Author: نعمان ناصر

جنوبی افریقا کے سابق کپتان اے بی ڈیویلیئرز نے اپنے ٹاپ 5 کرکٹرز کی فہرست میں سابق پاکستانی فاسٹ بولر کو شامل کرلیا۔

جنوبی افریقا کے سابق کپتان اے بی ڈیویلیئرز نے اپنے ٹاپ کرکٹرز کی فہرست جاری کی ہے جن کے خلاف وہ کھیلے ہیں ان میں پاکستان کے فاسٹ بولر محمد آصف کو بھی شال کیا گیا ہے۔

انہوں نے اپنے قریبی دوست اور سابق رائل چیلنجرز بنگلور کے ساتھی ویرات کوہلی کو فہرست میں شامل نہیں کیا۔

ڈی ویلیئرز نے کوہلی کے بجائے سچن ٹنڈولکر فہرست میں منتخب کیا ہے۔

ان کے ٹاپ فائیو کرکٹرز میں جیک کیلس، اینڈریو فلنٹوف، محمد آصف، شین وارن اور سچن ٹنڈولکر شامل ہیں،

اے بی نے کہا کہ کیلس بہترین آل راؤنڈر ہے یا شاید اب تک کا بہترین کرکٹر ہے۔ محمد آصف وہ بہترین سیمر تھا جس کا میں نے کبھی سامنا کیا ہے۔ مجھے وارن کے خلاف کھیلنا پسند تھا، لیکن مجھے کبھی مشکل نہیں لگی۔ مجھے ان کی مجموعی شخصیت پسند تھی، فلاپی ہیٹ، زنک کریم، سنہرے بال ہوتے تھے۔

اینڈریو فلنٹوف، جو ایک بڑے میچ پرفارمر تھے۔ ایجبسٹن میں کیلس کے لیے وہ یارکر جو میں نے کبھی دیکھا ہے سب سے بہترین ہے۔

یہ پڑھیں: اے بی ڈیولیرز نے بابر اعظم کو آسان مشورہ دے دیا

واضح رہے کہ ڈی ویلیئرز خود جدید کرکٹ کی سب سے مشہور شخصیات میں سے ایک ہیں۔ 14 سالہ بین الاقوامی کیریئر کے دوران انہوں نے جنوبی افریقہ کے لیے 114 ٹیسٹ میں 50.66 اور 228 ون ڈے میچوں میں 53.50 کی اوسط سے اسکور کیا۔

ابھی حال ہی میں انہوں  نے ورلڈ چیمپئن شپ آف لیجنڈز (ڈبلیو سی ایل) 2025 میں جنوبی افریقا چیمپئنز کی کپتانی کی، 220 کے حیران کن اسٹرائیک ریٹ پر چھ اننگز میں 429 رنز کے ساتھ ٹورنامنٹ کے سب سے زیادہ رنز بنانے والے کھلاڑی رہے۔

ان کی قیادت میں ٹیم نے فائنل میں پاکستان کو شکست دے کر ٹائٹل اپنے نام کیا۔

محمد آصف نے 23 ٹیسٹ میں پاکستان کی نمائندگی کی جہاں انہوں نے 2.99 کے اکانومی ریٹ سے 106 وکٹیں حاصل کیں۔ انہوں نے 38 ون ڈے میں بھی حصہ لیا اور 4.71 رنز فی اوور کی اوسط سے 46 وکٹیں حاصل کیں، اس کے ساتھ ساتھ 11 ٹی ٹوئنٹی میں 8.00 کی اکانومی میں 13 وکٹیں حاصل کیں۔

انٹرنیشنل کرکٹ کونسل (آئی سی سی) نے ویمنز ورلڈ کپ کی انعامی رقم کا اعلان کردیا۔

آئی سی سی کے مطابق ویمنز ورلڈ کپ کی انعامی رقم میں 297 فیصد اضافہ کیا گیا ہے، ایونٹ کی مجموعی انعامی رقم ایک کروڑ 30 لاکھ ڈالرز سے زائد رکھی گئی ہے۔

میگا ایونٹ کی فاتح ٹیم کو 44 لاکھ ڈالر اور رنراپ کو 22 لاکھ ڈالر سے زائد ملیں گے۔

سیمی فائنلسٹ ٹیمیں 11 لاکھ  ڈالر سے زائد کی انعامی رقم حاصل کریں گی۔

آئی سی سی کے مطابق گروپ اسٹیج کے ہر میچ کی جیت کی صورت میں 34 ہزار314 ڈالرکا انعام ہے۔

اس کے علاوہ پانچویں اور چھٹی پوزیشن پر7 لاکھ،ساتویں اور آٹھویں پوزیشن پر 2 لاکھ 80 ہزار ڈالر ملیں گے۔

واضح رہے کہ ورلڈکپ 30 ستمبر سے بھارت اور سری لنکا میں کھیلا جائے گا۔ پاکستانی کرکٹ ٹیم ورلڈ کپ میں اپنے تمام میچز سری لنکا میں کھیلے گی۔

شارجہ: پاکستان کے سابق کپتان رمیز راجا نے سہ ملکی سیریز کے افتتاحی میچ میں افغانستان کے خلاف پاکستان کی جیت کا کریڈٹ کپتان سلمان علی آغا کو دیا اور بیٹنگ لائن پر تنقید بھی کردی۔

پاکستان اور افغانستان کے میچ کے بعد اپنے یوٹیوب چینل پر رمیز راجا نے کہا کہ ایک مرحلے پر میچ افغانستان کی طرف سے جا رہا تھا اور اگر سلمان علی آغا رنز نہ بناتے تو پاکستان شدید مشکلات میں پڑ سکتا تھا۔

انہوں نے کہا کہ پاکستان نے اس پچ پر 182 رنز بنائے لیکن اس کے باوجود ایسا لگ رہا تھا کہ افغانستان کے پاس جیتنے کا موقع ہے اگر سلمان آغا ناکام ہوجاتے تو پاکستان کے لیے حالات بہت مشکل ہوسکتے تھے۔

پاکستان کے مڈل آرڈر پر تنقید کرتے ہوئے راجہ نے کہا کہ کوئی بھی بلے باز کریز پر رک نہیں سکا۔

یہ پڑھیں: پاکستان نے ٹرائی سیریز کے پہلے میچ میں افغانستان کو شکست دے دی

سابق کپتان نے کہا کہ ٹاپ آرڈر نے اچھی شروعات کی لیکن کسی نے بڑی اننگز نہیں کھیلی، کوئی 15، 50 اور کوئی 10 پر آؤٹ ہوگیا، جب آپ افغانستان بیک فٹ پر تھا تو وکٹیں اتنی لاپرواہی سے کیوں گر رہی تھیں۔

راجہ نے اس بات پر زور دیا کہ پاکستانی بلے بازوں کو زیادہ ذمہ داری کے ساتھ بیٹنگ کرنے کی ضرورت ہے۔

ان کا مزید کہنا تھا کہ ایسے حالات میں آپ کو ذہانت کے ساتھ بیٹنگ کرنی ہوگی، اور سلمان علی آغا نے بالکل ایسا ہی کیا، اگر وہ جلد آؤٹ ہو جاتے تو پاکستان 150 تک پہنچنے کے لیے جدوجہد کرتا، اور افغانستان میچ جیت لیتا۔

قومی ٹیم کے نوجوان بیٹر حسن نواز کا کہنا ہے کہ میں پریشر میں اور اچھا کھیلتا ہوں۔

دبئی میں میڈیا سے گفتگو کرتے ہوئے مڈل آرڈر بیٹر حسن نواز نے کہا کہ ایشیا کپ میں بھارت کے خلاف میچ کو بطور چیلنج لوں گا اور بہت زیادہ انجوائے کروں گا۔

انہوں نے کہا کہ مجھ کوئی بھی بوجھ نہیں ہے پہلے بھی سیریز کھیلی ہے، میرا یہ نیچرل ہے کہ پریشر میں اچھا کھیل جاتا ہوں، مجھے اپنے اوپر اعتماد ہے انشا اللہ اچھا کھیلوں گا۔

حسن نواز نے کہا کہ آخری دو تین سیریز میں صفر پر آؤٹ نہیں ہوا، کوچ مائیک ہیسن سے کافی کچھ سیکھنے کو مل رہا ہے، کوشش کروں گا کہ ٹرائی سیریز میں بھی اپنا بیسٹ دوں۔

مڈل آرڈر بیٹر نے کہا کہ یو اے ای کی کنڈیشن میں ہر گیند پر مار نہیں سکتے، گیم کو ساتھ لے کر چلنا پڑے گا اور یہی میچ ونر والی اننگز ہوتی ہے۔

انہوں نے کہا کہ وکٹ کی کنڈیشن کے مطابق کھیلیں گے، ہر میچ کا پریشر ہوتا ہے لیکن انجوائے کرتے ہیں، اچھا کھیلیں گے تو نام بنے گا، یہ میرے لیے چیلنج بھی ہے۔

حسن نواز نے کہا کہ تیاری مکمل ہے بھارت کے خلاف میچ کو بھی انجوائے کریں گے۔

پاکستان کی ون ڈے ٹیم کے کپتان محمد رضوان کیریبین ٹی 20 لیگ کے ڈیبیو میچ ہی کلین بولڈ ہوگئے۔

پاکستان کے وکٹ کیپر بیٹر محمد رضوان کی خراب فارم کا سلسلہ کیریبین لیگ میں بھی جاری رہا اور وہ ڈیبیو میچ میں عجیب و غریب انداز سے کلین بولڈ ہوئے۔

واری کین کے خلاف سویپ شاٹ کھیلتے ہوئے گیند کی لائن مس ہوئی اور وہ گرتے ہوئے بولڈ ہوگئے۔

رضوان 6 گیندوں پر صرف 3 رنز بنا کر پویلین لوٹ گئے۔

واضح رہے کہ چند روز قبل قومی ون ڈے ٹیم کے کپتان محمد رضوان کا سی پی ایل فرنچائز سینٹ کٹس اینڈ نیوس پیٹریاٹس کے ساتھ معاہدہ طے پایا تھا۔

افغانستان کے فاسٹ بولر فضل الحق فاروقی کی جگہ محمد رضوان کو ٹیم میں شامل کیا گیا۔ فضل الحق فاروقی ٹیم میں شامل ہونے کے باعث ٹورنامنٹ ادھورا چھوڑ کر روانہ ہوئے۔

یہ پہلا موقع ہے جب محمد رضوان سی پی ایل فرنچائز میں ایکشن میں دکھائی دے رہے ہیں، رضوان کے علاہ نسیم شاہ اور عباس آفریدی بھی سینٹ کٹس اینڈ نیوس پیٹریاٹس کا حصہ ہیں۔

یاد رہے کہ یہ قومی کرکٹر کا دوسرا غیر ملکی ٹی ٹوئنٹی لیگ معاہدہ ہے۔ اس سے قبل وہ بگ بیش لیگ کے پندرہویں سیزن کیلئے میلبرن رینیگیڈز سے معاہدہ کرچکے ہیں۔

آسٹریلیا کے خلاف پہلے ون ڈے میچ میں جنوبی افریقی اسپنر پرینیلن سبرائن کا بولنگ ایکشن رپورٹ کیا گیا ہے۔

میچ آفیشلز کی رپورٹ کے مطابق سبرین کے ایکشن کی قانونی حیثیت کے حوالے سے خدشات کا اظہار کیا گیا۔31 سالہ کھلاڑی نے ون ڈے ڈیبیو میں ٹریوس ہیڈ کی اہم وکٹ حاصل کی تھی۔

سبرائن نے اس سے قبل زمبابوے کے خلاف بلاوایو میں اپنا ٹیسٹ ڈیبیو کیا تھا اور چار وکٹیں حاصل کی تھیں۔

جنوبی افریقی اسپنر اب آئی سی سی سے منظور شدہ ٹیسٹنگ سہولت میں بولنگ ایکشن ٹیسٹ کروائیں گے۔

یہ پڑھیں: ایڈم زمپا کو جنوبی افریقا کے خلاف نازیبا زبان کا استعمال مہنگا پڑ گیا

اسپنر کا بولنگ ایکشن رپورٹ ہونا جنوبی افریقا کے لیے دھچکا ہے کیونکہ اس سے قبل فاسٹ بولر کاگیسو ربادا انجری کی وجہ سے تین میچوں کی سیریز سے باہر ہوچکے ہیں۔

جنوبی افریقا کو تین میچوں کی ون ڈے سیریز میں 1-0 کی برتری حاصل ہے، بقیہ دو ون ڈے میچ 22 اور 24 اگست کو شیڈول ہیں۔

ٹی 20 سیریز میں جنوبی افریقا کے خلاف آسٹریلیا نے 2-1 سے کامیابی حاصل کی تھی۔