Author: قیصر کامران صدیقی

 چوہدری پرویز الہی نے کہا ہے فوری اور سستے انصاف کی فراہمی کیلئے وکلاء مرکزی کردار کے حامل ہیں، ان کا کہنا تھا مسلم لیگ ق پاکستان کو فلاحی ملک بنانا چاہتی ہے ۔

مختلف سیاسی جماعتوں سے تعلق رکھنے والے سینئر وکلاء کی پاکستان مسلم لیگ ق میں شمولیت کے اعلان کے موقع پر چوہدری پرویزالٰہی کا کہنا تھا کہ انھوں نے برصغیر کی تاریخ میں پہلی بار پراسکیوشن سروس قائم کیا اور پبلک ڈیفنڈر سروس کیلئے باقاعدہ قانون سازی کی، ایشیاء میں پہلی بار کنزیومر کورٹس قائم کیں جن سے ہزاروں صارفین کو فائدہ ملا۔

ان کا کہنا تھاکہ ان کے دور میں وکلاء کیلئے مفت علاج کی سہولت مہیا کی گئی، اس سے قبل پاکستان میں تحصیل کی سطح تک بار ایسوسی ایشنز کو بلاتفریق فنڈز نہیں دئیے گئے تھے۔ 

وزیراعظم نواز شریف کے مشیر خارجہ سرتاج عزیز کہتے ہیں معاشی ترقی کیلئے سعودی تعاون کو قدر کی نگاہ سے دیکھتے ہیں، پاکستان اورسعودی عرب کےتعلقات کومزید مضبوط کیاجائے گا۔

اسلام آباد میں سعودی وزیرخارجہ شہزادہ سعود الفیصل کے ساتھ مشترکہ پریس کانفرنس کرتے ہوئے سرتاج عزیز نے کہا کہ پاک سعودی تعلقات دونوں ممالک کے عوام کے لئے فائدہ مند ہیں،دونوں ممالک مذہبی عقائد، اقدار اور روایات سے جڑے ہوئے ہیں، علاقائی اور عالمی امور پردونوں ممالک کے یکساں خیالات ہیں۔

انہوں نے کہا کہ پاکستان اورسعودی عرب کےتعلقات کومزید مضبوط کیاجائے گا، معاشی ترقی کے لئے سعودی تعاون کو قدرکی نگاہ سے دیکھتے ہیں، سرتاج عزیز نے مزید کہا کہ مذاکرات کے دوران دونوں ممالک نےباہمی تعلقات پراعتمادکااظہارکیا۔

وفاقی وزیر اطلاعات و نشریات پرویز رشید نے کہا ہے کہ ہماری حکومت کمزور ہے قانون طاقتور ہے۔ پرویز مشرف کی بیرون ملک روانگی کا فیصلہ حکومت نے کرنا ہے۔

اسلام آباد میں ایک کتاب کی تقریب سے خطاب کے بعد میڈیا سے گفتگو کرتے ہوئے وزیر اطلاعات نے کہا کہ سعودی عرب ہمارا محسن ملک ہے۔ سعودی عرب نے کبھی پاکستان میں غیر آئینی اقدام کی حمایت نہیں کی۔ان کا کہنا تھا کہ انرجی سیکٹر میں بھر پور تعاون کی یقین داہانی کرائی گئی ہے۔

امریکہ ،کابل اور بھارت سے بھی ہمارے اچھے تعلقات ہو چکے ہیں الطاف حسین کے بیان پر جواب دیتے ہوئے پرویز رشید کا کہنا تھا کہ اس ملک میں نئے نئے نعرے آتے رہتے ہیں، اب بلدیاتی انتخابات کیلئے بھی نئے نعرے لگائے جارہے ہیں۔سندھ کی تقسیم کے حوالے سے سندھ کے عوام خود فیصلہ کریں۔آئین کے تحت تمام مسائل حل کیے جاسکتے ہیں۔

وزارت آئی ٹی کے ماتحت اداروں پاکستان کمپیوٹر بورڈ اور ای جی ڈی کے تحت چلنے والے تیرہ منصوبوں میں مالی بے ضابطگیوں کا انکشاف ہوا ہے، وزیر مملکت برائے آئی ٹی انوشہ رحمان نے معاملہ نیب کے حوالے کرنے کے احکامات جاری کردیئے۔

وزیرمملکت برائے آئی ٹی نے گذشتہ برس ستمبر میں پاکستان کمپیوٹر بورڈ اور ای جی ڈی کے انٹرنل آڈٹ کے احکامات جاری کیے تھے جس کے نتیجے میں تیرہ منصوبوں میں شدید مالی بے ضابطگیاں پائی گئیں۔

ان منصوبوں کے تحت سی ڈی اے، وزارت داخلہ، اسٹیبلشمنٹ ڈویژن ، ایف آئی اے اور اسلام آباد پولیس سمیت دیگر اداروں کو ای سروسز فراہم کی جانا تھیں۔ وزیرمملکت برائے آئی ٹی انوشہ رحمان کا کہنا ہے کہ کرپٹ عناصر کے لیے وزارت کے لیے کوئی جگہ نہیں۔ آئی ٹی کے تمام منصوبوں کو شفاف بنایا جائے گا۔