ایف آئی اے سائبر کرائم سرکل نے فیصل آباد میں میڈیکل کی طالبہ کو جنسی ہراساں اور تشدد کرنے کی ویڈیو وائرل کرنے کا مقدمہ شیخ دانش و دیگر کے خلاف درج کر لیا ہے۔

نمائندہ اے آر وائی نیوز کے مطابق ایف آئی اے نے متاثرہ طالبہ خدیجہ کی مدعیت میں مقدمہ درج کیا ہے جس میں مرکزی ملزم دانش کی اہلیہ ماہم اور بیٹی انا کو بھی ملزمہ نامزد کیا گیا ہے۔

سائبر کرائم سرکل نے مقدمہ نمبر 125 درج کر کےسیل کر دیا ہے۔ مقدمہ میں انسداد الیکٹرانک کرائم ایکٹ اور تعزیرات پاکستان کی 7 دفعات شامل ہیں۔

جمعرات کے روز طالبہ تشدد کیس کے مرکزی ملزم شیخ دانش کو علاقہ مجسٹریٹ کے روبرو پیش کیا گیا تو پولیس نے عدالت سے ملزم کے 5 روزہ جسمانی ریمانڈ کی استدعا کی۔ عدالت نے پولیس کی استدعا منظور کرتے ہوئے ملزم دانش کا 5روزہ جسمانی ریمانڈ منظور کر لیا۔

خیال رہے کہ دو روز قبل فیصل آباد میں طالبہ کے ساتھ انسانیت سوز سلوک کی ویڈیو سامنے آئی تھی، جس میں دیکھا گیا کہ کاروباری شخصیت شیخ دانش علی اور متاثرہ طالبہ کی ہم جماعت ماہم کی جانب سے خدیجہ پر بہیمانہ تشدد کیا جارہا ہے۔

پولیس حکام کا کہنا ہے کہ ملزمان پر طالبہ پر بہیمانہ تشدد کیا اور بال بھی کاٹ دیے، جبکہ اسے جنسی طور پر بھی ہراساں کیا گیا۔

فیصل آباد میں چوری کے دوران پکڑے جانے والی خواتین نے اپنے کپڑے خود پھاڑنے کا ‏اعتراف کر لیا۔

چیئر پرسن ویمن پروٹیکشن اتھارٹی کنیزفاطمہ نے اےآروائی نیوز سے گفتگو کرتے ہوئے کہا کہ ‏فیصل آباد واقعے کی خواتین نےاپنی غلطی پرمعافی مانگی ہے۔

کنیز فاطمہ نے کہا کہ خواتین چور بھی تھیں تو پکڑ کر تشدد کا نشانہ بنانے کا اختیار کسی کو ‏نہیں ہے خاتون نے کہا ڈر کی وجہ سےاپنےکپڑے پھاڑے۔

ذرائع کا کہنا ہے کہ خواتین ناصرف بھکارنیں ہیں بلکہ بلیک میلر بھی ہیں، کئی ماہ سے دکانوں میں ‏گھس کر دکانداروں کو ہراساں کرتی تھیں، خواتین بات نہ ماننے پر کبھی دوپٹے اتاردیتی تھیں اور ‏کبھی کپڑے پھاڑ لیتی تھیں۔

فیصل آباد میں خواتین پر تشدد کا واقعہ، ویڈیو سے اصل حقائق سامنے آگئے

واقعے کے روز الیکٹرک اسٹور کے باہر لگے ایک کیمرے کی فوٹیج میں دیکھا جاسکتا ہے کہ چار ‏خواتین بھیگ مانگتے ہوئے اسٹور میں داخل ہوئیں، باہر ایک نوجوان بھی موجود ہے، چند لمحے بعد ‏دکاندار خاتون کو پکڑنے کے لیے باہر نکل کر دروازہ بند کردیتا ہے۔

خواتین جیسے ہی اسٹور میں داخل ہوئیں اور ایک گودام کی طرف بڑھی جس پر دکان میں موجود ‏لڑکے نے روکنا چاہا، فقیرنی کا دوپٹہ ہاتھ میں آیا، فقیری دوپٹہ چھوڑچھاڑ کر اندر گودام میں چلی ‏گئی، نوجوان ٹیبل پھلانگ کر باہر نکل آیا جس کے بعد باقی خواتین بھی سامان چرانے لگ گئیں۔

ایک اور ویڈیو سڑک پر لگے کیمرے کی سامنے آئی جس میں دو فقیرنیوں کو سڑک پار کرتے دیکھا ‏جاسکتا ہے جن میں سے ایک نے سر سے دوپٹہ پھینکا اورخود کومکمل بے لباس کرلیا۔

فیصل آباد میں انٹرمیڈیٹ کے امتحانات میں طالب علموں کے نمبر تبدیل کیے جانے کا انکشاف سامنے آیا ہے۔

اے آر وائی نیوز کے مطابق فیصل آباد میں ایک گروہ انٹرمیڈیٹ کے طالب علموں کے نمبر تبدیل کرنے کا کام کررہا تھا، جس میں ایک سرکاری اور نجی ادارے کے ٹیچر بھی شامل تھے۔

انٹرمیڈیٹ کی طالبہ نے امتحانات میں جوابی کاپی پر اپنے اصل رول نمبر کے ساتھ موبائل نمبر پر لکھا، جس پر سرکاری ٹیچر نے اُس نمبر پر واٹس ایپ کے ذریعے رابطہ کر کے رقم کے عوض کیمسٹری کے پرچے میں اچھے نمبر دینے کی پیش کش کی۔

 طالبہ کے والد نے اس تمام تر صورت حال کے حوالے سے ایجوکیشن بورڈ کے چیف سیکریٹری کو آگاہ کیا، والد کی شکایت پر تحقیقات شروع ہوئیں تو دو ٹیچرز کے نام سامنے آئے۔

ایجوکیشن بورڈ کے چیف سیکریٹری نے تھانہ صدر میں چار دفعات کے تحت مقدمہ درج کرایا، جس پر پولیس نے گروہ میں شامل سرکاری اسکول کے ای ایس ٹی ٹیچر تصدق حسین کو گرفتار کرلیا۔

پولیس کے مطابق گروہ کا دوسرا رکن اور نجی کالج کا ٹیچر بھاگنے میں کامیاب ہوگیا۔

والد کے مطابق سرکاری اسکول کے ای ایس ٹی ٹیچر تصدق حسین نے فرضی رول نمبر کے ساتھ اصل جوابی کاپی پر درج نمبر اتارا اور فون کر کے پیسوں کے عوض کیمسٹری کے پرچے میں اچھے نمبر دینے کی پیش کش کی۔

فیصل آباد: پنجاب کے شہر فیصل آباد میں برتن ٹوٹنے پر مالکن نے 13 سالہ گھریلو ملازمہ کو بہیمانہ تشدد کا نشانہ بنادیا۔

اے آر وائی نیوز کی رپورٹ کے مطابق فیصل آباد کے علاقے پیپلز کالونی نمبر دو میں مالکن نے 13 سالہ گھریلو ملازمہ یاسمین پر تشدد کیا، پولیس کا کہنا ہے کہ خوفزدہ بچی گھر سے فرار ہوکر جھنگ روڈ پر پینسرہ پہنچ گئی تھی، ہائی وے پولیس اہلکاروں نے بچی کو لاوارث دیکھ کر تحویل میں لیا۔

پولیس کا کہنا ہے کہ ہائی وے پولیس نے متاثرہ کمسن گھریلو ملازمہ کو تھانہ بٹالہ کالونی پہنچا دیا ہے۔

پولیس کے مطابق گھریلو ملازمہ کو سابق ناظم کے گھر برتن ٹوٹنے پر تشدد کا نشانہ بنایا گیا، بچی کا طبی معائنہ کروالیا گیا ہے، چہرے، سر اور ٹانگوں پر تشدد کے نشانات موجود ہیں، ڈنڈے مارے جانے سے بچی کے ہاتھوں پر سوجن موجود ہے۔

مزید پڑھیں: فیصل آباد میں گھریلو ملازمہ پر اہلخانہ کا تشدد، ملزم گرفتار

دوسری جانب چائلڈ پروٹیکشن بیورو کا کہنا ہے کہ متاثرہ گھریلو ملازمہ یاسمین کو تحویل میں لیا جائے گا، سرکاری مدعیت میں مالکن کے خلاف مقدمہ بھی درج کروایا جائے گا۔

پولیس کا کہنا ہے کہ ملازمہ پر تشدد کرنے والی مالکن عاصمہ کے خلاف قانونی کارروائی عمل میں لائی جائے گی، ملزمہ عاصمہ سابق یونین کونسل ناظم عثمان کی اہلیہ ہے۔

فیصل آباد: پنجاب کے شہر فیصل آباد میں پولیس نے کار پر فائرنگ کردی جس کے نتیجے میں نوجوان جاں بحق جبکہ تین افراد زخمی ہوگئے۔

اے آر وائی نیوز کی رپورٹ کے مطابق فیصل آباد کے علاقے ڈجکوٹ تھانے کی حدود میں پیٹرولنگ پر نکلنے والی موبائل نے کار سوار پر اندھا دھند گولیاں برسا دیں۔

مقتول کے رشتے دار کا کہنا ہے کہ اہلکاروں نے وقاص کی کار پر پیچھے سے فائرنگ کی، گاڑی میں ڈرائیور سمیت چار افراد بیٹھے ہوئے تھے جو گولیاں لگنے سے زخمی ہوئے، ڈجکوٹ کی پولیس نے مقتول وقاص لاش کو غائب کردیا اور اب اُس کے بارے میں کچھ بتایا بھی نہیں جارہا۔

لواحقین کے مطابق مقتول وقاص مہمانوں کے ساتھ تقریب سے واپس جارہا تھا کہ اسی دوران پیٹرولنگ کرنے والی پولیس موبائل نے اُس کو نشانہ بنا ڈالا۔ عزیز و اقارب نے واقعے کی جوڈیشل انکوائری کرانے کا مطالبہ بھی کیا ہے۔

لواحقین نے نوجوان کی ہلاکت کے بعد پولیس کے خلاف مظاہرہ کیا اور لاری اڈے کو بند کیا جس کے بعد پولیس نے پیٹی بند بھائیوں کے خلاف کارروائی کی اور انہیں حراست میں لیا۔

مزید پڑھیں: وزیراعظم عمران خان کی اسامہ ستی کےاہلخانہ کو تحقیقات سے متعلق مکمل تعاون کی یقین دہانی

پولیس حکام کے مطابق پٹرولنگ پولیس نے کار سواروں کو رکنے کا اشارہ دیا تو انہوں نے گاڑی بھگا دی تھی، جس کے بعد اُس کا تعاقب کیا گیا، گاڑی میں موجود تمام افراد نے شراب پی ہوئی تھی، فائرنگ کے نتیجے میں جاں بحق ہونے والے نوجوان وقاص کا تعلق سمندری کےنواحی علاقے سے تھا اور وہ بھی نشے میں دھت تھا۔

پولیس ذرائع کے مطابق پولیس کی فائرنگ سے جاں بحق ہونے والا نوجوان پنجاب پولیس میں تعینات ایک ایس ایچ او کا قریبی رشتے دار ہے۔

حکام کا کہنا ہے کہ فائرنگ کے الزام میں سب انسپیکٹر اور دو کانسٹیبلوں کو حراست میں لے لیا گیا ہے جن سے تفتیش کی جارہی ہے، اہلکاروں کا قصور ثابت ہوا تو ان کے خلاف قانونی کارروائی کی جائے گی۔

واضح رہے کہ چند روز قبل اسلام آباد کے سیکٹر جی 10 میں پولیس نے گاڑی پر فائرنگ کی تھی جس کے نتیجے میں نوجوان طالب علم اسامہ ستی جاں بحق ہوگیا تھا۔ مقتول کے والد نے الزام عائد کیا تھا کہ اُن کے بیٹے کو پولیس نے جان بوجھ کر نشانہ بنایا کیونکہ ایک روز قبل اسامہ کی اہلکاروں سے تلخ کلامی ہوئی تھی جس پر انہوں نے مزہ چکھانے کی دھمکی بھی دی تھی۔