Author: رافع حسین

کراچی: سندھ حکومت کی جانب سے ایڈمنسٹریٹر اور ڈپٹی کمشنر ضلع شرقی لگائے جانے والے افسر کے خلاف انکشاف ہوا ہے کہ انھیں 6 کیسز میں نیب کی جانب سے تحقیقات کا سامنا ہے، نیز واٹر کمیشن کی جانب سے انھیں نا اہل بھی قرار دیا جا چکا ہے۔

اے آر وائی نیوز کے مطابق سندھ حکومت کی جانب سے من پسند افراد کی بطور ایڈمنسٹریٹر تعیناتی کی گئی ہے، ذرایع کا کہنا ہے کہ ضلع شرقی کراچی کے ایڈمنسٹریٹر اور ڈپٹی کمشنر کا عہدہ رکھنے والے محمد علی شاہ کو پنک ریزیڈنسی سمیت چھ کیسسز میں نیب کی تحقیقات کا سامنا ہے۔

ذرایع کا کہنا ہے کہ ڈی سی ایسٹ تعیناتی کے بعد محمد علی شاہ پر نیب کے زیر حراست حاجی آدم جھوکیو اور لینڈ مافیا تیمور ڈومکی کے جعل سازی سے الاٹمنٹ کے سسٹم کو پھر شروع کرنے کا بھی الزام ہے، جعلی الاٹمنٹ کے لیے ڈی ایم سی ایسٹ میں من پسند اے ڈی سی افسران اور مختیار کار بھی تعینات کر دیے گئے ہیں۔

ذرایع کا کہنا ہے کہ واٹر کمیشن کی جانب سے نا اہل قرار دیے گئے شخص کو ضلع شرقی کا ایڈمنسٹریٹر اور ڈپٹی کمشنر کا عہدہ دیا گیا ہے، واٹر کمیشن نے اس وقت کے ڈپٹی کمشنر ملیر محمد علی شاہ کو کے فور منصوبے میں تاخیر کا ذمے دار قرار دیا تھا، اور ان پر واٹر کمیشن شدید تحفظات کا اظہار کر چکا ہے۔

افتخار شلوانی کی منظوری پر کے ایم سی میں من پسند افسر کی تعیناتی

واٹر کمیشن نے مذکورہ افسر کو نا اہل قرار دے کر فوری طور پر ڈی سی کے عہدے سے ہٹائے جانے کی ہدایت کی تھی، واٹر کمیشن نے کہا تھا کہ ڈپٹی کمشنر ملیر محمد علی شاہ عوام کے مفاد میں نہیں ہیں، ضلعی انتظامیہ کی نااہلی کی وجہ سے منصوبے میں تاخیر ہوئی، رقم موجود ہونے کے باوجود کام نہیں کیا گیا۔

ذرایع کا کہنا ہے کہ واٹر کمیشن کی رپورٹ کے بعد اس افسر کی کہیں تعیناتی نہیں ہو سکتی، ایم کیو ایم سمیت دیگر جماعتوں نے بھی محمد علی شاہ کی ضلع شرقی میں بطور ایڈمنسٹریٹر تعیناتی پر سوالات اٹھائے تھے۔

ذرایع کا کہنا ہے کہ محمد علی شاہ کو بااثر شخصیات کی سفارش پر ایڈمنسٹریٹر ضلع شرقی تعینات کیا گیا، واٹر کمیشن کی رپورٹ کے بعد سندھ حکومت نے برخلاف جا کر 2 عہدے ایک نا اہل افسر کو دیے۔

کراچی: شہر قائد میں انتظامی تبدیلیاں بھی بہتری نہ لا سکیں، سسٹم ناکام ہو چکا اور شہری مختلف مسائل کے باعث شدید پریشانی کا شکار ہیں۔

تفصیلات کے مطابق کراچی میں واٹر اینڈ سیوریج بورڈ کے ایم ڈی کی تبدیلی بھی صورت حال میں بہتری نہ لا سکی، کراچی کے مختلف علاقوں میں سیوریج اور ابلتے گٹروں نے سڑکیں اور گلیاں تباہ کر دیں۔

ادھر ضلع وسطی کے ایڈمنسٹریٹر اور ڈپٹی کمشنر نے اپنے ہی محکمے کے احکامات ہوا میں اڑا دیے ہیں، ذرایع کا کہنا ہے کہ صفائی کے نام پر جاری ہونے والے فنڈز میں خرد برد کا انکشاف ہوا ہے۔

ضلع وسطی کے مختلف علاقوں میں سیوریج سسٹم بھی بیٹھ چکا ہے، جب کہ علاقے کے واٹر بورڈ کا عملہ اور ایکس سی این علاقے سے غائب ہیں، دستگیر، عزیز آباد بلاک ٹو اور ٹین، اور جوہر آباد میں گٹر ابل پڑے ہیں، جس کی وجہ سے سڑکیں اور گلیاں زیر آب رہنے لگی ہیں، بدبو اور تعفن سے شہریوں کا نکلنا محال ہو گیا۔

کئی مقامات پر کئی دنوں سے پانی کھڑا ہونے کے باعث سڑکیں ٹوٹ پھوٹ کا شکار ہیں، جگہ جگہ بڑے بڑے گڑھے پڑ چکے ہیں، سیوریج کے پانی کے باعث مچھروں اور مکھیوں کی بھی بہتات ہو گئی، علاقہ مکینوں کی جانب سے شکایات کے باوجود نکاسی کا عمل شروع نہ ہو سکا۔

اے آر وائی نیوز کے مطابق ایم ڈی واٹر بورڈ صورت حال جاننے کے باوجود عملے کو علاقے میں بھیجنے سے قاصر دکھائی دے رہے ہیں۔

ادھر ضلع وسطی کے علاقے یاسین آباد میں کچرے کا ڈمپنگ پوائنٹ بنا دیا گیا ہے، دوسرے علاقوں سے کچرا لا کر یاسین آباد سے عائشہ منزل جانے والی سڑک پر پھینکا جانے لگا، کچرے کے ڈمپنگ پوائنٹ کے باعث ٹریفک کی روانی متاثر ہو چکی ہے، بدبو اور تعفن سے شہری پریشان ہیں۔

کچرے کے ڈھیر کے باعث یاسین آباد قبرستان جانے والا روڈ بھی متاثر ہو چکا ہے، جب کہ ایڈمنسٹریٹر اور ڈپٹی کمشنر اور سندھ سالڈ ویسٹ بورڈ کچرے کے ڈمپنگ پوائنٹ سے لاعلم نکلے ہیں۔

ذرایع کا کہنا ہے کہ محکمہ بلدیات نے تمام اضلاع کے ایڈمنسٹریٹرز کو صفائی ستھرائی اور کچرا ٹھکانے لگانے کے لیے فنڈز جاری کیے ہیں لیکن فنڈز میں خرد برد کیا جا رہا ہے، محکمہ بلدیات کی جانب سے روزانہ کی بنیاد پر ضلعی رپورٹ مانگے جانے کے باوجود بھی صورت حال بہتر نہ ہو سکی۔