Author: راجہ محسن اعجاز

ملک بھر میں ایک ساتھ انتخابات کرانے سے متعلق درخواستوں کی سپریم کورٹ میں سماعت ہوئی چیف جسٹس نے رولنگ دیتے ہوئے کہا ہے کہ کوئی ٹائم لائن نہیں دیں گے۔

اے آر وائی نیوز کے مطابق ملک بھر میں ایک ساتھ انتخابات کرانے سے متعلق درخواستوں کی سماعت عیدالفطر کی تعطیلات کے بعد آج دوبارہ شروع ہوئی۔ چیف جسٹس عمر عطا بندیال کی سربراہی میں جسٹس اعجاز الاحسن اور جسٹس منیب اختر پر مشتمل تین رکنی خصوصی بینچ سماعت کی۔

اٹارنی جنرل منصور عثمان اعوان نے عدالت عظمیٰ میں پیش ہوکر حکومتی موقف پیش کیا جب کہ پی ٹی آئی کے وکیل علی ظفر، پیپلز پارٹی کے وکیل فاروق ایچ نائیک درخواست گزار کے وکیل شاہ خاور، پی ٹی آئی رہنما شاہ محمود قریشی، فواد چوہدری بھی عدالت میں پیش ہوئے۔

چیف جسٹس نے وکلا کے دلائل اور فریقین کے موقف سننے کے بعد رولنگ دیتے ہوئے کہا کہ عدالت مذاکرات کے لیے مزید کوئی ٹائم لائن نہیں دے گی۔ آج کی سماعت کا مناسب حکم جاری کریں گے جس کے بعد سماعت کو ملتوی کر دیا گیا۔

اس سے قبل سماعت شروع  ہوئی تو اٹارنی جنرل منصور عثمان اعوان سپریم کورٹ میں پیش ہوئے اور عدالت کو بتایا کہ 19 اپریل کو حکومت اور اپوزیشن میں پہلا رابطہ ہوا اور 26 اپریل کو ملاقات پر اتفاق ہوا تھا۔  اس سلسلے میں 25 اپریل کو وفاقی وزرا ایاز صادق اور سعد رفیق کی پی ٹی آئی رہنما اسد قیصر سے ملاقات ہوئی تاہم انہوں نے کہا کہ وہ مذاکرات کے لیے با اختیار نہیں ہیں۔

اٹارنی جنرل نے عدالت کو مزید آگاہ کرتے ہوئے بتایا کہ گزشتہ روز حکومتی اتحاد کی ملاقاتیں ہوئیں۔ دو جماعتوں کو مذاکرات پر اعتراض تھا لیکن راستہ نکالا گیا۔ چیئرمین سینیٹ نے ایوان بالا میں حکومت اور اپوزیشن کو خطوط لکھے ہیں اور دونوں سے مذاکرات کے لیے چار چار نام مانگے گئے ہیں۔

اس موقع پر چیف جسٹس عمر عطا بندیال نے اٹارنی جنرل سے استفسار کیا کہ اسد قیصر کے بعد کیا کوشش کی گئی کہ کون مذاکرات کے لیے با اختیار ہے؟ جس پر اٹارنی جنرل کا کہنا تھا کہ منگل کو میڈیا سے معلوم ہوا کہ شاہ محمود قریشی مذاکرات کے لیے با اختیار ہیں۔

چیف جسٹس نے یہ بھی استفسار کیا کہ چیئرمین سینیٹ نہ حکومت کے نمائندے ہیں اور نہ اپوزیشن کے ان سے کس حیثیت میں رابطہ کیا گیا؟ جس پر اٹارنی جنرل نے کہا کہ چیئرمین سینیٹ وفاق کی علامت ہیں اس لیے ان سے کہا گیا۔

اس موقع پر پیپلز پارٹی کے وکیل فاروق ایچ نائیک نے کہا کہ چیئرمین سینیٹ سہولت کاری کریں گے۔

چیف جسٹس نے کہا کہ چیئرمین سینیٹ اجلاس بلائیں گے اس میں بھی وقت لگے گا۔ حکومت مذاکرات میں سنجیدہ ہے تو خود اقدام اٹھاتی۔ مذاکرات کرنے پر عدالت مجبور نہیں کر سکتی۔ عدالت تو صرف آئین پر عمل چاہتی ہے تا کہ تنازع کا حل نکلے۔ عدالت کو کوئی وضاحت نہیں چاہیے صرف حل بتائیں۔

فاروق ایچ نائیک نے کہا کہ تمام حکومتی اتحادی جماعتیں پی ٹی آئی سےمذاکرات پر آمادہ ہیں اور سینیٹ واحد ادارہ ہے جہاں تمام جماعتوں کی نمائندگی موجود ہے۔ چیئرمین سینیٹ کا کردار صرف سہولت فراہم کرنا کرنا ہے، مذاکرات سیاسی جماعتوں کمیٹیوں نے ہی کرنے ہیں۔

انہوں نے کہا کہ یہ سیاسی ایشو ہے اس لیے سیاسی قائدین کو ہی مسئلہ حل کرنے دیا جائے اور سیاست کا مستقبل سیاستدانوں کو ہی طے کرنے دیا جائے۔

اس موقع پر پی ٹی آئی کے مرکزی سینیئر وائس چیئرمین شاہ محمود قریشی نے عدالت میں اپنا موقف پیش کرتے ہوئے کہا کہ حکومت کے اصرار پر عدالت نے سیاسی اتفاق رائے کیلیے موقع دیا تھا اور تمام جماعتوں کی سیاسی قیادت عدالت میں پیش ہوئی تھی۔

شاہ محمود قریشی نے کہا کہ عدالتی حکم کو پی ٹی آئی نے سنجیدگی سے لیا لیکن پی ڈی ایم میں آج بھی مذاکرات پر اتفاق رائے نہیں ہے۔ عدالت نے قومی مفاد میں سیاسی جماعتوں کو موقع فراہم کیا لیکن تحریک انصاف کے ساتھ کوئی رابطہ نہیں کیا گیا۔

ان کا کہنا تھا کہ پی ٹی آئی نے مذاکرات کے لیے مجھے، فواد چوہدری اور علی ظفر کو نامزد کیا تھا۔ اسد قیصر نے حکومت کو مجھ سے رابطہ کرنے کا کہا تھا لیکن آج تک مجھ سے کسی نے رابطہ نہیں کیا۔

پی ٹی آئی رہنما نے مزید کہا کہ چیئرمین سینیٹ نے گزشتہ روز فون پر کہا کہ وزیراعظم کے اصرار پر رابطہ کر رہا ہوں جس پر میں نے ان سے کہا کہ سپریم کورٹ میں جوتجاویز دی تھیں وہ کہاں ہیں۔

انہوں نے عدالت سے کہا کہ سینیٹ کی کمیٹی صرف تاخیری حربہ ہے۔ قومی اسمبلی کا اجلاس بلا کررولز کی خلاف ورزی کی گئی۔ زیر سماعت معاملے کو پارلیمان میں زیر بحث نہیں لایا جا سکتا۔ پارلیمان میں دھمکی آمیز لہجے اور زبان سن کرشرمندگی ہوئی۔

چیف جسٹس نے کہا کہ یہ سیاسی باتیں ہیں، ہم کیس کے بارے میں بات کر رہے ہیں۔ انہوں نے شاہ محمود قریشی سے استفسار کیا کہ آپ کہہ رہے ہیں کہ سنجیدگی سے رابطہ نہیں کیا گیا؟ جس پر پی ٹی آئی رہنما نے کہا کہ ہم بات چیت کے لیے تیار ہیں حکومت سنجیدہ ہے تو ابھی مذاکرات پر بیٹھنے کو تیار ہیں۔

پیپلز پارٹی کے وکیل نے کہا کہ آئین اور پارلیمنٹ کو کون نیچا دکھا رہا ہے، اس پر نہیں جانا چاہتا تاہم شاہ محمود قریشی نے جو تقریر کی ایسے اتفاق رائے نہیں ہو سکتا۔ مولانا فضل الرحمان کو سینیٹ نے مذاکرات پر آمادہ کیا۔ چیئرمین سینیٹ کو نام دیں کل ہی بیٹھنے کو تیار ہیں۔

چیف جسٹس نے کہا کہ عدالت کا کوئی حکم نہیں صرف تجویز ہے۔ نام دینے میں کیا سائنس ہے، کیا حکومت نے اپنے 5 نام دیے ہیں؟ مذاکرات کے معاملے میں صبر اور تحمل سے کام لینا ہوگا۔ قومی مفاد اور آئین کے تحفظ کیلئے اتفاق نہ ہوا تو جیسا ہے ویسے ہی چلے گا۔

فاروق نائیک نے کہا کہ حکومت کے نام تین سے چار گھنٹے میں فائنل ہو جائیں گے پی ٹی آئی چاہے تو 3 نام دے دے۔ اس موقع پر چیف جسٹس نے تجویز دی کہ فاروق نائیک کو بھی مذاکرات میں رکھا جائے تاکہ معاملہ ٹھنڈا رکھا جائے۔

شاہ محمود قریشی نے عدالت عظمیٰ کو بتایا کہ چیئرمین سینیٹ نے صرف سینیٹرز کے نام مانگے ہیں۔

چیف جسٹس عمر عطا بندیال نے کہا کہ حکومت نے نیک نیتی دکھانے کیلیے کیا اقدامات کیے ہیں؟ ایسا لگ رہا ہے کہ حکومت صرف پاس پاس کھیل رہی ہے۔ آج توقع تھی کہ دونوں فریقین کی ملاقات ہوگی۔ جس پر اٹارنی جنرل نے کہا کہ کوشش ہوگی کہ دونوں کمیٹیوں کی آج پہلی ملاقات ہوجائے۔

درخواست گزار کے وکیل شاہ خاور ایڈووکیٹ نے کہا کہ دونوں فریقین متفق ہوں تو حل نکل آئے گا۔

پی ٹی آئی رہنما فواد چوہدری نے کہا کہ پارلیمان اور عدالت نہیں سپریم صرف آئین ہے۔ آئین نہ تو سپریم کورٹ تبدیل کرسکتی ہے اور نہ ہی سیاسی جماعتوں کا اتفاق رائے اسے تبدیل کر سکتا ہے۔ سیاسی جماعتوں کو الیکشن کی تاریخ دینے کا اختیار نہیں ملنا چاہیے۔ ایسا ہوا تو کوئی بھی حکومت الیکشن کے لیے فنڈز جاری نہیں کرے گی۔

چیف جسٹس عمر عطا بندیال نے کہا کہ مذاکرات تو پہلے ہی ہو جانے چاہیے تھے۔ اس حوالے سے عدالتی فیصلے، آئین اور قانون موجود ہے۔ ہم نہ کوئی ہدایت کر رہے ہیں اور نہ ہی کوئی ٹائم لائن جاری کر رہے ہیں۔ اس کیس کا تحریری فیصلہ جاری کریں گے اور عدالت مناسب حکم نامہ جاری کرے گی۔

آج کی سماعت کا مناسب حکم جاری کریں گے، چیف جسٹس! کوئی ٹائل لائن نہیں دیں گے، چیف جسٹس —- ملک بھر میں ایک ساتھ انتخابات کرانے کی درخواستوں پر سماعت ملتوی#ARYNews pic.twitter.com/oroZVEAds1

— ARY NEWS (@ARYNEWSOFFICIAL) April 27, 2023

 

اس موقع پر پی ٹی آئی کے وکیل علی ظفر نے کہا کہ ماحول سازگار ہو گا تو مذاکرات ممکن ہوں گے۔ مذاکرات کے لیے وقت مقرر کرنا لازمی ہے، تاخیر سے مقصد سے فوت ہو جائے گا۔

پی پی کے وکیل نے کہا کہ بیٹھیں گے تو بات ہوگی، گلےشکوے ہوں گے تو حل بھی نکلے گا۔ اٹارنی جنرل نے کہا کہ 1977 میں سیاسی حالات اتنےکشیدہ نہیں تھے جتنے آج ہیں۔

چیف جسٹس نے کہا کہ سیاستدانوں کو خود سے مسائل کا حل نکالنا چاہیے۔ سازگار مذکرات کے ذریعے حل نہ نکلا تو آئین بھی موجود ہے اور ہمارا فیصلہ بھی جس کے بعد انہوں نے سماعت ملتوی کردی۔

واضح رہے کہ عدالت عظمیٰ نے گزشتہ سماعت میں حکومت کو پنجاب اور کے پی میں انتخابات کیلیے27 اپریل تک 21 ارب روپے جاری کرنے کا حکم دیا تھا اور سپریم کورٹ نے 14 مئی کو پنجاب میں انتخابات کرانے کا حکم تاحال واپس نہیں لیا ہے۔

سپریم کورٹ نے ملک میں بیک وقت الیکشن کرانے کے کیس میں تمام سیاسی جماعتوں کو نوٹس جاری کر دیے اور کہا ہے کہ سیاسی جماعتیں ایک موقف پر آجائیں تو عدالت گنجائش نکال سکتی ہے درخواست پر سماعت کل صبح ساڑھے 11 بجے تک ملتوی کردی۔

اے آر وائی نیوز کے مطابق سپریم کورٹ میں وزارت دفاع کی جانب سے ملک بھر میں بیک وقت انتخابات کرانے کی درخواست کی سماعت ہوئی۔ چیف جسٹس عمر عطا بندیال کی سربراہی میں تین رکنی بینچ نے سماعت کی اور اٹارنی جنرل سمیت وکلا کے دلائل سننے کے بعد تمام سیاسی جماعتوں کو نوٹس جاری کرتے ہوئے سماعت کل صبح ساڑھے 11 بجے تک کے لیے ملتوی کردی ہے۔

چیف جسٹس عمر عطا بندیال نے رولنگ دیتے ہوئے کہا کہ اس معاملے کو زیادہ طول نہیں دیا جا سکتا۔ سیاسی جماعتیں ایک موقف پر آجائیں تو عدالت گنجائش نکال سکتی ہے۔ 5 دن عید کی چھٹیاں آگئی ہیں۔ میرے ساتھی ججز کہتے ہیں کہ پانچ دن کا وقت بہت ہے۔

اس موقع پر سرکاری شاہ خاور ایڈووکیٹ نے کہا کہ عدالتی فیصلہ کبھی ایک وجہ سے نافذ نہیں ہوسکا تو کبھی دوسری وجہ سے۔ لوگ کنفیوژ اور ٹینشن میں ہیں، عدالتی فیصلے پر عملدرآمد ضروری ہے۔ عوام کو ہیجانی کیفیت سے نکالنے کے لیے درخواست دائر کی ہے، انتخابات الگ الگ ہوئے تو کئی پیچیدگیاں پیدا ہوں گی۔ صوبوں میں منتخب حکومتیں الیکشن پر اثر انداز ہوں گی۔

چیف جسٹس نے کہا کہ جب بحث ہو رہی تھی تو اٹارنی جنرل نے یہ نکتہ کیوں نہیں اٹھایا؟ اٹارنی جنرل کو نہ جانے کس نے تین چار پر زور دینے کا کہا۔ ان سے پوچھیں گے کہ کس نے ان کو یہ موقف اپنانے سے روکا؟

شاہ خاور ایڈووکیٹ نے کہا کہ سیاسی جماعتیں ابھی بھی متفق ہو جائیں تو آئیڈیل حالات ہوں گے جس پر چیف جسٹس نے کہا کہ مذاکرات کی بات ہے تو 8 اکتوبر پر ضد نہیں کی جا سکتی۔ یکطرفہ کچھ نہیں ہوسکتا، سیاسی جماعتوں کو دل بڑا کرنا ہوگا۔ آئین کے مطابق 90 دن میں انتخابات کرانا لازم ہیں اور 14 اپریل کو یہ مدت گزر چکی ہے۔ نگران حکومت 90 دن سے زیادہ برقرار رہنے پر بھی سوال اٹھتا ہے۔

چیف جسٹس نے کہا کہ آپ کے مطابق یہ سیاسی انصاف کا معاملہ ہے۔ جس میں فیصلے عوام کرے گی۔ آپ کی تجویز ہے کہ سیاسی جماعتیں مذاکرات کریں۔ اس سے قبل عدالت نے یقین دہانی کرانے کا کہا تو حکومت نے جواب نہیں دیا آج پہلی بار حکومت نے مثبت بات کی ہے۔ عدالت ایک دن انتخابات کرانے کی درخواستوں پر سیاسی جماعتوں کو نوٹس جاری کر دیتی ہے۔

چیف جسٹس عمر عطا بندیال نے کہا کہ سیاسی جماعتوں کو کل کے لیے نوٹس جاری کر رہے ہیں۔ تاریخ پر جماعتیں مطمئن ہوئیں تو لیول پلیئنگ فیلڈ ملے گا۔ قوم کی تکلیف اور اضطراب کاعالم دیکھیں۔

اس موقع پر اٹارنی جنرل منصور عثمان اعوان نے استدعا کی کہ عدالت سیاسی جماعتوں کو مہلت دے جب کہ عدالت نے پی ٹی آئی کے وکیل فیصل چوہدری کو روسٹرم پر بلالیا اور چیف جسٹس نے ان سے استفسار کیا کہ کیا پی ٹی آئی مذاکرات پر آمادہ ہے جس پر فیصل چوہدری ایڈووکیٹ نے کہا کہ امیر جماعت اسلامی سراج الحق زمان پارک آئے اگلے دن ہی ہمارا سندھ کا صدر گرفتار ہوگیا۔ قوم آپ کی طرف دیکھ رہی ہے آپ سے بہت امید ہے۔

اس سے قبل سماعت شروع ہوئی تو چیف جسٹس نے اٹارنی جنرل کو وزارت خزانہ کی رپورٹ پڑنے کی ہدایت کرتے ہوئے کہا  کہ معاملہ بہت لمبا ہوتا جا رہا ہے۔ حکومت نے اپنا ایگزیکٹیو کام پارلیمان کو دیا ہے یا نہیں۔ عدالت کو کہا گیا تھا سپلیمنٹری گرانٹ کے بعد منظوری لی جائے گی۔ اس کے برعکس معاملہ ہی پارلیمنٹ کو بھجوا دیا گیا۔ کیا الیکشن کیلیے ہی ایسا ہوتا ہے یا عام حالات میں بھی ایسا ہوتا ہے؟

اٹارنی جنرل نے عدالت کو بتایا کہ قائمہ کمیٹی نے حکومت کو ہدایت جاری کی تھیں۔ جس پر تین رکنی بینچ کے رکن جسٹس منیب اختر نے کہا کہ قائمہ کمیٹی میں حکومت کی اکثریت ہے۔ کومت کو گرانٹ جاری کرنے سے کیسے روکا جا سکتا ہے؟ وزیراعظم کے پاس اسمبلی میں اکثریت ہونی چاہیے۔ مالی معاملات میں تو حکومت کی اکثریت لازمی ہے۔ کیا آپ کو سپلیمنٹری بجٹ مسترد ہونے کے نتائج کا علم ہے؟

چیف جسٹس نے کہا کہ آپ ہمارا نقطہ نظر سمجھ چکے ہیں۔ انتظامی امور قائمہ کمیٹی کو بھجوانے کی کوئی مثال نہیں ملتی۔ انتخابی اخراجات ضروری نوعیت کے ہیں غیر اہم نہیں۔ حکومت کا گرانٹ مسترد ہونے کا خدشہ اسمبلی کے وجود کے خلاف ہے۔ توقع ہے کہ آپ ہمارا نقطہ نظر سمجھ چکے ہیں اور حکومت اپنے فیصلے پر نظر ثانی کرے گی۔ حکومت فیصلہ کرے یا اسمبلی کو واپس بھجوائے۔ اس معاملے کے نتائج غیر معمولی ہوسکتے ہیں فی الحال غیر معمولی نتائج پر نہیں جانا چاہتے۔

چیف جسٹس عمر عطا بندیال نے اٹارنی جنرل سے مکالمہ کرتے ہوئے کہا کہ حکومت کو عدالتی احکامات پہنچا دیں۔ الیکشن کمیشن کہتا ہے اکتوبر تک الیکشن نہیں ہوسکتے۔ اس نے ایک ساتھ الیکشن کرانے کا بھی کہا ہے۔ الیکشن کمیشن کی اس بات سے کئی سوالات جنم لیتے ہیں۔ اس کی آبزرویشن کی بنیاد سیکیورٹی کی عدم فراہمی ہے۔

چیف جسٹس نے کہا کہ ملک میں دہشت گردی 1992 سے جاری ہے۔ ملک میں 1988، 1990، 1993، 1996، 2002، 2008، 2013 اور 2018 میں الیکشن ہوئے، سیکیورٹی مسائل ان انتخابات میں بھی تھے۔ سیکیورٹی مسائل تو ان انتخابات میں بھی تھے۔ 2007 میں بینظیر بھٹو کی شہادت ہوچکی تھی جس کی وجہ سے 2008 میں تو حالات بہت کشیدہ تھے، 2013 میں بھی دہشتگردی تھی۔ اس بار ایسا کیا منفرد خطرہ ہے جو الیکشن نہیں ہوسکتے؟

اٹارنی جنرل نے کہا کہ پہلے ایک ساتھ تمام سکیورٹی فورسز نے فرائض سر انجام دیے تھے، اب دو صوبوں میں الیکشن الگ ہوں گے۔ جس پر چیف جسٹس نے کہا کہ کیا گارنٹی ہے 8 اکتوبر کو حالات ٹھیک ہو جائیں گے؟ وزارت دفاع نے بھی اندازہ ہی لگایا ہے۔ حکومت اندازوں پر نہیں چل سکتی۔

ان کا یہ بھی کہنا تھا کہ سیکیورٹی فورسز کا کام بیرونی خطرات سےنمٹنا ہے۔ وہ 2001 سے سرحدوں پر مصروف ہیں۔میری درخواست پر ڈی جی ملٹری آپریشنز نے بریفنگ دی۔

چیف جسٹس نے کہا کہ ڈی جی آئی ایس آئی اور سیکرٹری دفاع بھی موجود تھے۔ ملاقات میں افسران کو بتایا تھا دوران سماعت یہ معاملہ نہیں اٹھایا گیا۔ سب کو بتایا کہ فیصلہ ہو چکا ہے اب پیچھے نہیں ہٹ سکتے۔ الیکشن کمیشن اور وزارت دفاع کی درخواستیں فیصلے واپس لینے کی بنیاد نہیں۔ الیکشن کمیشن نے پہلے کہا وسائل دیں الیکشن کروالیں گے اور اب کہتے ہیں ملک میں انارکی پھیل جائے گی۔ الیکشن کمیشن پورا مقدمہ دوبارہ کھولنا چاہتا ہے۔ وزارت دفاع کی رپورٹ میں عجیب استدعا ہے۔ کیا وزارت دفاع ایک ساتھ الیکشن کروانے کی استدعا کرسکتی ہے؟ وزارت دفاع کی درخواست ناقابل سماعت ہے۔ ٹی وی پر سنا ہے وزرا کہتے ہیں اکتوبر میں بھی الیکشن مشکل ہے۔

اٹارنی جنرل منصور عثمان نے کہا کہ وزیر خارجہ بلاول بھٹو وزیراعظم سے ملے ہیں۔ امیر جماعت اسلامی بھی شہباز شریف اور عمران خان سے ملے ہیں، کوشش ہے کہ ملک میں سیاسی ڈائیلاگ شروع ہو۔ ایک کے علاوہ تمام حکومتی جماعتیں پی ٹی آئی سے مذاکرات پر آمادہ ہیں۔ بلاول آج مولانا فضل الرحمان سے مل کر مذاکرات پر قائل کریں گے۔ معاملات سلجھ گئے تو شاید اتنی سیکیورٹی کی ضرورت نہ پڑے۔ دونوں فریقین نے مذاکرات کے لیے کمیٹیاں تشکیل دے دی ہیں۔ عدالت کچھ مہلت دے تو معاملہ سلجھ سکتا ہے۔

جس پر چیف جسٹس نے کہا کہ اٹارنی جنرل کی بات میں وزن ہے۔ منجمد سیاسی نظام چلنا شروع ہو رہا ہے۔ 14 مئی بھی قریب آچکا ہے۔