Author: رافع حسین

لاہور: مسلم لیگ ن کے صد و قائد حزب اختلاف شہباز شریف بدھ کو ایک روزہ دورے پر کراچی پہنچیں گے۔

تفصیلات کے مطابق اپوزیشن لیڈر اور مسلم لیگ (ن) کے سربراہ شہباز شریف 2 ستمبر کو ایک روزہ دورے پر کراچی پہنچیں گے۔دورے کے دوران شہباز شریف معروف سماجی رہنما فیصل ایدھی سےملاقات کریں گے۔

شہباز شریف بارش سے متاثرہ علاقوں کے دورہ کریں گے اور متاثرین سے ملاقات کریں گے۔مسلم لیگ ن کے صدر حالیہ بارشوں میں جاں بحق افراد کے اہل خانہ سے بھی تعزیت کریں گے۔

ذرائع کا کہنا ہے کہ شہبازشریف ناظم آباد میں ن لیگ کے دفتر کاا فتتاح کریں گے اور میڈیا سے بھی بات چیت کریں گے۔شہباز شریف کراچی دورہ کر کے رات کو واپس لاہور روانہ ہوں گے۔

یاد رہے کہ 27 اگست کو مسلم لیگ ن کے صدر شہباز شریف کا کہنا تھا کہ کراچی میں ہونے والی موسلادھار بارشوں کے نتیجے میں ہونے والی جانی نقصان اور املاک کے نقصان پر انتہائی معذرت خواہ ہوں۔

شہباز شریف کا کہنا تھا کہ وفاقی اور صوبائی حکومتوں کو تعاون کرنا چاہیے اور مشکلات کا شکار لوگوں کی آسانیوں کے لیے تمام وسائل بروئے کار لائیں۔

کراچی: شہر قائد میں طوفانی بارشوں سے شہر کا بوسیدہ انفرا اسٹرکچر تباہ و برباد ہو گیا ہے۔

تفصیلات کے مطابق کراچی میں بارش نے شہر کا حلیہ بگاڑ دیا، مرکزی شاہراہیں ٹوٹ پھوٹ کا شکار ہیں، انڈر پاسز میں پانی جمع جب کہ کئی شاہراہوں اور علاقوں سے تاحال پانی کی نکاسی کا کام مکمل نہ کیا جا سکا۔

بارش ختم ہونے کے 2 دن بعد بھی نشیبی و مضافاتی علاقوں کے ساتھ ساتھ پوش علاقے اور ان کی سوسائٹیز زیر آب ہیں، دوسری جانب شہر کی کئی سڑکیں ٹوٹ پھوٹ کا شکار ہیں، ابلتے گٹروں نے رہی سہی کسر بھی پوری کر دی ہے۔

اے آر وائی نیوز کے مطابق پوش سوسائٹیز، پی ای سی ایچ ایس، گلستان ظفر سوسائٹی، اسکیم 33، نارتھ ناظم آباد، ڈیفنس، اور کلفٹن میں کئی کئی فٹ پانی کھڑا ہے، ڈی ایچ اے میں خیابان بخاری، سحر، راحت، خیابان شجاعت، شہباز میں انتظامیہ کی جانب سے بارش کا پانی تاحال نہیں نکالا جا سکا، کئی علاقوں میں سڑکیں زیر آب ہونے سے رہائشی گھروں میں محصور ہیں۔

ڈیفنس، فیڈرل بی ایریا، نیو کراچی میں گھروں میں پانی داخل ہونے سے املاک کو نقصان پہنچا، کئی گھروں اور فلیٹوں کے بیسمنٹ میں پانی ہونے سے شہریوں کی گاڑیاں بھی خراب ہو گئیں، متعدد علاقے 48 گھنٹے گزر جانے کے باوجود پانی کھڑا ہونے کے باعث بجلی سے محروم ہیں۔

دو دن گزرنے کے باوجود نرسری پر پانی کی نکاسی نہ ہونے سے مسجد میں بھرا پانی بھی نہیں نکالا جا سکا، تجارتی مرکز ٹاور اور صدر میں بھی جگہ جگہ گندا پانی جمع ہے، برساتی پانی کی نکاسی نہ ہونے کے باعث لیاقت آباد انڈر پاس کے اوپر والی سڑک دھنس گئی ہے، ملیر ہالٹ جانے والی سڑک بھی بیٹھ گئی، گلستان جوہر، گلشن اقبال میں بھی سڑکوں پر بڑے بڑے گڑھے پڑ چکے ہیں۔

بڑا بورڈ، نارتھ ناظم آباد، منگھوپیر، اورنگی ٹاؤن، بلدیہ ٹاؤن، شیر شاہ، کیماڑی، لانڈھی کورنگی میں پہلے سے خراب سڑکیں مزید بدحال ہو گئیں۔

ادھر سندھ حکومت کو بھی تین دن بعد ہوش آ گیا ہے، حکومت نے کراچی کے 6 اضلاع سمیت صوبہ بھر کے 20 اضلاع کو آفت زدہ قرار دے دیا ہے، کراچی کے 6، حیدر آباد ڈویژن کے 9 اضلاع، میرپورخاص ڈویژن کے 3 اضلاع جب کہ نواب شاہ ڈویژن کے 2 اضلاع کو آفت زدہ قرار دے کر اضلاع کے ڈپٹی کمشنرز کو بارشوں کے باعث ہونے والے نقصانات کا جلد از جلد تخمینہ لگانے کی ہدایت کر دی گئی ہے۔

کراچی: شہر قائد میں بد ترین لوڈ شیڈنگ کا گورنر سندھ عمران اسماعیل نے نوٹس لے لیا، انھوں نے اس سلسلے میں اہم رابطے بھی کیے۔

تفصیلات کے مطابق گورنر سندھ عمران اسماعیل نے کراچی میں بجلی کی شدید لوڈ شیڈنگ کا نوٹس لیتے ہوئے وفاقی وزیر توانائی عمر ایوب اور معاون خصوصی شہزاد قاسم سے رابطہ کیا۔

گورنر سندھ عمران اسماعیل نے کے الیکٹرک کے سی ای او مونس علوی کو بھی فون کیا، اور شہر میں بارش سے پیدا ہونے والی صورت حال پر تبادلہ خیال کیا۔

گورنر سندھ نے کہا کہ بجلی کے طویل بریک ڈاؤن سے شہریوں کا برا حال ہے، وفاقی وزیر توانائی عمر ایوب نے گورنر سندھ کو بتایا کہ وہ کے الیکٹرک سے رابطے میں ہیں، اور کے الیکٹرک کو آج شام تک بجلی بحال کرنے کی ہدایت کر دی گئی ہے۔

کراچی کے کئی علاقے بارش کے تیسرے روز بھی بجلی سے محروم

گورنر سندھ کا کہنا تھا کہ پانی جمع ہونے کی وجہ سے بجلی کا بریک ڈاؤن ہوا، لیکن دو دن گزرنے کے بعد بھی بجلی بحال نہ ہونا سمجھ سے بالا ہے، کے الیکٹرک شہر میں بجلی کی فوری بحالی یقینی بنائے۔

واضح رہے کہ کراچی میں دو دن قبل کی بارش کے بعد شہر میں کے الیکٹرک کی بجلی کا نظام درہم برہم ہو چکا ہے، بارش کے بعد کے الیکٹرک کا کم زور اور بوسیدہ نظام بجلی فراہم کرنے میں مکمل طور پر ناکام رہا، شہر کے مختلف علاقوں سے پانی کی نکاسی کے بعد بھی کراچی میں بجلی کی فراہمی معمول پر نہیں آ سکی۔

اس وقت شہر کے 30 فی صد علاقوں میں 40 گھنٹوں سے بجلی غائب ہے، کے الیکٹرک کے 400 فیڈرز تاحال بند ہیں، شہر کے بیش تر حصے تاریکی میں ڈوبے ہوئے ہیں، کے الیکٹرک کی 35 پی ایم ٹیز اور 69 کیبل فالٹس کی وجہ سے متعلقہ علاقوں میں بجلی کی فراہمی بند ہے۔

بجلی کی عدم فراہمی سے فریج میں رکھی کھانے پینے کی اشیا خراب ہونے اور پانی کی قلت سے شہریوں کو شدید مشکلات کا سامنا ہے۔