نہیں ملک بچانے والی ہماری بات میں وزن نہیں، عمران خان کی مس مینجمنٹ اور بیڈگورننس کو ہم نے آکر بیل آؤٹ کیا۔

پیرصابرشاہ کا کہنا تھا کہ ہماری جماعت میں مشاورت کی کمی ہے، ن لیگ قومی جماعت تھی جسےاب صوبائی بنا دینا زیادتی ہے۔

سینئر لیگی رہنما نے کہا کہ اسوقت ہماری جماعت کی حالت بہت خراب ہےجولمحہ فکریہ ہے،مشاورت میں دوسرے صوبوں کو شامل نہ کرنےسے نقصان ہوا۔

سابق وزیراعلیٰ کا کہنا تھا کہ جن لوگوں کو مشاورت کےقابل سمجھا گیا وہی خرابی کے ذمہ دارہیں، انہی چندلوگوں نے پارٹی قیادت کواندھیرےمیں رکھا۔

انھوں نے کہا کہ شہبازشریف کو یہ مشورہ کسی نےتودیاکہ عمران کا گند اپنےسر لےلیں، جس حالات سے گزر رہےہیں اس سے اتحادی جماعتیں اتنی متاثر نہیں ہوئیں ، نقصان ہم اٹھارہےہیں اور ہماری جماعت خمیازہ بھگت رہی ہے۔

پیرصابرشاہ کا کہنا تھا کہ 18سال کے پی کا پارٹی صدر رہا جس میں مشرف کا سخت دور بھی تھا، یہ کسی کی سازش ہے مشکل وقت میں کھڑے رہنے والوں کو کارنرکیاجائے۔

انھوں نے مزید کہا کہ سازشیوں کومعلوم ہےآئندہ بھی مشکل وقت میں یہ پھرکھڑےہوں گے، مستقبل میں پارٹی کی کوئی قیادت کرسکتا ہےتووہ مریم نواز ہی ہیں۔

ترجمان بلوچستان عوامی پارٹی دنیش کمار نے پاکستان ڈیموکریٹک موومنٹ (پی ڈی ایم) اور اتحادی جماعتوں کو محسن کش قرار دے دیا ہے۔

ترجمان بی اے پی نے دنیش کمار نے اے آر وائی نیوز سے خصوصی گفتگو کرتے ہوئے کہا کہ افسوس جس پی ڈی ایم کی ہم نے حمایت کی وہی اب ہمارے پیچھے پڑے ہیں۔ مرکزی کمیٹی کا اجلاس بلایا ہے اور اس کے ایجنڈے میں حکومت چھوڑنا شامل ہے۔

دنیش کمار نے کہا کہ اگر پارٹی کی مرکزی کمیٹی نے حکومت کو چھوڑنے کا فیصلہ کیا تو ہم تاخیر نہیں کریں گے۔ اگر بلوچستان عوامی پارٹی کے 4 ایم این ایز نہ ہوتے تو ان کی حکومت نہ بنتی۔ افسوس ہے کہ ہم نے جس حکومت کو سہارا دیا اب وہی محسن کشی کر رہی ہے۔

ترجمان بلوچستان عوامی پارٹی کا کہنا تھا کہ پہلے بھی ان پارٹیوں کو آزمایا لیکن کسی نے بلوچستان کے مسائل حل نہیں کیے۔ وزیراعظم کی تواپنی پارٹی داؤ پر لگی ہوئی ہے، اس لیے انکی توجہ اس طرف آتی ہی نہیں۔

سینیٹر دنیش کمار نے مزید کہا کہ پوری سچائی اور ایمانداری سے کہتا ہوں کہ رجیم چینج میں وہ نیوٹرل تھے۔ ہمیں نہ عمران خان کا ساتھ دینے کا کہا گیا اور نہ ہی پی ڈی ایم کا ساتھ دینے کا یہ ہماری پارٹی کا اپنا فیصلہ تھا۔

ترجمان باپ سینیٹر دھنیش کمار اتحادی حکومت پر برس پڑے۔PDM کو محسن کش قرار دے دیا۔اب افسوس ہوتا ہے جس PDM کو سہارا دیا وہی ہماری پارٹی کے پیچھے پڑگئے۔یہ محسن کشی ہےہمارے 4ایم این ایز نہ ہوتے انکی حکومت نہ بنتی۔پارٹی اجلاس بلایا ہے اگر حکومت چھوڑنے کا فیصلہ ہوا تو تاخیر نہیں کریں گے pic.twitter.com/0BHX2GOicx

— Naeem Ashraf Butt (@NaeemAshrafBut2) February 6, 2023

ترجمان بی اے پی نے کہا کہ مجھے ابھی الیکشن ہوتے نظرنہیں آ رہے ہیں۔ قومی اور تمام صوبائی اسمبلیوں کے انتخابات اکٹھے ہی ہوں گے۔ ملک کے موجودہ معاشی حالات بار بار انتخابات کے متحمل نہیں ہوسکتے اور یہی نکتہ آگے جا کر کے پی اور پنجاب اسمبلیوں کے انتخابات کے التوا کا باعث بنے گا۔

مسلم لیگ ن کے رہنما شاہد خاقان عباسی نے پنجاب اور کے پی میں عید بعد انتخابات کی تجویز دیتے ہوئے کہا ہے کہ حکومت یا کسی شخص کا اختیار نہیں کہ انتخابات میں تاخیر کرے۔

مسلم لیگ ن کے رہنما شاہد خاقان عباسی نے اے آر وائی نیوز سے خصوصی گفتگو کرتے ہوئے پنجاب اور خیبرپختونخوا میں عید بعد انتخابات کی تجویز دیتے ہوئے کہا ہے کہ رمضان یا عید کے موقع پر انتخابات مناسب نہیں ہوں گے۔

شاہد خاقان کا کہنا تھا کہ حکومت یا کسی شخص کا اختیار نہیں کہ انتخابات میں تاخیر کرے۔ اگر گورنر نے تاریخ نہ دی تو پھر الیکشن کمیشن خود فیصلہ کردے گا جب کہ اگر الیکشن کمیشن اںتخابات میں تاخیر کرتا ہے تو پھر اس کو اپنا فیصلہ جسٹیفائی بھی کرنا پڑے گا۔

سابق وزیراعظم نے ن لیگ سے ناراضی کے حوالے سے پوچھے گئے ایک سوال کے جواب میں وہ کہ میں کسی سے ناراض نہیں اور نہ ہی ناراضی کی کوئی وجہ ہے۔ اگر ناراض ہیں تو سیدھاراستہ ہے باہر چلے جائیں کوئی قید نہیں۔

ان کا کہنا تھا کہ اسٹیبلشمنٹ ہمیشہ نیوٹرل ہوتی ہے۔ میں پارٹی کی ہر مشاورت میں شامل نہیں ہوتا۔ نگراں وزیر اعلیٰ کے نام کیلیے مجھ سے نہیں پوچھا گیا تھا پھر میں نے دلچسپی بھی نہیں لی۔

شاہد خاقان عباسی نے پی ٹی آئی رہنما فواد چوہدری کو ہتھکڑیاں لگانا اور چہرے پر کپڑا ڈال کر عدالت میں پیش کرنے کو غلط اقدام قرار دیا اور کہا کہ سیاستدانوں سے اس طرح کا سلوک انسانی حقوق کے خلاف ہے۔ ن لیگ اور دوسری جماعتوں میں فرق ہونا چاہیے۔ یہ جو مقدمے بنے ہیں ان کی وجوہات وقت آپ کو بتا دے گا۔

سابق وزیراعظم سے جب یہ سوال کیا گیا کہ کیا یہ تاثر درست ہے کہ آصف زرداری نے ن لیگ کی سیاست کو خراب کر دیا؟ جس کے جواب میں شاہد خاقان عباسی نے کہا کہ ویسے کوئی کسی کیلیے سیاست نہیں کرتا بلکہ اپنے اور ملک کیلیے کرتا ہے لیکن اگر ہم اتنے نالائق ہیں تو ان کاموں میں ہمیں پڑنا ہی نہیں چاہیے۔

یہ بھی پڑھیں: شاہد خاقان عباسی نے پارٹی عہدے سے استعفیٰ دیدیا ہے، محمد زبیر کی تصدیق

واضح رہے کہ شاہد خاقان عباسی نے مسلم لیگ ن کے سینیئر نائب صدر کے عہدے سے استعفیٰ دے دیا ہے جس کی تصدیق پارٹی رہنما محمد زبیر نے کردی ہے۔