Author: نعیم اشرف بٹ

اسلام آباد: نئی حکومت آنے کے سات دن بعد بھی وفاقی کابینہ تشکیل نہ دی جا سکی۔

ذرائع کے مطابق آپسی تحفظات کے باوجود وزارت داخلہ راناثنااللہ کو دیے جانے کا امکان ہے 2 لیگی رہنماؤں نے راناثنااللہ پر تحفظات سے قیادت کو آگاہ کیا تھا۔

ذرائع کا کہنا ہے کہ وزارت قانون، دفاع اور اطلاعات پر پی پی کی نظریں ہیں جس پر ن لیگ ہچکچا رہی ہے، ایم کیوایم پاکستان کو بھی مرضی کی وزارتیں دے کر راضی کیا جائے گا۔

ذرائع کا کہنا ہے کہ وفاقی کابینہ میں شمولیت کے لیے آصف علی زرداری مخالف اور بلاول بھٹو حامی ہیں پیپلز پارٹی اور مسلم لیگ (ن) میں آئینی عہدوں کی تقسیم پر بھی اختلافات ہیں۔

پارٹی ذرائع کا کہنا ہے کہ پیپلز پارٹی من پسند وزارتیں اور آئینی عہدوں کی خواہش مند ہے۔ پیپلز پارٹی نے مسلم لیگ (ن) سے چاروں گورنرز اور آئینی عہدوں کا مطالبہ کیا ہے پیپلز پارٹی نے کابینہ میں تین اہم وزارتوں کا بھی مطالبہ کیا ہے۔

اسلام آباد: وفاقی کابینہ کے لیے متوقع ناموں کو شارٹ لسٹ کر لیا گیا ہے۔ جے یو آئی، ایم کیو ایم، بی اے پی اور بی این پی کو بھی وزارت دینے کا امکان ہے۔

اے آر وائی نیوز کے مطابق ذرائع کا کہنا ہے کہ مسلم لیگ (ن) کے رہنما رانا ثنا اللہ کو وزیر قانون اور احسن اقبال کو وزیر داخلہ بنانے کی تجویز ہے۔

ذرائع کے مطابق ایاز صادق کو آئی ٹی اور خواجہ آصف کو وزیر دفاع بنانے کا امکان ہے۔ مفتاح اسماعیل کو مشیر خزانہ بنائے جانے کا امکان ہے۔

مزید پڑھیں: حکومت بنے 5 دن ہوگئے لیکن وفاقی کابینہ نہ بن سکی

ذرائع کا کہنا ہے کہ رانا تنویر کو وزارت دفاعی پیداوار اور مریم اورنگزیب کو اطلاعات دینے کا امکان ہے۔ برجیس طاہر اور سعد رفیق کو بھی وزیر بنائے جانے کا امکان ہے۔

جے یو آئی کو 3، ایم کیو ایم کو 2، بی اے پی اور بی این پی کو بھی وزارت دینے کا امکان ہے۔ جے یو آئی کے مولانا اسعد کو وزیر مذہبی امور بنانے کی تجویز ہے۔

ذرائع کے مطابق بلاول بھٹو زرداری نے وزارت خارجہ نہ لی تو حنار بانی کھر اور شیری رحمان کے نام تجویز ہیں۔ شیری رحمان کا نام امریکا میں سفیر کے لیے شارٹ لسٹ کیا گیا ہے۔

ذرائع کا کہنا ہے کہ خورشید شاہ اور نوید قمر کے نام بھی وزارتوں کی لسٹ میں شامل ہیں۔