Author: رافع حسین

کراچی: شہر قائد میں مون سون کے چوتھے اسپیل کے دوران تیسرے روز بھی بارش جاری ہے، شہر کے مختلف علاقوں میں ناقص نکاسی آب کے باعث شہری شدید اذیت میں مبتلا ہیں۔

اے آر وائی نیوز کے مطابق کراچی کے علاقے گلبہار میں کشمیری محلہ بھی ان علاقوں میں سے ایک ہے جہاں بارش انتظامیہ کی غفلت اور بے حسی کے باعث سخت اذیت کا سبب بن جاتی ہے۔

حالیہ بارش میں بھی کشمیری محلہ پھر زیر آب آ گیا ہے لیکن انتظامیہ نہیں جاگ سکی ہے، بارش کے بعد گلبہار کے کشمیری محلے کی صورت حال نہایت ابتر ہے، لیاری ندی اوور فلو ہونے کے باعث ندی کا کچرا علاقے میں پھیل گیا ہے۔

علاقے میں جگہ جگہ کیچڑ اور گندگی کے ڈھیر بن گئے ہیں، بدبو اور تعفن سے علاقہ مکین شدید پریشانی میں مبتلا ہیں، بارش اور سیوریج کے پانی کے باعث علاقہ زیر آب ہے اور نکاسی کا کام شروع نہیں ہو سکا ہے، کیچڑ کے باعث لوگ اپنے گھروں سے نکل نہیں پا رہے ہیں۔

علاقہ مکینوں کا کہنا ہے کہ بارشوں میں ہمیشہ اس محلے میں یہی مسئلہ ہوتا ہے لیکن کوئی شنوائی نہیں ہوتی، تاحال یہاں کوئی مشینری، عملہ یا کوئی وزیر نہیں آیا۔

ادھر کراچی کے علاقے عزیز آباد بلاک ٹو میں بھی سیوریج کا گندا پانی گھروں سے نکالا نہیں جا سکا ہے، سیوریج لائنز خراب ہو چکی ہیں، گٹر چوک ہونے کے باعث بارش کے بعد پانی گھروں میں داخل ہو چکا ہے، علاقہ مکینوں کا کہنا ہے کہ کئی بار واٹر اینڈ سیوریج بورڈ کو شکایت کر چکے ہیں لیکن واٹر بورڈ نے نہ بوسیدہ لائنیں تبدیل کی نہ چوک مین ہولز کی صفائی کی، عوام اپنی مدد آپ کے تحت صفائی کرنے اور پانی نکالنے پر مجبور ہیں۔

خیال رہے کہ کراچی میں تیسرے روز صبح 8 بجے سے اب تک کہاں کتنی بارش ریکارڈ کی گئی، محکمہ موسمیات نے اس کے اعداد و شمار جاری کر دیے ہیں۔

موسمیات کے مطابق کراچی میں سب سے زیادہ بارش سرجانی میں 23 ملی میٹر ریکارڈ کی گئی ہے، فیصل بیس میں 19، مسرور بیس میں 12.5 ملی میٹر، لانڈھی میں 8.5، سعدی ٹاؤن میں 8.4، نارتھ کراچی میں 5.6 ملی میٹر، جناح ٹرمینل میں 4.4، اولڈ ایئرپورٹ پر 4، ناظم آباد میں 3.2، جوہر اور یونی ورسٹی روڈ پر 1.8، کیماڑی میں 1.3 ملی میٹر بارش ریکارڈ کی گئی۔

کراچی: شہر قائد کے علاقے اورنگی ٹاؤن ساڑھے 11 مخدوم شاہ کالونی میں ایک موٹر سائیکل سوار تیز بارش کے پانی کے بہاؤ میں بہہ کر لا پتا ہو گیا۔

تفصیلات کے مطابق کراچی کے علاقے اورنگی ٹاؤن میں ایک موٹر سائیکل سوار نالے میں گر گیا، پانی کے تیز بہاؤ کے باعث موٹر سائیکل سوار لاپتا ہو گیا ہے جس کی تلاش جاری ہے۔

اہل علاقہ اپنی مدد آپ کے تحت شہری کو تلاش کرنے میں مصروف ہیں۔

ادھر کراچی میں ناگن چورنگی پاور ہاؤس، یو پی موڑ پر نالہ ابل پڑا ہے اور سڑک زیر آب آ گئی ہے، ناگن چورنگی سے پاور ہاؤس تک سڑک زیر آب آنے سے ٹریفک بھی معطل ہو گئی ہے۔ بارش کے بعد سرجانی ٹاؤن بھی پانی میں ڈوب گیا ہے۔

کراچی کے مختلف علاقوں میں موسلادھار بارش، موسم خوشگوار

سرجانی نالہ اوور فلو ہونے سے سڑکیں اور نالہ ایک لیول پر آ گیا، پانی بھر جانے کے باعث سڑکیں تالاب کا منظر پیش کر رہی ہیں، برساتی پانی کے باعث شہریوں کو مشکلات کا سامنا ہے، جگہ جگہ گاڑیاں بند ہو گئی ہیں۔

بارش سے سبزی منڈی میں بھی تباہ کاری ہوئی ہے، بارش کے پانی سے سبزی منڈی کی ٹوٹی سڑکیں تالاب بن گئی ہیں، پانی سے سبزی منڈی کچرے اور کیچڑ کا مرکز بن کر تعفن زدہ ہو گئی سے جس سے بیماریاں پھیلنے کا خدشہ سر اٹھا چکا ہے، ہول سیل فروٹ، سبزی منڈی میں لاکھوں روپے کا مال بارش کی نذر ہو چکا ہے، منڈی انتظامیہ کی غفلت اور لاپرواہی سے تاجروں کو شدید نقصان پہنچا۔

دوسری طرف صوبائی وزرا ناصر حسین شاہ اور سعید غنی مختلف علاقوں کے دورے پر نکل چکے ہیں، صوبائی وزرا نے بارش کے بعد نکاسی آب کے انتظامات کا جائزہ لیا، ناصر شاہ نے ہدایت کی ہے کہ میونسپل کمشنرز اور افسران نکاسی آب کے لیے سڑکوں پر رہیں۔

خیال رہے کہ مون سون کے تیسرے اسپیل میں بارش کا سلسلہ جاری ہے، محکمہ موسمیات کا کہنا ہے کہ گلستاں جوہر یونی ورسٹی روڈ پر 78.5 ملی میٹر بارش ریکارڈ کی گئی ہے، سرجانی ٹاؤن میں 68.4 ملی میٹر، جناح ٹرمینل پر 57.6 ملی میٹر، صدر میں 51، کیماڑی میں 48.5، نارتھ کراچی میں 47.3 ملی میٹر، فیصل بیس پر 43 ملی میٹر، ناظم آباد میں 27.5 ملی میٹر، کلفٹن میں 21.4، پی اے ایف مسرور 18، جب کہ لانڈھی میں 15 ملی میٹر بارش ریکارڈ کی گئی ہے۔