Author: نذیر بھٹی

لاہور: پاکستان پیپلز پارٹی کے اراکین پنجاب اسمبلی نے صدر مملکت آصف علی زرداری سے ملاقات کے دوران شکایت کے انبار لگا دیے۔

صدر مملکت سے اراکین صوبائی اسمبلی کی ملاقات کا احوال ذرائع نے اے آر وائی نیوز کو بتا دیا۔ آصف علی زرداری نے رہنماؤں سے سوال کیا کہ جنوبی پنجاب میں بجلی و گیس کہاں مل رہی ہے اور کہاں نہیں؟ اس پر انہوں نے متاثرہ علاقوں کی نشاندہی کی۔

اراکین اسمبلی نے کہا کہ بیوروکریسی ہماری بات نہیں سنتی ایک ایڈیشنل سیکرٹری دیا لیکن اس کی کوئی سنتا ہی نہیں، ڈپٹی کمشنر تو کیا اسسٹنٹ کمشنر تک ایڈیشنل سیکرٹری کی بات نہیں سنتا، ایڈیشنل سیکرٹری کہتے ہیں احکامات دیے ہیں لیکن بعد میں پتا چلتا ہے متعلقہ افسر نے نہیں مانا، (ن) لیگی ارکان کے کام فوری ہوتے ہیں تبادلوں سمیت ہر کام کے فوری آرڈر دیے جاتے ہیں۔

انہوں نے بتایا کہ اربوں روپے کا بجٹ لاہور پر لگا دیا ایک ضلع پر نوازشات ہیں، باقی پنجاب ایک طرف ہے یہ کون سا میرٹ ہے؟ لاہور میں اربوں روپے لگا کر ہارس اینڈ کیٹل شو کا انعقاد کیا گیا جبکہ کسانوں کا پنجاب میں کوئی پرسان حال نہیں ہر جگہ سے کسان پس رہا ہے۔

اس پر صدر مملکت نے کہا کہ ہم کسانوں کے ساتھ کھڑے ہیں، سہولیات فراہم کرنے کیلیے ہر ممکن کوشش کی جائے گی۔

رہنماؤں نے بتایا کہ ہم جیت کر ایوان میں آئے لیکن ہمارے کام نہیں ہوتے، ہمارے ہی حلقے میں (ن) لیگی افراد کے کام ہو رہے ہیں، ڈی سیز، ڈی پی اوز، اے سیز سمیت متعلقہ انتظامیہ (ن) لیگی افراد کے کام فوری کرتے ہیں۔

آصف علی زرداری نے کہا کہ آپ سب کے تحفظات جائز ہیں، ہم ان کو جلد حل کروائیں گے، ہماری ترجیحات ملک اور عوام ہیں، ہم ان کے ساتھ کھڑے ہیں، ہم نے ہمیشہ ملک و عوام کی جنگ لڑی۔

انہوں نے مزید کہا کہ بلدیاتی الیکشن کی تیاری کریں ہمیں بھر پور کامیابی حاصل کرنا ہوگی، پنجاب میں بلدیاتی الیکشن میں تاخیر نہیں ہونی چاہیے، بلدیاتی الیکشن کا ہونا بہت ضروری ہے، عوامی مسائل کا حل بلدیاتی الیکشن ہے، ہم عوامی ہیں ہمیں عوام کی جنگ لڑنی ہے۔

ان کا کہنا تھا کہ پانی کا بہت بڑا مسئلہ ہے، سندھ اور بلوچستان کے مسائل حل نہیں ہو رہے، ہمیں مسائل کو سنجیدہ لینا ہوگا، میں ہر فورم پر اس کی نشاندہی کر چکا ہوں، بلاول بھٹو زرداری اور میں خود پنجاب میں بیٹھوں گا۔

ملاقات میں صدر مملکت نے یہ بھی کہا کہ گورنر پنجاب سردار سلیم حیدر کی کارکردگی متاثر کن ہے، وہ بہترین کام کر رہے ہیں، ان کا کام ہے جہاں غلط ہو اس کی نشاندہی کرے اور ایکشن لے۔

لاہور: پاکستان پیپلز پارٹی اور مسلم لیگ (ن) کے درمیان تحفظات کو دور کرنے کیلیے دونوں سیاسی جماعتوں کی طرف سے بنائی گئیں کوآرڈینیشن کمیٹیوں کے اجلاس کی اندرونی کہانی سامنے آگئی۔

ذرائع نے اے آر وائی نیوز کو بتایا کہ اجلاس کے آغاز میں ہی پیپلز پارٹی نے (ن) لیگ پر دوٹوک مؤقف واضح کیا اور کہا کہ اگر اتحادی حکومت کے معاملات آگے نہیں بڑھانا چاہتے تو واضح کر دیں، ہم اپنا آئندہ کا لائحہ عمل خود طے کر لیں گے۔

جبکہ (ن) لیگ نے مؤقف اپنایا کہ پیپلز پارٹی کے تحفظات دور کر کے معاملات آگے بڑھائیں گے۔

ذرائع کے مطابق کوآرڈینیشن کمیٹیوں کے اجلاس میں مختلف امور پر اتفاق رائے ہوا۔ رحیم یار خان اور ملتان کی ڈسٹرکٹ ڈیولپمنٹ کمیٹیوں کی سربراہی پیپلز پارٹی کو دینے جبکہ جیتنے والے حلقوں میں دونوں سیاسی جماعتوں کے منتخب ارکان اسمبلی کو مساوی فنڈز دینے پر اتفاق ہوا۔

اجلاس میں اتفاق ہوا کہ ضلعی سطح پر مختلف کمیٹیوں میں پیپلز پارٹی کو نمائندگی دی جائے گی جبکہ پوسٹنگ اور ٹرانسفر میں پیپلز پارٹی سے مشاورت کی جائے گی۔

ذرائع کے مطابق اجلاس میں گفتگو میں بتایا گیا کہ گورنر پنجاب سردار سلیم حیدر خان اور وزیر اعلیٰ مریم نواز کے درمیان کوئی اختلاف نہیں ہیں۔

دوسری جانب، کوآرڈی نیشن کمیٹیوں کے اجلاس کا اعلامیہ جاری کیا گیا جس کے مطابق اجلاس میں پاور شیئرنگ معاہدے سے متعلق پیشرفت اور خیر سگالی کمیٹی کے قیام کا اعلان کیا گیا۔

اعلامیے کے مطابق اجلاس میں معاہدے پر عملدرآمد کے ٹی او آرز طے کیے گئے جبکہ (ن) لیگ نے اتحادی جماعت کے تحفظات دور کرنے کیلیے جنوری کے پہلے ہفتے تک وقت مانگ لیا۔

اجلاس میں پیپلز پارٹی کی جانب سے گورنر پنجاب، راجہ پرویز اشرف، حسن مرتضیٰ، ندیم افضل چن، علی حیدر گیلانی شریک ہوئے جبکہ (ن) لیگ کی طرف سے اسپیکر پنجاب اسمبلی، اسحاق ڈار، ایاز سادق اور مریم اورنگزیب شریک ہوئے۔