Author: راجہ محسن اعجاز

اسلام آباد : سپریم کورٹ نے کراچی میں بچے کے قتل کیس میں گرفتار ملزم کو بری کردیا، ٹرائل کورٹ نے ملزم کو موت کی سزاسنائی تھی۔

تفصیلات کے مطابق سپریم کورٹ نے پولیس تحویل میں ملزم کے میڈیا کو دئیے گئے اعترافی بیان کو ناقابل قبول قراردے دیا۔

جسٹس اطہر من اللہ نے 25 صفحات پر مشتمل تحریری فیصلہ جاری کیا ، جس میں عدالت نے کراچی میں بچے کے قتل کیس میں گرفتار ملزم کو بری کردیا۔

ٹرائل کورٹ نے بچے کے قتل کےالزام میں ملزم کو موت کی سزا سنائی تھی اور سندھ ہائیکورٹ نے واقعاتی شواہد، ٹی وی انٹرویومیں اعتراف جرم کی بنیاد پر سزا کی توثیق کی تھی۔

عدالت نے کہا پولیس تحویل میں دیاگیا بیان بطورثبوت استعمال نہیں ہوسکتا،مجسٹریٹ موجودگی لازم ہے، رپورٹر کو ملزم تک رسائی دینا اور بیان ریکارڈ کر کے پھیلانا کوئی معمولی بات نہیں۔

تحریری فیصلے میں کہا گیا کہ تھانہ انچارج ، آئی اونےجسمانی ریمانڈ کے دوران ملزم کےانٹرویو کی اجازت دی، افسوس سےکہنا پڑتا ہےملزم کے بیان کا ترمیم شدہ حصہ بعد میں ٹی وی چینل پر نشرکیاگیا۔

سپریم کورٹ کا کہنا تھا کہ یہ پہلا کیس نہیں کہ جس میں زیر حراست ملزم سےایسا رویہ اپنایاگیاہو، ایسا رویہ عام ہوتا جا رہا ہے اور بغیر کسی روک ٹوک کے جاری ہے، ایسا رویہ روارکھنا نہ صرف ملزم بلکہ متاثرین کے حقوق کی بھی خلاف ورزی ہے۔

جرم کی خبریں لوگوں کیلئے دلچسپی کا باعث ہوتی ہیں خاص طورپرہائی پروفائل کیس، ایسے کیسز میں عوام کی غیر معمولی دلچسپی میڈیا ٹرائل کا باعث بن سکتی ہے، میڈیا ٹرائل نتائج نہ صرف ملزمان بلکہ دیگر متاثرین کیلئے بھی ناقابل تلافی ہو سکتےہیں۔

فوجداری نظام انصاف ہر معاملے میں منصفانہ ٹرائل کے حق کو یقینی بنانا ہے، میڈیا پر نشر کیا گیا ملزم کا بیان قابل قبول نہ تھا ، بیان نہ کسی مجسٹریٹ کے سامنے دیا گیا تھا اور نہ قانونی تقاضے پورے کیے گئے تھے، ایسا اقدام شاید اپنی کارکردگی دکھانے یا عوامی دباؤ سے نمٹنے کے لیے کیا گیا ہو ، ایسا اقدام کسی طور پر عوامی مفاد میں نہیں تھا۔

فیصلے کی کاپی سیکریٹری وزارت داخلہ،سیکریٹری وزارت اطلاعات و نشریات کو بھجوانے کا حکم دیتے ہوئے کہا فیصلےکی کاپی چیئرمین پیمرا، صوبائی چیف سیکرٹریز کوبھی بجھوائی جائے، ہر ملزم کو اس وقت تک بے گناہ تصور کیا جاتا ہے جب تک منصفانہ ٹرائل سے مجرم ثابت نہ کر دیا جائے۔

اسلام آباد: سپریم کورٹ نے ججز ٹرانسفر کیس کا فیصلہ سناتے ہوئے کہا کہ ججز کا تبادلہ غیر آئینی نہیں۔

تفصیلات کے مطابق سپریم کورٹ نےججز ٹرانسفر کیس کا فیصلہ سنا دیا ،جسٹس محمد علی مظہر نے فیصلہ پڑھ کر سنایا۔

سپریم کورٹ نے فیصلے میں کہا کہ ججز کا تبادلہ غیر آئینی نہیں، فیصلہ 2-3 کے تناسب سے سنایا گیا۔

جسٹس محمد علی مظہر ، جسٹس شاہد بلال ،جسٹس صلاح الدین پنہورنےاکثریتی فیصلہ سنایا جبکہ جسٹس نعیم افغان اور جسٹس شکیل احمد نےاکثریتی فیصلے سے اختلاف کیا۔

سپریم کورٹ نے ججز کی سنیارٹی کا معاملہ صدر پاکستان کو واپس ریمانڈ کردیا۔

فیصلے میں کہا گیا کہ ججز تبادلے کیلئےصدر پاکستان کا اختیارباقاعدہ طریقہ کار کےتحت استعمال ہوتاہے، صدر ججزکا تبادلہ متعلقہ جج، چیف جسٹس پاکستان کی مشاورت سےکرتے ہیں۔

سپریم کورٹ کے مطابق آئین کے آرٹیکل 200 اور 175 دونوں علیحدہ ہیں، آرٹیکل 200 صدر مملکت کو ٹرانسفر کا اختیار دیتا ہے، سنیارٹی کے فیصلے تک جسٹس سرفراز ڈوگر بطورقائمقام چیف جسٹس فرائض جاری رکھیں گے، آئین کے آرٹیکل 175 ججز کی جوڈیشل کمیشن کے ذریعے تقرری سے متعلق ہے۔

یاد رہے سپریم کورٹ نے ججز ٹرانسفر کیس میں فریقین کے دلائل مکمل ہونے پر فیصلہ محفوظ کیا تھا۔

دوران سماعت پیٹرن انچیف تحریک انصاف کے وکیل نے دلائل دیتے ہوئے کہا تھا کہ آرٹیکل دوسو اور آرٹیکل ایک سو پچھہتر میں ٹکراؤ ہے۔

جس پر جسٹس محمد علی مظہرنے ریمارکس دیے تھے جوڈیشل کمیشن کے پاس تبادلہ کا کوئی اختیارنہیں، جج کی سیٹ پر مستقل تبادلہ نہیں ہوسکتا، ججز ٹرانسفر کا پورا طریقہ آرٹیکل دوسو میں دیا گیا ہے۔

جسٹس محمد علی نے سوال کیا درخواست میں ججز کو ڈیپوٹیشنسٹ لکھا گیا ہے، ججز کو ڈیپوٹیشنسٹ کیسے کہاں جاسکتا ہے؟

جس پر وکیل منیر اے ملک نے کہا تھا کہ کبھی نہیں کہا تبادلہ پر آئے ججز ڈیپوٹیشنسٹ ہے۔

اٹارنی جنرل کا کہنا تھا کہ ماضی میں ججز ٹرانسفر کی کوئی مثال نہیں۔ججز ٹرانسفر میں صدر اور وزیراعظم کا کردار محدود ہے، ججز ٹرانسفر کے عمل میں چیف جسٹس صاحبان بھی شامل ہیں، وزیر اعظم کی ایڈوائس اور بزنس رولز کیخلاف کوئی استدعا نہیں کی گئی۔

اسلام آباد : جسٹس منصور علی شاہ نے سروس کیس میں عدلیہ سے متعلق اہم فیصلے میں کہا کہ تاریخ ان ججوں کو بری نہیں کرے گی جواپنی آئینی ذمہ داری ترک کر دیتے ہیں۔

تفصیلات کے مطابق جسٹس منصور علی شاہ نے سروس کیس میں عدلیہ سے متعلق اہم فیصلہ جاری کردیا۔

جس میں کہا ہے کہ ججز کا فرض ہے اپنی صفوں میں طاقت کے سامنے ہتھیار ڈالنے والوں کی نشاندہی کریں، ججز اخلاقی وضاحت اور ادارہ جاتی جرأت کے ساتھ ایسا کر سکتے ہیں۔

فیصلے میں کہنا تھا کہ اندر سے تنقید آئین کی وفاداری کی جڑ ہے،بے وفائی نہیں، ایسے لوگوں کو للکارنا عدالتی ادارے کی خدمت کی اعلیٰ ترین شکل ہے، ججز کو دیانتداری اور جرأت کے ساتھ کام کرنا ہے۔

انھوں نے کہا کہ ججز کو اندرونی اور بیرونی تمام تجاوزات کا مقابلہ کرنا ہے، ججز کو عدلیہ اورقانون کی حکمرانی پامال کرنے کے خطرات کا مقابلہ کرنا ہے، ججز کو چھوٹے، قلیل مدتی فوائد کے لالچ کا شکار نہیں ہونا چاہیے۔

جسٹس منصور کا کہنا تھا کہ ایسے فوائد محض وہم اور عارضی ہوتے ہیں، جج کا اصل اجر ادارے کے وقار اور عوام کے اعتماد کو برقرار رکھنے میں ہے، تاریخ ان لوگوں کو یاد رکھتی ہے جو اصول کے دفاع میں ثابت قدم رہے۔

فیصلے کے مطابق عدالتوں کو آئینی اخلاقیات کا مینارہ اور جمہوری سالمیت کا محافظ ہونا چاہیے، تاریخ ان ججوں کو بری نہیں کرے گی جواپنی آئینی ذمہ داری ترک کر دیتے ہیں۔

سپریم کورٹ کے جج نے کہا کہ تاریخ ایسے ججز کو ناانصافی کے ساتھی کے طور پر یاد رکھے گی، سپریم کورٹ تنازعات کے حل کا فورم نہیں، قوم کا آئینی ضمیر بھی ہے۔

اسلام آباد : سپریم کورٹ نے نور مقدم قتل کیس کے  تحریری فیصلے میں کہا کہ ملزم ظاہر نور مقدم کا بے رحم قاتل ہے، ہمدردی کے قابل نہیں۔

تفصیلات کے مطابق سپریم کورٹ نے مجرم ظاہر جعفر کی سزائے موت برقرار رکھنے کا تحریری فیصلہ جاری کردیا۔

سپریم کورٹ کا تفصیلی تحریری فیصلہ 13 صفحات پر مشتمل ہے، جس میں کہا گیا ہے کہ سائلنٹ وِٹنس تھیوری مطابق بغیرعینی گواہ کےویڈیوثبوت قابل قبول ہیں، مستند فوٹیج خود اپنے حق میں ثبوت بن سکتی ہے۔

فیصلے میں کہا گیا کہ ریکارڈ شدہ ویڈیو یا تصاویر بطورشہادت پیش کی جا سکتی ہیں اور قابل اعتماد نظام سے لی گئی فوٹیج خود بخود شہادت بن سکتی ہے، بینک ڈکیتی کیس میں ویڈیو فوٹیج بغیرگواہ قبول کی گئی، امریکی عدالتوں میں سائلنٹ وِٹنس اصول کووسیع پیمانے پر تسلیم کیا گیا۔

عدالت کا کہنا تھا کہ ملزم ظاہر جعفر نور مقدم کا بے رحم قاتل ہے، ہمدردی کے قابل نہیں، دونوں لوئر کورٹس کا فیصلہ متفقہ طور پر درست قرار دیا جاتا ہے۔

تحریری فیصلے میں کہا کہ ملزم کی جانب سے نور مقدم پر جسمانی تشدد کی ویڈیو ثبوت کے طور پر پیش کی گئی، سی سی ٹی وی فوٹیج ڈی وی آر اور ہارڈ ڈسک قابل قبول شہادت ہیں، ویڈیو ریکارڈنگ میں کوئی ترمیم ثابت نہیں ہوئی،ملزم کی شناخت صحیح نکلی۔

سپریم کورٹ کا کہنا تھا کہ ڈی این اے رپورٹ سے زیادتی کی تصدیق ہوئی، آلہ قتل پرمقتولہ کا خون ہے، ملزم نور مقدم کی موجودگی کی کوئی وضاحت نہ دے سکا، ڈیجیٹل شواہد اب بنیادی شہادت تصور کئے جاتے ہیں۔

فیصلے کے مطابق سی سی ٹی وی فوٹیج مقررہ معیار پر پوری اترے توتصدیق کی ضرورت نہیں، ظاہر جعفر کی قتل میں سزائے موت برقرار رکھی اور زیادتی کی سزاعمرقید میں تبدیل کی۔

عدالت کا مزید کہنا تھا کہ ظاہر جعفر کی نورمقدم کواغوا کرنے کے الزام کی سزا ختم کرکے بری کیاجاتا ہے تاہم غیر قانونی طور پراپنے پاس رکھنے پر ظاہر جعفر کی سزا برقرار رکھی گئی ہے جبکہ شریک ملزمان محمد افتخار اور محمد جان کی سزا برقرار ہیں۔

عدالت نے شریک ملزمان کی سزا کم کرکے جتنی قید کاٹ لی اس کے بعد رہا کرنے کا حکم دیا۔

تحریری فیصلے میں کہا گیا کہ جسٹس علی باقر نجفی فیصلے کے حوالے اپنا اضافی نوٹ دیں گے۔